(2021 - جىلى 12 - ايدىڭ 31 - كۇنى)

شي جينپيڭ

 جولداستار، دوستار:

 كونە جىلعا قوش ايتىپ، جاڭا جىلدى قارسى الىپ وتىرعان وسى ٴبىر ساليقالى ساتتە ٴبىز شات مەرەيمەن ٴبىر ارادا باس قوسىپ، مەملەكەت ىستەرىن بىرگە اقىلداسىپ، اقتارىلا اڭگىمەلەسىپ، ايرىقشا قۋانىشقا بولەندىك.

 مەن الدىمەن جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس جانە ورتالىق اسكەري ىستەر كوميتەتى اتىنان ٴارقايسى دەموكراتيالىق پارتيا - توپتارعا، ساۋدا - ونەركاسىپشىلەر بىرلەستىگىنە جانە پارتيادا، توپتا جوق قايراتكەرلەرگە، ٴارقايسى حالىقتىق ۇيىمدارعا، بۇكىل ەلدەگى بارشا جۇمىسشىلارعا، شارۋالارعا، زيالىلارعا، كادرلارعا جانە ٴار سالاداعى قايراتكەرلەرگە، حالىق ازاتتىق ارمياسىنىڭ وفيتسەر - اسكەرلەرىنە، قارۋلى ساقشىنىڭ كوماندير - جاۋىنگەرلەرىنە، قوعام حاۋىپسىزدىگى كادر - ساقشىلارىنا، ٴورت ٴوشىرۋ، ورتتەن ساقتانۋ، قۇتقارۋ، كومەك بەرۋ قوسىنىنىڭ كوماندير - جاۋىنگەرلەرىنە، شياڭگاڭ ەرەكشە اكىمشىلىك رايونىنداعى باۋىرلاستارعا، اۋمىن ەرەكشە اكىمشىلىك رايونىنداعى باۋىرلاستارعا، تايۋاندىق باۋىرلاستارعا جانە شەتەلدەگى چياۋباۋلارعا، جۇڭگونىڭ وسىزامانداندىرۋ قۇرىلىسىنا كوڭىل بولگەن جانە قولداۋ كورسەتكەن ٴار ەلدەگى شەتەلدىك دوستارعا مەرەكەلىك سالەم جولدايمىن ٴارى جاڭا جىل بايلانىسىمەن ىزگى تىلەك تىلەيمىن! كوپشىلىك، جاڭا جىلدارىڭىز قۇتتى بولسىن!

2021 - جىل جۇڭگو كوممۋنيستىك پارتياسىنىڭ تاريحىندا بولسىن، الدە جۇڭحۋا ۇلتى تاريحىندا بولسىن كەلەلى تاريحي مانگە يە ٴبىر جىل بولدى. ٴبىز جۇڭگو كوممۋنيستىك پارتياسى قۇرىلعاندىعىنىڭ 100 جىلدىعىن سالتاناتپەن قۇتتىقتادىق، جۇڭگو كوممۋنيستىك پارتياسى 19 - كەزەكتى ورتالىق كوميتەتىنىڭ التىنشى جالپى ماجىلىسىندە جۇڭگو كوممۋنيستىك پارتياسىنىڭ تاريحىنداعى 3 - تاريحي قاراردى ماقۇلداپ، ٴبىرىنشى 100 جىلدىق كۇرەس نىساناسىنىڭ جەڭىسىنە قول جەتكىزىپ، جۇڭحۋانىڭ بايتاق دالاسىندا جاپپاي دوڭگەلەك داۋلەتتى قوعام قۇردىق، مۇلدە كەدەيلىك ماسەلەسىن تاريحي سيپاتتى شەشىپ، جاپپاي وسىزاماندانعان سوتسياليستىك مەملەكەت قۇرىپ، ەكىنشى 100 جىلدىق كۇرەس نىساناسىنىڭ جاڭا ساپارىن باستادىق. 

وسى ٴبىر جىلدا قىم - قۋىت، كۇردەلى حالىقارالىق جاعداي مەن ماشاقاتتى دا اۋىر ەل ٴىشىنىڭ رەفورما، دامۋ، ورنىقتىلىق جاعدايى الدىندا، جۇڭگو كوممۋنيستىك پارتياسى ورتالىق كوميتەتى بۇكىل ەلدەگى ٴار ۇلت حالقىن ىنتىماقتاستىرىپ باستاپ، 100 جىلدىق وزگەرىس پەن عاسىرلىق ىندەت جاعدايىنا سالماقتىلىقپەن توتەپ بەرىپ، جاڭا دامۋ جاعدايىن قالىپتاستىرۋعا تىڭ قادام تاستاپ، جوعارى ساپالى دامۋدا تىڭ ونىمدىلىككە قول جەتكىزدى، مەملەكەتتىڭ ستراتەگيالىق عىلىم - تەحنيكا قۋاتى جەدەل زورايدى، حالىق تۇرمىسى پارمەندى قامتاماسىزداندىرىلدى، ەكولوگيالىق وركەنيەت قۇرىلىسى ۇزدىكسىز ىلگەرىلەتىلدى، تاسقىننان ساقتانىپ، اپاتتان قۇتقارۋ جانە اپاتتان كەيىنگى قايتا قۇرۋ قىزمەتى پارمەندى جۇرگىزىلىپ، مەملەكەت قورعانىسى جانە ارميانى وسىزامانداندىرۋ قۇرىلىسى جەدەل ىلگەرىلەتىلدى، جالپى بارىستىق حالىق دەموكراتياسى ۇزدىكسىز دامىتىلىپ، پارتيا تاريحىن ۇيرەنۋ تاربيەسىنىڭ ونىمدىلىگى كورنەكتى بولدى، پارتيانى جاپپاي قاتاڭ باسقارۋ ۇزدىكسىز تەرەڭدەتىلىپ، ەلىمىز ەكونوميكاسىنىڭ دامۋى مەن ىندەتتەن ساقتانۋ - تىزگىندەۋى تۇتاس جەر شارىندا الدىڭعى ورىندى ساقتاپ، «14 - بەسجىلدىقتا» تاماشا باستامانى جۇزەگە اسىردىق.

 وسى ٴبىر جىلدا ٴبىز رەفورمانى جاپپاي تەرەڭدەتۋدى ۇزدىكسىز ىلگەرىلەتىپ، ورتالىق رەفورمانى تەرەڭدەتۋ كوميتەتى ورنالاستىرعان 50 ٴتۇيىندى رەفورما مىندەتىن جانە باسقا دا 61 رەفورما مىندەتىن نەگىزىنەن ورىندادىق، ورتالىق كوميتەت پەن مەملەكەت ورگاندارىنىڭ قاتىستى تاراۋلارى تاعى 105 رەفورما مىندەتىن ورىندادى، ٴارقايسى جاق 216 رەفورما جوباسىن ورتاعا قويىپ، پارتيامىز قۇرىلعان 100 جىلدا ٴارقايسى جاقتاعى تۇزىمدەردى اناعۇرلىم كەمەلدەندىرۋ، اناعۇرلىم قالىپتاستىرۋ جاعىندا كورنەكتى ونىمدىلىككە يە نىسانالاردى ورىندادىق.

وسى ٴبىر جىلدا ٴبىز «ٴبىر ەل، ەكى ٴتۇزىم» باعىتىندا تاباندى بولىپ، «وتانشىلدار شياڭگاڭدى باسقارۋ»، «وتانشىلدار اۋمىندى باسقارۋ» ٴتۇبىرلى پرينسيبىن دايەكتىلەندىرىپ، تياناقتاندىرىپ، شياڭگاڭنىڭ،  اۋمىننىڭ ەكونوميكانى دامىتۋىنا، حالىق تۇرمىسىن جاقسارتۋىنا قولداۋ كورسەتىپ، شياڭگاڭنىڭ بىلىقپالىقتان جونگە سالۋعا قاراي ٴوتۋىن، قالىپتى ارناعا قايتا ورالۋىن قولداپ جانە ىلگەرىلەتىپ،  اۋمىننىڭ گۇلدەنىپ - كوركەيۋىن، ورنىقتىلىعىن ساقتادىق. ٴبىز ٴبىر جۇڭگو پرينسيبىندە جانە «92 - جىلعى ورتاق تانىمدا» تاباندى بولىپ، «دەربەستەندىرۋگە» قارسى تۇرىپ، ٴبىر تۇتاستىقتى جەبەۋ كەلەلى اۋقىمىن كۇشەيتىپ، سىرتقى سايىستارعا پارمەندى توتەپ بەرىپ، ەكى جاعالاۋ قاتىناسىنىڭ بەيبىت دامۋىن جەبەدىك. ٴبىز ادامزات تاعدىرلاس ورتاق تۇلعا ۇستانىمىنان جازباي، شىنايى كوپ جاقتىلىقتى دارىپتەپ، «ٴبىر بەلدەۋ، ٴبىر جولدى» بىرگە قۇرۋدى تىڭعىلىقتى ىلگەرىلەتىپ، ۆاكسينانى تۇتاس جەر شارىندىق الەۋمەتتىك ٴونىم ەتۋ ۋادەمىزدى ورىنداپ، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن كۇش سالا قورعاپ، دۇنيە ٴجۇزىنىڭ بەيبىتشىلىگى مەن دامۋىن جەبەۋدە بەلسەندى ۇلەس قوستىق! 

جولداستار، دوستار!

2022 - جىلى جۇڭگو كوممۋنيستىك پارتياسىنىڭ مەملەكەتتىك 20 - قۇرىلتايى اشىلادى. بۇل − پارتيا مەن مەملەكەتىمىزدىڭ ساياسي تۇرمىسىنداعى كەلەلى ٴىس. ٴبىز تاريحي ىرىقتىلىق رۋحىن ۇزدىكسىز ساۋلەلەندىرىپ، قولايلى ساتتەن پايدالانىپ العا ۇمتىلىپ، ەكپىندەي ىلگەرىلەپ، جاپپاي سوتسياليستىك وسىزاماندانعان قۇدىرەتتى ەل قۇرۋدىڭ ەمتيحان تاپسىرۋ جولىن جاقسى ٴجۇرۋىمىز ٴارى اناعۇرلىم جاپالى، اناعۇرلىم ماشاقاتتى قۇلشىنىس جاساۋعا دايىندالىپ، ورنىقتى دا اقاۋسىز ەكونوميكالىق ورتانى، سالتى دۇرىس، ستيلى پاك ساياسي ورتانى، ەلى امان، جۇرتى تىنىش قوعامدىق ورتانى كۇش سالا ساقتاپ، ٴىس جۇزىندىك ارەكەتىمىز ارقىلى جۇڭگو كوممۋنيستىك پارتياسى 20 - قۇرىلتايىنىڭ جەڭىسپەن اشىلۋىن قارسى الۋىمىز كەرەك. 

جولداستار، دوستار

2021 - جىلى حالىق ساياسي كەڭەسى جۇڭگو كوممۋنيستىك پارتياسى ورتالىق كوميتەتىنىڭ شەشىم، ورنالاستىرۋلارىن مۇقيات دايەكتىلەندىرىپ، تياناقتاندىرىپ، ىنتىماق پەن دەموكراتيا سىندى ەكى ۇلكەن نەگىزگى تاقىرىپقا تاباندى بولىپ، ارناۋلى كەڭەستىك قۇرىلىمىنىڭ ٴتۇرلى قۇرىلىستارىن ىلگەرىلەتىپ، يدەيا مەن ساياسيداعى جەتەكشىلىكتى كۇشەيتىپ، جۇڭگو كوممۋنيستىك پارتياسى تاريحىن ٴتۇيىن ەتكەن «ٴتورت تاريح» تاربيەسىن مۇقيات ورىستەتىپ، «14 - بەسجىلدىقتا» تاماشا باستاما اشۋدى توڭىرەكتەي وتىرىپ كەڭەس بەرىپ جانە دەموكراتيالىق باقىلاۋ جۇرگىزىپ، قوعام جاعدايى مەن حالىق تىلەگىن بەلسەندى اڭىس ەتىپ، مىندەت وتەپ، جاۋاپكەرشىلىكتى ادا ەتۋدىڭ ۇلگىسىندە جاڭالىق اشىپ، شينحاي توڭكەرىسىنىڭ 110 جىلدىعىن ەسكە ٴتۇسىرۋ قيمىلىن وتكىزىپ، پارتيا مەن مەملەكەت ىستەرىنىڭ دامۋىنا ماڭىزدى ۇلەس قوستى. 

جاڭا ٴبىر جىلدا ٴبىز جۇڭگو كوممۋنيستىك پارتياسى باسشىلىعىنداعى كوپ پارتيا سەلبەستىگى مەن ساياسي جاقتان كەڭەسۋ تۇزىمىندە تاباندى بولىپ جانە ونى كەمەلدەندىرىپ، ەڭ كەڭ وتانشىلدىق بىرلىكساپتى بەكەمدەپ جانە دامىتىپ، جۇڭگو كوممۋنيستىك پارتياسى 19 - كەزەكتى ورتالىق كوميتەتى التىنشى جالپى ٴماجىلىسىنىڭ رۋحىن ۇيرەنىپ، دايەكتىلەندىرىپ، ورتالىق ساياسي كەڭەس قىزمەتى ٴماجىلىسىنىڭ رۋحىن تياناقتاندىرىپ، جالپى جاعدايدى توڭىرەكتەپ سىندارلى اقىل - كەڭەس بەرىپ، جۇرت رايىن، حالىق تىلەگىن يگەرىپ، ورتاق تانىمدى اناعۇرلىم جاقسى ۇيىستىرىپ، پارتيا مەن مەملەكەتتىڭ نىسانا مىندەتتەرىن ورىنداۋعا كەڭىنەن اقىل - پاراسات جانە كۇش - قۋات ۇيىستىرۋىمىز كەرەك. 

جولداستار، دوستار!

كۇش ىنتىماقتان، باقىت كۇرەستەن كەلەدى. ىنتىماقتاسا كۇرەس جاساۋ − 100 جىلدان بەرگى جۇڭگو كوممۋنيستەرىنىڭ، جۇڭگو حالقىنىڭ، جۇڭحۋا ۇلتىنىڭ سومداعان باعالى رۋحاني قاسيەتى. ٴبىز مۇرات - سەنىم تۋىن بيىك ۇستاپ، جۇڭحۋا ۇل - قىزدارىنىڭ ۇلى ىنتىماعىن كۇشەيتىپ، جالپى جۇرت جۇدىرىقتاي جۇمىلاتىن ۇلى كۇش ۇيىستىرىپ، قاجىرلى دا پاراساتتى تاباندىلىقتى ساقتاپ، ايبارلى دا سەستى ايبىندى ايگىلەپ، جاڭا دا ۇلى جەڭىس پەن داڭقتارعا قول جەتكىزۋگە قۇلشىنۋىمىز كەرەك. 

كوپشىلىككە راحىمەت.

شينحۋا اگەنتتىگىنىڭ  12 - ايدىڭ 31 - كۇنى بەيجيڭنەن بەرگەن حابارى.