ٴتىلشىمىز جاڭ جينفىڭ حابارلايدى. جاعىمدى ٴان اۋەنى، تارتىمدى تايكانداۋ ويىنى، قىزىقتى قار شاڭعى ويىنى، «الۋان ٴتۇستى باقىت بۇلتى» جانە قالقىعان شارلار...  12 - ايدىڭ 21 - كۇنى «قار - مۇزدى بويلاپ ىلەنى ەمىن - ەركىن ساياحاتتاۋ» اتىنداعى ىلە وبلىسىنىڭ 2022 - جىلعى قىسقى قار - مۇز ساياحاتىنىڭ باستالۋ سالتى تەكەس اۋدانى قاراجون حالىقارالىق قار شاڭعى دەمالىس رايونىندا وتكىزىلدى، بۇل ىلە وبلىسىنىڭ قىسقى ساياحاتىنىڭ رەسمي باستالعانىن ايگىلەيدى.

ناق مايداندا جەڭىل مۋزىكا ٴۇنى ىشىندە ولەڭدىك مۋزىكادا سۋرەت سالۋ ٴبيى «سۋ بوياۋلى تايجي» كونسەرتىمەن  قيمىلدىڭ شىمىلدىعى اشىلدى، «تۇسىمدە قاراجونعا قايتتىم» ٴانى كونسەرت مايدانىن قىزدىرىپ جىبەردى.

ىلە - شالا حانزۋدىڭ ۇلتتىق كيىمىمەن شاڭعى تەبۋ ويىنى، جالاڭ تاقتايمەن جوعارى دارەجەلى شاڭعى جولىندا ونەر كورسەتۋ، قازاق بويجەتكەندەرى ات اترەتىندەگىلەردىڭ قارلى القاپتا كوسىلە شابۋى، دالالىق جارىس، قارلى دالا قالقىمالى پاراشوت ويىنى جانە كوكبار، بايگە سياقتى باي مازمۇندى قار - مۇز قيمىلى كورەرمەندەر مەن ساياحاتشىلاردى وزىنە باۋرادى.

ٴۇرىمجى قالاسىنان كەلگەن قار شاڭعى اۋەسكەرى شاۋ يۇنچۋان: «كوركەم قاراجون قار شاڭعى الاڭىنا تۇڭعىش كەلۋىم، قار شاڭعى جولى ولشەمدى ەكەن، شاڭعى تەپكەندە تيتتەي دە توڭبادىم، تاماشا اسەرگە بولەندىم. كەيىن وتباسىمداعىلاردى ىلەنىڭ قار - مۇز ساياحاتىنىڭ تارتىمدىلىعىن سەزىنۋگە ەرتىپ كەلەمىن» دەدى.

قار - مۇز ساياحاتى جەرگىلىكتى ەكونوميكانىڭ دامۋىن دا جەبەدى. قىستاق تۇرعىندارى سۋسىندىق، جەرگىلىكتى ەرەكشە ٴونىم، ٴدامدى تاعام سياقتىلاردى ساتىپ، كىرىستەرىن ارتتىردى. شارۋالار شاتتىعى ساياجايىن اشقانىنا كوپ جىل بولعان جوۋ شۋەنىڭ قاقتامالارى ەرەكشە ٴدامدى بولىپ، قار شاڭعى الاڭىندا جارىم كۇندە 400 يۋاننان استام اقشا تاۋىپتى. ول قار - مۇز ساياحاتى مەزگىلىنەن پايدالانىپ كوبىرەك اقشا تاپپاقشى ەكەن.

تيجاراتتى جەبەۋ ٴۇشىن تەكەس اۋداندىق ۇكىمەت 100 مىڭ يۋاندىق قار شاڭعى بەلەتىن ۇسىنۋ قيمىلىن ورىستەتىپ، سول جەردە اشىلۋ سالتىنا قاتىناسقان ىلەنىڭ كوركەم كورىنىسى ساياحات سەرىكتەستىگى، يۇنتۋ ساياحات سەرىكتەستىگى، باتىس بولەك مەملەكەت ساياحات سەرىكتەستىگى سياقتى 30 ساياحات سەرىكتەستەرىنىڭ اربىرىنە 2 مىڭ يۋاندىق قار شاڭعى بەلەتىن ۇسىندى.

ىلە وبلىستىق ساياحات قوعامىنىڭ القاسى ما حۇڭلياڭ بىلاي دەدى: «ىلە وبلىسىنىڭ قىسقى ساياحاتى باستالۋدان بۇرىن، ٴبىز قاتىستى سالالاردان، تاراۋلاردان ٴارقايسى اۋدان، قالالاردىڭ قىسقى ساياحات قيمىلدارىن ۇعىسىپ، ساياحات سەرىكتەستىكتەردى اڭگىمە ٴماجىلىسىن اشۋعا بەلسەنە ۇيىمداستىرىپ، قىسقى ساياحاتقا قاتىستى ساياساتتار مەن شارالاردى ۇگىتتەپ، ٴتۇسىندىرىپ، قىسقى ساياحاتتىڭ ارناۋلى لەنياسىن بەلگىلەدىك، ٴار قايسى ساياحات سەرىكتەستىكتەرىن ٴتۇرلى ٴتيىمدى ساياساتتاردان ويداعىداي پايدالانۋعا قۋزاپ، جەتەكشىلىك ەتىپ، ىلەنىڭ قىسقى ساياحاتىن جانداندىردىق».جۋىق جىلداردان بەرى ىلە وبلىسى «شينجياڭ جاقسى جەر . ىلەنىڭ كوركەم كورىنىسى» ساياحات تانىسقىسىن كورنەكتىلەندىرىپ، وزگەشە قار - مۇز ساياحات بايلىعىنا سۇيەنىپ، قار - مۇز ساياحات فاكتورلارىن ۇزدىكسىز اشىپ، ورتاسى كوركەم، يقۋاتى كەمەلدى، قىزمەت وتەۋى ارناعا تۇسكەن، ساپاسى جاقسى ساياحاتتاعى كوزەۋلى ورىندى قۇلشىنا قالىپتاستىردى.

بيىل 12 - ايدان كەلەر جىلى ناۋرىزعا دەيىن ىلە وبلىسى 180 نەشە ٴتۇرلى باي مازمۇندى قار - مۇز ساياحاتى مەن ۇلتتىق سالت - سانا مادەنيەت قيمىلىن ىركەس - تىركەس وتكىزىپ، ساياحاتشىلاردىڭ قار - مۇز سپورتىنا، قار - مۇز قىزىقتى ويىن تۇرلەرىنە جانە ۇلتتىق سالت - سانا مادەنيەتىنە قاتىناسۋ قىزعىندىلىعى مەن سەزىنۋىن بارىنشا جوعارىلاتىپ، «قىس بايلىعىن» «بازارلى شارۋاشىلىققا» اينالدىرىپ، ىلە وبلىسىنىڭ قىسقى ساياحات ورلەۋىن كوتەرەدى.

وبلىستىق مادەنيەت جانە ساياحات مەكەمەسى پارتيا باسشىلىق گرۋپپاسىنىڭ شۋجيى، ورىنباسار مەكەمە باستىعى جاڭ چۇنميڭ بىلاي دەدى: «كەلەسى قادامدا ٴبىز ٴتۇرلى مادەنيەت، ساياحات قيمىلدارىن بەلسەنە ورىستەتىپ، ساياحات بازارىنىڭ ومىرشەڭدىك كۇشىن ارتتىرامىز؛ قىسقى ساياحات ۇگىتىن كۇشەيتىپ، ىلە ساياحاتىنىڭ ماركاسىن ۇزدىكسىز جاراتامىز؛ ٴتۇرلى ٴتيىمدى ساياساتتاردى تياناقتاندىرىپ، قىسقى ساياحاتتىڭ تەز ارادا قالپىنا كەلۋىنە دەم بەرەمىز؛ قىسقى ساياحاتتىڭ جاڭا كۇيىن، جاڭا ونىمدەرىن اشىپ، ونىممەن قامداۋدىڭ دەڭگەيىن ۇزدىكسىز جوعارىلاتۋدى ىلگەرىلەتىپ، قار - مۇز ساياحاتىن ۇزدىكسىز ىلگەرىلەتۋدى ىلە وبلىسىنىڭ ەكونوميكالىق دامۋىنىڭ جاڭا قوزعاۋشى كۇشىنە جانە قارجى قوسۋدىڭ قىزۋ تۇيىنىنە اينالدىرامىز».