ەرىكتى تىلشىلەر كەنجەتاي، جاناتالى، شياۋ لي حابارلايدى. جۇمىستاندىرۋدى ماڭداي الدى ورىنعا قويۋ ستراتەگياسىن دايەكتى اتقارىپ، مادەنيەت - ساياحات كاسىبىن دامىتۋدىڭ جۇمىستاندىرۋدى جەبەۋ رولىن تولىق ساۋلەلەندىرىپ، مادەنيەت - ساياحات كاسىپورىندارىنا دارىندى باۋراۋعا بەلسەندى دانەكەر بولۋ ٴۇشىن، 6 - ايدىڭ 24 - كۇنى اۆتونوميالى رايوننىڭ ساياحات كاسىبىنە ارناۋلى قىزمەتكەر قابىلداۋ قيمىلىنىڭ باستالۋ سالتى جانە ناق مايداندا قىزمەتكەر قابىلداۋ جينالىسى (نەگىزگى جينالىس الاڭى) كۇنەس اۋدانىنىڭ حالىق الاڭىندا وتكىزىلدى.

بۇل رەتكى قىزمەتكەر قابىلداۋ جينالىسىن اۆتونوميالى رايوندىق ادام كۇشى بايلىعى جانە قوعامدىق قامتاماسىزداندىرۋ مەڭگەرمەسى ۇيىمداستىرعان، اۆتونوميالى رايوندىق الەۋمەتتىك جۇمىستاندىرۋعا قىزمەت وتەۋ ورتالىعى، ىلە وبلىستىق ادام كۇشى بايلىعى جانە قوعامدىق قامتاماسىزداندىرۋ مەكەمەسى مىندەتىنە الىپ وتكىزگەن، كۇنەس اۋداندىق پارتكوم مەن ۇكىمەت سەلبەسكەن؛ باستىسى ساياحات سەرىكتەستىكتەرى، ساياحات كورىنىس رايوندارى، ساياحات كووپەراتيۆتەرى سياقتى كاسىپورىندار مەن ساياحات كاسىبىمەن شۇعىلدانۋ نيەتى بار ٴتۇرلى سالاداعى جۇمىس ىزدەۋشىلەرگە ورتاق تۇعىر ازىرلەپ بەرىپ، كاسىپورىندار مەن جۇمىس ىزدەۋشىلەردى ٴونىمدى، دالمە - ٴدال ٴتۇيىلىستىرۋدى ماقسات ەتكەن. قيمىل الاڭى قىزمەتكەر قابىلداۋ رايونى، ساياحات ەرەكشە ونىمدەرىن كورمەلەۋ رايونى، ساياحات ەرەكشە ونىمدەرىن تانىستىرۋ رايونى، ساياساتتان ۇگىت جاساۋ، كەڭەس بەرۋ رايونى، كەڭەسۋ - كەلىسىم جاساسۋ رايونى جانە وزگەشە ٴدامدى تاعامدار جاساۋ ونەرى جارىس رايونى سياقتىلارعا بولىنگەن، ىلە اراق كاسىبى شەكتى جاۋاپكەرلىك سەرىكتەستىگى، قۇلجا مادەنيەت - ساياحات توبى، توعىزتاراۋ اۋداندىق مادەنيەت - ساياحاتقا قارجى قوسۋ، دامىتۋ شەكتى سەرىكتەستىگى، موڭعۇلكۇرە اۋداندىق تۇتاس وڭىرلىك ساياحاتقا قارجى قوسۋ، دامىتۋ شەكتى سەرىكتەستىگى سياقتى جۇزدەن استام كاسىپورىن مادەنيەت كاسىبى تيجاراتى، ساياحات باسقارۋ، قوناقجاي، اس - سۋ، كينو - تەلەۆيزيا، مەديا سياقتى جاقتارداعى ٴبىر مىڭ 500 دەن استام قىزمەت ورنىمەن قامداعان. قىزمەتكەر قابىلداۋ رايونىندا ادام قالىڭ بولعانىمەن، ٴتارتىبى ەرەكشە رەتتى بولدى. اۆتونوميالى رايوندىق الەۋمەتتىك جۇمىستاندىرۋعا قىزمەت ەتۋ ورتالىعى پارتكومىنىڭ مۇشەسى، ورىنباسار مەڭگەرۋشىسى شىن پيڭجياڭ تانىستىرىپ بىلاي دەدى: ناق مايداندا قىزمەتكەر قابىلداۋمەن ٴبىر ۋاقىتتا ينتەرنەتتە «تىكە تاراتۋ ارقىلى قىزمەتكەر قابىلداۋ» قيمىلىن دا ورىستەتتىك. وسى رەتكى قىزمەتكەر قابىلداۋ جينالىسىنىڭ كولەمى زور، قاتىناسقان كاسىپورىنداردىڭ بەدەلى جوعارى، قوعامدىق ىقپالى كۇشتى بولدى. العاشقى ساناققا نەگىزدەلگەندە وسى كۇنى كۇنەس اۋدانىنداعى نەگىزگى جينالىس الاڭىندا رەت سانى بويىنشا 4 مىڭنان استام ادام قيمىلعا قاتىناسقان، مۇنىڭ ىشىندە ٴبىر مىڭ 500 دەن استامى ادام ىستەتۋشى ورىندارمەن جۇمىستانۋعا نيەت ٴبىلدىرىپ كەلىسىم بەرگەن. قيمىل مايدانىندا 20 مىڭ نۇسقادان استام ٴتۇرلى ۇگىت ماتەريالى تاراتىلعان. 

«بۇل رەتكى ساياحات كاسىبىنە ارناۋلى قىزمەتكەر قابىلداۋ جينالىسى بۇكىل شينجياڭنىڭ 14 ايماق، وبلىسىندا ٴبىر ۋاقىتتا وتكىزىلدى. ەكى ساعاتقا جۋىق تىكە تاراتۋ قيمىلىن 800 مىڭنان استام ادام كوردى. جەلىدە <تىكە تاراتۋدا قىزمەت ورنىن تانىستىرۋ> ارقىلى ٴبىر مىڭ 700 دەن استام قىزمەت ورنى جاريالانىپ، كوزدەگەن ونىمدىلىككە قول جەتكىزدىك» دەدى شىن پيڭجياڭ. 

كۇنەس اۋدانىنداعى نەگىزگى جينالىس الاڭىنىڭ ەرەكشە ونىمدەردى كورمەلەۋ رايونىندا 30 دان استام ساياحات - مادەنيەت كاسىپورنى وبلىسقا توتە قاراستى ورىنداردان شىعاتىن جەرگىلىكتىڭ ەرەكشە ونىمدەرىنەن بال، اق اراق، قىزىل اراق، ٴسۇت ونىمدەرى، كەستەلى بۇيىمدار سياقتى ساياحات ونىمدەرىنەن 100 دەن استام ٴتۇرىن (توبىن) شوعىرلى كورمەلەپ، كوپتەگەن ساياحاتشىنى ساتىپ الۋعا باۋرادى. وزگەشە ٴدامدى تاعام پىسىرۋ ونەرى جارىس رايونىندا 16 ۋاكىلدەر ۇيىرمەسى ٴبىر مايداندا باسەكەگە ٴتۇسىپ، پالاۋ، جياۋماجي، كاۋاپ سياقتى وزگەشە تاعامدارى دايىنداۋدان جارىسا ونەر كورسەتتى.

كۇنەس اۋداندىق بازار باقىلاۋ - باسقارۋ مەكەسى پارتگرۋپپاسىنىڭ مۇشەسى ليۋ بيڭ تانىستىرىپ بىلاي دەدى: كۇنەس اۋدانىنىڭ وزگەشە ٴدامدى تاعامدارىن تولىق كورسەتىپ، اۋداننان جانە وبلىستان سىرت جەرلەردەن كەلگەن ساياحاتشىلاردى كۇنەسكە كەلىپ ساياحاتتاۋعا، تاماقتانۋعا باۋراۋ ٴۇشىن، كۇنەس اۋدانى 3 - كەزەكتى «ىلە اراق كاسىبى لوڭقاسى» اتىنداعى وزگەشە ٴدامدى تاعامدار جارىسىن وتكىزدىك، تۇتاس اۋدان بويىنشا وزگەشە تاعام جاسايتىن 16 اس - سۋ ورنى باسەكەگە قاتىناسىپ، اسپازدىق ونەرلەرىن تولىق ايگىلەدى.