ۋاڭ ياڭ ماجىلىسكە قاتىناستى ٴارى ٴسوز سويلەدى

شينحۋا اگەنتتىگىنىڭ 7 - ايدىڭ 21 - كۇنى ۇرىمجىدەن بەرگەن حابارى (ٴتىلشى لين حۇي). 8 - رەتكى بۇكىل مەملەكەتتىك شينجياڭعا باعىتتامالى كومەكتەسۋ قىزمەتى ٴماجىلىسى 7 - ايدىڭ 19 - كۇنىنەن 21 - كۇنىنە دەيىن شينجياڭنىڭ اقسۋ قالاسىندا وتكىزىلدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىقتىڭ شينجياڭ قىزمەتىن سايكەستىرۋ گرۋپپاسىنىڭ باستىعى ۋاڭ ياڭ ماجىلىسكە قاتىناستى ٴارى ٴسوز سويلەدى. ول بىلاي دەپ باسا دارىپتەدى: شي جينپيڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتىپ، جاڭا داۋىردەگى پارتيانىڭ شينجياڭدى جونگە سالۋ جالپى جوباسىن تولىق، دالمە - ٴدال دايەكتىلەندىرىپ، شينجياڭ قىزمەتىنىڭ باس نىساناسىن مىقتى يگەرىپ، ۇلى پارتيا قۇرۋ رۋحىن ساۋلەلەندىرىپ، جۇرت تىلەگىنە سايكەسۋگە، حالىق تۇرمىسىن قامتاماسىزداندىرۋعا، حالىق تىلەگىن ۇيىستىرۋعا تاباندى بولىپ، شينجياڭعا جاپپاي كومەكتەسۋگە، شينجياڭعا دالمە - ٴدال كومەكتەسۋگە، شينجياڭعا ۇزاق ۋاقىت كومەكتەسۋگە تاباندى بولىپ، ۇزاق بولاشاقتىق ساياساتتاردى كوپتەپ قاراستىرىپ، نەگىزدى بەكەمدەۋ شارالارىن كوپتەپ اتقارىپ، شينجياڭنىڭ باياندى دامۋىنا ىقپال جاسايتىن تەرەڭ قاتپارلى قايشىلىقتار مەن ماسەلەلەردى كۇش سالا شەشىپ، شينجياڭعا باعىتتامالى كومەكتەسۋدىڭ ۋنيۆەرسالدى ونىمدىلىگىن اناعۇرلىم جوعارىلاتىپ، جاڭا داۋىردەگى جۇڭگوشا سوتسياليستىك شينجياڭ قۇرۋعا كۇش سالۋ كەرەك.

ۋاڭ ياڭ بىلاي دەپ اتاپ كورسەتتى: جۋىق جىلداردان بەرى پارتيا ورتالىق كوميتەتىنىڭ پارمەندى باسشىلىعىندا، ٴارقايسى قاتىستى جاقتار جاڭا تيپتى ايدارشا ۆيرۋس وكپە قابىنۋ ىندەتى سياقتى ٴتيىمسىز ىقپالدى جەڭىپ، جاڭا داۋىردەگى شينجياڭعا باعىتتامالى كومەكتەسۋ قىزمەتىنىڭ باعىتى مەن ماڭىزدى ٴتۇيىنىن دالمە - ٴدال يگەرىپ، نازاردى شينجياڭداعى ٴار ۇلت بۇقاراسىنىڭ شۇعىل، قيىن، ۋايىمداعان، ٴزارۋ ماسەلەلەرىن دالمە - ٴدال شەشۋگە شوعىرلاندىرىپ، كەدەيلىكتەن ارىلتۋدان قامال الۋدىڭ جالپى بەتتىك جەڭىسىنە قول جەتكىزۋ مەن حالىق تۇرمىسىن ٴۇرتىس جاقسارتۋعا كۇش قوسىپ، جۇڭحۋا ۇلتىنىڭ ۇلى ىنتىماعىن جەبەپ، جۇڭگو كوممۋنيستىك پارتياسى باسشىلىق ەتكەن ساياسي ابزالدىق پەن جۇڭگوشا سوتسياليزم ٴتۇزىمى ابزالدىعىن تولىق ايگىلەدى. بۇل ناتيجەلەر وڭاي - وسپاق قولعا كەلگەن جوق، مۇنى تولىق تۇراقتاندىرۋعا تاتيدى.

ۋاڭ ياڭ بىلاي دەپ باسا دارىپتەدى: شينجياڭعا باعىتتامالى كومەكتەسۋ - پارتيا ورتالىق كوميتەتى جۇكتەگەن ماڭىزدى ساياسي مىندەت. قارجىنى، نىساندى حالىق تۇرمىسىنا، نەگىزگى ساتىعا، ٴتۇيىندى رايوندارعا بەيىمدەۋگە تاباندى بولىپ، كومەك قابىلداعان جەرلەردىڭ كەدەيلىكتەن ارىلتۋدان قامال الۋ ناتيجەسىن بەكەمدەۋىنە، كەڭەيتۋىنە، اۋىل - قىستاقتى گۇلدەندىرۋدى جەبەۋىنە دەم بەرۋ كەرەك. شينجياڭعا اقىل - پاراسات جاعىنان كومەكتەسۋدى قىزمەت ٴتۇيىنى ەتۋگە تاباندى بولىپ، «ۇيىرمە ۇلگىسىندە» شينجياڭعا كومەكتەسۋ سالاسىن كەڭەيتىپ، كادر - دارىندىلاردى تاڭداپ جىبەرۋ قىزمەتىنىڭ ساپاسىن جوعارىلاتۋ كەرەك. كاسىپ سالاسى ارقىلى شينجياڭعا كومەكتەسۋدى شىنايى ىلگەرىلەتىپ، جاڭا دامۋ ۇستانىمىن تياناق ەتىپ، جاڭا دامۋ ۇستانىمىن دايەكتىلەندىرىپ، جاڭا دامۋ ارناسىنا قىزمەت وتەۋ مەن توعىسۋدىڭ كىرىسۋ ٴتۇيىنىن ٴدال تاۋىپ، «14 - بەسجىلدىق» كەزىندەگى كاسىپ سەلبەستىگى مەن نىسان ورنالاستىرۋىن ويداعىداي جوبالاپ، كومەككە يە بولعان جەرلەردىڭ «قان جاساۋ» يقۋاتىن كۇشەيتۋىنە قولداۋ كورسەتۋ كەرەك. شينجياڭدى مادەنيەتپەن نارلەندىرۋدى ىشكەرىلەي اتقارىپ، «ەنگىزۋ» مەن «شىعارۋدى» ٴوزارا سايكەستىرۋگە تاباندى بولىپ، شينجياڭنىڭ تاڭداۋلى وڭىرلىك مادەنيەتى مەن ىشكى ولكەدەگى ۇلتتاردىڭ تاڭداۋلى مادەنيەتىنىڭ توعىسۋىن، ٴوزارا ۇلگى الۋىن جەبەپ، شينجياڭداعى ٴار ۇلت بۇقاراسىنىڭ جۇڭحۋا مادەنيەتى جونىندەگى ورتاق تانىمىن ارتتىرۋ كەرەك. ۇلتتاردىڭ ارالاسۋىن، ىشتەسۋىن، توعىسۋىن جەبەۋدى ٴتىپتى دە كورنەكتى ورىنعا قويىپ، شينجياڭنىڭ ٴىشى - سىرتىنداعى ٴار ۇلت بۇقاراسىنىڭ كوپ ساتىلى، كوپ سالالى، الۋان فورمالى ٴوزارا بارىس - كەلىس جاساۋىن، ٴوزارا اسەر ەتۋىن جەبەپ، شينجياڭعا كومەكتەسۋ قىزمەتىن شىنايى دامۋدى جەبەۋ ينجەنەرياسىنا، ۇلتتار ىنتىماعى ينجەنەرياسىنا، جۇرت تىلەگىن ۇيىستىرۋ ينجەنەرياسىنا اينالدىرۋ كەرەك.

چىن چۋانگو ماجىلىسكە قاتىناستى.  يوۋ چۋان ٴماجىلىستى باسقاردى ٴارى قورىتىندى ٴسوز سويلەدى. ول جەر - جەردەن، تاراۋلاردان مىنالاردى تالاپ ەتتى: باس شۋجي شي جينپيڭنىڭ «1 - شىلدەدەگى» ماڭىزدى ٴسوزىنىڭ رۋحىن جانە 3 - رەتكى ورتالىقتىڭ شينجياڭ قىزمەتى جونىندەگى اڭگىمە ٴماجىلىسىنىڭ رۋحىن جاپپاي دايەكتىلەندىرىپ، تياناقتاندىرىپ، جاڭا داۋىردەگى پارتيانىڭ شينجياڭدى جونگە سالۋ جالپى جوباسىن تولىق، دالمە - ٴدال دايەكتىلەندىرىپ، يدەيا مەن ارەكەتتى پارتيا ورتالىق كوميتەتىنىڭ شينجياڭ قىزمەتىنىڭ جاعدايى جونىندەگى تۇجىرىمىمەن شىنايى بىرلىككە كەلتىرىپ، شينجياڭنىڭ باياندى تىنىشتىعىن توڭىرەكتەي وتىرىپ، شينجياڭعا كومەكتەسۋ مىندەتىن ويداعىداي جوبالاۋ كەرەك. نازاردى ٴتۇيىندى ماسەلەلەرگە شوعىرلاندىرىپ، ٴتۇيىندى قىزمەتتى كورنەكتىلەندىرىپ، قىزمەت ستيلىن جاقسارتىپ، ٴتۇرلى شينجياڭعا كومەكتەسۋ مىندەتىنىڭ تۇبەگەيلى تياناقتانىپ، ونىمدىلىك جاراتۋىنا كەپىلدىك ەتۋ كەرەك.

شينجياڭعا كومەكتەسەتىن 19 ولكە، قالاداعى، ورتالىقتىڭ قاتىستى تاراۋلارى مەن ورىندارىنداعى، شينجياڭ ۇيعۇر اۆتونوميالى رايونىنداعى، شينجياڭ ٴوندىرىس - قۇرىلىس بيڭتۋانىنداعى، سونداي - اق كومەك قابىلداعان ايماق، وبلىس، قالا، شىلارداعى جاۋاپتى جولداستار ماجىلىسكە قاتىناستى. ورتالىق كوميتەت ۇيىمداستىرۋ ٴبولىمى، مەملەكەتتىك دامۋ جانە رەفورما كوميتەتى، مەملەكەتتىك كەڭەستىڭ مەملەكەت مال - مۇلكىن باسقارۋ كوميتەتى جانە بەيجيڭ، تيانجين، شاڭحاي، جياڭسۋ، جىجياڭ، فۋجيان، شاندۇڭ، حىنان، حۋبەي، گۋاڭدۇڭ، اۆتونوميالى رايون، بيڭتۋانداعى جاۋاپتى جولداستار ماجىلىستە پىكىر اۋىستىرۋ ٴسوزىن سويلەدى.