23 - ورتا مەكتەپتىڭ بولىمشە مەكتەبى، 10 - ورتا مەكتەپ، 24 - ورتا مەكتەپ پايدالانۋعا بەرىلدى

قۇلجا قالاسىندا جاڭادان سالىنعان 3 مەكتەپ العاشقى توپتا جاڭا وقۋشىلاردى قابىلدادى

ٴتىلشىمىز ياڭ جيڭ - ي حابارلايدى. قۇلجا قالالىق 23 - ورتا مەكتەپ بولىمشە مەكتەبىنىڭ 7 - جىلدىعىنا العاشقى توپتا جاڭادان قابىلدانعان وقۋشى تيان جىڭ مەكتەپ ورتاسىن اۋىز جاپپاي ماقتاپ بىلاي دەدى: ”جاڭا مەكتەپ ۇلكەن ٴارى كوركەم ەكەن، وسىندا وقۋعا تۇسكەنىمە ايرىقشا قۋانىشتامىن“. 8 - ايدىڭ 30 - كۇنى وقۋ باستالعان 3 - كۇنى قۇلجا قالاسىندا جاڭادان سالىنعان 3 مەكتەپ، ياعني 23 - ورتا مەكتەپتىڭ بولىمشە مەكتەبى، 10 - ورتا مەكتەپ، 24 - ورتا مەكتەپ تۇگەل پايدالانۋعا بەرىلىپ، العاشقى توپتا جاڭا وقۋشىلاردى قارسى الدى.

قۇلجا قالالىق 23 - ورتا مەكتەپ بولىمشە مەكتەبىنىڭ اۋلاسىندا ٴتىلشى شىت جاڭا وقىتۋ رايونىنىڭ، ولشەمدەنگەن ۋنيۆەرسالدى عيماراتتىڭ كۇن نۇرىنىڭ شۇعىلاسىندا ايرىقشا كوز تارتقانىن، جاسىل جەلەك جامىلعان دەنە تاربيە الاڭىنىڭ ومىرشەڭدىك كۇشكە تولىپ، مەكتەپتىڭ كوركەم كورىنىسىنە اينالعانىن كوردى. وقىتۋ عيماراتىنا كىرسەڭىز، كەڭ دە جارىق كلاس، شىت جاڭا پارتا - ورىندىق، اۆتوماتتى وقىتۋ جابدىقتارى ورناتىلىپ بولعان ەدى.

بۇل مەكتەپتىڭ وقىتۋشىسى راحىمان اۋىت تىلشىگە بىلاي دەدى: وسى وقۋ ماۋسىمى باستالىسىمەن مەكتەبىمىز العاشقى توپتا 500 دەن استام وقۋشى قابىلدادى، قازىر 30 نەشە وقىتۋشى، 10 كلاس بار، پارتا - ورىندىق نەگىزىنەن ازىرلەنىپ بولدى، باسقا قۇرىلعىلار رەتىمەن ازىرلەنۋدە، مەكتەپتىڭ گيمناستيكا الاڭى، دەنە تاربيە سارايى ٴالى دە  سالىنۋ ۇستىندە. سوڭعى مەزگىلدە مەكتەبىمىز اسكەري جاتتىعۋ جۇرگىزەدى ٴارى ٴتۇرلى تاقىرىپتىق تاربيە قيمىلدارىن ورىستەتەدى.

قۇلجا قالالىق 24 - ورتا مەكتەپتەگى 560 تان استام جاڭا وقۋشى وقۋ باستالىسىمەن 6 كۇندىك اسكەري جاتتىعۋدى باستادى، ونىڭ مازمۇنى ساپقا تۇرۋ ٴتارتىبى، جۇدىرىق ونەرى، اسكەري گيمناستيكا، جالپى حالىقتىق مەملەكەت قورعانىسى تاربيەسى پروگرامماسى، توڭكەرىستىك اندەردى ۇيرەتۋ سياقتىلاردى قامتيدى. اسكەري جاتتىعۋ ارقىلى وقۋشىلار نەگىزگى اسكەري ىستەر بىلىمدەرى مەن ونەرىن يگەرىپ، يدەيالىق - ساياسي سانالىلىعى مەن جالپىلىق ساپاسىن جوعارىلاتتى. مەكتەپكە جاڭادان قابىلدانعان وقۋشى جيا شينرۇي بىلاي دەدى: ”جاڭا وقۋ ماۋسىمىندا جاڭا بەينەمەن 24 ـ ورتا مەكتەپتىڭ ٴبىر مۇشەسى بولعانىما وتە قۋانىشتامىن، وقىتۋشىلارىممەن جانە ساباقتاستارىممەن بىرگە ورتالاۋ مەكتەپ 3 جىلدىعىنىڭ سىن ـ سايىسقا تولى ۇيرەنۋ تۇرمىسىن باستاۋدى ٴۇمىت ەتەمىن“.

قۇلجا قالالىق 10 - ورتا مەكتەپ اسكەري جاتتىعۋدى جانە ورتا، باستاۋىش مەكتەپ وقۋشىلارىنىڭ ارەكەتكە داعدىلانۋ جاتتىعۋىن ورىستەتىپ، كۇندەلىكتى وقىتۋ قيمىلىن ورىستەتۋگە ويداعىداي دايىندالدى. ”جاڭا سالىنعان بۇل مەكتەپ ۇيىمىزگە جاقىن، ورتاسى كوركەم، بالامنىڭ وسىندا وقىعانىنا اتا - انا رەتىندە توتەنشە ريزامىن“ دەدى قۇلجا قالالىق 10 - ورتا مەكتەپ وقۋشىسىنىڭ شەشەسى لان حانىم.