وڭتۇستىك شينجياڭدا

　　ماقتا ەگۋگە ۇيلەسەتىن مەزگىل بۇرىنعى جىلدارداعىدان ەرتە بولادى

انار بۇلت \ شينجياڭ گازەتىنىڭ ءتىلشىسى شيە حۇيبيان 3 - ايدىڭ 28 - كۇنى ۇرىمجىدەن حابارلايدى. شينجياڭ اۋا رايى مەكەمەسىنەن ۇعىسۋىمىزشا، جۋىقتا 2023 - جىلعى وڭتۇستىك شينجياڭنىڭ (تۇرپاندى قامتيدى) ماقتا ەگۋ مەزگىلىن جانە ەرەكشە جەمىس ورمانىنىڭ گۇلدەۋ مەزگىلىن مەجەلەۋ جونىندەگى زەرتتەۋ - تالقى ءماجىلىسى اقسۋ ايماعىندا اشىلدى. شينجياڭنىڭ ءىشى - سىرتىنان كەلگەن ماماندار ءبىر اۋىزدان بىلاي دەپ قارادى: بيىل وڭتۇستىك شينجياڭ وڭىرىندە ماقتا ەگۋگە ۇيلەسەتىن مەزگىل بۇرىنعى جىلدارداعىدان ەرتە كەلەدى، ماقتا ەگۋدىڭ دايىندىق قىزمەتىن ەرتە باستان ويداعىداي ىستەۋ كەرەك، مۇندا ”قۇرعاق ەگىپ، از - ازدان تامشىلاتىپ سۋارۋ“ جانە ”قوس جارعاقپەن جابۋ“ تەحنيكاسىن قولداناتىن ماقتا ەگەتىن وڭىرلەردىڭ الدىمەن ەرتە ەگۋىنە بولادى.

بۇدان سىرت، بايىنعولين موڭعۇل اۆتونوميالى وبلىسىنىڭ، اقسۋ ايماعىنىڭ المۇرتى، اقسۋ ايماعىنىڭ، قاشقار ايماعىنىڭ جانە قىزىلسۋ قىرعىز اۆتونوميالى وبلىسىنىڭ الماسى، اقسۋ ايماعىنىڭ، حوتان ايماعىنىڭ جاڭعاعى 4 - ايدىڭ باس شەنىندە گۇل اشۋ مەزگىلىنە ءوتىپ، جىلداعىدان 3 − 9 كۇن بۇرىن بولاتىندىعى مەجەلەندى. ماماندار جەر - جەردىڭ جەرگىلىكتى اۋا رايى تاراۋلارى جاريالاعان جەمىس ورمانىنىڭ گۇل اشۋ مەزگىلى جونىندەگى الدىن الا مالىمەتكە قاداعالاي نازار اۋدارىپ، گۇل تاماشالاۋ، مادەنيەت ساياحاتى قيمىلدارىن دەر كەزىندە وتكىزۋىن ۇسىنىس ەتتى.

شينجياڭ كليمات ورتالىعىنىڭ ساندى مالىمەتىندە كورسەتىلۋىنشە، 3 - ايدىڭ اياق شەنىندە وڭتۇستىك شينجياڭنىڭ باسىم كوپ بولىگىنىڭ اۋا تەمپەراتۋراسى جوعارىراق، تۇرپان قالاسىندا تومەنىرەك؛ جاۋىن - شاشىن كوپ ساندى جەردە تىم از بولادى ەكەن. 4 - ايدا اۋا تەمپەراتۋراسى انتەك جوعارى بولىپ، ءار ورتاڭعى شەندە جوعارىراق بولادى؛ 4 - ايدا اقسۋ ايماعىندا، قىزىلسۋ وبلىسىندا، قاشقار ايماعىندا، وڭتۇستىك شينجياڭنىڭ باتىس بولىگىندەگى تاۋلى وڭىرلەرىندە جاۋىن - شاشىن ءسال مولىراق نەمەسە كوبىرەك، قالعان رايونداردا ءسال ازىراق بولادى. ماماندار جەر - جەردىڭ سۋدى جاساندى جولمەن ارتتىرۋ جۇمىسىن كۇشەيتىپ، ماقتا مەن جەمىس ورمانىنىڭ ءوسۋىن قاجەتتى سۋمەن ويداعىداي قاناعاتتاندىرۋدى ۇسىنىس ەتتى.

3 - ايدىڭ اياق شەنىنەن 4 - ايدىڭ اياق شەنىنە دەيىن 6 رەت ورتاشا ءالسىز دارەجەلىدەن جوعارى اۋا رايى وزگەرىسىنىڭ بولاتىندىعى، بوران، قۇمدى بوران سوعۋى، ءىشىنارا جەرلەردە نوسەر جاۋۋى مۇمكىن ەكەندىگى مەجەلەندى، باستىسى، اقسۋ ايماعىندا، بايىنعولين وبلىسىندا، تۇرپان قالاسىندا بولادى. ماماندار قاتىستى ورىنداردىڭ اپاتتان ساقتانۋ، اپات زيانىن ازايتۋ، اپاتتان قۇتقارۋ دايىندىق جوباسىن الدىن الا ويداعىداي جاساپ، اۋا رايىنىڭ اۋىل شارۋاشىلىعىنا جاسايتىن ىقپالىن ەڭ تومەنگى دەڭگەيگە ءتۇسىرۋىن ۇسىنىس ەتتى.