انار بۇلت / شينجياڭ گازەتىنىڭ ءتىلشىسى گى يوۋجۇن، ەرىكتى ءتىلشى باي يۇنفىڭ

9 - ايدىڭ 26 - كۇنى تۇستەن بۇرىن سالالى اتىزدا اۋىل شارۋاشىلىعى ماشيناشىلارىن دۇمبە ءبيداي ەگۋگە ۇيىمداستىرىپ جۇرگەن فىڭ رۋگاڭ بيىلعى ءبيدايدىڭ ءتۇسىمىن تىلگە تيەك ەتكەندە جۇزىنەن قۋانىش لەبى ەسىپ شىعا كەلدى. ”ءونىم مولشەرى جاقسى، ساپاسى جاقسى، كىرىس تە وتە جاقسى!“، - دەدى ول كۇلىپ.

بيىل 50 جاسقا كەلگەن فىڭ رۋگاڭ شونجى اۋدانى شيبەي - ۋان قالاشىعى ليۋشۋحىزى قىستاعىنداعى استىق ەگەتىن ۇلكەن شارۋا، ول 20 جاسقا كەلمەي استىق ەگە باستاعان، قازىر 3000 مۋدان اساتىن وتباسىلىق ەگىس الاڭىنىڭ شارۋاشىلىعىن جۇرگىزىپ كەلەدى. ول: مەنىڭ استىق ەگۋ سىندى وسى ءبىر شارۋاشىلىقتى بىرتىندەپ ۇلعايتىپ ىستەي الۋىم مەملەكەتتىڭ اۋىل شارۋاشىلىعىنا تيىمدىلىك جاساۋداي ابزال ساياساتىنىڭ ارقاسى، - دەدى.

بىلتىر كۇزدە فىڭ رۋگاڭ 2600 مۋ جەرگە دۇمبە ءبيداي ەكتى، ۇيلەسىمدىلىگى جانە ءتۇسىمى ءبىرشاما جاقسى بولعان شيندۇڭ 22 - ءنومىرلى دۇمبە ءبيداي سورتىن ىستەتتى، بيىل ورتا ەسەپپەن مۋ باسىنان 608 كيلوگرامداي جاقسى ءونىم الىپ، بىلتىرعى مۋ باسىندىق ورتاشا تۇسىمنەن مولشەرمەن 50 كيلوگرامداي ارتىق بولدى.

كۇزگى جيىن - تەرىن كەزى ەگىن شارۋاشىلىعىنىڭ قاربالاس مەزگىلى. سول كۇنى تۇستەن بۇرىن فىڭ رۋگاڭنىڭ وتباسىلىق ەگىس الاڭىندا بىرنەشە ءىرى تۇرپاتتى اۋىل شارۋاشىلىق ماشيناسى ارلى - بەرلى قايشالىسىپ قاربالاس جۇمىس جۇرگىزدى. توپىراق بوساتۋ، تىڭايتقىش بەرۋ، تۇقىم سەبۋ، تاپتاۋدىڭ بارلىعى ءبىر رەتتە ورىندالدى.

”ءسوز جوق، ۇيلەسىمدى ۋاقىتتا تۇقىم سەبۋ كەرەك، سونىمەن بىرگە ءدارى - دارمەكپەن بىرگە ارلاستىرىپ ەگۋدى ％100 ورىنداۋ، ％100 تىڭايتقىش ارالاستىرىپ ەگۋ كەرەك“، - دەدى تۇقىم سەبۋگە جۇمىس باسىندا جەتەكشىلىك ەتىپ جۇرگەن شونجى اۋداندىق اۋىل شارۋاشىلىعى تەحنيكاسىن جالپىلاستىرۋ ورتالىعىنىڭ اعا اگرونومى ۋاڭ يان.

ءار جىلى كوكتەمگى ەگۋدىڭ، جازعى باپتاۋدىڭ، كۇزدە سەبۋدىڭ شەشۋشى مەزگىلىندە شونجى اۋداندىق اۋىل شارۋاشىلىق تەحنيكاسىن جالپىلاستىرۋ ورتالعىنىڭ اۋىل شارۋاشىلىق تەحنيكتەرى دەرلىك فىڭ رۋگاڭنىڭ وتباسىلىق ەگىس الاڭىن ءدال مولشەردە، ءدال تۇقىم سەبۋ، توپىراقتى ولشەپ، رەتسەپ بويىنشا تىڭايتقىش بەرۋ، سۋ ۇنەمدەپ تامشىلاتىپ سۋارۋ، دەرت - دەربەز، زياندى جاندىكتەردەن ساقتانۋ سياقتى تۇتاس بارىستىق تەحنيكالىق قىزمەت وتەۋمەن اقىسىز قامدايدى.

شونجى اۋدانى مەملەكەت بويىنشا ساپالى تاۋار استىق بازاسى اۋدانى، وسى بىرنەشە جىلدا جىل سايىن ەگىلگەن ءبيدايدىڭ اۋدانى دەرلىك ميلليون مۋدان اسىپ، ءونىم مولشەرى 400 ميلليون كيلوگرامنىڭ ۇستىندە بولدى.

”شونجى اۋدانىنىڭ ءبيداي ءتۇسىم مولشەرىنىڭ ۇزدىكسىز جوعارىلاۋى ابزال جاراتىلىستىق شارت - جاعدايدىڭ ارقاسىندا عانا ەمەس، ساپالى تۇقىم مەن ءونىمدى ءادىستىڭ سايكەسىم تابۋىنىڭ، اۋىل شارۋاشىلىعى ماشينالارى مەن اۋىل شارۋاشىلىق تەحنيكاسى توعىسۋىنىڭ جانە وزىق اۋىل شارۋاشىلىعى عىلىم - تەحنيكاسى جۇيەسىنىڭ جالپىلاسىپ پايدالانىلۋىنىڭ ارقاسىندا كەلگەن“، - دەدى ۋاڭ يان.

فىڭ رۋگاڭ ۋاڭ ياننىڭ بۇل ءسوزىن قۇپتايتىندىعىن ءبىلدىردى. وسى بىرنەشە جىلدا ول ۇنەمى جەرگىلىكتى ورىنداعى قولدانىلمالى وزىق ەگىمشىلىك تەحنيكاسىن ەڭ الدىمەن قولدانىپ كەلەدى. ساپالى تۇقىم، ءونىمدى ءادىس ارقىلى ونىڭ وتباسىنىڭ ءبيدايىنىڭ مۋ باسىندىق ءتۇسىمى ۇدايى جاي ەگىمشى وتباسىلارىنان الدەقايدا جوعارى بولدى.

”جاساندى سەرىك جول باستاۋشىسى ارقىلى دالمە - ءدال تۇقىم سەبۋ، دالمە - ءدال مولشەردە ۇيالاتىپ سەبۋ، تەلەفون ارقىلى زەردەلى سۋارۋ، ۇشقىشسىز ۇشاق ارقىلى ساقتانۋ سياقتى تەحنيكالار ءبىزدىڭ بۇل ارادا تۇگەلدەي ’جاي شارۋا‘ سانالادى“، - دەدى فىڭ رۋگاڭ. بيىل ول زەردەلى سۋارۋ جۇيەسىنە سۇيەنىپ، ءبىر قولفونمەن باسقارۋ ارقىلى 2600 مۋ جەردىڭ ءبيدايىن سۋارىپ، تىڭايتقىش پەن ادام كۇشى وزىندىك قۇنىن شامامەن 100 مىڭ يۋانداي ۇنەمدەدى. بۇدان سىرت، ول ءدال مولشەردە تۇقىم سەبۋ تەحنيكاسىنان پايدالانىپ مۋ باسىنا كەتەتىن تۇقىم بۇرىنعى 30 نەشە كيلوگرامنان 15.7 كيلوگرامعا ازايىپ، تۇقىمنىڭ وزىندىك قۇنىنان 100 نەشە مىڭ يۋان ۇنەمدەدى.

2020 - جىلى فىڭ رۋگاڭ الدىڭعى 2 جىلدا جاسىل ەگىمشىلىگىن دامىتۋ نەگىزىندە سالالى اتىزعا سۋ، تىڭايتقىش بەرۋ ءبىر تۇلعالانعان سۋارۋ جابدىعىن ورناتىپ، سۋارۋ بارىسىندا قولايلى دا جايلى بولىپ قانا قويماي، تۇتاس سالالى اتىز جاسىل ەگىمشىلىگىندە نەگىز قالاۋدى جۇزەگە اسىردى.

عىلمي ەگۋگە سۇيەنۋ ارقىلى فىڭ رۋگاڭنىڭ ءبيداي ءونىم مولشەرى جىل سايىن ورنىقتى ارتتى، بۇل ونىڭ استىق ەگۋگە دەگەن بەلسەندىلىگىن دە ارتتىردى. 10 جىلعا جۋىق ۋاقىتتان بەرى ول مەملەكەتكە تاپسىرعان ءبيدايدىڭ جالپى مولشەرى 8000 تونناعا جەتتى.

فىڭ رۋگاڭ بىلاي دەدى: بىرنەشە جىلدان بەرى مەملەكەتتىڭ اۋىل شارۋاشىلىعىنا تيىمدىلىك جاساۋ ساياساتى تاماشا بولدى، استىق ەگۋگە جالپىلىق قوسىمشا قاراجات بەرىلەدى، اۋىل شارۋاشىلىعى ماشيناسىن ساتىپ الۋعا اۋىل شارۋاشىلىعى ماشيناسى قوسىمشا قاراجاتى بەرىلەدى، وزىق اۋىل شارۋاشىلىعى تەحنيكاسىن قولدانۋعا دا قوسىمشا قاراجات بەرىلەدى، كىرىسىم جىلدان - جىلعا ارتتى، جۋىق جىلداردان بەرى ءار جىلعى تازا كىرىسىم 2 ميلليون يۋاننان جوعارى بولدى.

كىرىسى ارتتى، تۇرمىسى باقۋاتتى بولدى، فىڭ رۋگاڭ شونجى اۋدانى قالاشىعىنان تاۋار ءۇي ساتىپ الدى، تاعى 3 جەكە اۆتوكولىگى بار، ءبىر ءۇيلى جاننىڭ كۇندەرى ءماندى دە ماعىنالى. ۇلعايمالى ۇدايى ءوندىرىس كولەمىن كەڭەيتۋ ءۇشىن، وسى بىرنەشە جىلدا ول ىلگەرىندى - كەيىندى 4 ءىرى تۇرپاتتى اۋىل شارۋاشىلىعى ماشيناسىن ساتىپ الدى.

بيىل جازعى جيىن - تەرىننەن كەيىن فىڭ رۋگاڭ باسقا قىستاق تۇرعىندارىنىڭ 500 مۋ جەرىن ەرتە باستان اينالىمعا سالىپ، ءبيداي ەگىمشىلىگى اۋدانىن اناعۇرلىم كەڭەيتۋگە ازىرلەندى. ”مەملەكەتتىڭ ساياساتى جاقسى، مەنىڭ استىق ەگۋ سەنىمىم مىعىم، سەرپىنىم كۇشتى“، - دەدى ول.