ٴتىلشىمىز لۋ جۇڭ حابارلايدى. «بۇل مەنىڭ شينجياڭعا 2 - رەت كەلۋىم، ىندەتكە كەز كەلەمىز دەپ كىم ويلاعان. ىندەت تۋىلعاننان كەيىن تەكەس اۋدانىنىڭ بوگەلىپ قالعان ساياحاتشىلارعا قىزمەت وتەۋى، قامتاماسىزداندىرۋى توتەنشە جاقسى بولدى، ٴبىز تەكەستىڭ جىلۋلىققا، مەيىرىمدىلىككە تولى جەر ەكەنىن تەرەڭ سەزىندىك» دەدى 8 - ايدىڭ 10 - كۇنى گۋاڭجوۋلىق ساياحاتشى ليۋ جۇنحۇي اۋىلىنا قايتاتىن ساتتە شىن جۇرەكتەن تەبىرەنە.

بيىل 7 - ايدا ليۋ جۇنحۇي وتباسىنداعىلارىن ەرتىپ، ٴوز كولىگىمەن تەكەسكە كەلگەن ەدى، توسىن تۋىلعان ىندەت ولاردىڭ ساپارىنا كەسىرىن تيگىزىپ، ٴبىر ٴۇيلى جان امالسىز تەكەس اۋدانىندا بوگەلىپ قالعان بولاتىن.

8 - ايدىڭ 10 - كۇنى تەكەس اۋداندىق مادەنيەت - ساياحات مەكەمەسى قىزمەتكەرلەرىنىڭ كومەگىندە ليۋ جۇنحۇي اۋىلىنا قايتتى. اۋداندىق مادەنيەت - ساياحات مەكەمەسىنىڭ قىزمەتكەرلەرى ليۋ جۇنحۇيعا جاناشىرلىقپەن قاربىز، مينەرال سۋ سياقتى ماتەريالداردى ۇسىندى. «تەكەس اۋدانىنىڭ كورىنىسى كوركەم، ادامدارى ىزگى نيەتتى ەكەن، كەلەر جىلى، ٴسوزسىز، تاعى دا كەلەمىز» دەدى ليۋ جۇنحۇي.

بوگەلىپ قالعان 3 مىڭنان استام ساياحاتشىنىڭ قيىنشىلىعى مەن تالاپ - تىلەگىن دەر كەزىندە شەشۋ ٴۇشىن، تەكەس اۋدانى ساياحاتقا قىزمەت وتەۋ ارناۋلى القاسىن قۇرىپ، كادرلاردى بوگەلىپ قالعان ساياحاتشىلار جاتقان 48 قوناق ساراي مەن حالىقتىق تۇسەلحانانى كوتەرمەگە الۋعا ورنالاستىرىپ، دەركەزىندە مەڭگەرىپ، ساياحاتشىلاردىڭ تالاپ - تىلەكتەرىن ٴبىر جاقتى ەتتى. قايتامىز دەگەن تالاپ - تىلەگى بار ساياحاتشىلاردى ٴار كۇنى ساناققا الىپ، تەكەس اۋداندىق ىندەتتەن ساقتانۋ - تىزگىندەۋ قىزمەتى قولباسشىلىق شتابىنا جولداپ، ساياحاتشىلاردىڭ ساپار ٴىزىن تۇراقتاندىرعان سوڭ ٴوز كولىگىمەن كەلگەن ساياحاتشىلاردى رەتىمەن قايتۋعا ورنالاستىردى،

باسقا ساياحاتشىلار ارناۋلى كولىكپەن قۇلجا پويەز بەكەتىنە نەمەسە اۋەجايعا جەتكىزىلىپ، رەتىمەن قايتتى. سونىمەن بىرگە، تەكەس اۋدانى بارلىق قوناق سارايلارى مەن حالىقتىق تۇسەلحانالاردى وزىندىك قۇن باعاسىندا ساياحاتشى قابىلداۋعا جۇمىلدىردى. نياننيانشۇن مەيمانحاناسى، شيانجۇي شارۋالار شاعىن اۋلاسى، فانلي مەيمانحاناسى، شۋاڭپيڭ مەيمانحاناسى، انشين مەيمانحاناسى سياقتى حالىقتىق تۇسەلحانالار بەلسەنە سايكەسىپ، بوگەلىپ قالعان ساياحاتشىلاردى اقىسىز جاتىن ورىنمەن قامدادى. ەكونوميكادان ەرەكشە قينالعان ساياحاتشىلاردى بەلسەنە تۇرمىستىق بۇيىمدارمەن قامداپ، ولاردى ۋايىمنان ارىلتتى. مۇنان تىس، ساياحاتشىلار بوگەلىپ قالعان كەزدە، ولارمەن بايلانىس جاساپ، جاعداي ۇعىسىپ، ساياحاتشىلاردى توپقا ٴبولىپ، قاراجونعا ساياحاتتاۋعا، قاراجورعا ٴبيىن بىرگە بيلەۋگە ۇيىمداستىرىپ، ولاردىڭ بوگەلىپ قالعان كەزدەگى مادەني تۇرمىسىن بايىتتى. قازىر بوگەلىپ قالعان كوپتەگەن ساياحاتشى ٴساتتى تۇردە اۋىلىنا قايتتى.

بوگەلىپ قالعاندا دەركەزىندە اۋىلىنا قايتۋعا ۇيىمداستىرىلعان ساياحاتشىلاردان تىس، قازىر تاعى نەشە ونداعان ساياحاتشى ٴوز قالاۋلارىمەن تەكەس اۋدانىندا قالدى، مۇنىڭ ىشىندە كوپ ساندىسى وزدەرىنىڭ ۇيشە كولىگىمەن كەلگەن ساياحاتشىلار. ساياحاتشىلاردىڭ تەكەس اۋدانىنداعى كەزىندەگى ٴتۇرلى قاجەتىن قامتاماسىزداندىرۋ ٴۇشىن، تەكەس اۋدانى وڭىرىندەگى بارلىق كورىنىس رايوندارى اۋداندا بوگەلىپ قالعان ساياحاتشىلارعا ەسىك بەلەتىن كەشىرىم ەتۋ ساياساتىن بەلگىلەپ، تەكەس اۋدانىندا بوگەلىپ قالعان ۇيشە كولىكتە، توسەكتى كولىكتە، شاتىردا تۇنەگەندەردى تەگىن تاماقپەن قامدادى ٴارى مونشا، تەلەفون زارياتتاۋ، گاز قۇيۋ سياقتى جان جادىراتارلىق قىزمەت وتەۋلەرمەن تەگىن قامداپ، بوگەلىپ قالعان ساياحاتشىلارعا ۇيگە كەلگەندەي جىلۋلىق سەزىندىردى. 

بەلگىلى سەبەپتەردەن موڭعۇلكۇرەدە بوگەلىپ قالعان شينجياڭنىڭ ٴىشى - سىرتىنان كەلگەن ساياحاتشىلارعا بار كۇشپەن قامتاماسىزدىق ازىرلەۋ ٴۇشىن، موڭعۇلكۇرە اۋدانى وسكەلەڭ ٴمان بەرىپ، عىلمي ٴبىر تۇتاس جوسپارلاپ، ساياحاتشىلاردىڭ جۇرەك ۇنىنە دەن قويا قۇلاق ٴتۇرىپ، ولاردىڭ مۇقتاجدىقتارىن ىشكەرىلەي ۇعىسىپ، بوگەلىپ قالعان ساياحاتشىلاردىڭ تالاپ - تىلەكتەرىنىڭ ۇيلەسىمدى شەشىلۋىنە كەپىلدىك ەتتى.

8 - ايدىڭ 11 - كۇنى ٴتىلشى موڭعۇلكۇرە اۋداندىق مادەنيەت - ساياحات مەكەمەسىنەن مىنانى ۇعىستى: جۋىقتا اۋداندىق مادەنيەت - ساياحات مەكەمەسى اۋدانداعى تيجارات جۇرگىزىپ جاتقان قوناق سارايلارى مەن حالىقتىق تۇسەلحانالارداعى بوگەلىپ قالعان ساياحاتشىلاردى جاپپاي اداقتاپ، بوگەلىپ قالعان ساياحاتشىلار ينفورماتسياسى تىزىمدىگىن جەدەل شىعارىپ، ولاردى دەر كەزىندە ىستىق لەنيالى كەڭەس سۇراۋ تەلەفونى، پسيحولوگيالىق جەتەكشىلىك ەتۋ سياقتى جان جادىراتارلىق قىزمەت وتەۋمەن قامداعان ٴارى جان - جاقتى ۇشتاستىرىپ، ورنالاستىرىپ، شينجياڭنىڭ سىرتىنان كەلگەن ساياحاتشىلاردىڭ رەتىمەن موڭعۇلكۇرەدەن، ىلەدەن اتتانۋىنا ٴجون سىلتەگەن. 8 - ايدىڭ 10 - كۇنىنە دەيىن موڭعۇلكۇرەدە 249 ساياحاتشى بوگەلىپ قالعان، مۇنىڭ ىشىندە 173 ساياحاتشى شينجياڭنان، 76 ساياحاتشى شينجياڭنىڭ سىرتىنان كەلگەن.

بوگەلىپ قالعان ساياحاتشىلارعا موڭعۇلكۇرەنىڭ مەيىرىن سەزىندىرۋ ٴۇشىن، 8 - ايدىڭ 5 - كۇنىنەن باستاپ اۋدان وڭىرىندەگى بارلىق كورىنىس رايوندارى بوگەلىپ قالعان ساياحاتشىلارعا ەسىك بەلەتىن كەشىرىم ەتۋ ساياساتىن بەلگىلەدى، اۋداندىق مادەنيەت - ساياحات مەكەمەسىنىڭ قىزمەتكەرلەرى بوگەلىپ قالعان ساياحاتشىلارعا مادەنيەت جاسامپازدىق ٴونىمى − «ٴمىنىپ قايت ٴبىر قىلقۇيرىق» تۋىندىسىن جانە تيانگۇڭ ىرىمشىگى سياقتى ەرەكشە تاعامداردى تارتۋ ەتىپ، ولاردىڭ ٴار جاقتىلى تالاپ - تىلەكتەرىن ەگجەي - تەگجەيلى ۇعىسىپ، قيىن ماسەلەلەرىن مۇمكىندىكتىك بارىنشا شەشتى، حالىقتىق تۇسەلحانالاردى، شارۋالار شاتتىعى ساياجايلارىن بوگەلىپ قالعان ساياحاتشىلارعا باي مازمۇندى مادەني كوڭىل اشۋ قيمىلدارىن وتكىزىپ بەرۋگە شابىتتاندىردى. سونىمەن بىرگە، موڭعۇلكۇرە اۋدانى بازاردى باقىلاۋ - باسقارۋ مەكەمەسى مەن مادەنيەت - ساياحات مەكەمەسىن ۇيىمداستىرىپ، بىرلەسكەن شاعىن گرۋپپا قۇرىپ، جۇلدىز دارەجەلى قوناق سارايلارىن، قوناقجايلاردى، حالىقتىق تۇسەلحانالاردى جاتاق اقىسىن ارزانداتۋ جاعىنان قىزمەت وتەۋگە باستادى، موڭعۇلكۇرە اۋداندىق حالىق ۇكىمەتى قوسىمشا قاراجات بەرىپ، بوگەلىپ قالعان ساياحاتشىلاردىڭ جاتاق اقىسىنا %40 تيىمدىلىك جاساپ، ساياحاتشىلاردىڭ حاۋىپسىز دە الاڭسىز جاتاققا جاتۋىنا كەپىلدىك ەتىپ، ساياحاتشىلاردىڭ رازىلىق دارەجەسىن جوعارىلاتتى.