لي كىچياڭ شىعىس تيموردىڭ زۇڭليى رۋاركپەن ٴوزارا قۇتتىقتاۋ تەلەگرامماسىن جولدادى

شينحۋا اگەنتتىگىنىڭ 5 - ايدىڭ 20 - كۇنى بەيجيڭنەن بەرگەن حابارى. 5 - ايدىڭ 20 - كۇنى مەملەكەت ٴتوراعاسى شي جينپيڭ شىعىس تيموردىڭ زۇڭتۇڭى حورتامەن ٴوزارا قۇتتىقتاۋ تەلەگرامماسىن جولداپ، شىعىس تيموردىڭ تاۋەلسىزدىكتى قالپىنا كەلتىرگەندىگىنىڭ 20 جىلدىعىن جانە جۇڭگو مەن شىعىس تيموردىڭ ديپلوماتيالىق قارىم - قاتىناس ورناتقاندىعىنىڭ 20 جىلدىعىن قۇتتىقتادى.

شي جينپيڭ مىنالاردى اتاپ كورسەتتى: 20 جىلدان بەرى شىعىس تيمور ەكونوميكانى بەلسەنە دامىتىپ، حالىق تۇرمىسىن جاقسارتىپ، جالىندى ومىرشەڭدىك كۇش قاۋلاتتى. جۇڭگو مەن شىعىس تيمور دوستىعىنىڭ تاريحى ۇزاق. ديپلوماتيالىق قارىم - قاتىناس ورناتقان 20 جىلدان بەرى ەكى جاقتىڭ ساياسي ٴوزارا سەنىمدىلىگى ۇزدىكسىز تەرەڭدەپ، ناقتى سەلبەستىگى تىڭعىلىقتى ىلگەرىلەپ، گۋمانيتارلىق اۋىس - كۇيىسى كۇن سايىن جيىلەپ، ەكى ەل قارىم - قاتىناسىندا اقاۋسىز، ورنىقتى دامۋ جاعدايى جارىققا شىقتى.  

مەن جۇڭگو مەن شىعىس تيمور قارىم - قاتىناسىنىڭ دامۋىنا ايرىقشا ٴمان بەرەمىن، حورتا زۇڭتۇڭمەن بىرگە قۇلشىنىپ، جۇڭگو مەن شىعىس تيموردىڭ تاتۋ كورشىلىك، دوستىق، ٴوزارا سەنىمدى، ٴوزارا پايدا جەتكىزۋدەي جان - جاقتى سەلبەستىك سەرىكتەستىك قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتىپ، ەكى ەلدى جانە ەكى ەل حالقىن باقىتقا كەنەلتۋدى قالايمىن.

حورتا مىنالاردى ٴبىلدىردى: شىعىس تيمور جۇڭگونىڭ ٴوڭىردىڭ جانە دۇنيە ٴجۇزىنىڭ بەيبىتشىلىگىن، ورنىقتىلىعىن جەبەۋدە شەشۋشى رول اتقارعاندىعىن القايدى، جۇڭگونىڭ شىعىس تيموردىڭ مەملەكەت قۇرىلىسى بارىسىندا كۇش سالا قولداۋ كورسەتكەندىگىنە العىس ايتادى. شىعىس تيمور جاق جۇڭگو جاقپەن باتىل ىنتىماقتاسىپ، ەكى جاقتىڭ دوستىعى مەن سەلبەستىگىن كۇشەيتەدى.

سول كۇنى مەملەكەتتىك كەڭەستىڭ زۇڭليى لي كىچياڭ شىعىس تيموردىڭ زۇڭليى رۋاركپەن ٴوزارا قۇتتىقتاۋ تەلەگرامماسىن جولدادى. لي كىچياڭ مىنالاردى ٴبىلدىردى: جۇڭگو مەن شىعىس تيمور ديپلوماتيالىق قارىم - قاتىناس ورناتقان 20 جىلدان بەرى، ەكى ەلدىڭ قارىم - قاتىناسى ٴساتتى دامىپ، ٴارقايسى سالاداعى اۋىس - كۇيىسى، سەلبەستىگى ورنىقتى ىلگەرىلەدى. جۇڭگو جاق شىعىس تيمورمەن بولعان دوستىق سەلبەستىك قارىم - قاتىناسىن دامىتۋعا باسا ٴمان بەرەدى، شىعىس تيموردىڭ دامۋ قۇرىلىسىنا ۇزدىكسىز قولداۋ كورسەتەدى، ەكى جاق قارىم - قاتىناسىنىڭ ۇزدىكسىز تەرەڭدەۋىن، ناقتىلانۋىن ىلگەرىلەتەدى.

رۋارك مىنالاردى ٴبىلدىردى: شىعىس تيمور مەن جۇڭگونىڭ باۋىرلاستىق دوستىق سۇيىسپەنشىلىگىنىڭ تامىرى تەرەڭ، ەكى ەلدىڭ سەلبەستىگى ناتيجەلى بولدى. ەكى جاقتىڭ سەلبەستىكتى اناعۇرلىم كۇشەيتىپ، ىندەتتەن كەيىنگى قايتا سەرپىلىپ قالپىنا كەلۋدەگى سىن - سايىستارعا قول ۇستاسا توتەپ بەرۋىن ٴۇمىت ەتەمىن.