شينجياڭنىڭ اۋىل شارۋاشىلىق تاراۋلارى ەگىس ۋاقىتىن مىقتى يگەرىپ، ەگىس دايىندىعىنا ازىرلەندى

انار بۇلت \ شينجياڭ گازەتىنىڭ ءتىلشىسى ليۋ ي 1 - ايدىڭ 30 - كۇنى ۇرىمجىدەن حابارلايدى. 1 - ايدىڭ 28 - كۇنى كوكتەم مەرەكەسى دەمالىسىنان كەيىن قىزمەتكە شىققان ءبىرىنشى كۇنى اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى تاياۋ مەزگىلدەگى اۋىل شارۋاشىلىعى، اۋىل - قىستاق ءتۇيىندى قىزمەتتەرىن ورنالاستىردى، مەڭگەرمە ورگانىنداعى تاراۋلار، ورىندار نازاردى قىزمەتكە شوعىرلاندىرىپ، تاسقىنداعان رۋحاني كۇيمەن قىزمەتكە كىرىسىپ، بۇكىل شينجياڭنىڭ استىق ءوندىرىسىنىڭ جاڭا جىلدا ”ورنىقتى باستاما اشۋىنا“ شىنايى كەپىلدىك ەتتى.

جىل ەسەبى كوكتەمدە، كوكتەمگى اۋىل شارۋاشىلىق ءوندىرىسىن تارتىپپەن ىلگەرىلەتۋ − تۇتاس جىلدا اۋىل شارۋاشىلىعىنان تاعى دا مول ءونىم الۋعا شىنايى كەپىلدىك ەتۋدىڭ ماڭىزدى نەگىزى. 2 - ايدىڭ باس شەنىندە بۇكىل شينجياڭنىڭ كوكتەمگى ەگىسكە دايىندالۋ قىزمەتتەرى وڭتۇستىكتەن سولتۇستىككە قاراي ىركەس - تىركەس ورىستەتىلەدى. ءار دارەجەلى اۋىل شارۋاشىلىعى، اۋىل - قىستاق تاراۋلارى قىزمەت جاۋاپكەرشىلىگىن ناقتىلاندىرىپ، كوكتەمگى ەگىس، كوكتەمگى تۇقىم ءسىڭىرۋ جۇمىستارىن ەرتە باستان جوسپارلاپ، تۇقىم، حيميالىق تىڭايتقىش، اۋىل شارۋاشىلىعى دارىلەرى سياقتى اۋىل شارۋاشىلىعى ءوندىرىس ماتەريالدارىن زاپاس ساقتاۋ قىزمەتىن ويداعىداي ىستەپ، اۋىل شارۋاشىلىعى ءوندىرىس زاتتىق ماتەريالدارىنىڭ قامداۋ - قاجەتسىنۋ جاعدايىن باقىلاۋدى، رەتتەۋدى كۇشەيتىپ، بازار باقىلاۋ - باسقارۋ تاراۋلارىمەن بىرلەسە قيمىلداۋدى كۇشەيتىپ، جالعان، جارامسىز اۋىل شارۋاشىلىعى ماتەريالدارىنا سوققى بەرۋ ارناۋلى ارەكەتىن ورىستەتىپ، شارۋالاردىڭ اۋىل شارۋاشىلىعى ماتەريالدارىنان الاڭسىز پايدالانۋىنا مۇمكىندىك جاسايدى.

”بيىل تاعى ءبيداي، جۇگەرى، ماقتا، جەر جاڭعاعى، سويا بۇرشاقتى جوعارى ساپالى، جوعارى ءونىمدى ءوندىرۋ، مال، ءۇي قۇستارىن باعىپ - باسقارۋ سياقتى شەشۋشى تەحنيكالاردى كۇش سالا جالپىلاستىرامىز“. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنىڭ باستىعى قۇربانجان قۇتلۇق بىلاي دەدى: اۋىل شارۋاشىلىق تەحنيكتەرى نەگىزگى ساتىعا، ءوندىرىستىڭ الدىڭعى شەبىنە ىشكەرىلەي ارالاسىپ، شارۋالاردىڭ وندىرىستەگى ءىس جۇزىندىك ماسەلەلەرىن شەشىپ، ەگىس ۋاقىتىن مىقتى يگەرىپ، كوكتەمگى ەگىسكە دايىندالۋ قىزمەتتەرىن ويداعىداي ىستەپ، تاعى دا مول ءونىم الۋعا قۇلشىنادى.

قازىر شينجياڭنىڭ باسىم كوپ ساندى وڭىرلەرىندە ءالى دە قىس، بۇقارانىڭ ”كوجە قاتىق“ ونىمدەرىنىڭ ءوندىرىسىن ورنىقتىرۋ، قامداۋدى قامتاماسىز ەتۋ ءالى دە اۋىل شارۋاشىلىق قىزمەتىنىڭ ماڭىزدى ءتۇيىنى بولىپ وتىر. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى قىس ماۋسىمىنداعى كوكونىستى جانە مال شارۋاشىلىعى ونىمدەرىنىڭ ءوندىرىسىن ورنىقتىرۋدى، قامداۋدى قامتاماسىز ەتۋدى ناقتى يگەرۋ جونىندە ورنالاستىرۋ جاساپ، جەر - جەردەن، تاراۋلاردان شۇعىل جاعدايعا توتەپ بەرۋ، قامداۋدى قامتاماسىز ەتۋ قىزمەت دايىندىق جوباسىن جانە شاراسىن اشالاپ، كەمەلدەندىرىپ، كوكونىس ءوندىرىسى اينالىمىنىڭ ورنالاسۋ جوباسىن ويداعىداي ىستەۋدى ءبىر تۇتاس جوسپارلاپ، كوكونىستىڭ جالپى مولشەرى مەن قۇرىلىمدىق تەپە - تەڭدىگىن جەبەپ، ”كوجە قاتىق“ ونىمدەرىمەن قامداۋدىڭ جەتكىلىكتى بولۋىنا شىنايى كەپىلدىك ەتۋدى تالاپ ەتتى. سونىمەن بىرگە ءار دارەجەلى اۋىل شارۋاشىلىعى، اۋىل - قىستاق تاراۋلارى قاتىستى تاراۋلارمەن بىرگە باعىمشىلىق الاڭدارىنىڭ قيىنشىلىقتى جەڭۋىنە بەلسەنە كومەكتەسىپ، جەم - ءشوپ سياقتى زاتتىق ماتەريالداردى، مال، قۇس جانە ونىمدەردى تاسىمالداۋ ارناسىن ىركىلىسسىزدەندىرىپ، مال شارۋاشىلىعىنىڭ قالىپتى ءوندىرۋ، ساتۋ ءتارتىبىن قورعايدى.

”شارۋالاردىڭ كىرىسىن ارتتىرۋدى اۋىل شارۋاشىلىعى، اۋىل - قىستاق، شارۋالار قىزمەتىنىڭ وزەكتى مىندەتى ەتۋگە تاباندى بولىپ، شارۋالاردىڭ كىرىستى ارتتىرىپ، بايۋ ارناسىن ۇزدىكسىز كەڭەيتىپ، اناعۇرلىم كوپ شارۋانىڭ كاسىپ سالاسىنىڭ دامۋ پايداسىنان يگىلىكتەنۋىنە مۇمكىندىك جاسايمىز“. قۇربانجان قۇتلۇق مىنانى ءبىلدىردى: بيىل شينجياڭنىڭ مەملەكەتتىڭ استىق حاۋىپسىزدىگىنە جانە ماڭىزدى ەگىن، مال شارۋاشىلىق ونىمدەرىمەن قامداۋعا ۇلەس قوسۋ دەڭگەيىن قۇلشىنا جوعارىلاتۋمەن بىرگە، شارۋالارعا تيىمدىلىك جاساۋ ساياساتى ارقىلى سۇيەمەلدەۋ تەبىنىن اناعۇرلىم ارتتىرىپ، اۋىل شارۋاشىلىعىمەن بىرلەسۋ، اۋىل شارۋاشىلىعىنا جەتەكشىلىك ەتۋ مەحانيزمىن كەمەلدەندىرىپ، كوپ ءتۇرلى شارانى قاتار قولدانىپ، شارۋالاردىڭ ورنىقتى جۇمىستانۋىن جەبەپ، شارۋالار كىرىسىنىڭ ءۇرتىس ارتۋىنا شىنايى كەپىلدىك ەتەمىز.