«ۇرىمجىدەگى ءىشىنارا الەۋمەتتىك دارەتحانالار ”شىرت ۇيقىعا كەتىپ“، قالا تۇرعىندارىنىڭ دارەتكە وتىرۋى قيىن بولدى» اتتى حاباردىڭ جالعاسى

　　ءىشىنارا جابىلىپ قالعان الەۋمەتتىك دارەتحانالار جوندەلىپ، ىسكە قوسىلدى

　□ انار بۇلت \ شينجياڭ گازەتىنىڭ ءتىلشىسى حۋ دامين، گو حۇڭلەي

3 - ايدىڭ 27 - كۇنى ءۇرىمجى قالاسى تيانشان رايونى قىزىلتۋ جولى سيفرلى ونىمدەر كومپيۋتەر بازارى تار كوشەسىندە، ءبىرتالاي كۇن جوندەلگەننەن سوڭ، ءبىر قىس جابىلىپ قالعان ءبىر الەۋمەتتىك دارەتحانا قالا تۇرعىندارىنا اشىلدى.

بىلتىر قىس كىرگەننەن كەيىن، ۇرىمجىدەگى ءىشىنارا الەۋمەتتىك دارەتحانالاردا لاس سۋ قۇبىرى قاتىپ قالۋ، نەگىزگى سۋ قۇبىرىندا سۋ بولماۋ، ەلەكترمەن قامداۋ كىناراتى سياقتى ماسەلەلەر بايقالدى. كۇن سۋىق بولعاندىقتان، كىنارات بايقالعان الەۋمەتتىك دارەتحانالاردى جوندەۋگە مۇمكىندىك بولماي، ۋاقىتشا ىستەتۋدەن توقتاتىلعان بولاتىن. كەي ينتەرنەت قولدانۋشىلار ”انار بۇلت 12345 كەڭەس سۇراۋ“ لەبىز تاقتاسىندا، الەۋمەتتىك دارەتحانالار ىستەتىلمەي، دارەتكە وتىرۋدىڭ قيىن بولعاندىعىن اڭىس ەتتى. انار بۇلت \ شينجياڭ گازەتىنىڭ تىلشىلەرى ارالاپ تەكسەرگەننەن كەيىن، مۇنى حابارلادى. ءۇرىمجى قالاسىنىڭ ءارقايسى رايوندارىنداعى الەۋمەتتىك دارەتحانالاردى باسقارۋ تاراۋلارى مىنالاردى ءبىلدىردى: كۇن جىلىنىپ، قۇرىلىس جۇرگىزۋ شارتىن ازىرلەگەننەن كەيىن، بۇزىلعان الەۋمەتتىك دارەتحانالاردى دەر كەزىندە جوندەيمىز.

تاياۋدا تەمپەراتۋرانىڭ ورلەۋىنە ساي، ۇرىمجىدەگى الەۋمەتتىك دارەتحانالاردى باسقارۋ تاراۋلارى قۇرىلىس جۇرگىزۋشىلەردى ۇيىمداستىرىپ، بۇزىلعان الەۋمەتتىك دارەتحانالاردى جوندەدى. قازىر بۇزىلعان الەۋمەتتىك دارەتحانالاردىڭ كەيبىرى جوندەلىپ بولعاننان كەيىن قالا تۇرعىندارىنا اشىلدى.

3 - ايدىڭ 27 - كۇنى ءتىلشى قىزىلتۋ جولى سيفرلى ونىمدەر كومپيۋتەر بازارى تار كوشەسىندەگى الەۋمەتتىك دارەتحاناعا بارعاندا، ايناداي ەتىپ تازالانعاندىعىن كوردى. ”بۇل الەۋمەتتىك دارەتحانا ىستەتۋدەن توقتاتىلعاندا، ءبىز لاجىسىزدان وسى ماڭداعى ءبىر عيماراتتاعى الەۋمەتتىك دارەتحاناعا بارىپ تۇردىق، قاتارعا تۇرىپ عيماراتقا ليفتپەن شىعىپ - تۇسەمىز، قولايسىز - اق، ۋاقىتتا زايا بولادى“، - دەدى وسى ماڭدا قىزمەت ىستەيتىن قالا تۇرعىنى چىن جۇنفا، - الەۋمەتتىك دارەتحانا اشىلعاننان كەيىن دارەتكە وتىرۋ قولايلى بولدى، وسى الەۋمەتتىك دارەتحانانىڭ اشىلا بەرۋىن ءۇمىت ەتەمىن. ءتىلشى ىلە - شالا تيانشان رايونىنداعى شيحۋجيەدە ەرتەدە جابىلعان ءبىر الەۋمەتتىك دارەتحانانىڭ قالا تۇرعىندارىنا اشىلعاندىعىن كوردى. ”بۇل الەۋمەتتىك دارەتحانانى ءمالىم كاسىپورىن قورعاپ، كۇتىمدەيتىن، قالا تۇرعىندارى الەۋمەتتىك دارەتحانا جابىلىپ، دارەتكە وتىرۋ قولايسىز بولعاندىعىن اڭىس ەتكەن ماسەلەنى تاپسىرىپ العاننان كەيىن، ءبىز قورعاپ، كۇتىمدەيتىن مەكەمە - ورىنمەن تالاي رەت تىلدەستىك، جوندەلگەننەن كەيىن وسى ەكى كۇندە قالا تۇرعىندارىنا اشىلدى“، - دەدى ءۇرىمجى قالاسى تيانشان رايونى دۇڭمىن ءمالى باسقارماسىنىڭ ءبىر جاۋاپتىسى.

تيانشان رايونىنداعى حالىق جولى مەن دۇڭحۋان جولى توعىسقان جەردە، شينحۋا سولتۇستىك جولى ورتا كوپىر 3 - تار كوشەسىندە، ءتىلشى وسىدان بۇرىن ۋاقىتشا ىستەتۋدەن توقتاتىلعان الەۋمەتتىك دارەتحانالاردىڭ قالا تۇرعىندارىنا اشىلعاندىعىن كوردى.

ءۇرىمجى قالاسى تيانشان رايوندىق قالا باسقارۋ مەكەمەسىنىڭ (اكىمشىلىك زاڭ اتقارۋ مەكەمەسى) ءبىر قىزمەتكەرى بىلاي دەدى: 3 - اي باستالىپ كۇن جىلىعاننان كەيىن تيانشان رايونى بۇزىلعان الەۋمەتتىك دارەتحانالاردى جوندەۋگە كىرىستى، قازىر قىزىلتۋ جولى بولىگىندەگى الەۋمەتتىك دارەتحانالاردى قامتىعان ءىشىنارا الەۋمەتتىك دارەتحانالار ىركەس - تىركەس اشىلدى، قاراستى اۋماقتاعى جاستار جولى، قىزىلتاۋ شىعىس جولى سياقتى جول بولىكتەرىندەگى الەۋمەتتىك دارەتحانالار ءالى دە جوندەلۋدە، مولشەرمەن تاياۋ ارادا اشىلادى.

ءۇرىمجى قالاسى شۇيموگوۋ رايونىنىڭ، سايباق رايونىنىڭ، ءۇرىمجى جوعارى، جاڭا تەحنيكالىق كاسىپ سالالارىن اشۋ رايونىنىڭ (جاڭا قالا رايونى) ءبارى قاراستى اۋماقتاعى الەۋمەتتىك دارەتحانالاردى جوندەدى، قازىر ءىشىنارا الەۋمەتتىك دارەتحانالار ىركەس - تىركەس قالا تۇرعىندارىنا اشىلدى.

شۇيموگوۋ رايونى شۇيتاشان باقشاسىنداعى ءبايتانىڭ ماڭىنداعى ءبىر الەۋمەتتىك دارەتحانانىڭ لاس سۋ قۇبىرى قاتىپ قالعاندىقتان، قىس بويى اشىلماعان بولاتىن. 3 - ايدىڭ 26 - كۇنى ءتىلشى وسىندا بارىپ، بۇل الەۋمەتتىك دارەتحانانىڭ قالا تۇرعىندارىنا اشىلعاندىعىن كوردى. ”ءبىر قىس جابىلدى، بۇل الەۋمەتتىك دارەتحانا اقىرى ىستەتىلدى“، - دەدى شۇيتاشان باقشاسىندا سەيىلدەپ جۇرگەن قالا تۇرعىنى ساي ساي - ى. ”تاياۋدا قۇرىلىس جۇرگىزۋشىلەر الەۋمەتتىك دارەتحانانى جوندەدى، الەۋمەتتىك دارەتحانا ءبىر اپتانىڭ الدىندا اشىلدى“، - دەدى وسى الەۋمەتتىك دارەتحانانى باسقارۋشى.

ءتىلشى ىلە - شالا يپاۋ چىڭگۇڭ الاڭىنىڭ باتىسىنداعى ءبىر الەۋمەتتىك دارەتحاناعا بارعاندا، 3 قۇرىلىس جۇرگىزۋشى جۇمىس ىستەپ جاتىپتى. ”بىلتىر جازدا بۇل الەۋمەتتىك دارەتحانانىڭ جەرى وتىرىپ كەتىپ، حاۋىپسىزدىك كومەسكى قاتەرى تۋىلدى، سونىمەن لاجىسىزدان ىستەتۋدەن توقتاتىلعان بولاتىن“، - دەدى وسى الەۋمەتتىك دارەتحانا قۇرىلىسىنىڭ جاۋاپتىسى لي يانجۇن، - ەندى 3 تە 4 كۇننەن كەيىن الەۋمەتتىك دارەتحانانىڭ وتىرىپ كەتكەن جەرى جوندەلىپ بولادى.

ءۇرىمجى جوعارى، جاڭا تەحنيكالىق كاسىپ سالالارىن اشۋ رايونى (جاڭا قالا رايونى) تيانجين سولتۇستىك جولى باتىس 5 - تار كوشەسى، حىبەي شىعىس جولى شينتي تار كوشەسى جانە سايباق رايونى نانچاڭ سولتۇستىك جولى سياقتى وڭىرلەردەگى الەۋمەتتىك دارەتحانالاردى ارالاعاندا، ءتىلشى وسىدان بۇرىن جابىلعان الەۋمەتتىك دارەتحانالاردىڭ قالا تۇرعىندارىنا اشىلعاندىعىن كوردى.

ءۇرىمجى قالاسى سايباق رايوندىق قالا باسقارۋ مەكەمەسىنىڭ (اكىمشىلىك زاڭ اتقارۋ مەكەمەسى) قاتىستى جاۋاپتىسى بىلاي دەدى: بىلتىر قىستا سايباق رايونىنداعى 6 الەۋمەتتىك دارەتحانا بۇزىلىپ ىستەتۋگە جاراماي قالعان بولاتىن، قازىر مۇنىڭ ۇشەۋى جوندەلىپ بولدى، قالعان ۇشەۋى جوندەلۋدە.