التاي ايماعى:

حالىق تۇرمىسىنا قاتىستى 10 ناقتى ءىس حالىق تۇرمىسىنىڭ قۇت - ىرىسىن ارتتىرادى

□ انار بۇلت \ شينجياڭ گازەتىنىڭ ءتىلشىسى جاڭ تيڭ، ەرىكتى ءتىلشى حۋ جۇنشيۋ

3 - ايدىڭ 20 - كۇنى التاي ايماعى «التاي ايماعىنىڭ 2023 - جىلعى حالىق تۇرمىسىنا قاتىستى 10 ناقتى ءىستى ىلگەرىلەتۋ قىزمەتى جوباسىن» (تومەندە قىسقارتىلىپ «جوبا» دەلىنەدى) شىعاردى، بۇل تابيعي گاز جەتكىزۋ قۇبىرىن ورناتۋ، قامتاماسىزداندىرۋ سيپاتتى بەيقۇت ءۇي ينجەنەرياسىن اتقارۋ سياقتى حالىق تۇرمىسىنا قاتىستى 10 ناقتى ىسكە سايادى.

”وسى «جوبانىڭ» شىعارىلۋى پارتيا 20 - قۇرىلتايىنىڭ رۋحىن جانە مەملەكەتتىك ەكى ءماجىلىستىڭ رۋحىن دايەكتىلەندىرۋدىڭ، تياناقتاندىرۋدىڭ ناقتى شاراسى“، - دەدى التاي ايماقتىق دامۋ جانە رەفورما كوميتەتىنىڭ ورىنباسار مەڭگەرۋشىسى فىڭ يۇيتيان.

«جوبادا» مىنالار العا قويىلدى: بيىل جۇڭگو مۇناي - تابيعي گاز توبى شينجياڭ مۇناي الابى سەرىكتەستىگىنىڭ قارامايلى تابيعي گاز الابىنان بۋرىلتوعاي ونەركاسىپ باقشا رايونىن باسقارۋ كوميتەتىنە دەيىنگى تابيعي گاز جەتكىزۋ قۇبىرى جاڭادان ورناتىلادى. بۇل نىسانعا جيىنى 575 ميلليون يۋان قارجى قوسىلادى، ينجەنەرياداعى قۇبىردىڭ جالپى ۇزىندىعى 246 كيلومەتر، ءبىتىپ ىسكە قوسىلعاننان كەيىن ايماقتاعى 130 مىڭ تۇرعىن وتباسىن تابيعي گازبەن قامداي الادى.

فىڭ يۇيتيان مىنالاردى ءبىلدىردى: جاڭادان ورناتىلاتىن تابيعي گاز قۇبىرى التاي ايماعىنىڭ قازىرگى تابيعي گاز قاينارى تۇراقتى بولماۋ، قامداۋ باعاسى تىم جوعارى بولۋ جاعدايىن بارىنشا جاقسارتىپ، ايماقتىڭ ەكونوميكالىق ارتۋ تاسىلىنە بۇرىلىس جاساۋىن تەزدەتىپ، ەنەرگيا ۇنەمدەۋىن جەبەيدى، بۇل ايماق ەكونوميكاسىنىڭ، قوعامىنىڭ جوعارى ساپالى دامۋى جونىنەن ماڭىزدى مانگە يە.

بەيقۇت ءۇي ينجەنەرياسى حالىق كوڭىلىن الاڭسىز ەتەدى. «جوباعا» ساي، التاي ايماعى قامتاماسىزداندىرۋ سيپاتتى 5229 تۇرعىن ءۇي دايىنداپ، لاشىقتى وڭىردەگى 304 ءۇيدى جاڭالاپ، 17 مىڭ وتباسىن قامتىعان كونە، ەسكى 107 تۇرعىندار اۋماعىن جاڭالايدى. سونىمەن بىرگە مال شارۋاشىلىعى وڭىرلەرىندەگى باقىت بەكەتى جانە وتارداعى مال شارۋاشىلىعى نەگىزدىك قۇرىلعى قۇرىلىسى ينجەنەرياسىن ۇزدىكسىز اتقارىپ، مال شارۋاشىلىعى وڭىرلەرىندە 53 باقىت بەكەتىن جاڭادان سالادى نەمەسە جاڭالاپ دەڭگەيىن جوعارىلاتادى، وتارداعى مالشىلار ءۇشىن 515 تۇرعىن ءۇيدى، 393 مال قوراسىن جاڭادان سالىپ، كوشىپ - قوناتىن مالشىلاردىڭ ءوندىرىس، تۇرمىس ساپاسىن ۇزدىكسىز جوعارىلاتادى.

حالىق تۇرمىسىنا قاتىستى 10 ناقتى ىستە تاعى ۇكىمەت اشقان بالاباقشالارىنا قابىلداناتىن بالا سانىن، بوبەك باعۋ قۇرىلىمدارىنا قابىلداناتىن بوبەك سانىن، كۇندىز قارايلاسۋ كولەمىندەگى قارتتار سانىن ارتتىرۋ ينجەنەرياسىن اتقارۋ كۇن تارتىپكە ەنگىزىلدى. بۇل ينجەنەريا قالا - قالاشىق بالاباقشالارىنىڭ جۇمىس جۇرگىزۋ شارت - جاعدايىن اناعۇرلىم جاقسارتىپ، قالا مەن اۋىلدىڭ پارقىن ازايتىپ، كلاستارداعى بالا سانى ولشەمنەن اسىپ كەتۋ جانە قابىلداناتىن بالا سانى كەمشىل بولۋ ماسەلەسىن باسەيتىپ، ايماقتا مەكتەپكە دەيىنگى تاربيەنىڭ جالپىلاسۋىن جالپىعا ءتيىمدى، ساپالى دامىتۋعا تۇرتكى بولادى؛ ايماقتىق دەڭگەيدە ۇلگى كورسەتەتىن بوبەك باعۋ قۇرىلىمدارىن قۇرۋ قيمىلىن ورىستەتىپ، بالاباقشالارىندا بوبەكتەر كلاسىن اشۋ سىناق ءتۇيىنى قىزمەتىن ىلگەرىلەتىپ، تۇتاس ايماقتاعى بوبەك باعۋ قۇرىلىمدارىنا قابىلداناتىن بوبەك سانى جاعىندا تىڭنان ارتقان بوبەك سانىن 1200دەن تۇسىرمەيدى؛ الەۋمەتتىك اۋماقتارداعى قارتتارعا كۇندىز قارايلاسۋ ورتالىعىنان بەسەۋىن جاڭادان (جاڭالاپ) سالىپ، قارتتاردى ۇيدە كۇتىمدەۋ بويىنشا ”15 مينۋتتىق“ قىزمەت وتەۋ شەڭبەرىن جەدەل قالىپتاستىرادى؛ اۋىل - قىستاق تاس جولى، اۋىز سۋ حاۋىپسىزدىگى، لاس سۋدى جونگە سالۋداعى ولقىلىقتاردى تولىقتاۋ ينجەنەريالارىن اتقارادى، ءورت سوندىرگىشتى، كومىرتەگى توتىعىنان ساقتاندىرعىشتى ”10 مىڭ وتباسىنا جالپىلاستىرۋ“ سياقتىلاردى اتقارادى.

”التاي ايماعى مەملەكەتتىك ەكى ءماجىلىستىڭ رۋحىن، اسىرەسە، باس شۋجي شي جينپيڭنىڭ ماڭىزدى ءسوزىنىڭ رۋحىن ىشكەرىلەي ۇيرەنۋدى، ۇگىتتەۋدى، دايەكتىلەندىرۋدى قازىرگى جانە الداعى مەزگىلدەگى ماڭداي الدى ساياسي مىندەت ەتىپ، تياناقتاندىرۋدى مىقتى يگەرىپ، نەگىزگى الەۋمەتتىك قىزمەت وتەۋدى كۇشەيتىپ، حالىق تۇرمىسىنىڭ قۇت - ىرىسىن ءۇرتىس ارتتىرىپ، ايماق ەكونوميكاسىنىڭ جوعارى ساپالى دامۋىن كۇش سالا ىلگەرىلەتەدى“، - دەدى التاي ايماقتىق پارتكومنىڭ ورىنباسار شۋجيى، اكىمشىلىك مەكەمەسىنىڭ ءۋاليى جەڭىس قادىس.