汉文 ىلە اقپارات تورابىنا حوش كەلدىڭىزدەر!
موڭعۇلكۇرە اۋدانى بايگە ىستەرىن ۇدايىلاندىرىپ، جىلقى شارۋاشىلىعىنىڭ دامۋىنا ومىرشەڭدىك كۇش ۇستەدى
2022-05-30 12:09:49     كورىلىم:رەت كەلۋ قاينارى:ىلە گازەتى  جاۋاپتى رەداكتور:گۇلدەن ماقسات قىزى

ەرىكتى ٴتىلشى سۇن چينحۋا، پۋ جىچياڭ حابارلايدى. مامىرداعى موڭعۇلكۇرە بارشا تىرشىلىك جاندانعان، كوركى كوز سۇرىندىرەتىن كوركەم بەينەگە ەندى. 5 - ايدىڭ 18 - كۇنى موڭعۇلكۇرە اۋدانىنىڭ «ىلە تۇلپارى» اتىنداعى بايگە ىستەرىن ۇدايىلاندىرۋ قيمىلى موڭعۇلكۇرە اۋداندىق تۇلپار ساياحات، مادەنيەت باقشاسىندا باستالىپ،  موڭعۇلكۇرە اۋدانىنىڭ تۇتاس وڭىرلىك ساياحاتى مەن وسى زامانعى جىلقى شارۋاشىلىعىنىڭ دامۋىن اناعۇرلىم ىلگەرىلەتتى. 

سول كۇنگى قيمىلدا ايگىلى تۇلپار كورمەسى، ات ٴۇستى شەبەرلىگىنەن ونەر كورسەتۋ، 2 مىڭ مەترلىك قۇنان بايگەسى، 5 مىڭ مەترلىك دونەن بايگەسى جانە 2 مىڭ مەترلىك قۇنان جورعا جارىسى وتكىزىلدى. كوز الدا زىمىراعان تۇلپارلار، الىستاعى قارلى تاۋ، جاسىل جايلاۋ وزىندىك كەلبەتىمەن ساياحاتشىلارعا تەرەڭ اسەر قالدىردى. قۇلجا قالاسىنان كەلگەن ساياحاتشى ٴلاززات قادىر قىزى بىلاي دەدى: «موڭعۇلكۇرە اۋدانىنداعى قاراعانتى جايلاۋىنىڭ كورىنىسى ەرەكشە كوركەم. بايگەنى تۇڭعىش رەت وسىنداي جاقىن ارالىقتان كورىپ، قاتتى اسەرلەندىم. قيمىل مايدانى دۋماندى بولدى».

بەس مايدان جوعارى ورەدەگى بايگەگە قاتىناسقان  وبلىسقا توتە قاراستى ٴارقايسى اۋدان - قالادان كەلگەن شاباندوزدار تاماشا رۋحاني كۇيلەرىن بەينەلەدى. ىلە تۇلپارىنىڭ 5 مىڭ مەترلىك دونەن بايگەسى - وسى كۇنگى جارىس تۇرلەرىندەگى ەڭ نەگىزگى بايگە بولىپ، بايگە الاڭى قىزۋ دۋمانعا بولەنىپ، 20 نەشە شاباندوز جارىسقا ساقاداي سايلاندى. بايگە باستالۋدان بۇرىن شاباندوزدار دايىندىق رايونىندا ارعىماقتارىن جاتتىقتىرىپ، بايگە باستالۋ بەلگىسى بەرىلىسىمەن شاباندوزدار بەينە ادىرنادان شىققان وقتاي زىمىرادى.

ىلە تۇلپارىنىڭ 5 مىڭ مەترلىك دونەن بايگەسىنىڭ اعا جۇلدەگەرلىگىن ەنشىلەگەن شاباندوز ەرجول لاق ۇلى بىلاي دەدى: «بۇگىن بايگەدە اتىمنىڭ بابى وتە جاقسى، بايگەنىڭ سوڭعى جارتى مايدانىندا باسقالاردى باسىپ وزىپ، جۇلدەگەر بولدىم. بۇدان بىلاي ۇزدىكسىز قۇلشىنىپ،  اتىمدى جاقسى باپتاپ، ٴتىپتى دە جاقسى ناتيجەلەرگە قول جەتكىزەمىن».

جارىس ىستەرى اياقتاعان سوڭ، جارىستى مىندەتىنە الىپ وتكىزگەن ورىن سيلىق تاراتۋ سالتىن وتكىزىپ، بايگەدە وزىپ شىققان شاباندوزدارعا سيلىق لوڭقاسىن تاراتتى.

وسى زامانعى جىلقى شارۋاشىلىعى كاسىبىنىڭ تەز قارقىنمەن دامۋىنا ىلەسە، موڭعولكۇرە اۋداندىق پارتكوم، ۇكىمەت مول جىلقى شارۋاشىلىعى بايلىعىنا سۇيەنىپ، جىلقى شارۋاشىلىعى مەن 1 - ، 2 - ، 3 - كاسىپتى توعىسپالى دامىتىپ، ٴار جىلى جەلىلەس ات ٴۇستى ونەرى جارىس قيمىلدارىن وتكىزىپ كەلەدى، بۇكىل ەلدىڭ جەر - جەرىندەگى شاباندوزدار مەن 10 مىڭ بايگە اتى بۇل قيمىلعا قاتىناسىپ، جىلقىنى وزەك ەتكەن كاسىپ تىزبەگى «جىلقى شارۋاشىلىعى+» توعىسپالى دامۋ  ۇلگىسىنىڭ جالپىلاسۋىن ىلگەرىلەتىپ، بۇقارانىڭ مادەني تۇرمىسىن بايىتىپ قالماستان، موڭعولكۇرە اۋدانىنىڭ وسى زامانعى جىلقى شارۋاشىلىعىنىڭ دامۋىنا تىڭ ومىرشەڭدىك كۇش ۇستەدى.