تىلشىلەرىمىز ما چىڭلۋ، سۇن ي - نان حابارلايدى. 3 - ايدىڭ 24 - كۇنى ىلە وبلىستىق پارتكومنىڭ نازاريا ۇيرەنۋ وزەكتى گرۋپپاسى ”شي جينپيڭنىڭ ەكولوگيالىق وركەنيەت يدەياسىن ىشكەرىلەي ۇيرەنۋ، ٴتۇسىنۋ“ ارناۋلى تاقىرىپتا ۇيرەنۋ ٴماجىلىسىن وتكىزىپ، شي جينپيڭنىڭ ەكولوگيالىق وركەنيەت يدەياسى مەن پارتيا 20 ـ قۇرىلتايىنىڭ بايانداماسىنا قاتىستى مازمۇنداردى ىشكەرىلەي ۇيرەنىپ، ٴتۇسىنىپ، يدەيانى اناعۇرلىم بىرلىككە كەلتىرىپ، جاۋاپكەرشىلىكتى شىنايى ارقالاپ، ەكولوگيانى جالپىلىق جونگە سالۋدى، جۇيەلى جونگە سالۋدى، تۋ باستان جونگە سالۋدى كۇشەيتىپ، جاڭا جاۋاپكەرلىك ارقالاپ، جاڭا ىسكەرلىك كورسەتۋ ارقىلى ىلەنىڭ ەكولوگيالىق ورتاسىنىڭ جوعارى ساپالى دامۋىن ىلگەرىلەتتى. وبلىستىق پارتكومنىڭ ورىنباسار شۋجيى، وبلىس باستىعى ەلشات تۇرسىنباي ۇلى ۇيرەنۋ ٴماجىلىسىن باسقاردى.

ماجىلىستە جۇڭگو قورشاعان ورتا عىلمي زەرتتەۋ اكادەمياسى قورشاعان ورتانى باقىلاۋ - ولشەۋ تەحنيكاسىن زەرتتەۋ جانە قولدانىلمالى زەرتتەۋ ورتالىعىنىڭ مەڭگەرۋشىسى ياڭ ۋىندى ”ىلە اڭعارى وزەكتى رايونىنداعى قالا اتموسفەراسى لاستانۋىنىڭ تەرەڭ قاينارىنا تالداۋ، سونداي - اق لاستانۋدان ساقتانۋ جانە ونى جونگە سالۋ شارالارىن زەرتتەۋ“ نەگىزگى تاقىرىبىن ارقاۋ ەتىپ، ارناۋلى تاقىرىپتىق پىسىقتاۋ بايانداماسىن جاساۋعا ارنايى ۇسىنىس ەتتى؛ ەلشات تۇرسىنباي ۇلى، جاۋ سۇيفاڭ، قايرات اشىك ۇلى جانە وبلىستىق ەكولوگيالىق ورتا مەكەمەسىندەگى جاۋاپتى جولداستار پىكىر اۋىستىرىپ، ٴسوز سويلەدى، سونداي - اق وبلىستىق پارتكومنىڭ تۇراقتى مۇشەلەرى مەن وبلىستىق حالىق قۇرىلتايىنىڭ، ساياسي كەڭەستىڭ نەگىزگى باسشى جولداستارى دا جازباشا پىكىر اۋىستىردى.

ەلشات تۇرسىنباي ۇلى بىلاي دەپ اتاپ كورسەتتى: شي جينپيڭنىڭ ەكولوگيالىق وركەنيەت يدەياسى جۇيەلى، كەمەلدى، مازمۇنى باي دا تەرەڭ، قورعاۋ مەن دامۋدىڭ ديالەكتيكالىق بىرلىك قاتىناسىن جۇيەلى دالەلدەپ، جاڭا داۋىردەگى ەكولوگيالىق وركەنيەت قۇرىلىسىنىڭ نەگىزگى ٴمانىن، ستراتەگيالىق نىساناسىن جانە جۇزەگە اسىرۋ جولىن ىشكەرىلەي بايىمداپ، جاڭا داۋىردەگى ەكولوگيالىق وركەنيەت قۇرىلىسى مەن ەكولوگيالىق ورتانى قورعاۋ قىزمەتىنە العا باسۋ بەتالىسىن كورسەتىپ، ٴتۇبىرلى ولشەم ازىرلەدى. ساياسي دەڭگەيدى جوعارىلاتىپ، ەكولوگيالىق ورتانى قورعاۋدىڭ توتەنشە ماڭىزدىلىعىن جەتە تانىپ، ەكولوگيالىق وركەنيەت قۇرىلىسىنىڭ ساياسي جاۋاپكەرشىلىگىن باتىل ارقالاپ، ەكولوگيالىق وركەنيەت قۇرىلىسى مەن ەكولوگيالىق ورتانى قورعاۋدى ىلگەرىلەتۋدىڭ جاۋاپكەرشىلىك سەزىمىن، كوكەيتەستىلىك سەزىمىن ۇزدىكسىز كۇشەيتىپ، ادام مەن تابيعات جاراسىمدى قاتار ٴومىر سۇرەتىن كورىكتى ىلە قۇرۋ كەرەك.

ەلشات تۇرسىنباي ۇلى مىنالاردى باسا دارىپتەدى: جاسىل، تومەن كومىرتەكتى دامۋدى ۇزدىكسىز ىلگەرىلەتىپ، دامۋ تاسىلىندە جاسىلعا ويىسۋدى جەدەلدەتىپ، جاڭا دامۋ جاعدايىنا ۇيلەسەتىن ەكولوگيالىق ورتانى قورعاۋ ٴتۇزىمى جۇيەسىن بىرتىندەپ ورناتۋ كەرەك. سۋ ۇنەمدەۋ، سۋ ساقتاۋ، سۋ رەتتەۋ ٴىسىن ٴبىر تۇتاس جوسپارلاپ ويداعىداي ىستەپ، وزەن (كول) باستىعى ٴتۇزىمىن ىشكەرىلەي تياناقتاندىرىپ، سۋ بايلىعىن جايعاستىرۋ مەن باسقارۋدىڭ ەگجەي ـ تەگجەيلى، جۇيەلى، زاڭمەن باسقارىلۋ دەڭگەيىن ۇزدىكسىز جوعارىلاتۋ كەرەك. ەكولوگيانى قورعاۋ، قالپىنا كەلتىرۋ تەبىنىن ارتتىرىپ، ىلە وزەنى اڭعارىنىڭ ەكولوگياسىن قورعاۋ جانە جالپىلىق جونگە سالۋ، تۇياقكەستى بولعان جايىلىم ەكولوگياسىن قالپىنا كەلتىرۋ، جونگە سالۋ سياقتى نىسانداردى جەدەل اتقارىپ، ورگانيزمدەردىڭ الۋان تۇرلىلىگىن قورعاۋدى كۇشەيتىپ، ەكولوگيالىق جۇيەنىڭ ساپاسىن ۇزدىكسىز جوعارىلاتۋ كەرەك. لاستانۋدان ساقتانۋ جانە ونى وڭاۋدان قامال الۋ شايقاسىن ىشكەرىلەي ويداعىداي جۇرگىزىپ، اتموسفەرا، سۋ، توپىراق سياقتىلاردىڭ لاستانۋىنان ساقتانۋدى جانە ونى وڭاۋدى ٴبىر تۇتاس جوسپارلاپ ىلگەرىلەتىپ، اۋىل - قىستاقتىڭ قونىس ورتاسىن رەتتەۋ - جونگە سالۋدى تىڭعىلىقتى ىلگەرىلەتىپ، ورتالىقتىڭ ەكولوگيالىق ورتانى قورعاۋدى باقىلاۋ - تەكسەرۋدە اڭىس ەتكەن ماسەلەلەرىن رەتتەۋ - تۇزەتۋدى ويداعىداي يگەرىپ، ەكولوگيالىق ورتانى ”تەك اناعۇرلىم جاقسارتۋعا بولادى، بۇلدىرۋگە بولمايدى“ دەيتىن تومەنگى شەكتى مىقتاپ ساقتاۋ كەرەك. ەكولوگيالىق ورتانى باقىلاۋ - باسقارۋدى كۇشەيتىپ، ەكولوگيالىق ورتاعا قاتىستى زاڭ اتقارۋ سەرپىنىن ارتتىرىپ، بۇقارانىڭ جانىنداعى ەكولوگيالىق ورتا ماسەلەسىن شىنايى، ويداعىداي شەشۋ كەرەك. ۇيىمدىق باسشىلىقتى كۇشەيتىپ، ٴار جاقتىڭ جاۋاپكەرشىلىگىن ناقتىلاندىرىپ، بيڭتۋان مەن جەرگىلىكتى ورىننىڭ سەلبەستىگىن، تاراۋلاردىڭ سەلبەسۋىن كۇشەيتىپ، ۇگىتتەۋدى، جەتەكتەۋدى كۇشەيتىپ، جوعارى مەن تومەن بىرلەسىپ ارەكەتتەنەتىن، وڭىرلەر بىرلەسىپ قيمىلدايتىن، وزەن اعارلارىن بىرلەسىپ وڭايتىن، بىرگە يگەرىپ، بىرگە باسقاراتىن جاعداي قالىپتاستىرىپ، بۇكىل وبلىستىڭ ەكولوگيالىق ورتانى قورعاۋ قىزمەتىنىڭ تىڭ ساتىعا كوتەرىلۋىن ىلگەرىلەتۋ كەرەك.