”گۇل جايناعان الەم“ تۇتىنۋدىڭ جاندانۋىن جەبەدى

ۋاڭ شينحۇڭ (شينجياڭ گازەتىنىڭ ٴتىلشىسى)

ومىردە ەڭ كەرەمەت ٴساۋىر ايى، بۇل گۇل تاماشالاپ، كوكتەمگى سەيىلگە شىعۋدىڭ دەر شاعى. 4 - اي كىرىسىمەن شينجياڭنىڭ جەر - جەرىندە جاعالاي گۇل اشىلىپ، گۇل تاماشالاۋدىڭ ەڭ تاماشا مەزگىلىنىڭ كەلۋىمەن جەر - جەردىڭ ساياحات بازارى جەدەل جاندانىپ، تۇتىنۋ بازارى تاعى ٴبىر قاۋىرت كەزدى قارسى الادى.

”’گۇلمەن كومكەرىلگەن شينجياڭدى ساياحاتتاۋدى‘ جۇبايىم ەكەۋىمىز بيىلعى ساياحاتتاعى باستى تالعام ەتتىك. كۇنەس اۋدانى تۇرگەن اۋىلىنىڭ ورىك گۇلى ٴبىزدىڭ ەڭ العاشقى بەكەتىمىز بولدى“ دەدى ٴوزىن ”گۇل قۇمار“ دەپ اتاعان جياڭسۋلىق ساياحاتشى لي يۇيفاڭ.

تۇرگەن اۋىلىنىڭ قارا وي قىستاعى ساياحات بايلىعى مول ورىك گۇلى اڭعارىنا ورنالاسقان، ”ورىك گۇلى قىـستاعى“ دەگـەن اتى بـار. ٴار جىلى 3 - ايدىڭ سوڭىنان 4 - ايدىڭ باسىنا دەيىنگى ۋاقىتتا جابايى ورىك گۇلى اشىلعان كەزدە توپ - توپ ساياحاتشىنى وسىندا باۋرايدى.

”بيىل ٴبىز گۇلدىڭ شەشەكتەۋ مەزگىلىنە جەتپەي - اق ساياحاتشى قابىلداي باستادىق“. وسى قىستاقتا حالىقتىق تۇسەلحانا تيجاراتىمەن شۇعىلداناتىن قىستاق تۇرعىنى نۇرگۇل ازات قىزى بىلاي دەدى: ورىك گۇلى قىستاعىمىز ساياحاتىنىڭ جۇمىس باستاۋ تەتىگى. ٴار جولى ورىك گۇلى اشىلىپ، ساياحاتشىلار كەلگەندە قىستاقتاعى ساياحات كاسىبىمەن شۇعىلداناتىندار بۇرىنعى وزدەرى ىستەگەن قىزمەت ورنىنا جەدەل ورالىپ، ٴبىر جىلدىق قاربالاستىق قىزمەتىن باستايدى.

قۇلجادان وتباسىنداعىلارىن ەرتىپ گۇل تاماشالاۋعا كەلگەن جاۋ يان كاۋاپ جەي وتىرىپ بىلاي دەدى: ”گۇلگە قىزىقپايتىن ەشكىم جوق، تۇرگەننىڭ ورىك گۇلىن ٴبىز وتباسىمىزبەن ٴار جىلى كەلىپ كورەمىز، قانشا كورسەك تە كوز مەيىرىمىز ٴبىر قانبايدى“.

”گۇل تاماشالاعان ادامنىڭ كوڭىل كۇيى جاقسى بولاتىندىعىنان با، كاۋاپتى دا كوپ جەيدى. قازىر كۇندىك كىرىسىم بۇرىنعىدان 3 ەسە ارتتى“ دەدى كاۋاپشى جەلىل قاسىم.

قاراوي قىستاعى پارتيا ياچەيكاسىنىڭ شۋجيى ليۋ يۇڭشيڭ بىلاي دەپ تانىستىردى: قازىر گۇل اشۋ مەزگىلىندە ساياحاتتاپ كەلەتىندەر بارعان سايىن كوبەيدى. 20 كۇندىك گۇل اشۋ مەزگىلىندە قىستاقتاعى وتباسىلارىنىڭ ورتاشا كىرىسى 20 مىڭ يۋان اينالاسىندا بولادى.

ورىك گۇلى، المۇرت گۇلى، شاپتول گۇلى... 4 - ايداعى شينجياڭ بەينە پاراقتالعان ”گۇل كۇنتىزبەسى“ ىسپەتتى، قايسى پاراعىن اشساڭىز دا تۇگەلدەي كوز مەيىرىن قاندىراتىن كوركەم سۋرەتتەر.

ٴتىپتى دە كوپ تۇتىنۋشىنىڭ كوز مەيىرىن قاندىرىپ، گۇل تاماشالاۋ ساياحاتى سىندى تۇتىنۋدىڭ وسى ٴبىر قولامتالى ٴتۇيىنىن مىقتى يگەرۋ ٴۇشىن، كوپتەگەن ساياحات سەرىكتەستىكتەرى سوناۋ كوكتەم مەرەكەسىنەن بۇرىن دايىندىق كوردى. كوكتەم مەرەكەسى وتە سالىسىمەن جەلىدە جانە جەلى سىرتىندا وزگەشەلەنگەن، الۋان تۇرلىلەنگەن، جوعارى ساپالى گۇل تاماشالاۋ ساياحاتى جەلىلەرىن بەلگىلەدى. كەيبىر ساياحات سەرىكتەستىكتەرى گۇلدى دانەكەر ەتىپ، جول بويىندا تابيعي كورىنىستەردى تاماشالاۋ، حالىقتىق سالت - سانانى، ادامزات مادەنيەتىن سەزىنۋ، ٴدامدى تاعامداردان ٴدام تاتۋ سياقتىلارمەن بايلانىستىرىپ، گۇل تاماشالاۋ ساياحاتى مەن قار - مۇز ساياحاتىن ۇشتاستىردى.

”ساياحاتشىلاردىڭ گۇل تاماشالاۋ ساياحاتىنا قىزعىندىلىعىنىڭ ارتۋىمەن ٴىشىنارا ساياحات سەرىكتەستىكتەرىنىڭ كوكتەمگى ساياحاتتاعى تاپسىرىسى بۇرىنعى جىلدارداعى سايكەس مەزگىلدەگىدەن %40 كە جۋىق ارتتى“ دەدى شينجياڭ جۇڭگو حالىقارالىق ساياحات قوعامى شەكتى جاۋاپكەرشىلىك سەرىكتەستىگىنىڭ باس ديرەكتورى جوۋ دي.

ساياحات سەرىكتەستىكتەرىنەن سىرت، كەيبىر زەرتتەۋ - ۇيرەنۋ قۇرىلىمدارى دا گۇل تاماشالاۋ ساياحاتىنىڭ كوشىنە قوسىلدى. ٴۇرىمجى قالاسىنداعى زەرتتەۋ - ۇيرەنۋ ساياحاتىمەن شۇعىلداناتىن ٴبىر قۇرىلىمنىڭ جاۋاپتىسى بىلاي دەدى: قازىر ٴبىزدىڭ تەلەفونىمىز ىستىق لەنياعا اينالدى، مەرەكە، دەمالىس كۇندەرى اتا - انالار بالالارىمەن بىرگە ساياحاتتايتىن زەرتتەۋ - ۇيرەنۋدىڭ قانداي تۇرلەرى بار دەگەن اتا - انالاردىڭ ەڭ كوپ كەڭەس سۇرايتىن ٴتۇرى بولدى.

”كوكتەمدە ٴبىر ٴۇيلى جان سىرتقا بارىپ گۇل تاماشالاپ، كوكتەمگى سەيىلگە شىعۋ جانىڭىزدى جادىراتىپ قانا قويماي، كوڭىل كۇيىڭىزدى شىڭدايدى ەكەن، ەرەكشە ماعىنالى سەزىندىم“. بالاسىن كورلاعا المۇرت گۇلىن كورۋگە ەرتىپ بارعان ٴۇرىمجى قالاسىنىڭ تۇرعىنى گاۋ جۋان بىلاي دەدى: وتباسىمىز ٴار جىلى ٴبىر ٴبولىم قاراجات شىعارىپ گۇل تاماشالاۋ ساياحاتىنا جۇمسايمىز.

تاماعى ٴدامدى، ساياحاتى قىزىقتى ەكەن، تاماشا كوڭىل كۇي سيلادى. مىنە بۇل سانجىلىق ساياحاتشى ۋ دۇڭميڭنىڭ تۇرپان قالاسى گاۋچاڭ رايونى يار قالاشىعى شاڭحۋ قىستاعىنا بارىپ ورىك گۇلىن تاماشالاعانداعى اسەرى. ول بىلاي دەدى: بۇرىن باسقالاردىڭ تۇرپانعا بارىپ گۇل تاماشالاپ قايتقانىن ەستىگەنىمدە ەشقانداي ماعىنالى سەزىنبەۋشى ەدىم، گۇل تاماشالاعان ادامداردىڭ ٴيىن تىرەسۋىنىڭ دە سەبەبى بار ەكەنىن ٴوزىم بارىپ كورگەن سوڭ ٴبىلدىم، وزگەشە ٴدامدى تاعام جاساۋ جارىسى، ۇلتتىق سالت ـ سانا ويىندارىنىڭ ىقپالى بولەكشە بولىپ، بارعانعا تاتيدى ەكەن.

ۇعىسۋعا قاراعاندا، كوكتەم ماۋسىمى كەلگەننەن بەرى، تۇتاس شينجياڭنىڭ جەر ـ جەرىندە گۇل تاماشالاۋ، كوكتەمگى سەيىل ساياحاتى، ٴوز اۆتوكولىگىمەن ساياحاتتاپ كوكتەمنەن ٴلاززات الۋ ٴۇرتىس دۋماندى بولعان. جەر ـ جەردىڭ ٴىس جۇزىندىك جاعدايىمەن ۇشتاستىرىپ، ىركەس - تىركەس العا قويعان كوكتەمدە سەيىلگە شىعىپ گۇل تاماشالاۋ قيمىلى، ۇلتتىق سالت ـ سانا مادەنيەتى، اۋىل ـ قىستاق ٴدامدى تاعامدارى سياقتى كوكتەمگى تاقىرىپتىق مادەنيەت ـ ساياحات قيمىلدارى 300 تۇردەن اسقان. تەك چيڭميڭ دەمالىسىنىڭ وزىندە شينجياڭنىڭ جالپى قابىلداعان ساياحاتشى سانى 2 ميلليون 210 مىڭ 200 ادام ـ رەتتەن اسىپ، سايكەس مەزگىلدەگىدەن %20.53 ارتقان؛ ساياحات كىرىسى 2 ميلليارد 198 ميلليون يۋانعا جەتىپ، سايكەس مەزگىلدەگىدەن %62.33 ارتقان.