لۋ جۇڭ (ٴوز ٴتىلشىمىز)

 2021 - جىلى اۆتونوميالى وبلىستىڭ ساياحات كاسىبىندە ٴسۇيىنىشتى جاڭالىقتار كوپ بولدى، ايتالىق، قۇلجا قالاسى مەن نىلقى اۋدانى «جۇڭگوداعى كليماتى قونىستانۋعا جايلى قالا» دەگەن داڭىقتى اتاققا يە بولدى؛ قۇلجا قالاسى، قورعاس اۋدانى جانە كۇنەس اۋدانى اۆتونوميالى رايون بويىنشا تۇتاس وڭىرلىك ساياحاتتان ۇلگى كورسەتەتىن رايون بولىپ باعالاندى؛ قۇلجا قالاسى «2021 - جىلعى جۇڭگو اۋدان ٴوڭىرى ساياحاتىندا ۋنيۆەرسالدى باسەكەلىك قۋاتقا يە 100 ەگەي اۋدان، قالا» تىزىمدىگىنە ەنگىزىلدى، تەكەس اۋدانى مەن كۇنەس اۋدانى «2021 - جىلعى جۇڭگو اۋدان ٴوڭىرى ساياحاتىنىڭ دامۋ كومەسكى كۇشىنە يە 100 ەگەي اۋدان، قالا» تىزىمىنە ٴىلىندى؛ 11 - ايدىڭ 5 - كۇنى اۆتونوميالى رايوندىق مادەنيەت جانە ساياحات مەڭگەرمەسى، اۆتونوميالى رايوندىق دامۋ، رەفورما كوميتەتى 1 - توپتا اۆتونوميالى رايونداعى ساياحات سەيىل - سەرۋەن كوشەلەرىنىڭ ەسىمدىگىن اشىق جاريالادى، قۇلجا قالاسىنداعى ىلە كونە قالاسى قازانشى، التىشۋار كوشەلەرى، تەكەس اۋدانىنداعى جىبەك جاعا داڭعىلى وسى تىزىمدىكتەن ورىن الدى. 

2021 - جىلى ىلەنىڭ ساياحات كاسىبىنىڭ دامۋ ومىرشەڭدىگى اناعۇرلىم قاۋلاپ، تاماشا دامۋ اۋقىمى جارىققا شىقتى. 

كوكتەم ماۋسىمىنداعى ساياحاتتىڭ قۋاتى ەڭ مىعىم بولدى

وتكەن جىلى 3 - ايدا، ما فىڭۋو ساياحات تورابى تىڭشۇن مادەنيەت، ساياحات تورابىمەن بىرگە، 2021 - جىلعى كوكتەم ماۋسىمىنداعى «ساياحات باعدارلاۋىشىن» جاريالاپ، سول جىلعى كوكتەم ماۋسىمىنداعى ەڭ جاڭا ساياحات تۇتىنۋىنىڭ بەتالىسىنا تالداۋ جۇرگىزىپ، مەجە جاسادى. گۇل تاماشالايتىن كوپتەگەن كوزەۋلى جەرلەردىڭ ىشىندە شينجياڭداعى ىلەنىڭ كوكتەم ماۋسىمىنداعى ساياحاتىنا بولعان قىزعىندىلىق %317 جوعارىلاپ، كوكتەم ماۋسىمىنداعى ساياحات قىزعىندىلىق ورلەۋى ەڭ جوعارى رايونعا اينالدى.

كوكتەم لەبىن ەڭ الدىمەن سەزىندىرەتىن جەر كۇنەس اۋدانىنداعى ورىكتى ساي ەكەنىندە ٴشۇبا جوق. 4 - ايدىڭ 3 - كۇنى «ساياحات ەلشىسى كۇنەستە. كوكتەم شۋاعىنا شومىلعان ورىكتى ساي» اتىنداعى 2021 - جىلعى جۇڭگو . نارات ورىك گۇلى مەرەكەسىنىڭ شىمىلدىعى كۇنەس اۋدانىنداعى ورىكتى سايدا اشىلىپ، گۇل تاماشالاۋشى ساياحاتشىلار وسى اراعا اعىلىپ، بۇل ارانى ەل ٴىشى ساياحاتىنداعى ەڭ بازارلى كورىنىس رايونىنا اينالدىردى. 

4 - ايدىڭ 12 - كۇنى 11 - كەزەكتى شينجياڭ ىلە ورىك گۇلى مادەنيەت - ساياحات مەرەكەسى اياقتالدى. 12 كۇنگە جالعاسقان ساياحات مەرەكەسىندە قۇلجا اۋدانىنىڭ جالپى قابىلداعان ساياحاتشى سانى 238 مىڭ 600 ادام - رەتتەن اسىپ، ساياحات كىرىسى 83 ميلليون 748 مىڭ 600 يۋانعا جەتتى.

2021 - جىلى كوكتەم ماۋسىمىندا، ىلەنىڭ ساياحات كاسىبىنىڭ دامۋ قۋاتى مىعىم بولىپ، جاپپاي جانداندى. 1 - ايدان 4 - ايعا دەيىن وبلىسقا توتە قاراستى ورىندار ەل ىشىنەن 14 ميلليون 29 مىڭ 900 ادام - رەت ساياحاتشى قابىلداپ، سايكەس مەزگىلدەگىدەن %19.09 ارتتى، ساياحات كىرىسى 9 ميلليارد 324 ميلليون يۋانعا  جەتىپ، سايكەس مەزگىلدەگىدەن %6.32 ارتتى. 

سارا نىساندار ساياحات كاسىبىنىڭ قارىشتاپ دامۋىن جەبەدى

ساياحاتشىلاردىڭ قاۋىرت ارتۋى ساياحات نەگىزدىك قۇرىلعىلارىنا، ساياحات ونىمدەرىنە، قىزمەت وتەۋدى قامتاماسىز ەتۋگە جانە قىزمەت وتەۋ ساپاسىنا اناعۇرلىم جوعارى تالاپ قوياتىنى داۋسىز.وتكەن جىلى قۇلجا قالاسى ۇسىنىلىم تەبىنىن ارتتىرىپ، ىلە وزەنى كورىنىس رايونىندا نەگىزدىك قۇرىلعىلاردىڭ دارەجەسىن جوعارىلاتۋدى ىلگەرىلەتىپ، سەيىل - سەرۋەن ساياحاتى نىساندارىن كوبەيتىپ، ساياحاتشىلاردىڭ ٴتۇيسىنۋ سەزىمىن جوعارىلاتتى. 

حۋايۋان وڭتۇستىك جولىنىڭ باتىس جاعىنداعى الما كولى نىسانى ورنالاسقان ورىن ٴاسىلى ٴبىر قامىستى قويناۋ ەدى، استى ساز بالشىق بولعاندىقتان، ساياحاتشىلار بۇل قامىستى قويناۋعا كىرە المايتىن، قۇلجا قالالىق مادەنيەت ـ ساياحات مەكەمەسى بۇل ارانى ىلە وزەنى ساياحاتى نەگىزدىك قۇرىلعىلارىنىڭ دارەجەسىن جوعارىلاتۋ ينجەنەرياسىنا ەنگىزدى. الما كولى نىسانى سۋلى القابىنىڭ كولەمى 60 مۋدان اسادى، كول اينالما جولىنىڭ ۇزىندىعى 1000 مەترگە تايايدى. نىسان سالىنىپ بولعاننان كەيىن قالا تۇرعىندارىنا ساياحاتتاپ، سەيىل ـ سەرۋەن قۇراتىن ورىن ازىرلەپ بەرۋدەن سىرت، تاعى ساۋداگەر شاقىرىپ، قارجى ەنگىزۋ ارقىلى ماڭىنداعى شارۋاشىلىق فورماتسيالارىن جاقسارتاتىن بولادى. 

وتكەن جىلى قۇلجا قالاسى ساياحات ٴتۇيىندى نىسان قۇرىلىستارىن ۇزدىكسىز جەدەلدەتىپ، كورىنىس رايوندارىنىڭ ساپاسىن جوعارىلاتتى. سونىمەن بىرگە، ساۋداگەر شاقىرىپ، قارجى ەنگىزۋدى بەلسەنە ورىستەتىپ، مادەنيەت، ساياحات نىساندارىنىڭ ىرگە تەۋىپ، اتقارىلۋىن تارتىپپەن ىلگەرىلەتتى. قۇلجا قالالىق مادەنيەت ـ ساياحات مەكەمەسى ساۋداگەر شاقىرىپ، قارجى ەنگىزۋ ارقىلى جالپى 11 نىسان ەنگىزدى، كەلىسىم بويىنشا جالپى 2 ميلليارد 220 ميلليون يۋان قارجى قوسىلىپ، قازىرگە دەيىن 629 ميلليون يۋان قارجى تياناقتاندى.

5 ـ ايدىڭ 28 ـ كۇنى حۋاچىڭ توبى شينجياڭ بولىمشە سەرىكتەستىگى نىسان باسقارۋعا مەردىگەر بولعان ىلە قازانشى ٴداستۇرلى ۇلتتىق سالت ـ سانا مادەنيەت كورمە رايونىنىڭ قۇرىلىس نىسانى جۇمىس باستادى. بۇل نىسان قۇلجا قالالىق مادەنيەت ـ ساياحاتقا قارجى قوسۋ (توبى) شەكتى جاۋاپكەرشىلىك سەرىكتەستىگىنىڭ قارجى قوسۋىمەن سالىنعان، ىلە كونە قالاسىنىڭ قازانشى ۇلتتىق سالت ـ سانا ساياحات رايونىنا ورنالاسقان، يەلەگەن جەر اۋماعى 54.9 مۋ، قۇرىلىس اۋماعى 48195 شارشى مەتر. نىسان انار گۇلى الاڭى، انار گۇلى كورمە سارايى، «وزگەشە مادەنيەت»  سالت ـ سانانى سەزىنۋ كوشە رايونى، «ىلە ستيلى» ٴدامدى تاعامداردان ونەر كورسەتۋ ورتالىعى، ۇلتتىق مادەنيەت تاقىرىپتىق قوناق ٴۇيى سىندى 5 بولىمشە قۇرىلىس رايونىنا بولىنەدى، سونىمەن بىرگە، جەر استى اۆتوكولىك توقتاتۋ الاڭى سالىنىپ، سايكەستى قۇرىلعىلار ورناتىلادى، بۇعان جالپى 356 ميلليون يۋان قارجى قوسىلعان. 

بۇل نىسان وتكەن جىلى اۆتونوميالى وبلىستا ٴتۇيىندى تۇردە سالىنعان 16 ساياحات سارا نىسانىنىڭ ٴبىرى. وسى تەكتەس ساياحات سارا نىساندارىن سالۋ مەن اتقارۋ ىلە ساياحات كاسىبىنىڭ جوعارى ساپالى دامۋىنا بەرىك نەگىز قالادى.

ساياحات ونىمدەرى جاپپاي تولىستى

نەگىزدىك قۇرىلعىلاردى ۇزدىكسىز كەمەلدەندىرۋمەن بىرگە، ساياحات ونىمدەرىمەن قامداۋ جاعى دا كۇن سايىن تولىسا ٴتۇستى.

بىلتىر 8 ـ ايدىڭ 31 ـ كۇنى كۇنەس اۋدانى جىل باسىندا ەنگىزىلگەن جالپى 300 ميلليون يۋانعا جۋىق قارجى قوسىلعان نارات كورىنىس رايونىنداعى «تيانشانداعى شوپان جىرى» وسى زامانعى ات ٴۇستى ٴبيى تەاترحاناسىنىڭ دارەجەسىن جوعارىلاتۋ، جاڭالاۋ نىسان قۇرىلىسى ورىندالىپ بولدى، مۇقيات دايىندالعان كولەمدى تەاتر «ناراتتا قاراۋىلدا تۇرۋ» جاڭادان سالىنعان تەاترحانادا تۇڭعىش رەت قويىلدى. 

العاشقى توپتاعى مەملەكەتتىك تۇتاس وڭىرلىك ساياحاتتان ۇلگى كورسەتۋ رايونى رەتىندە ساياحات كاسىبىن اناعۇرلىم بايىتۋ ٴۇشىن، موڭعۇلكۇرە اۋدانىنداعى ٴارقايسى كورىنىس رايوندارى، كورىنىس تۇيىندەرى ساياحات ۇلگىسىندە ۇزدىكسىز جاڭالىق اشىپ، ساياحات بايلىعىن جانداندىرىپ، كاسىپ تىزبەگىن ۇزارتىپ، قامداۋ ٴتۇيىنىن ساپالىلاندىردى. بىلتىر موڭعۇلكۇرە اۋدانى «مايەك قىزىل قالاشىعى» زيالى جاستار سارايى كورىنىس رايونىنىڭ نەگىزدىك قۇرىلعىلارى مەن كاسىپ كۇيىن جاقسارتۋ نىسانى، موڭعۇلكۇرە اۋدانى سازدىق باقشاسى تۇزدە اتقا ٴمىنۋ كلۋبى سياقتى قۇرىلىس نىساندارىن ٴتۇيىندى تۇردە اتقارىپ، ٴارقايسى كورىنىس وڭىرلەرىنىڭ نەگىزدىك قۇرىلعىلارى ورەسىن  اناعۇرلىم جوعارىلاتىپ، ساياحات كاسىبىنىڭ ىقپالداستىق كۇيىن ارتتىرىپ، ساياحات مادەنيەتى مازمۇنىن ۇزدىكسىز اشىپ، ساياحات ساپاسىن جوعارىلاتتى.

ىلەنىڭ ٴتورت ماۋسىمى دا كوركەم،  قىس ماۋسىمىنىڭ كوركەمدىگى وزگەشە.

12 ـ ايدىڭ 1 ـ كۇنى نارات كورىنىس رايونى قار ـ مۇز ساياحاتىنىڭ جاڭا ۇلگىسىن اشىپ، قار ساياحات بايلىعى ابزالدىعىن سۇيەنىش ەتىپ، قار سپورتى، قاردان ٴلاززاتتانۋ، قاردا سەيىل ـ سەرۋەن قۇرۋ سياقتى ەرەكشە ساياحات تۇرلەرىن اشىپ، شاڭعى تەبۋ، شاڭعىمەن باتپىراۋىق ۇشىرۋ، سىرلى القاپتان ەندەي ٴوتۋ، قار موتوتسيكلى، قالقىما كولىك، UTV ۇلگىسىندەگى دالالىق اۆتوكولىك سياقتى قىسقى كوڭىل اشۋ نىساندارى مەن قىسقى قىسقا كەسكىن جاسامپازدىق جارىسى سياقتى قىس ماۋسىمىن باستى تاقىرىپ ەتكەن قيمىلدار وتكىزدى. 

12 - ايدىڭ 18 - كۇنى تۇستەن بۇرىن 2021 ـ جىلعى تەكەس اۋدانى «قىسقى وليمپيادا سپورت جارىسىن قارسى الۋ . قار ـ مۇز ساياحاتى» قىسقى ساياحاتىنىڭ باستالۋ سالتى قاراجون قار ـ مۇز سپورتى ورتالىعىندا وتكىزىلدى، بۇل تەكەس اۋدانىنىڭ 2021 ـ جىلعى قىسقى ساياحاتىنىڭ رەسمي باستالعانىن كورسەتەدى. قيمىل 3 ٴبولىم 20 نەشە تۇرگە ٴبولىنىپ، قاراجون، سەگىز تاڭبالى قالاشىق سياقتى ساياحات ماركاسىن سۇيەنىش ەتىپ، ەل ٴىشى ـ سىرتىنداعى ساياحاتشىلارعا تەكەس اۋدانىن جان ـ جاقتى، ٴار قىرىنان تانىستىرىپ، تەكەس اۋدانىنىڭ قىسقى كوركىن ايگىلەدى. 

تاياۋ مەزگىلدەن بەرى ىلە مول قار ـ مۇز بايلىعىن سۇيەنىش ەتىپ، «قىسقى وليمپيادا سپورت جارىسىن شات مەرەيمەن قارسى الۋدى» نەگىزگى تاقىرىپ ەتىپ، قىسقى ساياحاتتى جوعارى ولشەممەن جوبالاپ، قار ـ مۇز ساياحاتى تۇرلەرىن ۇزدىكسىز مولايتىپ، قىسقى ساياحات تۇرلەرىن اشتى ٴارى قىسقى ساياحاتتى ۇيىمداستىرۋ تەبىنىن ارتتىردى، اۋدان، قالالار قىسقى ساياحات تۇرلەرى مەن ساياحات جەلىلەرىن ۇزدىكسىز جاڭالاپ، اشىپ، قار ـ مۇز ساياحاتىن زور كۇشپەن دامىتىپ، قار شاڭعى الاڭىنداعى جارىس جولى، قار موتوتسيكلى سياقتى قۇرىلعىلاردى كەمەلدەندىرۋمەن بىرگە، قىسقى مالتاۋ، شاڭعى تەبۋ، كونكي تەبۋ، قاردا فۋتبول تەبۋ سياقتى قار ـ مۇز سپورتىن بەلسەنە ورىستەتىپ، جۇرتشىلىقتىڭ قار - مۇز سپورتى مەن كوڭىل اشۋ قاجەتىن قاناعاتتاندىرماقشى.