لۋ جۇڭ  (ٴوز ٴتىلشىمىز)

رەداكتوردان: جاڭا جورىق - داڭق پەن ارمانعا تولى ۇزاق ساپار. پارتيانىڭ 20 - قۇرىلتايى ۇلى جوبانى كەسكىندەپ، العا ىلگەرىلەۋ سيگنالىن شالدى. ٴبىز قايرات - جىگەردى تاسقىنداتىپ، باتىلدىقپەن ەكپىندەي العا ىلگەرىلەپ، جاڭا ۇلى كۇرەس ارقىلى جاڭا ۇلى ىستەردى جاراتۋىمىز كەرەك.

بۇگىننەن باستاپ گازەتىمىز «جاڭا ٴداۋىر، جاڭا جورىق، جاڭا ۇلى ٴىس» ارناۋلى ايدارىن اشىپ، گازەتىمىزدىڭ تىلشىلىك ۇجىمى قالا، اۋىلدارداعى، الەۋمەتتىك اۋماقتارعا، ورگاندارعا، كاسىپورىندار مەن ٴىسورىندارعا، مەكتەپتەرگە، ٴتۇرلى جاڭا ەكونوميكالىق جاڭا ۇيىمدار مەن جاڭا قوعامدىق ۇيىمدارعا بارىپ تىلشىلىك ىستەۋ ارقىلى جازعان «جاناسىمدى، ٴنارلى، جالىندى» اقپارات تۋىندىلارىن جاريالاپ، نەگىزگى ساتىداعى كادرلار مەن بۇقارانىڭ پارتيا 20 - قۇرىلتايىنىڭ رۋحىن ۇيرەنۋدەگى، دايەكتىلەندىرۋدەگى، تياناقتاندىرۋداعى تيپتىك ادىستەرىن شوعىرلى اڭىس ەتىپ، جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىندا كورىكتى ىلە قۇرۋدىڭ جاندى بەينەسىن ايگىلەيدى.

«بيىل 2 فىن جەرگە اسقاباق ەگىپ، 3 مىڭ يۋان كىرىس كىرگىزدىم. كەلەر جىلى بۇدان دا كوبىرەك جەرگە ەكپەكشىمىن» دەدى 11 - ايدىڭ 17 - كۇنى نىلقى اۋدانى جاعالاستاي اۋىلى قۇجىرتاي قىستاعىنىڭ تۇرعىنى البەرگەن تورەقان ۇلى تىلشىگە قۋانىشتى بەينەمەن. قۇجىرتاي قىستاعىندا 165 وتباسى بار، بيىل ولار تۇڭعىش رەت اسقاباق ەكتى. ويتكەنى بۇل جۇمىس قۇجىرتاي قىستاعىنىڭ «اسقاباق ەگۋ جوسپارى» بويىنشا ىستەلگەن ەدى.

قۇجىرتاي قىستاعىنداعى تۇرعىنداردىڭ اۋلاسى كەڭ بولعانىمەن، باسىم كوپ ساندىسى تولىق پايدالانىلماعان. بۇدان بۇرىن نەگىزىنەن جۇگەرى مەن جوڭىشقا ەگىپ، جەم -ٴشوپ رەتىندە پايدالانىپ كەلگەن. قايتكەندە اۋىل - قىستاقتىڭ قونىستانۋ ورتاسىن رەتتەۋ - وڭاۋمەن بىرگە قىستاق تۇرعىندارىنىڭ اۋلا شارۋاشىلىعىن شالقىتىپ كىرىس كىرگىزۋىن جۇزەگە اسىرۋعا بولادى؟ 2021 - جىلى قىستا نىلقى اۋداندىق وقۋ - اعارتۋ مەكەمەسىنىڭ قۇجىرتاي قىستاعىندا تۇراتىن «ۇعىسۋ، تيىمدىلىك جاساۋ، توعىستىرۋ» قىزمەت اترەتى مەن قىستاقتىڭ «ەكى كوميتەتى» بىرلىكتە «اسقاباق ەگۋ جوسپارىن» اتقارا باستادى.

قىستاق تۇرعىندارى اۋلاسىنىڭ كولەمى ورتا ەسەپپەن 1.5 مۋ بولىپ، كەيبىر اۋلالاردىڭ كولەمى 3 تە 4 مۋعا جەتەدى. سونىمەن بىرگە، قۇجىرتاي قىستاعىنىڭ جەر ٴتۇزىلىسىنىڭ پارقى ٴبىرشاما زور، قىستاق تۇرعىندارىنىڭ اۋلاسى ويلى - شۇڭقىرلى، تەگىس جەر از، ونىڭ ۇستىنە قىستاقتا سۋ تاپشى بولۋ، قىستاق تۇرعىندارىنىڭ كوكونىس ەگۋ تاجىريبەسى كەمشىل بولۋ ماسەلەسى دە ورىن تەپكەن. اۋىل شارۋاشىلىق تەحنيكتەرىنىڭ جەتەكشىلىگىندە اسقاباق ەگىمشىلىگى يگىلىك جاراتىپ، كىرىستى ارتتىرۋدىڭ باستى جوباسىنا اينالدى.

«ٴبىز تالشىن، اسقاباق سياقتى جەرگىلىكتى ورىننىڭ كليماتىنا ۇيلەسەتىن، بازارداعى ساتىلىمى دا جاقسى 2 ٴتۇرلى سورتتى تاڭدادىق. اسقاباق قۋاڭشىلىققا ٴتوزىمدى، ۇزاق ساقتاۋعا بولاتىن، ٴتۇسىمى جوعارى، باسقارۋعا قولايلى، بازارداعى سۇرانىسى جوعارى سياقتى ەرەكشەلىكتەرگە يە، قىستاق تۇرعىندارى اسقاباق ەگىمشىلىگىمەن شۇعىلدانسا ايتارلىقتاي ەكونوميكالىق ونىمدىلىك جاراتادى» دەدى قۇجىرتاي قىستاعى پارتيا ياچەيكاسىنىڭ شۋجيى تيان ليچي.

بيىل 3 - ايدا قىزمەت اترەتى 2 مىڭ 300 يۋانعا اسقاباق تۇقىمىن ساتىپ الىپ، ونى قىستاقتاعى 165 وتباسىنا تەگىن تاراتىپ بەردى. سوڭىنان ارناۋلى تەحنيكتەردى تەحنيكالىق جاقتان جەتەكشىلىك ەتۋگە ۇسىنىس ەتتى. قىستاق تۇرعىندارىن الاڭداۋشىلىقتان ارىلتۋ ٴۇشىن قۇجىرتاي قىستاعى نىلقى اۋدانى سانحىيۋان اۋىل شارۋاشىلىعىن دامىتۋ شەكتى جاۋاپكەرشىلىك سەرىكتەستىگىمەن  اسقاباق ساتىپ الۋ كەلىسىمىنە قول قويىستى.

10 - ايدىڭ سوڭىندا اسقاباق ارت - ارتىنان پىسىپ، سانحىيۋان اۋىل شارۋاشىلىعىن دامىتۋ شەكتى جاۋاپكەرلىك سەرىكتەستىگى ٴار كيلوگرامىن 2 يۋاننان ساتىپ الدى. «قازىرگە دەيىن سانحىيۋان اۋىل شارۋاشىلىعىن دامىتۋ شەكتى جاۋاپكەرشىلىك سەرىكتەستىگى قىستاق تۇرعىندارى ەككەن 4.1 توننا اسقاباقتى ساتىپ الىپ، ٴار وتباسىنا نەشە ٴجۇز يۋاننان نەشە مىڭ يۋانعا دەيىن ۇقساماعان ەكونوميكالىق پايدا جەتكىزدى. بۇل قىستاق تۇرعىندارىنىڭ ەگىمشىلىك كاسىبىمەن شۇعىلدانۋ بەلسەندىلىگىن ەسەلەپ ارتتىردى. كوپتەگەن قىستاق تۇرعىندارى كەلەر جىلى اسقاباق ەگەتىن جەر كولەمىن كەڭەيتىپ، اۋلا شارۋاشىلىعىن دامىتىپ، كىرىستەرىن ارتتىرۋ ويلارىنىڭ بار ەكەندىگىن دە ٴبىلدىردى» دەدى تيان ليچي.

اسقاباق ەگىمشىلىگىنەن تىس، قۇجىرتاي قىستاعى تاعى سانحىيۋان اۋىل شارۋاشىلىعىن دامىتۋ شەكتى جاۋاپكەرشىلىك سەرىكتەستىگىمەن سەلبەستىك ورناتىپ، اسقاباقتان جاسالاتىن ازىق - تۇلىكتەردى مانەرلەۋدى جوسپارلاۋدا. «بيىل قىستا قىزمەت اترەتى مەن قىستاقتىڭ <ەكى كوميتەتى> قىسقى تەحنيكالىق ونەرگە قاۋىرت تاربيەلەۋ ورايىنان پايدالانىپ، قىستاق تۇرعىندارىن اسقاباقتان ازىق - تۇلىك جاساۋ ونەرىنە تاربيەلەۋ جوسپارىمىز بار. كەلەر جىلى كاسىپورىنمەن سەلبەستىك ورناتىپ، اسقاباق كۇلشەسى، اسقاباق قارماسى، اسقاباق نانى سياقتى جەلىلەس ونىمدەردى ٴوندىرىپ، اسقاباق ٴونىمىنىڭ قوسىمشا قۇنىن ارتتىرماقشىمىز» دەدى تيان ليچي.