汉文 ىلە اقپارات تورابىنا حوش كەلدىڭىزدەر!
شي جينپيڭ ساۋد ارابياسىنىڭ پاتشا مۇراگەرى، قوسىمشا باس ءۋازىرى مۇحاممەدپەن تەلەفوندا سويلەستى
2023-03-30 11:19:31     كورىلىم:رەت كەلۋ قاينارى:تيانشان تورى  جاۋاپتى رەداكتور:جاڭىلقان قوجا قىزى

شينحۋا اگەنتتىگىنىڭ 3 - ايدىڭ 28 - كۇنى بەيجيڭنەن بەرگەن حابارى. 3 - ايدىڭ 28 - كۇنى مەملەكەت ءتوراعاسى شي جينپيڭ ساۋد ارابياسىنىڭ پاتشا مۇراگەرى، قوسىمشا باس ءۋازىرى مۇحاممەدپەن تەلەفوندا سويلەستى.

شي جينپيڭ مۇحاممەدتكە سالمان پاتشاعا ىزگى تىلەگىن جانە ورازا ايى بايلانىسىمەن جولداعان سالەمىن جەتكىزىپ قويۋدى ايتتى. شي جينپيڭ بىلاي دەپ اتاپ كورسەتتى: قازىر جۇڭگو − ساۋد ارابياسى قارىم - قاتىناسى تاريحتاعى ەڭ تاماشا مەزگىلدە تۇر. بىلتىر جىل سوڭىندا، مەن ساۋد ارابياسىندا ءساتتى تۇردە مەملەكەتتىك ساپاردا بولدىم، ءبىز ريادتا تۇڭعىش كەزەكتى جۇڭگو − اراب ەلدەرى باسشىلار ءماجىلىسىن، جۇڭگو - شىعاناقتاعى اراب ەلدەرى سەلبەستىك كوميتەتى باسشىلار ءماجىلىسىن ءساتتى وتكىزىپ، جۇڭگو - ساۋد ارابياسى قارىم - قاتىناسىنىڭ دامۋىن پارمەندى ىلگەرىلەتىپ، جۇڭگونىڭ شىعاناقتاعى اراب ەلدەرى سەلبەستىك كوميتەتىمەن جانە اراب ەلدەرىمەن قارىم - قاتىناسىن جەبەپ، ورتا شىعىس ءوڭىرىنىڭ جاعدايىنا بەلسەندى ىقپال جاسادىق. جۇڭگو جاق ساۋد ارابياسى جاقپەن بىرگە ”3 اينالىمدى باسشىلار ءماجىلىسى“ جەتىستىگىن ويداعىداي تياناقتاندىرىپ، ءبىر - ءبىرىنىڭ وزەكتى مۇددەسىنە ساياتىن ماسەلەلەردە ۇزدىكسىز باتىل ءوزارا قولداۋ كورسەتىپ، ناقتى ىستەر سەلبەستىگى مەن گۋمانيتارلىق اۋىس - كۇيىستى كەڭەيتىپ، جۇڭگو − ساۋد ارابياسى جان - جاقتى ستراتەگيالىق سەرىكتەستىك قارىم - قاتىناسىنىڭ اناعۇرلىم زور دامۋدى جۇزەگە اسىرۋىن ىلگەرىلەتىپ، جاڭا داۋىرگە بەت العان جۇڭگو − اراب ەلدەرى تاعدىرلاس ورتاق تۇلعاسىن بار كۇشپەن قۇرىپ، ورتا شىعىس ءوڭىرىنىڭ بەيبىتشىلىگىن، ورنىقتىلىعىن، دامۋىن جەبەۋگە ءتىپتى دە كوپ ۇلەس قوسۋدى قالايدى.

شي جينپيڭ بىلاي دەپ اتاپ كورسەتتى: تاياۋدا جۇڭگونىڭ، ساۋد ارابياسىنىڭ، يراننىڭ ورتاق قۇلشىنۋىندا، ساۋد ارابياسى، يران بەيجيڭدە ءساتتى كەڭەس وتكىزدى ءارى كەلەلى جەتىستىككە قول جەتكىزدى، بۇل ساۋد ارابياسى − يران ەكى ەلدىڭ قارىم - قاتىناسىن جاقسارتۋىنا پايدالى، وڭىردەگى ەلدەردىڭ ىنتىماعىن، سەلبەستىگىن كۇشەيتۋ، ءوڭىردىڭ شۇعىل جاعدايىن باسەڭدەتۋ جونىنەن كەلەلى ۇلگىلىك اسەرگە يە، حالىقارالىق قوعامنىڭ كەڭ كولەمدى جاقسى باعاسىنا يە بولدى. جۋىقتان بەرى وڭىردەگى ەلدەر اراسىندا قارىم - قاتىناستىڭ ساباسىنا ءتۇسۋ جاعدايى كورنەكتى كۇشەيدى، بۇل قايشىلىقتى، الاۋىزدىقتى كەڭەسۋ، اقىلداسۋ ارقىلى شەشۋدىڭ حالىق تىلەگىنە جاناساتىندىعىن، ءداۋىر اۋقىمى مەن ءار ەلدىڭ مۇددەسىنە ۇيلەسەتىندىگىن تولىق كورسەتتى. ساۋد ارابياسى − يران ەكى جاقتىڭ تاتۋ كورشىلىك، دوستىق رۋحىن ۇستانىپ، بەيجيڭ كەڭەسى جەتىستىگىنىڭ نەگىزىندە قارىم - قاتىناستى ۇزدىكسىز جاقسارتۋىن ءۇمىت ەتەمىن. جۇڭگو جاق ساۋد ارابياسى − يران كەڭەسىنىڭ كەيىنگى بارىسىن ۇزدىكسىز قولداۋدى قالايدى.

مۇحاممەد سالمان پاتشانىڭ شي جينپيڭگە جولداعان سالەمىن جەتكىزدى، شي جينپيڭنىڭ مەملەكەت ءتوراعاسى بولىپ ۇزدىكسىز سايلانعاندىعىن تاعى ءبىر مارتە قىزۋ قۇتتىقتادى. مۇحاممەد مىنالاردى ءبىلدىردى: ساۋد ارابياسى جاق جۇڭگو جاقتىڭ ساۋد ارابياسى مەن يراننىڭ قارىم - قاتىناسىن جاقسارتۋىن زور كۇشپەن قولداعاندىعىنا شىنايى العىس ايتادى، بۇل جۇڭگونىڭ جاۋاپكەرشىلىك ارقالايتىن ءىرى ەلدىك رولىن تولىق ايگىلەدى. جۇڭگو وڭىرلىك جانە حالىقارالىق ىستەردە كەلەلى سىندارلى رولىن كۇننەن - كۇنگە ساۋلەلەندىرۋدە، ساۋد ارابياسى جاق مۇنى ايرىقشا القايدى. جۇڭگو ساۋد ارابياسىنىڭ ماڭىزدى سەلبەستىك سەرىكتەسى. ساۋد ارابياسى جاق جۇڭگومەن قارىم - قاتىناستى دامىتۋعا ايرىقشا ءمان بەرەدى، جۇڭگو جاقپەن بىرگە قۇلشىنىپ، ەكى ەل سەلبەستىگىنىڭ تىڭ بولاشاعىن اشۋدى قالايدى.