شينحۋا اگەنتتىگىنىڭ 1 - ايدىڭ 7 - كۇنى بەيجيڭنەن بەرگەن حابارى. 2022 - جىلى 1 - ايدىڭ 7 - كۇنى مەملەكەت ٴتوراعاسى شي جينپيڭ قازاقستاننىڭ زۇڭتۇڭى توقايەۆكە اۋىزشا سالەم جولدادى.

شي جينپيڭ اۋىزشا سالەمىندە مىنالاردى ٴبىلدىردى: جۋىقتا قازاقستاندا زور كولەمدى دۇربەلەڭ تۋىلىپ، اۋىر ٴولىم - ٴجىتىم جانە مال - مۇلىك شىعىنى بولدى، مەن سىزدەن شىنايى حال سۇرايمىن. ٴسىز شەشۋشى ساتتە باتىل تۇردە پارمەندى شارا قولدانىپ، جاعدايدى تەز ارادا تىنىشتاندىرىپ، ساياساتكەر رەتىندەگى جاۋاپكەرشىلىگىڭىز بەن مىندەتىڭىزدى، مەملەكەت پەن حالىققا بارىنشا جاۋاپتى بولۋ تۇرعىڭىزدى ايگىلەدىڭىز.

شي جينپيڭ بىلاي دەپ باسا دارىپتەدى: جۇڭگو جاق ٴارقانداي كۇشتىڭ قازاقستاننىڭ ورنىقتىلىعىن بۇلدىرۋىنە، قازاقستاننىڭ حاۋىپسىزدىگىنە حاۋىپ توندىرۋىنە باتىل قارسى تۇرادى، ٴارقانداي كۇشتىڭ قازاقستان حالقىنىڭ تىنىش تۇرمىسىن بۇلدىرۋىنە باتىل قارسى تۇرادى، سىرتقى كۇشتەردىڭ قازاقستاندا قاساقانا الاساپىراندىق تۋدىرۋىنا، «ٴتۇستى توڭكەرىس» قوزعاۋىنا باتىل قارسى تۇرادى، جۇڭگو مەن قازاقستاننىڭ دوستىعىن بۇلدىرەتىن، ەكى ەلدىڭ سەلبەستىگىنە كەدەرگىلىك جاسايتىن ٴارقانداي قاسكۇنەمدىككە باتىل قارسى تۇرادى. باۋىرلاس كورشى ەل جانە ماڭگىلىك جان - جاقتى ستراتەگيالىق سەرىك رەتىندە، جۇڭگو جاق قازاقستانعا مۇمكىندىكتىڭ بارىنشا قاجەتتى قولداۋ كورسەتىپ، قازاقستان جاقتىڭ قيىن وتكەلدەن وتۋىنە كومەكتەسۋدى قالايدى. مەيلى قانداي حاۋىپ - قاتەر مەن سىن - سايىسقا ٴدوپ كەلسە دە، جۇڭگو قازاقستاننىڭ سەنۋگە تاتيتىن دوسى جانە قادىر تۇتاتىن سەرىگى، جۇڭگو حالقى قازاقستان حالقىمەن ماڭگى بىرگە بولادى.