شينحۋا اگەنتتىگىنىڭ 5 - ايدىڭ 31 - كۇنى بەيجيڭنەن بەرگەن حابارى. جاقىندا مەملەكەت ءتوراعاسى شي جينپيڭ بانگلادەشتىك بالا اليفا · چينگە جاۋاپ حات قايتارىپ، ونى قۇلشىنا ۇيرەنىپ، ارمانعا قانات قاعىپ، جۇڭگو مەن بانگلادەشتىڭ ءداستۇرلى دوستىعىن ويداعىداي جالعاستىرۋعا جىگەرلەندىردى.

شي جينپيڭ بىلاي دەپ اتاپ كورسەتتى: چيننىڭ حاتىندا بايانداعان ءتول كەشىرمەسى جۇڭگو − بانگىلادەش دوستىعىنىڭ جاندى بەينەسى. جۇڭگو مەن بانگلادەش حالقى ەجەلدەن بەرى جاقسى كورشى، جاقسى دوس، عاسىرلار بويى جالعاسقان دوستىق بارىس - كەلىس تاريحى بار. 600 نەشە جىلدىڭ الدىندا جۇڭگونىڭ ميڭ پاتشالىعىنىڭ تەڭىز ساياحاتشىسى جىڭ حىنىڭ ”باۋچۋان“ اتتى كەمەسى 2 رەت بانگلادەشكە بارىپ، ەكى ەل حالقى اراسىنا دوستىقتىڭ تۇقىمىن سەپتى. 600 نەشە جىلدان كەيىن جۇڭگو تەڭىز ارمياسىنىڭ ”بەيبىتشىلىك كەمەسى“ اتتى شيپاحانالىق كەمە مول مەيىرىممەن الىس ساپارعا شىقتى، جۇڭگونىڭ ايەل اسكەري شيپاگەرى جيداگاڭ پورتىندا چيننىڭ شەشەسىنە كومەكتەسىپ ونى مۇشكىل حالدەن اراشالاپ، ءساتتى بوساندىردى، چيننىڭ اكەسى بانگلادەش تىلىندە ”جۇڭگو“ دەپ ات قويىپ، جۇڭگو − بانگلادەش دوستىعىنىڭ ادامدى اسەرلەندىرەتىن جاڭا تاراۋىن جازدى.

شي جينپيڭ بىلاي دەپ باسا دارىپتەدى: چيننىڭ ەسەيگەندە جۇڭگو − بانگلادەش دوستىعىنىڭ ەلشىسى بولۋ مۇراتىن ورناتقاندىعىن، بولاشاقتا جۇڭگوعا كەلىپ شيپاگەرلىك ۇيرەنىپ، ”جۇڭگولىق شەشەسى“ سەكىلدى اجالعا اراشاشى، جارالىعا مەدەت بولۋدى ءۇمىت ەتەتىندىگىن ءبىلىپ قاتتى قۋاندىم. چيننىڭ تاماشا شاعىن قاستەرلەپ، قۇلشىنا ۇيرەنىپ، ءوز ارمانىنا جەتىپ، وتباسىنىڭ ءۇمىتىن اقتاپ، قوعامعا قىزمەت ەتىپ، وتانعا ەڭبەك ءسىڭىرۋىن ءۇمىت ەتەمىن. ”1 - ماۋسىم“ حالىقارالىق بالالار مەرەكەسى كەلۋ قارساڭىندا چيننىڭ دەنساۋلىعىنىڭ مىقتى، وتباسىنىڭ باقىتتى بولۋىن، ۇيرەنۋدە العا باسۋىن تىلەيمىن.

اليفا · چين 2010 - جىلى دۇنيەگە كەلەردە شەشەسى سالماقتى جۇرەك اۋرۋى سەبەبىنەن بوسانا الماي قينالىپ، ومىرىنە حاۋىپ تونگەن ەدى. سول كەزدە بانگلادەشتىڭ جيداگاڭ پورتىندا ساپاردا جۇرگەن جۇڭگو تەڭىز ارمياسىنىڭ ”بەيبىتشىلىك كەمەسى“ اتتى شيپاحانالىق كەمەسى كومەك سۇرانىسىن تاپسىرىپ العاننان كەيىن جەرگىلىكتى شيپاحاناعا دەرەۋ اسكەري شيپاگەر جىبەرىپ، وراسان زور قىسىمدا ءىشتى جارىپ بوساندىرۋ وپەراتسياسىن جاساپ، اقىرى شەشەسى مەن بالانى امان الىپ قالادى. العىس ايتۋ ءۇشىن ونىڭ اكەسى وعان ”چين“ (Chin) دەپ ات قويادى، بۇل بانگلادەش تىلىندە ”جۇڭگو“ دەگەن ماعىنادا ەدى.