ٴتىلشىمىز ما چىڭلۋ حابارلايدى. اۆتونوميالى وبلىستاعى اۋدان - قالالار «بۇقارا ٴۇشىن ناقتى ٴىس ىستەيمىن» امالياتتىق قيمىلىن دانەكەر ەتىپ، ٴار ۇلت بۇقاراسى ٴۇشىن شىن نيەتپەن ناقتى ٴىس ىستەپ، قيىنشىلىقتارىن شەشىپ، پارتيا تاريحىن ۇيرەنۋ تاربيەسىنىڭ جەتىستىكتەرىن كوزبەن كورىپ، كوڭىلمەن تۇيسىنە الاتىن ونىمدىلىككە اينالدىرىپ، ٴار ۇلت بۇقاراسىنىڭ تابىس سەزىمىن، باقىت سەزىمىن ۇزدىكسىز جوعارىلاتتى. 

تاس جول قاتىناسىنىڭ «ەڭ سوڭعى ٴبىر شاقىرىمى» ىركىلىسسىزدەندىرىلدى

قۇلجا قالاسىنىڭ كونە قالا رايونىندا، يىڭبين جولىنىڭ جالعاسى، لاڭزى باسى جولى جانە اۋەجاي باتىس جولى سياقتى جول بولەكتەرىندەگى «تۇيىق جولدار» مەن «تار جولدار» ارت - ارتىنان ىركىلىسسىزدەندىرىلىپ، تولاسسىز قاتىناس تورابى قالانىڭ كەلبەتىن اسىرىپ، دارەجەسىن جوعارىلاتۋدىڭ جان تامىرىنا اينالدى.

«<تۇيىق جولدىڭ> ىركىلىسسىزدەندىرىلۋى وتە جاقسى بولدى، مەيلى قايدا بارساق تا وراعىتىپ جۇرمەيتىن بولدىق، بۇقارانىڭ ٴجۇرىس - تۇرىسىنا توتەنشە قولايلى بولدى» دەدى ٴۇيى قۇلجا قالاسى جەڭىس كوشەسىنىڭ 7 - جان كوشەسىندە تۇراتىن تۇرعىن چىن جيانشين. قۇلجا قالالىق 15 - باستاۋىش مەكتەپتىڭ ماڭىنداعى «تار جولدىڭ» ۇزىندىعى 390 مەتر بولاتىن دا، قوس باعىتتا 4 اۆتوموبيل قاتار قاتىناي الاتىن جول ەتىپ جاساۋ جوسپارلانعان، نىسان اياقتاعاننان كەيىن كونە قالا رايونىندا شىعىس - باتىس باعىتتاعى نەگىزگى جولدان جاڭادان بىرەۋى قوسىلىپ، ستالين شىعىس جولى مەن ىلە وزەنى جولىن تۇتاستىردى.

اۆتوكولىكپەن قۇلجا قالاسىن ارالاساڭىز جاڭادان جوندەلىپ جاسالعان يىڭبين جولىنىڭ باتىسقا قاراي سوزىلىپ، قۇلجا قالاسىنداعى كولەمدى تولايىم ساتۋ بازارى بولعان حۋارۇي بازارىن، لاڭزى باسى سازدىق باقشاسىن قالانىڭ اكىمشىلىك ورتالىعىمەن تۇتاستىرعانىن كورەسىز. وسىلايشا، قالا رايونىندا 15 مينۋتتىق قاتىناس شەڭبەرى، تۇرمىس شەڭبەرى جانە ەكونوميكا شەڭبەرى قالىپتاستى...

بۇرىنعى ويلى - شۇڭقىرلى كوشەلەر مەن تار توپىراق كوشەلەر قازىر كەڭ دە تەگىس سەمەنت جولعا وزگەرىپ، كونە قالا رايونىنىڭ قاتىناسى ىركىلىسسىزدەندىرىلىپ، بۇقارانىڭ ٴجۇرىس - تۇرىسىنا قولايلى بولدى. ساۋداگەر تۇرسۇنمامەت قيۇم قۋانىشتى تۇردە بىلاي دەدى: «جول ىركىلىسسىزدەندىرىلدى، ادامدار دا كوبەيدى، ساۋدام دا كۇسەت بولدى، تۇرمىسىم بارعان سايىن جاقساردى».

حابارلاسۋ ىستەرىنىڭ «ەڭ سوڭعى ٴبىر شاقىرىمى» ىركىلىسسىزدەندىرىلدى

بيىل جىل باسىنان بەرى جۇڭگو جىلجىمالى حابارلاسۋ توبى شينجياڭ شەكتى سەرىكتەستىگىنىڭ تەكەس اۋداندىق بولىمشە سەرىكتەستىگى 3 اۋىل، قالاشىقتاعى 10 شالعاي ەگىن - مال شارۋاشىلىق قىستاققا 4G حابارلاسۋ سيگنالىن جالپىلاستىرىپ، دارەجەسىن جوعارىلاتۋ ينجەنەرياسىن ورىنداپ، شارۋالاردىڭ حابارلاسۋ قيىن بولۋ جونىندەگى ارىز - ارمانىن شەشتى. جۇڭگو جىلجىمالى حابارلاسۋى تيەتۇڭ جۇيەسىن ورناتۋ - رەمونتتاۋ پۋنكتىنىڭ ورىنباسار باستىعى حان شين بىلاي دەدى: «جىلجىمالى حابارلاسۋ 4G نەگىزدىك پۋنكتى سالىنعاننان كەيىن مالشىلار ۇيىندە وتىرىپ -  اق دوۋين مەن حابار كورە الادى، سونداي - اق سىرتتا بولىپ جاتقان تىڭ ىستەردەن دەركەزىندە حاباردار بولا الادى». 

جۇڭگو جىلجىمالى حابارلاسۋ توبى شينجياڭ شەكتى سەرىكتەستىگى تەكەس اۋداندىق بولىمشە سەرىكتەستىگى 36 ميلليون يۋان قارجى قوسىپ، اۋداننىڭ بوزادىر وتارىندا 4G نەگىزدىك پۋنكتىن سالدى. 11-ايدىڭ 20-كۇنى بوزادىر مال شارۋاشىلىق رايونىندا جىلجىمالى حابارلاسۋ 4G نەگىزدىك پۋنكتى رەسمي پايدالانۋعا بەرىلىپ، شالعاي مال شارۋاشىلىق رايونىندا حابارلاسۋ سيگنالىن جالپىلاستىرۋدىڭ «ەڭ سوڭعى ٴبىر شاقىرىمى» ىركىلىسسىزدەندىرىلدى. مىڭ مەگاۆاتتىق حابارلاسۋ كابەلى مالشى وتباسىلارىنا دەيىن جەتكىزىلىپ، تاۋ قويناۋىنداعى مالشى بۇقاراسى كوپ جىلداردان بەرگى حابارلاسۋ سيگنالى جوق بولۋداي تاريحقا حوش ايتتى.

تەكەس اۋدانى شولاقتەرەك اۋىلى شاعانساي قىستاعىنىڭ مالشىسى اۋەلقان دارۋباي ۇلى بىلاي دەدى: «پارتيانىڭ شالعاي مال شارۋاشىلىق رايونىنداعى بۇقاراعا سىمسىز توراپ سيگنالىن جەتكىزىپ بەرگەنىنە ايرىقشا العىس ايتامىن، قازىر كەز - كەلگەن ۋاقىتتا تۋىس - تۋعان، دوس - جاراندارىممەن حابارلاسا الاتىن بولدىم، بۇل راسىندا يگى ٴىس بولدى، ايرىقشا قۋانىشتامىن». اۋەلقان ٴار جىلى قىستا بوزادىر مال شارۋاشىلىق رايونىنا بارىپ 4 اي مال باعادى. جايشىلىقتا شۇعىل جۇمىسپەن وتباسىنداعىلارمەن حابارلاسۋ ٴۇشىن تاۋدان ەتەككە ٴتۇسىپ 10 كيلومەتر شالعايداعى سيگنالى بار جەرگە بارىپ حابارلاساتىن. قازىر مىڭ مەگاۆاتتىق حابارلاسۋ كابەلى تارتىلعاننان كەيىن مالشىلاردىڭ حابارلاسۋ قاجەتى قاناعاتتاندىرىلىپ قالماستان، تاعى تەلەۆيزور كورە الاتىن بولدى. وسىلايشا مالشىلاردىڭ بوس ۋاقىتتاعى تۇرمىسى دا بارعان سايىن جاقساردى.

جەدەل جولداما ارقىلى قىزمەت وتەۋدىڭ «ەڭ سوڭعى ٴبىر شاقىرىمى» ىركىلسسىزدەندىرىلدى

جەدەل جولداما كاسىبىنىڭ «ەڭ سوڭعى ٴبىر شاقىرىمىن» ىركىلىسسىزدەندىرۋگە ايرىقشا ٴمان بەرىلىپ، «ٴجىتى جولداما ىستەستىگى»، «ەلەكتروندىق جەدەل جولداما ىستەستىگى»، «پوچتالىق جەدەل جولداما ىستەستىگى» جانە «اسقىن تەز جولداما ىستەستىگى» سياقتى ٴوزارا تيىمدىلىك جاساپ، ورتاق يگىلىككە كەنەلەتىن سەلبەستىك ۇلگىسى كەڭىنەن جالپىلاسىپ، جەدەل جولداما كاسىپورىندارى مەن ەلەكتروندىق ساۋدا تۇيىندەرىنىڭ قىستاقتاردا (الەۋمەتتىك اۋماق) جەدەل جولداما جەتكىزۋ قىزمەت وتەۋ ٴتۇيىنىن قۇرۋىنا قولداۋ كورسەتىلىپ، جەدەل جولداما كاسىبى اۋىل - قىستاقتارعا دەيىن جەتكىزىلىپ، بۇقارانى اناعۇرلىم تەز، قولايلى جەدەل جولداما كاسىبى قىزمەت وتەۋىنەن يگىلىكتەندىردى.

بيىل جىل باسىنان بەرى قۇلجا اۋدانى جەدەل جولداما كاسىبىن قىستاقتارعا جەتكىزۋ قىزمەتىن ىلگەرىلەتۋ بارىسىندا پوچتا سەرىكتەستىگىمەن، جەدەل جولداما كاسىپورىندارىمەن اڭگىمە ٴماجىلىسىن وتكىزىپ، جاقىننان سەلبەسىپ، قوس باعىتتا «پوچتالىق جەدەل جولداما» كاسىبىن اشىپ، جەرگىلىكتى ورىنداعى قىستاق تۇرعىندارىنىڭ جەدەل جولدامانى ۋاعىندا تاپسىرىپ الۋىنا قولايلىق جاراتتى. قازىرگە دەيىن «بەس بولۋ» ولشەمدى تالابى بويىنشا 28 جەدەل جولداما توراپ ٴتۇيىنىن، 19 پوچتالىق توراپ ٴتۇيىنىن، 132 قىستاق دارەجەلى قىزمەت وتەۋ ٴتۇيىنىن قۇردى.

قۇلجا اۋدانى سامجۇزى اۋىلى تومەنگى سامجۇزى قىستاعىنىڭ پوچتالىق جەدەل جولداما قىزمەت وتەۋ تۇيىنىندە كوپتەگەن قىستاق تۇرعىندارى سالەمدەمەلەرىن الىپ جاتتى. قىستاق تۇرعىنى ىرلي بىلاي دەدى: «قىستاعىمىزدا جەدەل جولداما قىزمەت وتەۋ پۋنكىتى قۇرىلعاننان كەيىن بۇرىنعىداي اۋدان ورتالىعىنا بارىپ سابىلمايتىن بولدىق. زات سالساق تا قولايلى، الگىندە عانا ٴۇرىمجى قالاسىنداعى قاريدارىما 5 كيلوگرام سۇرلەنگەن جىلقى ەتىن سالىپ جىبەردىم. جەدەل جولداما قىزمەت وتەۋ پۋنكتى قۇرىلعاننان بەرى ٴوزىم سۇرلەگەن جىلقى ەتى، قازى جانە قايماق سياقتى جەرگىلىكتى ونىمدەردى ساتۋىما قولايلى بولدى، تۇرمىسىم كۇننەن - كۇنگە جاقساردى».