شي جينپيڭ ينتەرنەت قولدانۋشىلاردىڭ پارتيا 20 - قۇرىلتايىنا قاتىستى قىزمەتتەر جونىندەگى پىكىر - ۇسىنىستارىن زەرتتەۋ، قابىلداۋ جونىندە ماڭىزدى نۇسقاۋ بەرىپ، بىلاي دەپ باسا دارىپتەدى

ينتەرنەت قاتارلى ٴتۇرلى ارنالار ارقىلى حالىقتىڭ قاجەتىن بىلۋگە، حالىقتان اقىل سۇراۋعا شەبەر بولىپ،حالىق ۇنىنە اناعۇرلىم ويداعىداي قۇلاق ٴتۇرىپ، حالىق رايىنا قۇرمەت ەتىپ، حالىق تىلەگىنە ۇيلەسۋ كەرەك

شينحۋا اگەنتتىگىنىڭ 6 - ايدىڭ 26 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ جۋىقتا ينتەرنەت قولدانۋشىلاردىڭ پارتيا 20 - قۇرىلتايىنا قاتىستى قىزمەتتەر جونىندەگى پىكىر - ۇسىنىستارىن زەرتتەۋ، قابىلداۋ جونىندە ماڭىزدى نۇسقاۋ بەرىپ، بىلاي دەپ باسا دارىپتەدى: پارتيانىڭ 20 - قۇرىلتايى پارتيا مەن مەملەكەتتىڭ ساياسي ومىرىندەگى ٴىرى ٴىس. پارتيانىڭ مەملەكەتتىك قۇرىلتايىنا قاتىستى قىزمەتتەردى ارقاۋ ەتىپ ينتەرنەتتە پىكىر جيناۋ بۇكىل پارتيانىڭ، بۇكىل قوعامنىڭ مەملەكەتتىڭ دامۋىنا، ۇلتتىڭ گۇلدەنۋىنە كەڭەس بەرىپ، ٴجون سىلتەۋىنىڭ ٴونىمدى تاسىلدەرىنىڭ ٴبىرى، سونداي - اق جالپى بارىستىق حالىق دەموكراتياسىنىڭ جاندى بەينەلەنۋى. بۇل رەتكى قيمىلعا قالىڭ كادر - بۇقارا ىستىق ىقىلاسپەن نازار اۋدارىپ، بەلسەنە ات سالىسىپ، كوپتەگەن سىندارلى پىكىر جانە ۇسىنىس بەردى، قاتىستى جاقتار مۇقيات زەرتتەپ، تولىق قابىلداۋ كەرەك. وسى رەتكى قيمىلدىڭ تابىستى ٴادىسىن قورىتىندىلاپ، جاڭا جاعدايداعى بۇقارالىق لۋشيانمەن ويداعىداي ٴجۇرىپ، ينتەرنەت قاتارلى ٴتۇرلى ارنالار ارقىلى حالىقتىڭ قاجەتىن بىلۋگە، حالىقتان اقىل سۇراۋعا شەبەر بولىپ، حالىق ۇنىنە اناعۇرلىم ويداعىداي قۇلاق ٴتۇرىپ، حالىق رايىنا قۇرمەت ەتىپ، حالىق تىلەگىنە ۇيلەسىپ، پارتيا مەن مەملەكەتتىڭ ٴتۇرلى قىزمەتتەرىن اناعۇرلىم ويداعىداي ىستەۋ كەرەك.

باس شۋجي شي جينپيڭنىڭ بيىل 2 - ايداعى ماڭىزدى نۇسقاۋىنىڭ رۋحىنا ساي، پارتيا 20 - قۇرىلتايىنا قاتىستى قىزمەتتەر جونىندە ينتەرنەتتە پىكىر جيناۋ قيمىلى 4 - ايدىڭ 15 - كۇنىنەن 5 - ايدىڭ 16 - كۇنىنە دەيىن ورىستەتىلدى، حالىق گازەتىنە، شينحۋا اگەنتتىگىنە، ورتالىق راديو - تەلەۆيزيا باس ستانسياسىنا قاراستى رەسمي سايتتار، اقپاراتتىق كليەنتتەر جانە «ۇيرەنۋدە قۋاتتى ەل» ۇيرەنۋ تۇعىرى جەكە - جەكە ارناۋلى ستون اشىپ، بۇكىل قوعامنىڭ پىكىر - ۇسىنىسىن تىڭدادى. قيمىلعا قالىڭ حالىق بۇقاراسى كەڭىنەن نازار اۋدارىپ جانە ات سالىستى، ينتەرنەت قولدانۋشىلاردان جالپى 8 ميلليون 542 مىڭنان استام ۇسىنىس قابىلدانىپ، پارتيا 20 - قۇرىلتايىنا قاتىستى قىزمەتتەر ٴۇشىن پايدالى دايەك ۇسىنىلدى.