شي جينپيڭ بەيجيڭ يۇييىڭ مەكتەبىندە قىزمەت تەكسەرگەندە بىلاي دەپ باسا دارىپتەدى

احىلاق، اقىل - وي، دەنە، ەستەتيكا، ەڭبەك جاعىنان جان - جاقتى جەتىلگەن جاڭا ءداۋىردىڭ جاقسى بالالارى بولۋعا قۇلشىنۋ كەرەك

بۇكىل ەلدەگى قالىڭ وسپىرىمدەر مەن بالالاردىڭ ”1 - ماۋسىم“ حالىقارالىق بالالار مەرەكەسىن قۇتتىقتادى

ساي چي، ديڭ شۋەشياڭ قىزمەت تەكسەرۋدە بىرگە بولدى

5 - ايدىڭ 31 - كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ بەيجيڭ يۇييىڭ مەكتەبىنە بارىپ، وقىتۋشى - وقۋشىلارعا امانداسىپ، حال سۇراپ، بۇكىل ەلدەگى قالىڭ وسپىرىمدەر مەن بالالاردىڭ ”1 - ماۋسىم“ حالىقارالىق بالالار مەرەكەسىن قۇتتىقتادى. سۋرەتتە: شي جينپيڭ وقۋشىلار ەگىس الاڭىندا اۋىل شارۋاشىلىق ەگىمشىلىگى امالياتىنا قاتىناسىپ جاتقان باستاۋىش مەكتەپ وقۋشىلارىمەن ىقىلاستى اڭگىمەلەسۋدە.

□ سۋرەتتى شينحۋا اگەنىتتىگىنىڭ ءتىلشىسى جۇي پىڭ تۇسىرگەن

5 - ايدىڭ 31 - كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ بەيجيڭ يۇييىڭ مەكتەبىنە بارىپ، وقىتۋشى - وقۋشىلارعا امانداسىپ، حال سۇراپ، بۇكىل ەلدەگى قالىڭ وسپىرىمدەر مەن بالالاردىڭ ”1 - ماۋسىم“ حالىقارالىق بالالار مەرەكەسىن قۇتتىقتادى. سۋرەتتە: شي جينپيڭ عىلىم ساباقحاناسىندا باستاۋىش مەكتەپ وقۋشىلارىمەن ىقىلاستى اڭگىمەلەسۋدە.

□ سۋرەتتى شينحۋا اگەنتتىگىنىڭ ءتىلشىسى ۋاڭ يە تۇسىرگەن

شينحۋا اگەنتتىگىنىڭ 5 - ايدىڭ 31 - كۇنى بەيجيڭنەن بەرگەن حابارى. ”1 - ماۋسىم“ حالىقارالىق بالالار مەرەكەسى كەلۋ قارساڭىندا، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 5 - ايدىڭ 31 - كۇنى تۇستەن بۇرىن بەيجيڭ يۇييىڭ مەكتەبىنە بارىپ، وقىتۋشى - وقۋشىلارعا امانداسىپ، حال سۇراپ، بۇكىل ەلدەگى قالىڭ وسپىرىمدەر مەن بالالاردىڭ مەرەكەسىن قۇتتىقتادى. شي جينپيڭ بىلاي دەپ باسا دارىپتەدى: وسپىرىمدەر مەن بالالار − وتانىمىزدىڭ بولاشاعى، جۇڭحۋا ۇلتىنىڭ ءۇمىتى. جاڭا داۋىردەگى جۇڭگو بالالارى مۇراتتى، تالاپتى بولۋى، ۇيرەنۋگە ىنتالى، ەڭبەكشىل بولۋى، العىس ايتا بىلەتىن، بەرەكە - بىرلىكتى بىلەتىن بولۋى، باتىلدىقپەن جاڭالىق اشۋى، باتىلدىقپەن كۇرەس جۇرگىزۋى، احىلاق، اقىل - وي، دەنە، ەستەتيكا، ەڭبەك جاعىنان جان - جاقتى جەتىلگەن جاقسى بالا بولۋى كەرەك. وقۋشىلاردىڭ مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ءۇشىن وقۋدى مۇرات ەتىپ، اتا - انالارىنىڭ ءۇمىتىن اقتاۋىن، پارتيا مەن حالىقتىڭ ءۇمىتىن اقتاۋىن ءۇمىت ەتەمىن.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى ديڭ شۋەشياڭ قىزمەت تەكسەرۋدە بىرگە بولدى.

بەيجيڭ يۇييىڭ مەكتەبى 1948 - جىلى حىبەيدىڭ شيبايپوسىندا قۇرىلعان، توركىنى ”جۇڭگو كوممۋنيستىك پارتياسى ورتالىق كوميتەتىنە توتە قاراستى ورگان قامداۋ ءبولىمىنىڭ يۇييىڭ باستاۋىش مەكتەبى“. 75 جىلدان بەرى مەكتەپ اعا بۋىن توڭكەرىسشىلەردىڭ كوڭىل بولۋىندە، قامقورلىعىندا، پارتيانىڭ وقۋ - اعارتۋ باعىتىن جاپپاي دايەكتىلەندىرىپ، ونەگە كورسەتىپ ادام تاربيەلەۋ ءتۇبىرلى مىندەتىن تياناقتاندىرىپ، وقۋ جۇيەسىندە جاڭالىق اشۋدى ىلگەرىلەتىپ، ەرەكشەلىككە يە وقىتۋ جۇرگىزىپ، وقۋشىلاردى احىلاق، اقىل - وي، دەنە، ەستەتيكا، ەڭبەك جاعىنان جان - جاقتى جەتىلۋگە جەتەكتەدى.

شي جينپيڭ مەكتەپكە كەلىپ، اۋەلى، مەكتەپ تاريحى سارايىنا كىرىپ مەكتەپتىڭ تاريحي وزگەرىسى، قۇرىلىسى، دامۋى جانە سوڭعى جىلداردا وقۋ - وقىتۋ رەفورماسىندا جاڭالىق اشۋدى ىلگەرىلەتۋ، ”ەكىنى جەڭىلدەتۋ“ ساياساتىنىڭ تالاپتارىن تياناقتاندىرۋ، وقۋشىلاردىڭ احىلاق، اقىل - وي، دەنە، ەستەتيكا، ەڭبەك جاعىنان جان - جاقتى جەتىلۋىن جەبەۋ سياقتى جاعدايلاردى ۇعىستى. شي جينپيڭ بىلاي دەپ اتاپ كورسەتتى: وقۋ - اعارتۋدىڭ ءتۇبىرلى مىندەتى − ونەگە كورسەتىپ ادام تاربيەلەۋ، احىلاق، اقىل - وي، دەنە، ەستەتيكا، ەڭبەك جاعىنان جان - جاقتى جەتىلگەن سوتسياليزمنىڭ قۇرىلىسشىلارى مەن ءىزباسارلارىن باۋلۋ. وقۋشىلاردى مۇرات - سەنىم، ءمورالدىق قاسيەت، ءبىلىم، زەيىن - زەردە، دەنە جانە پسيحيكالىق ساپا سياقتى جاقتاردان باۋلۋدىڭ بىردە - ءبىرى كەم بولسا بولمايدى. ”ەكىنى جەڭىلدەتۋ“ ساياساتىن تياناقتاندىرۋدىڭ بارىسى بولادى، ۇزاق ۋاقىت ەڭبەك ەتۋ كەرەك. اتا - انا، مەكتەپ، قوعام سياقتى ءارقايسى جاقتى تانىمدى جوعارىلاتۋعا جەتەكتەپ، ”ەكىنى جەڭىلدەتۋ“ قىزمەتى تالابىنىڭ ويداعىداي تياناقتاندىرىلۋىن ىلگەرىلەتىپ، وقۋشىلاردىڭ جان - جاقتى جەتىلۋىن جەبەۋ كەرەك. يۇييىڭ مەكتەبى داڭقتى توڭكەرىستىك داستۇرگە جانە ايقىن قىزىل گەنگە يە. توڭكەرىستىك ءداستۇر تاربيەسىن كۇشەيتىپ، يۇييىڭ مەكتەبىندەگى ءاربىر وقۋشىنىڭ مەكتەپتىڭ داڭقتى تاريحىن ەستە بەرىك ساقتاپ، پارتيانىڭ قامقورلىعىن جادىندا ساقتاپ، قىزىل ءداستۇردى جالعاستىرىپ، قىزىل گەنگە مۇراگەرلىك ەتىپ، كىشكەنتايىنان پارتيانىڭ سوزىنە قۇلاق اسىپ، پارتياعا ىلەسىپ، پارتيا ءۇشىن دارىندى بولۋدى، مەملەكەتكە ۇلەس قوسۋدى مۇرات ەتۋىنە مۇمكىندىك جاساۋ كەرەك.

شي جينپيڭ مەكتەپ ورتاسىن جاياۋ ارالاپ تەكسەرىپ كوردى. باسكەتبول الاڭىندا وقۋشىلار باسكەتبول ويناپ، جىپتەن سەكىرىپ، دەنە تاربيە ساباعىن وقىپ جاتىپتى. شي جينپيڭ بىلاي دەپ اتاپ كورسەتتى: ادامنىڭ دەنساۋلىق ساپاسىن جوعارىلاتۋدا جاس ءوسپىرىم كەز التىن مەزگىل سانالادى. وسى كەزەڭدە دەنەنىڭ ءوسۋى ءبىرىنشى ورىندا تۇرادى، دەنساۋلىق جاقسى بولعاندا عانا، الداعى ومىردەگى ۇيرەنۋگە، قىزمەتكە جاقسى نەگىز قالاۋعا بولادى. دەنە شىنىقتىرۋ وسپىرىمدەر مەن بالالاردىڭ دەنە ساپاسىن كۇشەيتۋدەگى ەڭ ۇتىمدى ءتاسىل. قازىر تۇرمىس شارت - جاعدايى جاقساردى، بالالار تىم سەمىرىپ كەتپەۋى، قايتا شىمىر تۇلعالى بولىپ، جاقسى شىنىعۋى كەرەك. دەنە شىنىقتىرۋدى بالا كەزدەن باستاپ مىقتى ۇستاۋ كەرەك، دەنە شىنىقتىرۋ كوبىرەك بولسا، ”بالپاناقتار“، ”كىشكەنتاي كوزىلدىرىكتىلەر“ ازايادى. مەكتەپ دەنە تاربيە وقىتۋشىلارىن تولىق، ويداعىداي سەپتەۋى، وتباسى، مەكتەپ، قوعام سياقتى ءارقايسى جاقتىڭ ءبارى وسپىرىمدەر مەن بالالاردىڭ دەنساۋلىعىن كۇشەيتۋگە شارت - جاعداي ازىرلەۋى كەرەك.

وسىدان سوڭ شي جينپيڭ وقۋشىلار ەگىس الاڭىنا كەلدى. بۇل ارا وقۋشىلار اۋىل شارۋاشىلىق ەگىمشىلىگى قيمىلىن ورىستەتەتىن امالياتتان وتكىزۋ ورنى، كۇن نۇرىنىڭ استىندا شونەكتە قاتار - قاتار جاپ - جاسىل كوكونىس مايساسى قاۋلاي وسۋدە. بالالار قولدارىنا شەلەك، كۇرەك، تىرما، قىل قالام الىپ، قىزاناق، قيار سياقتىلاردى سۋارىپ، توپىراعىن بوساتىپ، ارام ءشوبىن وتاپ، توزاڭداندىرىپ جاتىپتى. شي جينپيڭ بىلاي دەپ باسا دارىپتەدى: كوپتەگەن ءبىلىم مەن قاعيدا - قيسىن ەڭبەكتەن، تۇرمىستان كەلگەن. بالالاردى كىشكەنتايىنان ەڭبەك كوزقاراسىن ورناتۋعا، ەڭبەك ادەتىن جەتىلدىرۋگە جەتەكتەۋ كەرەك، ەڭبەك قابىلەتىن جوعارىلاتۋ ولاردىڭ ءبىلىمدى اناعۇرلىم جاقسى ۇيرەنۋىنە پايدالى. قازىر قالاداعى كەيبىر بالالاردىڭ اۋىل - قىستاقپەن، كەڭ تابيعاتپەن ارالاسۋى تىم از، ەڭبەكقور بولماۋمەن بىرگە، داقىلداردىڭ ءتۇرىن دە ايىرا بىلمەيدى، نە جەپ وتىرعانىن، قايدان كەلگەنىن، قالاي كەلگەنىن دەرلىك بىلمەيدى، ”كىم ويلار تاباقتاعى پىسقان استىڭ، ءار ءدانى كەلگەندىگىن بەينەت ءجۇزىپ“ دەگەندى ءتىپتى دە تۇسىنبەيدى. ول وقۋشىلارعا بىلاي دەدى: ۇلى تابيعاتتى تانۋدا الدىمەن جانىمىزداعى وسىمدىكتەردى تانۋدان باستاۋىمىز كەرەك. وقۋشىلار وسىرگەن ءتۇرلى وسىمدىكتەردىڭ ءبارى كىتاپتا تانىستىرىلعانىمەن، كوپشىلىكتىڭ وزدەرى ەگىپ، وزدەرى ءوسىرىپ، قاداعالاپ، باقىلاعاندا قول جەتكىزگەن تابىستارى ارينە ۇقسامايدى. وقۋشىلاردىڭ ”اۋىل شارۋاشىلىعىن ۇيرەنۋ“ بارىسىندا ەگىس جۇمىستارىنىڭ ماشاقاتى مەن شارۋالاردىڭ قيىنشىلىعىن ءتۇسىنىپ، كىشكەنتايدان ەڭبەكتى سۇيەتىن، استىقتى قاستەرلەيتىن، تابيعاتقا قۇرمەت ەتەتىن تاماشا ادەت قالىپتاستىرىپ، كورىكتى جۇڭگو قۇرۋعا ۇلەس قوسۋىن ءۇمىت ەتەمىن. جاڭا داۋىردەگى ەكولوگيالىق وركەنيەت قۇرىلىسىن بالالاردان باستاپ ۇستاپ، جاندى دا جالىندى ەڭبەكتى باستان كەشىرۋ ساباعى ارقىلى بالالاردىڭ ءوزى ىستەۋىنە، ءوزى باستان كەشىرۋىنە، ءوزى سەزىنۋىنە مۇمكىندىك جاساپ، ”تۇنىق سۋ، جاسىل تاۋ − باعالى بايلىق“ ۇستانىمىن ەرتە باستان بالالاردىڭ جۇرەگىنە ۇيالاتۋ كەرەك.

مەكتەپتىڭ سىسۇڭ عيماراتىنىڭ 2 - قاباتىنداعى عىلىم ساباقحاناسىنان ءالسىن - ءالى شاتتىق كۇلكىسى ەستىلىپ تۇردى، شي جينپيڭ كلاسقا كىردى، وقىتۋشى - وقۋشىلار باس شۋجيگە وزدەرىنىڭ ۇيرەنگەن ءتۇزۋ سىزىق قوزعالىسى، قيسىق سىزىق قوزعالىسى، كولبەۋ بەت قوزعالىسى سياقتى بىلىمدەردەن پايدالانىپ قۇراما قوبديشاقتان اينالما رەليستى پويەز جاساپ سىناقتان وتكىزگەندىكتەرىن ايتتى. شي جينپيڭ بىلاي دەپ اتاپ كورسەتتى: عىلمي تاجىريبە ساباعى بالالاردىڭ عىلمي ويلاۋىن، ءتىلسىم نارسەلەرگە ىزدەنىس جاساۋ اۋەسىن جانە جاڭالىق اشۋ تانىمىن باۋلۋداعى ءونىمدى ءتاسىل. وقۋشىلاردىڭ كىشكەنتايىنان ”عىلىم - تەحنيكادا جاڭالىق اشۋدا، مەملەكەتتى قۇدىرەتتەندىرۋدە مەن بارمىن“ دەيتىن مۇرات ورناتىپ، قازىر باتىلدىقپەن كىشكەنتاي عالىم، بولاشاقتا ۇلكەن عالىم بولۋعا قۇلشىنىپ، ەلىمىزدىڭ جوعارى دەڭگەيلى عىلىم - تەحنيكادا ءوز كۇشىنە سۇيەنۋدى، ءوزىن الۋەتتەندىرۋدى جۇزەگە اسىرۋىنا ۇلەس قوسۋىن ءۇمىت ەتەمىن.

شي جينپيڭ وسىدان كەيىن 5 - جىلدىق وقىتۋشىلار كەڭسەسىنە بارىپ ساباق دايىندىعىن اقىلداسىپ جاتقان وقىتۋشىلارعا امانداسىپ، ساباقتان كەيىنگى قىزمەت وتەۋ ساباعىنىڭ قۇرىلىمىن ورنالاستىرۋ سياقتى جاعدايلاردى سۇرادى. شي جينپيڭ بىلاي دەپ اتاپ كورسەتتى: جۇڭگوشا سوتسياليستىك وقۋ - اعارتۋ جۇيەسى جاقسى، ەلىمىزدىڭ نەگىزدىك وقۋ - اعارتۋى دۇنيە جۇزىندە باسىمدىققا يە، مادەنيەت سەنىمىن بەكەمدەپ، ءوزىمىزدىڭ جاقسى نارسەلەرىمىزگە ويداعىداي تاباندى بولىپ، شەتەلدىڭ جاقسى نارسەلەرىنەن ويداعىداي ونەگە الىپ، داۋىرمەن بىرگە ىلگەرىلەپ، ەسىك اشىپ، دامىپ، بالالاردىڭ كوز اياسىن اناعۇرلىم كەڭەيتىپ، وي جەلىسىن اناعۇرلىم كەڭەيتىپ، كوزقاراسىن اناعۇرلىم اشىپ، ۇلتتى گۇلدەندىرۋ اۋىر مىندەتىن ارقالاي الاتىن، دۇنيە جۇزىندە كەرەمەتتەردى باتىلدىقپەن جاراتا الاتىن مەملەكەت تىرەكتىلەرىن قۇلشىنا باۋلۋىمىز كەرەك. شي جينپيڭ بىلاي دەپ باسا دارىپتەدى: دارىندىلاردى باۋلۋدىڭ تەتىگى وقىتۋشىدا. قالىڭ وقىتۋشىلار پارتيا ءۇشىن ادام تاربيەلەۋ، مەملەكەت ءۇشىن دارىندى باۋلۋ اۋەلگى ماقساتىن، بورىشىن ەستە بەرىك ساقتاپ، حالىق اعارتۋشىلارىن ۇلگى ەتىپ، ءمورال ارقىلى ءوزىن تۇلعالاۋ، ءمورال ارقىلى ءبىلىمىن جەتىلدىرۋ، ءمورال ارقىلى ءتالىم - تاربيە بەرۋ كەرەك. بۇكىل قوعامدا وقىتۋشىلاردى قۇرمەتتەپ، وقىتۋعا ءمان بەرەتىن تاماشا سالت قالىپتاستىرىپ، وقىتۋشىلىقتى قوعامدا ەڭ قۇرمەتتەلەتىن جانە ادامدار قىزىعاتىن كاسىپكە اينالدىرىپ، تاڭداۋلى دارىندىلار تالاسا وقىتۋشى بولاتىن، تاڭداۋلى وقىتۋشىلار ۇزدىكسىز ورتاعا شىعاتىن تاماشا جاعدايدى قۇلشىنا قالىپتاستىرۋ كەرەك.

مەكتەپتىڭ شاعىن الاڭىندا وقىتۋشى - وقۋشىلار باس شۋجيدى ىقىلاسپەن اتتاندىرىپ سالدى. شي جينپيڭ بالالاردىڭ تولىسا ءتۇسۋىن، اقاۋسىز دارىندى بولىپ جەتىلۋىن تىلەدى ءارى بۇكىل ەلدەگى قالىڭ وسپىرىمدەر مەن بالالاردىڭ ”1 - ماۋسىم“ حالىقارالىق بالالار مەرەكەسىن قۇتتىقتادى. ول بىلاي دەدى: مەن بۇگىن بەيجيڭ يۇييىڭ مەكتەبىنە كوپشىلىككە ارنايى امانداسا كەلىپ، بالدىرعاندارمەن بىرگە ”1 - ماۋسىم“ بالالار مەرەكەسىن قۇتتىقتادىم. وقۋشىلاردىڭ رياسىز دا جالىندى، رۋحتى دا ارىندى بەينەسىن، جۇزدەرىنەن باقىت كۇلكىسى ەسىپ تۇرعاندىعىن كورىپ ايرىقشا قۋاندىم. پارتيا ورتالىق كوميتەتى وسپىرىمدەر مەن بالالاردىڭ اقاۋسىز ەرجەتۋىنە قاشاندا كوڭىل ءبولىپ، قامقورلىق جاساپ، ءبىر قىدىرۋ ساياسات، شارا اتقارىپ، بالالاردىڭ اقاۋسىز ەرجەتۋىنە اناعۇرلىم تاماشا ورتا ازىرلەۋگە قۇلشىندى. مەن جۇڭگو كوممۋنيستىك پارتياسىنىڭ باسشىلىعىندا جانە سوتسياليستىك ءتۇزىمنىڭ كورنەكتى ابزالدىلىعىندا، جۇڭحۋا ۇلتى ۇلى شاڭىراعىندا تۇرمىس كەشىرىپ جاتقان ءار ۇلت بالالارىنىڭ، ءسوزسىز، بارعان سايىن باقىتتى بولاتىندىعىنا، ءسوزسىز، اناعۇرلىم كوركەم بولاشاققا يە بولاتىندىعىنا سەنەمىن. ءار دارەجەلى پارتكومدار مەن ۇكىمەتتەر، قوعامداعى ءار جاق بالالار ىستەرىنىڭ دامۋىنا قاتىستى ءتۇرلى قىزمەتتەردى شىنايى تۇردە ويداعىداي ىستەپ، قيىنشىلىعى بار وتباسىلارىنداعى بالالارعا، اسىرەسە، جەتىم بالالار مەن مۇگەدەك بالالارعا كوڭىل ءبولىپ، كومەكتەسىپ، بارلىق بالاعا پارتيا مەن ۇكىمەتتىڭ مەيىرىن سەزىندىرۋ، ءبارىن باقىتتى دا تاماشا بالالىق شاققا يە ەتۋ كەرەك.

شي جينپيڭ وقۋشىلارعا بىلاي دەدى: بۇگىنگى وسپىرىمدەر مەن بالالار − مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ۇلى ءىسىنىڭ ءىزباسارلارى جانە بولاشاقتاعى نەگىزگى كۇش. وسى عاسىردىڭ ورتا شەنىندە ەلىمىزدى جاپپاي وسىزاماندانعان سوتسياليستىك قۇدىرەتتى مەملەكەت ەتىپ قۇرىپ شىعۋ ءۇشىن قازىر ءبىز وسى ۇرپاق قۇلشىنا كۇرەس جۇرگىزۋدەمىز، بولاشاقتا سىزدەردىڭ كۇرەس جۇرگىزە بەرۋلەرىڭىزگە سۇيەنەمىز.

شي جينپيڭ قالىڭ اتا - انالاردىڭ دەنساۋلىعىنىڭ مىقتى، وتباسىلارىنىڭ باقىتتى بولۋىن، قالىڭ وقىتۋشىلاردىڭ قاسيەتتى قىزمەت ورنىندا جاڭا ۇلەس قوسۋىن تىلەدى.

يىن لي جانە ورتالىق پەن مەملەكەت ورگاندارىنىڭ قاتىستى تاراۋلارىنداعى، بەيجيڭ قالاسىنداعى جاۋاپتى جولداستار قىزمەت تەكسەرۋدە بىرگە بولدى.