انار بۇلت \ شينجياڭ گازەتىنىڭ ءتىلشىسى ءابيبا 9 - ايدىڭ 6 - كۇنى دۇنحۋاڭنان حابارلايدى. 9 - ايدىڭ 6 - كۇنى 6 - كەزەكتى جىبەك جولى (دۇنحۋاڭ) حالىقارالىق مادەنيەت كورمەسى (تومەندە قىسقارتىلىپ ”دۇنحۋاڭ مادەنيەت كورمەسى“ دەلىنەدى) دۇنحۋاڭ حالىقارالىق ءماجىلىس - كورمە ورتالىعىندا باستالدى. نەگىزگى قوناق ولكە رەتىندە، شينجياڭ سارايى ”شينجياڭ جاقسى جەر“ نەگىزگى تاقىرىبىندا دۇنحۋاڭدا سالتاناتتى تۇردە ءوزىن كورسەتىپ، 15 كاسىپورىن - ءىسورنى جانە 4 ۇلكەن تۇردەگى 1000نان استام مادەنيەت - ساياحات ونىمدەرىن كورمەگە قاتىناستىردى.

دۇنحۋاڭ مادەنيەت كورمەسى − جىبەك جولى رۋحىن جالعاستىرۋدى جانە اسقاقتاتۋدى ماقسات ەتكەن ، ”ءبىر بەلدەۋ، ءبىر جول“ مادەنيەت اۋىس - كۇيىسى مەن سەلبەستىگىن بەلسەنە ىلگەرىلەتۋدى نەگىزگى تاقىرىپ ەتكەن حالىقارالىق مادەنيەت كورمەسى، كەزەكتە 5 كەزەك تابىستى وتكىزىلدى.

شينجياڭ نەگىزگى قوناق ولكە رەتىندە، نەگىزگى قوناق ەل تۇركىمەنستانمەن ءبىر كورمە رايونىنا ورنالاستى. شينجياڭ سارايىنىڭ كورمەگە قاتىناسۋ اۋماعى 253 شارشى مەتر بولىپ، سارعىش جانە اق ءتۇس نەگىزگى ارتقى كورىنىس رەڭى ەتىلىپ، قىزىل مىڭ ۇيدەگى پەريزاتتار قابىرعا سۋرەتى سارايدىڭ باس جاعىندا ”قالىقتاپ“ تۇرعانداي اسەر بەرەدى، ەسىكتىڭ كىرە بەرىسىندەگى ۇلكەن ەكراندا جانە سارايدىڭ ورتاسىنداعى 3 بۇكتەمەلى ۇلكەن ەكراندا تاياۋ جىلداردان بەرى شينجياڭنىڭ مادەنيەت - ساياحات كاسىپ سالاسىن دامىتۋداعى سۇبەلى جەتىستىكتەرى قايتالامالى كورسەتىلۋدە.

اۆتونوميالى رايوندىق مادەنيەت جانە ساياحات مەڭگەرمەسى كاسىپ سالاسىن دامىتۋ باسقارماسىنىڭ باستىعى تاڭ ۋىن بىلاي دەپ تانىستىردى: شينجياڭ سارايى جىبەك جولىنا 10 جىل · شينجياڭدى ساياحاتتاۋ − كەشەندى جەتىستىكتەر كورمە رايونى جانە شۇعىلا شاشقان مادەنيەت جالعاسىمى · جۇلدىزى جارقىراعان شىعىس − جىبەك جولى مادەنيەت كورمە رايونى سىندى 2 ۇلكەن بولىككە ءبولىندى. كەشەندى جەتىستىكتەر كورمە رايونىندا كورەرمەندەر ساۋساعىن قوزعاپ عانا ەكىلىكتى جايمالاپ، قول تەلەفوندا تيانشان الابىنىڭ بارلىق جەرىن ساياحاتتاي الادى. VR كوزىلدىرىك تاعىپ، جەر - جەردىڭ سالت - ساناسىن، ادەت - عۇرپىن جالپى كورىنىستىك تاماشالاپ، جاڭا اعىمدىق، عىلىم - تەحنيكالى تاسىلدەر ارقىلى شينجياڭدى جان - جاقتى تۇسىنەدى. جىبەك جولى مادەنيەت كورمە رايونىندا شينجياڭنىڭ ”كۇسان مادەنيەتى“، ”بەس جۇلدىز شىعىستان كوتەرىلسە جۇڭگوعا قۇت“، ”اتلاس مادەنيەتى“، ”قاس تاسى مادەنيەتى“ سىندى قاتىستى ەرەكشە مادەنيەت - ساياحات بايلىقتارى، بەيزاتتىق مادەنيەت جاسامپازدىق ونىمدەرى سياقتىلاردى كورسەتۋ ارقىلى شينجياڭنىڭ جۇڭحۋانىڭ تاڭداۋلى ءداستۇرلى مادەنيەتىن جاسامپازدىقپەن كادەگە جاراتۋ، جاڭالىق اشا دامىتۋ بارىسىندا قول جەتكىزگەن كورنەكتى جەتىستىكتەرىن ايگىلەدى.

”بۇل رەت ءبىز شينجياڭنىڭ قىسقى ساياحات بايلىقتارىن تانىستىرىپ عانا قويماي، تاعى حوتان ايماعىنىڭ شينيۇي ءان - ءبي ۇيىرمەسى ورىنداعان «بەس جۇلدىز شىعىستان كوتەرىلدى» ءبي تەاترىنىڭ تاڭدالعان ءۇزىندىسى سياقتىلاردى الا كەلدىك، مادەنيەت كورمەسى تۇعىرى ارقىلى شينجياڭنىڭ بايتاق تا كوركەم كورىنىسىن كوپ ارنامەن كورسەتىپ، ’شينجياڭ جاقسى جەردى‘ ءتىپتى جاڭعىرتا ءتۇسۋدى ءۇمىت ەتەمىز“، - دەدى تاڭ ۋىن.

شينجياڭ مۇراجايى بۇل رەت 200 نەشە مادەني جاسامپازدىق ونىمدەرىن الا كەلدى، مۇنىڭ ىشىندە ”تيانگۇڭ بازارى“، ”بەس جۇلدىز شىعىستان كوتەرىلدى“ سياقتى ءبىر قىدىرۋ مادەني جاسامپازدىق ونىمدەرى كورمەگە قاتىناسقان قىرۋار ساۋداگەردىڭ نازارىن اۋداردى. شينجياڭ مۇراجايى مادەني جاسامپازدىق ءبولىمىنىڭ مەڭگەرۋشىسى گۋان ي مىنالاردى ءبىلدىردى: مۇراجاي وسى رەت ءبىرتالاي مادەني جاسامپازدىق ونىمدەرى اراسىنان ەڭ تاڭداۋلىلارىن سارالاپ، كلاسسيكالىق مادەني جاسامپازدىق پەن جاڭادان اشقان مادەني جاسامپازدىق ونىمدەرىن الا كەلدى، جالپىلاستىرۋمەن بىرگە، موگاۋ ۇڭگىرىنە قاتىستى مادەني جاسامپازدىق ونىمدەرىنەن ۇلگى الىپ، كوپ ۇيرەنەدى، كوپ اۋىس - كۇيىس جاسايدى.

شينجياڭ سارايىنىڭ اعاش قالىپپەن ورنەك باسۋ كورمە رايونىندا شينجياڭ باۋشين مادەنيەتتى دامىتۋ شەكتى سەرىكتەستىگىنىڭ باس ديرەكتورى چىڭ رۇڭجياڭ بىلاي دەپ تانىستىردى: قورعاۋ، جالعاستىرۋ، جاڭالىق اشۋ ارقىلى اعاش قالىپپەن ورنەك باسىلعان كەزدەمەلەر 200 نەشە تۇردەن استى، وسى رەتكى كورمەگە وزىندىك ەرەكشەلىك العان 28 ءتۇرلى ورنەك اكەلدىك، ”ءبىز دۇنحۋاڭ مادەنيەت كورمەسى سىندى وسى تۇعىر ارقىلى اناعۇرلىم كوپ مادەني جاسامپازدىق كاسىپورىندارىن قاتىناسۋعا باۋراپ، وسى بەيزاتتىق مادەنيەت مۇرالارى شەبەرلىگىن بىرگە ساۋلەلەندىرە ءتۇسۋدى ءۇمىت ەتەمىز“.

دۇنحۋاڭ مادەنيەت كورمەسىنىڭ سيلى قوناعى، پاكيستان مەملەكەتتىك عىلىم - تەحنيكا داشۋەسى جۇڭگونى زەرتتەۋ ورتالىعىنىڭ ورىنباسار مەڭگەرۋشىسى زامىر اۋان ارالاپ كورگەننەن كەيىن مىنالاردى ءبىلدىردى: شينجياڭ سارايى ەرەكشە وزگەشە جوبالانىپتى، جاڭاشا لەپ بار، ساراي عىلىم - تەحنيكا شاراسىنان پايدالانىپ، جۇڭگو شينجياڭىنىڭ تاياۋ جىلداردان بەرگى مادەنيەت - ساياحات كاسىپ سالاسىنىڭ دامۋ جەتىستىكتەرىن ايگىلەپتى، عىلىم - تەحنيكا سيپاتى وتە كورنەكتى ەكەن. شينجياڭ سارايىنداعى ءبي وتە وزگەشە، تاريحي مادەنيەت ءبي فورماسىمەن وتە تەرەڭ بەينەلەنىپتى. ”مەن شينجياڭنىڭ كوپتەگەن جەرلەرىنە بارعام، ءار رەت بارعانىمدا وزگەرىستىڭ وتە زور ەكەندىگىن سەزىنەمىن. بۇل رەتكى كورمە سارايىنىڭ جوباسى ايرىقشا وزگەشە ەكەن، مەن دامۋى بارعان سايىن جاقسارىپ كەلە جاتقان شينجياڭدى كوردىم“، - دەدى زامىر.