تىلشىلەرىمىز ما چىڭلۋ، لي يافىڭ حابارلايدى. 10 - ايدىڭ 7 - كۇنى ىلە وبلىستىق ىندەتتەن ساقتانۋ - تىزگىندەۋ قىزمەتى قولباسشىلىق شتابىنان ۇعىسۋىمىزشا، كەزەكتە ىندەت سەبەبىنەن ىلە وبلىسىندا بوگەلىپ قالعان شينجياڭنان سىرت جەرلەردەن كەلگەن جولاۋشىلاردى ورنالاستىرۋ، قايتارۋ جوباسى اقىلداسىلىپ بەلگىلەنىپ، سىرت ولكەدەن كەلگەن جولاۋشىلاردى ٴتۇيىن مەن ٴتۇيىندى ۇشتاستىرىپ وتكەرمەلەي تاسۋ شاراسى اتقارىلىپ، حالىقتىق اۆياتسيا، تاس جول سياقتى تاراۋلار تاسىمال قۋاتىن كۇشەيتۋگە سايكەستىرىلىپ، بوگەلىپ قالعان جولاۋشىلاردى ىلەدەن ىركەس - تىركەس اتتاندىرۋ قىزمەتى بەلسەندى دە ٴتارتىپتى ۇيىمداستىرىلعان.
سول كۇنى قۇلجا اۋەجايىنىڭ ۇشاق كۇتۋ زالىنان قىزمەتكەرلەردىڭ ٴاربىر وتكەلەكتە كەزەكتەسىپ مىندەت اتقارىپ، بىردە - ٴبىر جولاۋشىنىڭ قاعىس قالماۋىنا كەپىلدىك ەتىپ جاتقاندىعىن كوردىك.
قۇلجا (نارات) اۋەجايىنىڭ ورىنباسار باس ديرەكتورى لي ليەجيان بىلاي دەدى: «وبلىستىق پارتكوم مەن ۇكىمەتتىڭ ورنالاستىرۋىنا ساي، شينجياڭنان سىرت جەرلەردەن كەلىپ بوگەلىپ قالعان جولاۋشىلاردى لايىقتى ورنالاستىردىق». سول كۇنى قۇلجا ـ كورلا - چۇڭچيڭ، قۇلجا - جىڭجوۋ، قۇلجا - قارامايلى - بەيجيڭ سياقتى كەزەكشى ۇشاقتار سايكەستىرىلۋ ارقىلى شينجياڭنان سىرت جەرلەردەن كەلىپ بوگەلىپ قالعان جولاۋشىلاردى ىلەدەن اتتاندىرۋ ماسەلەسى كۇش سالا ويداعىداي شەشىلدى.
چاڭچۇننەن كەلگەن جولاۋشى سۇن نايكۇن بىلاي دەدى: «جۇبايىم ەكەۋىمىز ٴوز اۆتوكولىگىمىزبەن ىلەگە ساياحاتتاي كەلىپ بوگەلىپ قالدىق، قازىر چاڭچۇنگە تەز قايتىپ ناۋقاس كورسەتۋگە ٴزارۋ بولىپ وتىرمىز، ٴوتىنىشىمىزدى قابىلداعاننان كەيىن، قۇلجا قالالىق ىندەتتەن ساقتانۋ - تىزگىندەۋ قىزمەتىنە قولباسشىلىق ەتۋ شتابى ارناۋلى ادام ورنالاستىرىپ بىزبەن بايلانىس جاساپ، جاعدايىمىزدى ەگجەي - تەگجەيلى ۇعىسقاننان كەيىن، كادرلاردىڭ كومەگىندە ۇشاق كۇتۋ زالىنا جەتتىك ٴارى ٴساتتى تۇردە بەيجيڭگە قاتىنايتىن ۇشاققادا وتىردىق.
قورعاستا بوگەلىپ قالعان حاڭجوۋلىق جولاۋشى حۋاڭ حاي بىلاي دەدى: «جەرگىلىكتى ۇكىمەت بىزگە شىنايى ىنتا - پەيىلمەن كوپتەپ كومەك كورسەتتى، بۇعان ەرەكشە اسەرلەندىم، كەيىن وراي بولسا قورعاسقا تاعى دا كەلەمىن.
قورعاس قالاسىندا ىندەت تۋىلعاننان بەرى، وبلىسقا توتە قاراستى اۋدان، قالالار حالىق بۇقاراسىنا وسكەلەڭ جاۋاپتى بولۋ رۋحىمەن شىنايى دا ٴونىمدى شارالار قولدانىپ، بوگەلىپ قالعان جولاۋشىلاردىڭ اۋىز سۋ، تاماق، ەمدەلۋ، جاتىن ورىن سياقتى ماسەلەلەرىن قولدان كەلگەنشە ويداعىداي شەشتى. سونىمەن بىرگە، شينجياڭنان سىرت جەرلەردەن كەلىپ بوگەلىپ قالعان جولاۋشىلاردىڭ ىلەدەن اتتانۋ ماسەلەسىن باعىتتامالى شەشىپ، دالمەن - ٴدال، ەگجەي - تەگجەيلى، ەرەكشە قىزمەت وتەپ، پسيحيكالىق جەتەكشىلىك ەتتى.
جولاۋشىلاردىڭ جاتىن ورنىنىڭ جايلى بولۋى ٴۇشىن قۇلجا قالاسى تۇسەلحانا، قوناق سارايى جانە حالىقتىق تۇسەلحانالاردى بوگەلىپ قالعان جولاۋشىلارعا ەڭ تومەنگى باعادا ساپالى ازىق - تۇلىكپەن قامداۋ جاعىنان قىزمەت وتەۋگە بەلسەنە سايكەستىردى. قورعاس اۋدانى جوعارى قارقىندىق تاس جولدا بوگەلىپ قالعان جولاۋشىلاردى 24 ساعات بويى ىستىق سۋمەن جانە ٴسۇت، بۋنان، نان، پالاۋ سياقتى ازىق - تۇلىكپەن قامدادى. تەكەس اۋدانى جولدا بوگەلىپ قالعان جولاۋشىلارعا اۋىل شارۋاشىلىق ەرەكشە ونىمدەرىن ۇسىنىپ، ولاردى جاتىن ورىنمەن جانە ازىق - تۇلىكپەن قامدادى ٴارى ارنايى ادام ورنالاستىرىپ، قۇلجا اۋەجايىنا دەيىن جەتكىزىپ، جول بويى اۆتوكولىككە ماي قۇيۋ سياقتى ماسەلەلەرىن شەشىپ، بوگەلىپ قالعان جولاۋشىلاردىڭ كوڭىل - كۇيىنىڭ ورنىقتى بولۋىنا بەلسەنە جەتەكشىلىك ەتتى. قورعاس قالاسى بوگەلىپ قالعان جولاۋشىلاردى اقىسىز اس - سۋمەن، جاتىن ورىنمەن قامدادى، قاراسۋ ٴمالى باسقارماسى قاراستى رايوندا بوگەلىپ قالعان ون حاڭجوۋلىق ساياحاتشىدان ۋاق - ۋاق حال سۇراپ، ولارعا ويداعىداي قىزمەت وتەدى. قازىر قورعاس قالاسىنىڭ بوگەلىپ قالعان جولاۋشىلارعا قىزمەت وتەۋ، قامتاماسىزداندىرۋ شاراسىنا نەگىزدەلگەندە، بوگەلىپ قالعان بارلىق جولاۋشى اقىسىز اس - سۋمەن قامدايتىن قوناق سارايلارىنا ورنالاستىرىلعان.
قورعاس قالالىق مادەنيەت جانە ساياحات مەكەمەسى پارتگرۋپپاسىنىڭ شۋجيى، مەكەمەنىڭ ورىنباسار باستىعى ياڭ چۇنمەي: «كەمەلدى جوبا، ٴونىمدى شارامەن بوگەلىپ قالعان جولاۋشىلارعا جەرگىلىكتى ورىن ۇكىمەتىنىڭ قامقورلىعىن سەزىندىردىك. سونىمەن بىرگە، ارنايى ادام ۇيىمداستىرىپ، بوگەلىپ قالعان جولاۋشىلاردىڭ جاعدايىن تاپتەشتەي ۇعىسۋ ارقىلى ولاردى تۇرگە ٴبولىپ، نەگىزدىك تۇرمىستىق قاجەتىن بارىنشا قامتاماسىزداندىردىق» دەدى.
سول كۇنى سايرام - كەڭساي جوعارى قارقىندىق تاس جولىنىڭ كەڭساي اقى الۋ پۋنكتى مەن چيڭشۇيحى - قۇلجا جوعارى قارقىندىق تاس جولىنىڭ كۇرە شىعىسى اقى الۋ پۋنكتىنەن شينجياڭعا سىرت جەرلەردەن ٴوز اۆتوكولىكتەرىمەن ساياحاتتاي كەلىپ بوگەلىپ قالعان جولاۋشىلاردىڭ ىلەدەن ارت - ارتىنان اتتانىپ جاتقانىن كوردىك. قازىر ىلەدە بوگەلىپ قالعان شينجياڭنان سىرت جەرلەردەن كەلگەن جولاۋشىلار ويداعىداي ورنالاستىرىلىپ، ولار جەرگىلىكتى ورىننىڭ ساپالى قىزمەت وتەۋىن القادى.
بەيجيڭنەن كەلگەن ساياحاتشى حۋاڭ چيڭجىڭ تىلشىگە: «جەرگىلىكتى ۇكىمەتتىڭ ٴبىز ٴۇشىن جان - جاقتى، ويداعىداي قىزمەت وتەگەنىنە ايرىقشا رازىمىز. جەرگىلىكتى ورىنداعى قاتىستى تاراۋلاردىڭ كومەگىندە ۇشاق بەلەتىن ساتىپ الدىق، توتەنشە قۋانىشتامىن» دەدى.
ۇعىسۋىمىزشا، ىلە وبلىستىق ىندەتتەن ساقتانۋ - تىزگىندەۋ قىزمەتىنە قولباسشىلىق ەتۋ شتابىنىڭ سايكەستىرۋىمەن تەك 48 ساعات ىشىندە جاساتقان ەكى رەتكى حىسۋان تەكسەرتۋ ناتيجەسى قالىپتى بولعان، 14 كۇن ىشىندە قورعاس قالاسىنا جانە بيڭتۋان 4 - شىسىنىڭ 62 - تۋانىنا بارماعان شينجياڭنان سىرت جەرلەردەن كەلگەن جولاۋشىلاردىڭ ۇشاقپەن نەمەسە ٴوز اۆتوكولىكتەرىمەن ىلەدەن اتتانۋىنا بولادى ەكەن. سونىمەن بىرگە، تۇسەلحانا، قوناق ساراي جانە حالىقتىق تۇسەلحانالار باسقا دا بوگەلىپ قالعان جولاۋشىلارعا ساپالى قىزمەت وتەۋگە بەلسەنە سايكەستىرىلىپ، ولاردىڭ تۇرمىستىق ماسەلەسى ويداعىداي شەشىلگەن.