انار بۇلت \ شينجياڭ گازەتىنىڭ ءتىلشىسى ۋاڭ يۇڭفي 3 - ايدىڭ 20 - كۇنى ۇرىمجىدەن حابارلايدى. اۋىل شارۋاشىلىعىن وركەندەتۋ بانكەسىنىڭ شينجياڭ بولىمشە بانكەسىنەن ۇعىسۋىمىزشا، شينجياڭنىڭ اۋىل شارۋاشىلىعى، اۋىل - قىستاق، شارۋالار ىستەرىنىڭ دامۋىن قولدايتىن نەگىزگى بانكە رەتىندە، بىلتىر 9 - ايدان بەرى اۋىل شارۋاشىلىعىن وركەندەتۋ بانكەسىنىڭ شينجياڭ بولىمشە بانكەسى اۋىل شارۋاشىلىق ماتەريالدارى جانە ەگىستىك جەر سىندى 2 ۇلكەن سالانى كوزدە ۇستاپ، كوكتەمگى ەگىس دايىندىعىنا قاتىستى قارىز اقشادان جيىنى 12 ميلليارد 445 ميلليون يۋان تاراتىپ، ماڭىزدى اۋىل شارۋاشىلىق ءوندىرىس ماتەريالدارىمەن قامداۋدى بار كۇشپەن قامتاماسىز ەتىپ، بيىلعى بۇكىل رايونىمىزدىڭ كوكتەمگى ەگىس ءوندىرىسى مەن استىقتان، ماقتادان مول ءونىم الۋىنا كەپىلدىك ەتكەن.

كوكتەمگى ەگىستىڭ، كوكتەمگى باپتاۋدىڭ شەشۋشى مەزگىلىندە قالىڭ شارۋا وتباسىلارىن اۋىل شارۋاشىلىق ماتەريالدارىمەن قامداۋدىڭ كىدىرىسسىز بولۋىنا، تاۋسىلىپ كەتپەۋىنە شىنايى كەپىلدىك ەتۋ ءۇشىن، اۋىل شارۋاشىلىعىن وركەندەتۋ بانكەسىنىڭ شينجياڭ بولىمشە بانكەسى شينجياڭ اۋىل شارۋاشىلىق ماتەريالدارى توبى، شينجياڭ تيانفۋ حالىقارالىق ەكونوميكا - ساۋدا شەكتى سەرىكتەستىگى سياقتى ءبىر توپ اۋىل شارۋاشىلىق ماتەريالدارى كاسىپورىندارىنا اۋىل شارۋاشىلىق ءوندىرىس ماتەريالدارى بويىنشا 4 ميلليارد 212 ميلليون يۋان قارىز اقشا بەرۋدى تەكسەرىپ بەكىتىپ، 3 ميلليارد 781 ميلليون يۋان تاراتىپ، كاسىپورىنداردىڭ شامامەن ءبىر ميلليون 100 مىڭ توننا ۋرەا، حلورلى كالي سياقتى تىڭايتقىشتاردى ساتىپ الۋىنا كومەكتەستى. وسى كاسىپورىندار ”ينتەرنەت جەلىسىندە + جەلىدەن تىس“ ارناسى ارقىلى اۋىل شارۋاشىلىعى ماتەريالدارىن سانجى، شىحىزى، اقسۋ سياقتى جەرلەرگە ساتىپ، بۇكىل شينجياڭنىڭ جەر - جەرىنىڭ كوكتەمگى ەگىس دايىندىعىنا پارمەندى قولداۋ كورسەتتى.

بىلتىر 9 - ايدان بەرى اۋىل شارۋاشىلىعىن وركەندەتۋ بانكەسىنىڭ شينجياڭ بولىمشە بانكەسى شينجياڭ اۋىل شارۋاشىلىعى ماتەريالدارى توبىنا جالپى 420 ميلليون يۋان قارىز اقشا بەرىپ، اۋىل شارۋاشىلىعى ماتەريالدارى توبىنىڭ يۇننان، گۇيجوۋ، سىچۋان سياقتى جەرلەردەن فوسفورلى تىڭايتقىش، كاليلى تىڭايتقىش، ازوتتى تىڭايتقىش، قوسپا تىڭايتقىش، ورگانيكالىق تىڭايتقىش سياقتى ءتۇرلى تىڭايتقىشتاردان 150 مىڭ توننا ساتىپ الۋىنا قولداۋ كورسەتتى.

”ءار جىلعى كوكتەمگى ەگىس دايىندىعى كەزىندە بازارعا سالىنعان ءتۇرلى اۋىل شارۋاشىلىعى ماتەريالدارى اۆتونوميالى رايوننىڭ بازار سۇرانىسى جالپى مولشەرىنىڭ شامامەن تەڭ جارتىسىن ۇستايدى، اۋىل شارۋاشىلىعىن وركەندەتۋ بانكەسىنىڭ ءار جىلعى بىزگە بەرگەن قارىز اقشاسى قارجى سۇرانىسىمىزدىڭ تەڭ جارتىسىن ۇستايدى. اۋىل شارۋاشىلىعىن وركەندەتۋ بانكەسىنىڭ قارىز اقشاسى اۆتونوميالى رايوننىڭ كوكتەمگى ەگىس دايىندىعىن اۋىل شارۋاشىلىق ماتەريالدارىمەن قامداۋدا شەشۋشى رول اتقارىپ وتىر دەۋگە بولادى“، - دەدى شينجياڭ اۋىل شارۋاشىلىق ماتەريالدارى توبى قازىنا ءبولىمىنىڭ مەڭگەرۋشىسى ليۋ شياۋجيە.

ەگىستىك جەردىڭ ەگىس اۋماعىن كەڭەيتۋگە، جوعارى ولشەمدى ەگىنجاي قۇرۋعا قولداۋ كورسەتۋ − بيىل اۋىل شارۋاشىلىعىن وركەندەتۋ بانكەسى شينجياڭ بولىمشە بانكەسىنىڭ كوكتەمگى ەگىس دايىندىعى قىزمەتىنە قىزمەت وتەۋىندەگى تاعى ءبىر ماڭىزدى تۇتقا. وسى قىزمەتتى بار كۇشپەن ىلگەرىلەتۋگە كەپىلدىك ەتۋ ءۇشىن، اۋىل شارۋاشىلىعىن وركەندەتۋ بانكەسىنىڭ شينجياڭ بولىمشە بانكەسى ىرىقتى تۇردە الدا تۇرىپ قىزمەت وتەپ، اۋىل - قىستاق جەرلەرىنىڭ كاسىپتىك ۇگىت، تانىستىرۋ سەرپىنىن ارتتىرىپ، جەكە - جەكە اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىمەن، بيڭتۋان اۋىل شارۋاشىلىعى، اۋىل - قىستاق مەكەمەسىمەن بىرلەسىپ ساياساتتىق فينانس جاعىنان جوعارى ولشەمدى ەگىنجاي قۇرىلىسىنا قولداۋ كورسەتۋدى ىلگەرىلەتۋ جونىندەگى حابارلاندىرۋدى باسىپ تاراتىپ، ءار دارەجەلى اۋىل شارۋاشىلىعى، اۋىل - قىستاق تاراۋلارىمەن جان - جاقتى ينفورماتسيا ءبولىسۋ تۇعىرىن ورناتىپ، اۋىل - قىستاق جەرلەرىنە قاتىستى كاسىپ بويىنشا كاسىپتىك، جان - جاقتى فينانستىق قىزمەت وتەدى.

سونىمەن بىرگە اۋىل شارۋاشىلىعىن وركەندەتۋ بانكەسىنىڭ شينجياڭ بولىمشە بانكەسى جاڭالىق اشىپ، ”اۋىل - قىستاق جەرى + كاسىپ سالاسى قارىزى“، ”اۋىل - قىستاق جەرى + عىلىم - تەحنيكا قارىزى“ سياقتى قارجى قۇراۋ ۇلگىسىن العا قويىپ، سەنىمدى قارىز كولەمى، قارىز اقشا ۋاقىت شەگى، قارجى قۇراۋ وزىندىك قۇنى جاعىندا تيىمدىلىك جاساپ، بەيىمدەلىپ، ”ءبىر كاسىپورىنعا ءبىر شارا“ نىسانىنىڭ جەدەل تياناقتانۋىن ىلگەرىلەتىپ، تۇتاس كاسىپ سالاسى بويىنشا شينجياڭنىڭ جوعارى ولشەمدى ەگىنجاي قۇرىلىسىنا قولداۋ كورسەتتى.