شينحۋا اگەنتتىگىنىڭ 1 - ايدىڭ 11 - كۇنى بەيجيڭنەن بەرگەن حابارى. مەملەكەت ٴتوراعاسى شي جينپيڭ 1 - ايدىڭ 11 - كۇنى يندونەزيانىڭ زۇڭتۇڭى جوكومەن تەلەفوندا سويلەستى.

شي جينپيڭ بىلاي دەپ اتاپ كورسەتتى: بىلتىردان بەرى جۇڭگو مەن يندونەزيا قارىم - قاتىناسى جاڭا تيپتى ايدارشا ۆيرۋس وكپە قابىنۋ ىندەتىنىڭ ٴتيىمسىز جاعدايىندا دا العا باستى، ورنىقتىلىق بارىسىندا ىلگەرىلەدى. ەكى ەل جوعارى دارەجەلىلەر تىلدەسۋ سەلبەستىك مەحانيزمىن اتقارىپ، ساياسي، ەكونوميكا، گۋمانيتارلىق ىستەر، تەڭىزدەگى «4 جاقتى قوزعالتقىش» ارقىلى ەكى جاقتى سەلبەستىكتىڭ جاڭا ارناسىن اشتى. جۇڭگو مەن يندونەزيا تۇگەلدەي وركەندەپ كەلە جاتقان ٴىرى ەلدەر، مەملەكەتتىڭ دامۋىن كوزدەۋ، حالىققا باقىت جاراتۋدى كوزدەۋ جولىندا جۇڭگو مەن يندونەزيا مۇراتتاس بولدى. عاسىرلىق وزگەرىس پەن 100 جىلدىق ىندەت الدىندا، ەكى جاق تاعدىرلاس ورتاق تۇلعانى قۇلشىنا قۇرۋى كەرەك. بۇل نىسانانى جۇزەگە اسىرۋدىڭ تەتىگى ٴاربىر ناقتى ىستەردى تىندىرۋ، ويداعىداي تىندىرۋ بولىپ تابىلادى.

شي جينپيڭ بىلاي دەپ باسا دارىپتەدى: ەكى جاق ىندەتكە بىرگە قارسى اتتانىپ، دەنساۋلىق ساقتاۋ، سالاماتتىق سەلبەستىك ۇلگىسىن سومداۋ كەرەك. جۇڭگو جاق يندونەزيامەن بىرگە ۆاكسينا تۇتاس كاسىپ سالاسى تىزبەگى سەلبەستىگىن جانە ٴدارى - دارمەك زەرتتەپ اشۋدى ۇزدىكسىز ورىستەتىپ، يندونەزيانىڭ وڭىرلىك ۆاكسينا ٴوندىرۋ ورتالىعىن قۇرۋىنا كومەكتەسىپ، ىندەتكە قول ۇستاسا قارسى اتتانۋ نەگىزىندە الەمدىك الەۋمەتتىك دەنساۋلىق ساقتاۋدى جونگە سالۋدى، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن قۇرۋدى ىلگەرىلەتەدى، كەمەلدەندىرەدى. ەكى جاق بىرگە دامىپ، ناقتى ىستەر سەلبەستىگى ۇلگىسىن ورناتۋى كەرەك. «ٴبىر بەلدەۋ، ٴبىر جولدى» بىرگە قۇرۋدى جۇڭگونىڭ جاڭا دامۋ ارناسىن ورناتۋمەن، يندونەزيا مەملەكەتىنىڭ ورتا، ۇزاق مەزگىلدىك دامۋ جوباسىمەن ۇشتاستىرۋ، ىندەتتەن كەيىنگى مەزگىلدەگى سەلبەستىكتى ٴبىر تۇتاس جوسپارلاپ ىلگەرىلەتۋ، جاكارتا - باندۇڭ جوعارى جىلدامدىقتى تەمىر جولىن جوعارى ساپامەن سالۋ، «وڭىرلىك كەشەندى ەكونوميكالىق  ٴدالىز»، «ەكى ەل قوس باقشاسى» سياقتى ٴتۇيىندى نىسانداردى ويداعىداي اتقارىپ، جاڭا ەنەرگيا، تومەن كومىر قىشقىل گازى، سيفرلى ەكونوميكا، تەڭىزدەگى سەلبەستىك سياقتىلاردىڭ جاڭا ارتۋ تۇيىندەرىن جەتىلدىرۋ كەرەك. تەك يندونەزيانىڭ دامۋىن ىلگەرىلەتۋگە، جۇڭگو مەن يندونەزيا سەلبەستىگىن تەرەڭدەتۋگە كومەگى تيەتىن ٴىس بولسا بولعانى، جۇڭگو جاق تۇگەلدەي بەلسەنە ات سالىسىپ، بار كۇشىن سالادى.

شي جينپيڭ بىلاي دەپ باسا دارىپتەدى: جۇڭگو جاق يندونەزيانىڭ وڭىرلىك جانە حالىقارالىق ىستەردەگى رولىنا باسا ٴمان بەرەدى، يندونەزيامەن بىرگە بىلتىرعى جۇڭگو - شىعىس وڭتۇستىك ازيا ەلدەرى وداعى تىلدەسۋ قارىم - قاتىناسىن ورناتقاندىعىنىڭ 30 جىلدىعىن ەسكە ٴتۇسىرۋ باسشىلار ماجىلىسىندەگى ورتاق تانىمدى ويداعىداي  تياناقتاندىرىپ، وڭىرلىك ەكونوميكانى قايتا جانداندىرۋدى، وڭىرلىك بەيبىتشىلىكتى، ورنىقتىلىقتى قورعاۋدى قالايدى. جۇڭگو مەن يندونەزيا بيىل جەكە - جەكە بريكس ەلدەرىنە ٴتوراعا ەل بولۋ جانە 20 ەل توبىنا ٴتوراعا ەل بولۋ مىندەتىن ارقالاپ وتىر. جۇڭگو جاق يندونەزيامەن بىرگە شىن مانىندەگى كوپ جاقتىلىقتى امالياتتا ايگىلەپ، الەمدىك دامۋ دارىپتەمەسىن بەلسەنە تياناقتاندىرىپ، بازارى جاڭادان گۇلدەنگەن ەلدەردىڭ جانە وركەندەپ كەلە جاتقان ەلدەردىڭ ۇقىق - مۇددەسىن قورعاپ، دۇنيە ٴجۇزى ەكونوميكاسىنىڭ قايتا جاندانۋىن، دامۋىن جەبەۋ، الەم ەكونوميكاسىن جونگە سالۋدى كەمەلدەندىرۋ ٴۇشىن ۇلەس قوسۋدى قالايدى.

جوكو مىنالاردى ٴبىلدىردى: مەن جۇڭگو كوممۋنيستىك پارتياسى 19 - كەزەكتى ورتالىق كوميتەتى التىنشى جالپى ٴماجىلىسىنىڭ تابىسپەن اشىلعاندىعىن قۇتتىقتايمىن، باس شۋجي شي جينپيڭنىڭ باسشىلىعىندا، جۇڭگو حالقىنىڭ ۇزدىكسىز جاڭا شۇعىلالى ناتيجە جاراتاتىندىعىنا سەنەمىن. بىلتىر يندونەزيا مەن جۇڭگونىڭ ەكى جاقتى ساۋدا، قارجى قوسۋى تەز قارقىنمەن ارتتى، دەنساۋلىق ساقتاۋ، ەمدەۋ سەلبەستىگى، اسىرەسە، ۆاكسينا ٴوندىرۋ جانە ٴدارى - دارمەك زەرتتەپ اشۋ سەلبەستىگىنىڭ ونىمدىلىگى كورنەكتى بولىپ، يندونەزيانىڭ %80 ۆاكسيناسى جۇڭگودان اكەلىندى. جاكارتا - باندۇڭ تەمىر جول قۇرىلىسىنىڭ اياق الىسى ٴساتتى بولىپ، ۋاعىندا سالىنىپ بولىپ پويەز قاتىناۋدان ٴۇمىت بار. يندونەزيانىڭ جۇڭگومەن تاماشا قارىم - قاتىناسى ٴوزارا قۇرمەت ەتۋدى، سەلبەسىپ تەڭ يگىلىككە كەنەلۋدى نەگىز ەتكەن. يندونەزيا جۇڭگو جاقپەن بىرگە ەكونوميكا - ساۋدا، ىندەتكە قارسى اتتانۋ سياقتى سالالارداعى سەلبەستىكتى كۇشەيتىپ، «ٴبىر بەلدەۋ، ٴبىر جولدى» بىرگە قۇرۋدى بەلسەنە ىلگەرىلەتۋدى، «وڭىرلىك كەشەندى ەكونوميكالىق ٴدالىزدى» جانە «ەكى ەل قوس باقشاسىن» ويداعىداي قۇرۋدى قالايدى. جۇڭگو كاسىپورىندارىنىڭ يندونەزياعا كەلىپ قارجى قوسىپ، جوعارى تەحنيكا، جاسىل دامۋ سياقتى سالالارداعى سەلبەستىكتى ورىستەتۋىن قارسى الادى. بيىل 20 ەل توبىنا ٴتوراعا ەل بولۋ سالاۋاتىمەن، يندونەزيا جۇڭگو جاقپەن تىعىز سايكەسىپ، 20 ەل توبىنىڭ حالىقارالىق قوعامنىڭ ىنتىماعىن ىلگەرىلەتۋ جانە دۇنيە ٴجۇزى ەكونوميكاسىن قايتا جانداندىرۋ ٴۇشىن بەلسەندى رول اتقارۋدى قالايدى. جۇڭگو حالقىنىڭ كوكتەم مەرەكەسىنىڭ كوڭىلدى ٴوتۋىن تىلەيمىن! بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ تابىستى بولۋىن تىلەيمىن!