شينحۋا اگەنتتىگىنىڭ 9 - ايدىڭ 15 - كۇنى بەيجيڭنەن بەرگەن حابارى (ءتىلشى جىڭ ميڭدا). 9 - ايدىڭ 15 - كۇنى تۇستەن بۇرىن مەملەكەت ءتوراعاسى شي جينپيڭ حالىق سارايىندا جۇڭگوعا رەسمي ساپارمەن كەلگەن كامبودجا باس ءۋازىرى حۇڭمانايمەن كەزدەستى.

شي جينپيڭ بىلاي دەپ اتاپ كورسەتتى: باس ءۋازىر حۇڭمانايدىڭ مىندەتكە وتىرعاننان كەيىن جۇڭگونى ەكى جاقتى ساپارداعى تۇڭعىش ەل ەتىپ تاڭداۋى كامبودجا جاڭا كەزەكتى ۇكىمەتىنىڭ جۇڭگو − كامبودجا دوستىعىن بەكەمدەۋگە جانە دامىتۋعا ايرىقشا ءمان بەرەتىنىن تولىق ايگىلەدى. جۇڭگو مەن كامبودجا − مىزعىماس دوستار. ديپلوماتيالىق قارىم - قاتىناس ورناتقان 65 جىلدان بەرى ەكى جاق باستان - اياق وسكەلەڭ ءوزارا سەنىم ارتىپ، تەڭ تۇرعىدا مامىلە جاساپ، ءوزارا پايدا جەتكىزىپ، تەڭ يگىلىككە كەنەلىپ، قارسى جاعىنىڭ مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن باستان - اياق باتىل قولدادى، بۇل − جۇڭگو − كامبودجا تاعدىرلاس ورتاق تۇلعاسىنىڭ وزەكتى ءمانى. بيىل ەكى جاق جوعارى ساپالى، جوعارى دەڭگەيلى، جوعارى ولشەمدى جۇڭگو − كامبودجا تاعدىرلاس ورتاق تۇلعاسىن قۇرۋدىڭ جاڭا ءداۋىرىن باستادى. جۇڭگو جاق كامبودجا جاقپەن بىرگە جۇڭگو − كامبودجا تاعدىرلاس ورتاق تۇلعاسى قۇرىلىسىنىڭ تەرەڭدەۋىن، ناقتىلانۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدىڭ ۇلگىسىن قول ۇستاسا سومداۋدى قالايدى.

شي جينپيڭ بىلاي دەپ باسا دارىپتەدى: جۇڭگو جاق كامبودجانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن قاراستىرۋىن باتىل قولدايدى، كامبودجا جاقپەن ۇنەمىلىك ستراتەگيالىق بايلانىستى ساقتاپ، ەل باسقارۋ تاجىريبەلەرى جونىندەگى اۋىس - كۇيىستى تەرەڭدەتۋدى قالايدى. ەكى جاق ۇكىمەتتەر ارا سايكەستىرۋ كوميتەتىنىڭ مەحانيزمدىك رولىن ويداعىداي ساۋلەلەندىرىپ، جاڭا ۇلگىدەگى جۇڭگو − كامبودجا تاعدىرلاس ورتاق تۇلعاسى ارەكەت جوسپارىن ويداعىداي تياناقتاندىرىپ، جۇڭگو مەن كامبودجانىڭ ”الماستىڭ التى قىرى“ سەلبەستىك جۇلگەسىن تولىقتاپ، ”ونەركاسىپتى دامىتۋ ءدالىزى“ مەن ”بالىق، كۇرىش ءدالىزىن“ بىرگە قۇرىپ، قاتىستى ءتۇيىندى سەلبەستىك ىستەرىنىڭ ەرتەرەك تياناقتانىپ، ونىمدىلىك كورسەتۋىن ىلگەرىلەتۋ كەرەك. جۇڭگو جاق كامبودجا جاقپەن زاڭ اتقارۋ، حاۋىپسىزدىك سەلبەستىگىن ۇدايىلاندىرا ورىستەتىپ، ينتەرنەتتە قۇمار ويناۋ، تەلەگراف الدامكوستىگى سياقتى شەكارا اتتاعان قىلمىستارعا ۇزدىكسىز سوققى بەرۋدى قالايدى. ەكى جاق ”جۇڭگو − كامبودجا دوستىق جىلى“ جەلىلەس قيمىلدارىن ۇزدىكسىز ويداعىداي وتكىزىپ، ەكى ەل جاستارى، جەرگىلىكتى ورىندار، وقۋ - اعارتۋ، ساياحات، ەمدەۋ - دەنساۋلىق ساقتاۋ سياقتى سالالارداعى سەلبەستىكتى كەڭەيتىپ، جۇڭگو − كامبودجا دوستىعىنىڭ ەكى ەل حالقىنا اناعۇرلىم كوپ باقىت اكەلۋىنە مۇمكىندىك جاساۋ كەرەك.

شي جينپيڭ بىلاي دەپ اتاپ كورسەتتى: مەيلى حالىقارالىق جانە وڭىرلىك جاعداي قالاي وزگەرسە دە، جۇڭگو باستان - اياق كامبودجانىڭ ەڭ سەنىمدى دوسى، ەڭ بەرىك سۇيەنىشى بولىپ كەلەدى. جۇڭگو جاق كامبودجا جاقپەن تىزە قوسىپ، قول ۇستاسىپ، حالىقارالىق ادىلدىكتى، ادىلەتتىلىكتى بىرگە قورعاۋدى، قالىڭ وركەندەپ كەلە جاتقان ەلدەردىڭ ورىندى ۇقىق - مۇددەسىن قورعاۋدى قالايدى.

حۇڭماناي مىنالاردى ءبىلدىردى: مەنىڭ جۇڭگونى تۇڭعىش رەت رەسمي ساپاردا بولاتىن مەملەكەت ەتۋىم كامبودجانىڭ جاڭا كەزەكتى ۇكىمەتىنىڭ جۇڭگوعا قاراتقان دوستىق ساياساتىن ۇزدىكسىز تاباندىلىقپەن اتقارىپ، كامبودجا مەن جۇڭگونىڭ مىزعىماس دوستىعىن ونان ارى ساۋلەلەندىرۋىن ايگىلەۋ ءۇشىن. كامبودجا جاق ءبىر جۇڭگو پرينسيبىنە تاباندى بولىپ، جۇڭگو جاقتىڭ ءوزىنىڭ وزەكتى مۇددەسىن قورعاۋىن تاباندىلىقپەن قولدايدى، ءتوراعا شي جينپيڭ العا قويعان الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن قولدايدى. كامبودجا جاق جۇڭگو جاقتىڭ ۇزاق ۋاقىتتان بەرى كامبودجانىڭ ەكونوميكالىق، قوعامدىق دامۋىنا زور كۇشپەن قولداۋ كورسەتكەندىگىنە جانە كومەكتەسكەندىگىنە العىس ايتادى، جۇڭگو جاقپەن ەكى ەل باسشىسى كەلىسكەن ماڭىزدى ورتاق تانىمدى تياناقتاندىرىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىگىن تەرەڭدەتىپ، ”الماستىڭ التى قىرى“ جۇلگەسى اياسىندا ەكى ەلدىڭ ونەركاسىپ، اۋىل شارۋاشىلىعى، قارجى قوسۋ، گۋمانيتارلىق ىستەر سياقتى سالالارداعى سەلبەستىگىنىڭ ونان ارى دامۋىن ىلگەرىلەتىپ، كامبودجا − جۇڭگو تاعدىرلاس ورتاق تۇلعاسىن قۇرىپ، ەكى ەل حالقىن اناعۇرلىم باقىتقا كەنەلتۋدى قالايدى. كامبودجا جاق جۇڭگو جاقپەن وڭىرلىك جانە حالىقارالىق ىستەردە تىعىز سايكەسىپ، كامبودجا - جۇڭگو قارىم - قاتىناسىن تىڭ دەڭگەيگە كوتەرۋدى قالايدى.

ۋاڭ ي كەزدەسۋگە قاتىناستى.