«ىزدەنۋ» جۋرنالى باس شۋجي شي جينپيڭنىڭ ماڭىزدى ماقالاسىن جاريالايدى

　　وقۋ - اعارتۋدا قۋاتتى ەل قۇرىلىسىن تىڭعىلىقتى ىلگەرىلەتۋ كەرەك

شينحۋا اگەنتتىگىنىڭ 9 - ايدىڭ 15 - كۇنى بەيجيڭنەن بەرگەن حابارى. 9 - ايدىڭ 16 - كۇنى باسپادان شىعاتىن «ىزدەنۋ» جۋرنالىنىڭ 18 - سانى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭنىڭ «وقۋ - اعارتۋدا قۋاتتى ەل قۇرىلىسىن تىڭعىلىقتى ىلگەرىلەتۋ كەرەك» اتتى ماڭىزدى ماقالاسىن جاريالايدى.

ماقالادا بىلاي دەپ باسا دارىپتەلدى: وقۋ - اعارتۋ كوركەيسە، مەملەكەت كوركەيەدى، وقۋ - اعارتۋ قۇدىرەتتەنسە، مەملەكەت قۇدىرەتتەنەدى. وقۋ - اعارتۋدا قۋاتتى ەل قۇرۋ − جاپپاي سوتسياليستىك وسىزاماندانعان قۇدىرەتتى مەملەكەت قۇرۋدىڭ ستراتەگيالىق جەتەكشىسى، جوعارى دەڭگەيلى عىلىم - تەحنيكادا ءوز كۇشىنە سۇيەنۋدى، ءوزىن الۋەتتەندىرۋدى جۇزەگە اسىرۋدىڭ ماڭىزدى تىرەگى، جالپى حالىقتىڭ بىرگە بايۋىن جەبەۋدەگى ءونىمدى ءتاسىل، جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدەگى نەگىزدىك ينجەنەريا.

ماقالادا بىلاي دەپ اتاپ كورسەتىلدى: پارتيا 18 - قۇرىلتايىنان بەرى پارتيا ورتالىق كوميتەتى وقۋ - اعارتۋدى مەملەكەتتىڭ ۇلى جوسپارى، پارتيانىڭ ۇلى جوسپارى ەتۋگە تاباندى بولىپ، وقۋ - اعارتۋدى وسىزامانداندىرۋدى جەدەلدەتۋ، وقۋ - اعارتۋدا قۋاتتى ەل قۇرۋ كەلەلى شەشىمىن جاساپ، جاڭا داۋىردەگى وقۋ - اعارتۋ ىستەرىندە تاريحي تابىسقا قول جەتكىزۋدى، جۇيەلىك وزگەرىستەر تۋىلۋدى ىلگەرىلەتتى. ەلىمىز دۇنيە جۇزىندەگى كولەمى ەڭ ۇلكەن وقۋ - اعارتۋ جۇيەسىن قۇردى، وقۋ - اعارتۋدىڭ وسىزاماندانىپ دامۋ جالپى تۇلعالىق دەڭگەيى دۇنيە جۇزىندەگى ورتاشا جوعارى ەلدەر قاتارىنا ءوتتى. بۇل جۇڭگوشا سوتسياليستىك وقۋ - اعارتۋدى دامىتۋ جولىنىڭ بۇكىلدەي دۇرىس ەكەندىگىن تولىق دالەلدەيدى. پارتيا 20 - قۇرىلتايىنىڭ بايانداماسىندا وقۋ - اعارتۋ، عىلىم - تەحنيكا، دارىندىلار جونىندە ارنايى مازمۇن ورنالاستىرىلىپ، وقۋ - اعارتۋدا قۋاتتى ەل قۇرۋدى جەدەلدەتۋ ۇندەۋى ورتاعا قويىلدى. ءبىز قۇرماقشى بولعان وقۋ - اعارتۋدا قۋاتتى ەل − جۇڭگوشا سوتسياليستىك وقۋ - اعارتۋدا قۋاتتى ەل، ءسوز جوق، پارتيانىڭ وقۋ - اعارتۋ ىستەرىنە جالپى بەتتىك باسشىلىعىنا تاباندى بولۋدى ءتۇبىرلى كەپىلدىك ەتىپ، ءمورال ارقىلى تاربيەلەۋدى ءتۇبىرلى مىندەت ەتىپ، پارتيا ءۇشىن ادام تاربيەلەۋدى، مەملەكەت ءۇشىن دارىندى تاربيەلەۋدى ءتۇبىرلى نىسانا ەتىپ، جۇڭحۋا ۇلتىنىڭ ۇلى گۇلدەنۋىنە قىزمەت وتەۋدى ماڭىزدى بورىش ساناپ، وقۋ - اعارتۋ ۇستانىمىن، جۇيەسىن، ءتۇزىمىن، مازمۇنىن، ءادىسىن، باسقارۋدى وسىزامانداندىرۋدى نەگىزگى ءتاسىل ەتىپ، جۇڭگو ۇلگىسىندەگى وسىزامانداندىرۋعا تىرەك بولۋدى، جەتەكشى بولۋدى وزەكتى يقۋات ەتىپ، ەڭ سوڭىندا حالىق رازى بولاتىن وقۋ - اعارتۋدى ويداعىداي جۇرگىزۋ كەرەك.

ماقالادا بىلاي دەپ اتاپ كورسەتىلدى: پارتيانىڭ وقۋ - اعارتۋ باعىتىن جاپپاي دايەكتىلەندىرىپ، وقۋ - اعارتۋدى حالىقتى وزەك ەتە وتىرىپ دامىتۋعا تاباندى بولىپ، ىرىقتىلىقپەن العا ءوتىپ ورنالاستىرىپ، وزگەرىسكە پارمەندى توتەپ بەرىپ، قۇلشىنا جاڭا جاعداي اشىپ، وقۋ - اعارتۋدى وسىزامانداندىرۋدى جەدەل ىلگەرىلەتىپ، وقۋ - اعارتۋدىڭ كۇشى ارقىلى حالىقتىڭ باقىت نەگىزىن نىعايتىپ، وقۋ - اعارتۋدى قۇدىرەتتەندىرۋ ارقىلى مەملەكەتتى بايىتۋ - قۇدىرەتتەندىرۋ نەگىزىن بەكەمدەپ، جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ ءۇشىن پارمەندى تىرەك ازىرلەۋ كەرەك. ءبىرىنشى، ۇلتتىڭ گۇلدەنۋى سىندى ۇلى مىندەتتى ارقالايتىن ءداۋىر جاڭا ادامدارىن جەتىلدىرۋ كەرەك. قانداي ادام تاربيەلەۋ، ادامدى قالاي تاربيەلەۋ، ادامدى كىم ءۇشىن تاربيەلەۋ − وقۋ - اعارتۋداعى ءتۇبىرلى ماسەلە ءارى وقۋ - اعارتۋدا قۋاتتى ەل قۇرۋداعى وزەكتى تاقىرىپ. ءبىزدىڭ وقۋ - اعارتۋدا قۋاتتى ەل قۇرۋداعى ماقساتىمىز − احىلاق، اقىل - وي، دەنە، ەستەتيكا، ەڭبەك جاعىنان جان - جاقتى دامىعان سوتسياليزمنىڭ قۇرۋشىلارى مەن ءىزباسارلارىن ۇرپاق جالعاي تاربيەلەپ، سوتسياليستىك وسىزامانداندىرۋ قۇرىلىسىندا ۇلكەن ىسكە جارامدى، اۋىر مىندەت ارقالاي الاتىن تىرەكتى دارىندىلاردى ۇرپاق جالعاي تاربيەلەپ، پارتيا ىستەرى مەن سوتسياليستىك وسىزاماندانعان قۇدىرەتتى ەل قۇرىلىسىنىڭ مۇراگەرى بار بولۋعا شىنايى كەپىلدىك ەتۋ. ەكىنشى، جوعارى ساپالى وقۋ - اعارتۋ جۇيەسىن قۇرۋدى جەدەلدەتۋ كەرەك. جوعارى ساپالى دامۋدى ءار دارەجەلى، ءار ءتۇرلى وقۋ - اعارتۋدىڭ جان تامىرى ەتۋگە تاباندى بولىپ، جوعارى ساپالى وقۋ - اعارتۋ جۇيەسىن جەدەل قۇرىپ، وقۋ - اعارتۋدىڭ جوعارى ساپالى دامۋى ارقىلى ەكونوميكانىڭ، قوعامنىڭ باياندى دامۋىنا قۋات ۇستەۋ كەرەك. ءۇشىنشى، وقۋ - اعارتۋدىڭ جوعارى ساپالى دامۋعا قىزمەت وتەۋ قابىلەتىن جاپپاي جوعارىلاتۋ كەرەك. جوعارى ساپالى دامۋعا قىزمەت وتەۋدى وقۋ - اعارتۋدا قۋاتتى ەل قۇرۋدىڭ ماڭىزدى مىندەتى ەتۋ كەرەك. وقۋ - اعارتۋدا قۋاتتى ەل، عىلىم - تەحنيكادا قۋاتتى ەل، دارىندىلاردا قۋاتتى ەل قۇرۋدىڭ ىشكى بىرلىگى جانە ءوزارا تىرەكتىك سيپاتى بار، وسى ۇشەۋىن ورگانيكالى ۇشتاستىرىپ، ءبىر تۇلعادا ءبىر تۇتاس جوسپارلاپ ىلگەرىلەتىپ، جوعارى ساپالى دامۋدى ىلگەرىلەتۋدىڭ ەسەلەپ ارتۋ اسەرىن قالىپتاستىرۋ كەرەك. ءتورتىنشى، رەفورما جاساۋدى، جاڭالىق اشۋدى تەرەڭدەتۋ بارىسىندا وقۋ - اعارتۋدى دامىتۋدىڭ ومىرشەڭدىك كۇشىن قاۋلاتۋ كەرەك. وقۋ - اعارتۋدا ءىرى ەلدەن وقۋ - اعارتۋدا قۋاتتى ەلگە ءوتۋ − جۇيەلىك سەكىرۋ جانە ساپالىق وزگەرىس، ءسوز جوق، رەفورما جاساۋدى، جاڭالىق اشۋدى قوزعاۋشى كۇش ەتۋ كەرەك. بەسىنشى، ەلىمىز وقۋ - اعارتۋىنىڭ حالىقارالىق ىقپال كۇشىن كۇشەيتۋ كەرەك. وقۋ - اعارتۋدا سىرتقا ەسىك اشۋ ستراتەگياسىن، تاكتيكاسىن كەمەلدەندىرىپ، ”سىرتتان ەنگىزۋ“ جانە ”سىرتقا شىعارۋ“ سىندى ەكى ۇلكەن ءىستى ويداعىداي ىستەۋدى ءبىر تۇتاس جوسپارلاپ، دۇنيە جۇزىندەگى بىرەگەي وقۋ - اعارتۋ بايلىعى مەن جاڭالىق اشۋ فاكتورلارىنان ءونىمدى پايدالانىپ، ەلىمىزدى دۇنيە جۇزىندەگى ىقپالى كۇشتى ماڭىزدى وقۋ - اعارتۋ ورتالىعىنا اينالدىرۋ كەرەك. التىنشى، جوعارى ساپالى وقىتۋشىلار قوسىنىن جەتىلدىرۋ كەرەك. وقىتۋشىلار قوسىنى قۇرىلىسىن كۇشەيتۋدى وقۋ - اعارتۋدا قۋاتتى ەل قۇرۋداعى ەڭ ماڭىزدى نەگىزدىك قىزمەت رەتىندە يگەرىپ، جۇڭگوشا ەرەكشەلىككە يە وقىتۋشى تاربيەلەۋ جۇيەسىن اقاۋسىزداندىرىپ، وقىتۋشىلىق ءمورالى وسكەلەڭ، كاسىپكە جەتىك، قۇرىلىمى ۇيلەسىمدى، ومىرشەڭدىككە تولى جوعارى ساپالى ماماندانعان وقىتۋشىلار قوسىنىن كۇش سالا جەتىلدىرۋ، تۇلعالاۋ كەرەك.

ماقالادا بىلاي دەپ باسا دارىپتەلدى: وقۋ - اعارتۋدا قۋاتتى ەل قۇرۋ − بۇكىل پارتيانىڭ، بۇكىل قوعامنىڭ ورتاق مىندەتى. پارتيانىڭ وقۋ - اعارتۋ قىزمەتىنە جالپى بەتتىك باسشىلىعىنا تاباندى بولىپ جانە ونى كۇشەيتىپ، پارتكوم ءبىر تۇتاس باسشىلىق ەتەتىن، پارتيا مەن ۇكىمەت تەڭ يگەرىپ، بىرگە باسقاراتىن، تاراۋلار ءوز جاۋاپكەرشىلىگىن ارقالايتىن وقۋ - اعارتۋ باسشىلىق ءتۇزىلىسىن ۇزدىكسىز كەمەلدەندىرۋ كەرەك. سەنىمدى بەكەمدەپ، ۇزدىكسىز قاجىماي كۇش سالىپ، وقۋ - اعارتۋدا قۋاتتى ەل بولۋ نىساناسىن ەرتەرەك جۇزەگە اسىرۋ جولىندا بىرگە قۇلشىنۋ كەرەك.