بۇكىل رايوندا

دۇمبە ءبيدايدىڭ قايتا كوكتەپ ءوسۋ جاعدايى بۇرىنعىدان جاقسى بولدى

انار بۇلت \ شينجياڭ گازەتىنىڭ ءتىلشىسى ليۋ ي 3 - ايدىڭ 28 - كۇنى ۇرىمجىدەن حابارلايدى. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنەن ۇعىسۋىمىزشا، كەزەكتە شينجياڭدا دۇمبە ءبيدايدىڭ ءوسۋ جاعدايى تاماشا بولىپ، قايتا كوكتەيتىن دۇمبە ءبيدايدىڭ كوكتەۋى بۇرىنعى جىلدارداعى ورتاشا دەڭگەيدەن جاپپاي جاقسى بولعان. وڭتۇستىك شينجياڭنىڭ باسىم كوپ ساندى وڭىرىندەگى جانە ىلە قازاق اۆتونوميالى وبلىسىنىڭ باتىس بولىگىندەگى دۇمبە ءبيداي باس كوتەرىپ كوكتەۋ مەزگىلىنە ەرتە كىرگەن، سولتۇستىك شينجياڭدا ىلە وبلىسىنىڭ باتىس بولىگىنەن سىرت جەرلەردە دۇمبە ءبيداي ءالى دە قىستان شىعۋ مەزگىلىندە تۇر ەكەن.

تانىستىرۋعا قاراعاندا، بيىل بۇكىل رايوندا دۇمبە ءبيدايدىڭ قايتا كوكتەپ ءوسۋ جاعدايىنىڭ ءبىرشاما جاقسى بولۋى، باستىسى، بىلتىرعى قىسقى سۋارۋ قىزمەتىنىڭ ىلگەرىلەۋ جاعدايىنىڭ ءساتتى بولۋىنان، بۇكىل رايونداعى باسىم كوپ ساندى قىسقى سۋارۋعا مۇقتاج دۇمبە ءبيدايدىڭ تولىق سۋارىلعاندىعىنان بولعان. سونىمەن بىرگە بىلتىرعى قىستان بيىل كوكتەمگە دەيىن، بۇكىل رايوندا قار ءبىرشاما كوپ جاۋىپ، توپىراقتىڭ دىمقىلدىعى جاقسى بولىپ، سونىمەن قوسا جەر - جەر اتىز باپتاۋدىڭ ءتۇرلى ءونىمدى شارالارىن قولدانىپ، دۇمبە ءبيدايدىڭ قىستان امان وتۋىنە تاماشا شارت - جاعداي ازىرلەگەن.

جۋىقتا دۇمبە ءبيدايدىڭ ىلگەرىندى - كەيىندى باس كوتەرىپ كوكتەۋ مەزگىلىنە وتۋىنە بايلانىستى، ءار دارەجەلى اۋىل شارۋاشىلىعى، اۋىل - قىستاق تاراۋلارى كوكتەمگى اتىز باپتاۋدىڭ ءتۇرلى جۇمىستارىن بار كۇشپەن تياناقتاندىرىپ، اۋىل شارۋاشىلىعى تەحنيكا كادرلارىن اتىز باسىنا بارىپ قايتا كوكتەپ ءوسۋ جاعدايىنا تەكسەرۋ جۇرگىزۋگە ۇيىمداستىرىپ، جەر جاعدايىنا، مايسا جاعدايىنا قاراي قۇنارلى سۋمەن باپتاۋدى كۇشەيتىپ، تۇتاس جىلدا استىقتان تاعى دا مول ءونىم الۋدىڭ ىرىقتىلىعىنا قول جەتكىزدى.

اۋىل شارۋاشىلىعى جاعدايى جونىندەگى ەڭ جاڭا ورنالاستىرۋدا كورسەتىلۋىنشە، كەزەكتە بۇكىل رايوندا دۇمبە ءبيدايدىڭ 1 -، 2 - تۇردەگى مايساسىنىڭ يەلەيتىن سالىستىرماسى ％9. 85 بولىپ، بىلتىرعى سول تۇستاعىدان ％67. 6 جوعارى بولعان، توپىراقتىڭ دىمقىلدىعى ۇيلەسىمدى جەر اۋدانىنىڭ يەلەيتىن سالىستىرماسى ％95كە جەتىپ، بىلتىرعىدان ％8 جوعارى بولعان. بۇكىل رايوندا 7 ميلليون 700 نەشە مىڭ مۋ جەردەگى قايتا كوكتەيتىن مايساعا تىڭايتقىش بەرىلگەن، 4 ميلليون 800 نەشە مىڭ مۋ جەردەگى قايتا كوكتەيتىن مايسا سۋارىلعان، 2 ميلليون 200 مىڭ مۋ جەردەگى ارام ءشوپ حيميالىق جولمەن وتالعان، دەرت - دەربەز جانە زياندى جاندىك اپاتىنان ساقتانعان - تىزگىندەلگەن جەر اۋدانى 230 مىڭ مۋعا تاياعان.

بۇكىل رايونداعى ءار دارەجەلى اۋىل شارۋاشىلىعى، اۋىل - قىستاق تاراۋلارى جاراتىلىستىق اپاتتاردان ساقتانۋ، سونداي - اق دەرت - دەربەز جانە زياندى جاندىك اپاتىنان ساقتانۋ - تىزگىندەۋ قىزمەتى دايىندىعىن ەرتە باستان ويداعىداي ىستەۋى، سولتۇستىك شينجياڭ ءوڭىرى كوكتەمگى سوقپا اياز سياقتى اپاتتاردان ساقتانۋدى ءتۇيىندى كۇشەيتۋى، وڭتۇستىك شينجياڭ ءوڭىرى بوران، تومەن تەمپەراتۋرالى ۇسىك جانە ءبيداي بىتە شىركەيى سياقتى دەرت - دەربەز جانە زياندى جاندىك اپاتىنان ساقتانۋدى ءتۇيىندى تۇردە ويداعىداي ىستەۋى كەرەك.