شينحۋا اگەنتتىگىنىڭ 10 - ايدىڭ 13 - كۇنى بەيجيڭنەن بەرگەن حابارى (ٴتىلشى ياڭ يجۇن). مەملەكەت ٴتوراعاسى شي جينپيڭ 10 - ايدىڭ 13 - كۇنى گەرمانيانىڭ زۇڭلي−ى مەركەلمەن بەينە ەكراندا ديدارلاستى. ەكى جاق دوستىق بەينەدە سوڭعى جىلدارداعى جۇڭگو - گەرمانيا، جۇڭگو - ەۆروپا قارىم - قاتىناسىنىڭ دامۋىنا قايىرىلا قارادى ٴارى قاتىستى ماسەلەلەر جونىندە ىشكەرىلەي پىكىر اۋىستىردى.

شي جينپيڭ مەركەلدىڭ مىندەتتەگى كەزىندە جۇڭگو - گەرمانيا، جۇڭگو - ەۆروپا قارىم - قاتىناسىنىڭ دامۋىنا قوسقان ۇلەسىنە بەلسەندى باعا بەردى. شي جينپيڭ بىلاي دەپ اتاپ كورسەتتى: «ادامداردىڭ ٴوزارا تانىستىعىندا ٴبىرىن - ٴبىرى ٴتۇسىنۋ ماڭىزدى؛ ادامداردىڭ ٴوزارا تۇسىنىسۋىندە ٴبىر - بىرىمەن سىرلاسۋ ماڭىزدى». بۇل ٴسوز ٴارى ٴبىزدىڭ تالاي جىل ىشكەرىلەي ارالاسۋىمىزدىڭ ەڭ جاقسى تۇسىندىرمەسى، ٴارى وتكەن 16 جىلدان بەرى جۇڭگو - گەرمانيا قارىم - قاتىناسىنىڭ ورنىقتى، اقاۋسىز دامۋدى ساقتاۋىنىڭ ماڭىزدى تاجىريبەسى. 

جۇڭگولىقتار دوستىق سۇيىسپەنشىلىككە، ادامگەرشىلىككە ٴمان بەرەدى، ٴبىز كونە دوسىمىزدى ۇمىتپايمىز، جۇڭگونىڭ قاقپاسى سىزگە قاشان دا اشىق بولادى. ٴسىزدىڭ جۇڭگو - گەرمانيا، جۇڭگو - ەۆروپا قارىم - قاتىناسىنىڭ دامۋىنا ۇزدىكسىز كوڭىل ٴبولۋىڭىزدى جانە ونى قولداۋىڭىزدى ٴۇمىت ەتەمىز.

شي جينپيڭ بىلاي دەپ باسا دارىپتەدى: ٴبىز تالاي رەت ەكى جاقتى قارىم - قاتىناس، كەلەلى حالىقارالىق جانە وڭىرلىك ماسەلەلەر، ەل باسقارۋ تاجىريبەسى سياقتىلار جونىندە ىشكەرىلەي پىكىر اۋىستىرىپ، ەكى جاقتى قارىم - قاتىناستىڭ العا دامۋىن بىرگە ىلگەرىلەتىپ، جۇڭگو مەن گەرمانيانىڭ الەمدىك سىن - سايىستارعا سەلبەسە توتەپ بەرۋىن ىلگەرىلەتتىك. جۇڭگو مەن گەرمانيا ٴوزارا پايدا جەتكىزۋ، سەلبەسۋ رۋحى بويىنشا، ەكى ەلدىڭ ەكونوميكادا ٴوزارا تولىقتاۋ سيپاتىن ساۋلەلەندىرىپ، تەڭ يگىلىككە كەنەلۋدى جۇزەگە اسىردى. جۇڭگو مەن گەرمانيا وزدەرىن جاقسى دامىتسا، دۇنيە ٴجۇزى ەكونوميكاسىنا قوسقان ۇلەسى دە اناعۇرلىم زور بولادى. بۇل مەملەكەت پەن مەملەكەت اراسىندا تەكە تىرەس جاعدايدان بۇكىلدەي ساقتانىپ، ٴوزارا تيىمدىلىك جاساپ، تەڭ يگىلىكتەنۋگە بولاتىندىعىن دالەلدەيدى، بۇل جۇڭگو مەن گەرمانيانىڭ قارىم - قاتىناسىندا مىقتى يگەرۋگە ٴتيىستى نەگىزگى ارنا. كەلەر جىل جۇڭگو مەن گەرمانيانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى، ەكى جاق قارىم - قاتىناسى دامۋىنىڭ قالاي بەت الۋىندا دۇرىس بەتالىستى ساقتاۋ اسا ماڭىزدى. جۇڭگو جاق جۇڭگو - گەرمانيا قارىم - قاتىناسىنا باستان - اياق ستراتەگيالىق بيىكتەن جانە ۇزاق بولاشاقتىق تۇرعىدان قارايدى، گەرمانيا جاقپەن جوعارى جىكتەگىلەردىڭ بارىس - كەلىسىن ساقتاپ، ٴوزارا ٴتۇسىنىسۋ مەن حالىقتار دوستىعىن ارتتىرىپ، ٴداستۇرلى سالالارداعى سەلبەسۋ كومەسكى كۇشىن اشىپ، ەنەرگيانى جاڭالاۋ، جاسىل جانە سيفرلى ەكونوميكا سياقتى ناقتى سەلبەستىكتىڭ جاڭا سالالارىن بەلسەنە اشىپ، جۇڭگو مەن گەرمانيا سەلبەستىگىنىڭ تەرەڭدەۋىن، ناقتىلانۋىن ىلگەرىلەتۋدى قالايدى.

شي جينپيڭ بىلاي دەپ اتاپ كورسەتتى: بەيبىتشىلىك پەن دامۋعا تالپىنۋ جۇڭگو - ەۆروپا ەكى جاقتىڭ ورتاق تىلەگى. جۇڭگو مەن ەۆروپا تۇگەلدەي كوپ جاقتىلىقتى قورعاۋدى قۋاتتايدى، تۇگەلدەي ساۋدا مەن قارجى قوسۋدىڭ ەركىندەسۋىن، قولايلىلاسۋىن قولدايدى، تۇگەلدەي جۇڭگو مەن ەۆروپانىڭ ورتاق مۇددەسى قايشىلىق - الاۋىزدىقتاردان باسىم تۇرادى،- دەپ قارايدى. قازىر الەمدىك جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ جانە دۇنيە ٴجۇزى ەكونوميكاسىنىڭ قالپىنا كەلۋىن ىلگەرىلەتۋ شەشۋشى مەزگىلدە تۇر، كۇن سايىن كوبەيگەن الەمدىك ماسەلەلەر مەن ۇزدىكسىز جوعارىلاعان ورنىقسىزدىق، تۇراقسىزدىق الدىندا، جۇڭگو مەن ەۆروپانىڭ الەمدەگى ەكى ٴىرى ماڭىزدى كۇش رەتىندە، سەلبەستىكتى كۇشەيتىپ، ىنتىماقتاسا توتەپ بەرۋ جاۋاپكەرشىلىگى بار. ەكى جاق جۇڭگو - ەۆروپا قارىم - قاتىناسىنا اناعۇرلىم كەڭ ولشەممەن قاراپ، وبيەكتى، جان - جاقتىلى تۇرعىدا ٴبىرىن - ٴبىرى تانىپ، پارىقتاردى، الاۋىزدىقتاردى ۇستامدى دا سىپايى، سىندارلى تۇردە ٴبىر جايلى ەتۋى ٴتيىس. ەۆروپا جاقتىڭ دەربەس، ٴوز - وزىنە قوجايىن بولۋعا تاباندى بولىپ، ەۆروپا وداعىنىڭ ٴوز مۇددەسى مەن حالىقارالىق قوعامنىڭ ىنتىماعىن شىنايى قورعاپ، جۇڭگو جاقپەن جانە باسقا ەلدەرمەن بىرلەسىپ، بەيبىتشىلىك پەن دامۋ سىندى عاسىرلىق قيىن ماسەلەنى شەشۋگە بىرگە كۇش سالۋىن ٴۇمىت ەتەمىن.

مەركەل مىنانى ٴبىلدىردى: ٴبىزدىڭ ونداعان جىلداردان بەرگى ٴار رەتكى بارىس - كەلىسىمىز ٴالى ەسىمدە. ٴبىز ورتاق كوڭىل ٴبولىپ وتىرعان ماسەلەلەر جونىندە بۇكپەسىز ىشكەرىلەي پىكىر اۋىستىرىپ، ٴوزارا تۇسىنىستىكتى ارتتىرىپ، گەرمانيا - جۇڭگو قارىم - قاتىناسى مەن ەۆروپا - جۇڭگو سەلبەستىگىنىڭ تاماشا دامۋىن جەبەدىك. مەن گەرمانيا زۇڭليى بولعان مەزگىلدە، جۇڭگو جەدەل دامۋدى جۇزەگە اسىردى، مەملەكەت قۋاتى باياعىدان مۇلدە باسقاشا بولدى ٴارى وراسان زور كومەسكى كۇشىن ايگىلەدى. مەن ەۆروپا وداعىنىڭ جۇڭگومەن قارىم - قاتىناستى دەربەس، وزىنە - ٴوزى قوجايىن بولا وتىرىپ دامىتۋى كەرەكتىگىن باستان - اياق قۋاتتاپ كەلەمىن، ەكى جاقتىڭ ٴوزارا ساقتالىپ وتىرعان پارىق جانە الاۋىزدىق ماسەلەلەر جونىندە تىلدەسۋدى، پىكىرلەسۋدى كۇشەيتۋىنە بولادى، ەۆروپا - جۇڭگو قارىم - قاتىناسىنىڭ كۇردەلى فاكتورلاردى جەڭىپ، ۇزدىكسىز داميتىندىعىنا سەنەمىن. گەرمانيا جاق جۇڭگو جاقتىڭ كليمات وزگەرىسىنە توتەپ بەرۋ جانە ورگانيزمدەردىڭ الۋان تۇرلىلىگىن قورعاۋ ٴۇشىن جاساعان قۇلشىنىستارىن القايدى، جۇڭگو جاقپەن بىرگە گەرمانيا مەن جۇڭگو ديپلوماتيالىق قارىم - قاتىناس ورناتقاندىعىنىڭ 50 جىلدىعىن قۇتتىقتاۋ قيمىلدارىن بىرگە جاقسىلاپ وتكىزىپ، ەكى جاقتى جانە كوپ جاقتى سەلبەستىكتى ۇزدىكسىز كۇشەيتىپ، الەمدىك سىن - سايىستارعا بىرگە توتەپ بەرۋدى قالايدى. مەن گەرمانيا مەن جۇڭگونىڭ، ەۆروپا مەن جۇڭگونىڭ تۇسىنىستىگى مەن سەلبەستىگىن جەبەۋ ٴۇشىن بەلسەندى قۇلشىنىس جاساي بەرەمىن.

ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.