انار بۇلت \ شينجياڭ گازەتىنىڭ ءتىلشىسى ۋي يۇڭگۇي

حوتان اۋدانى حانارىق قالاشىعىنىڭ داۋشياڭ قىستاعىنداعى 10 مىڭ مۋلىق كۇرىش اتىزىندا كۇرىش جايقالىپ، جاسىل تولقىن اتادى. جاقىنعى جىلداردان بەرى دارا ەرەكشەلىككە يە قۇمدى شولدەگى كۇرىش اتىز كورىنىسىنىڭ ارقاسىندا، داۋشياڭ قىستاعى وڭتۇستىك شينجياڭ وڭىرىنە تانىمال اۋىل ساياحات كەشەنى جانە ۇلتتىق سالت - سانا مادەنيەتى قىستاعىنا اينالدى. تۇتاس قىستاقتاعى 219 وتباسىنداعى قىستاق تۇرعىندارى اۋىل شارۋاشىلىعىنا سۇيەنىپ كىرىستەرىن ارتتىرىپ، ساياحات شارۋاشىلىعىنىڭ ارقاسىندا بايۋ جولىنا ءتۇستى.

داۋشياڭ قىستاعىنىڭ دامۋىن، وزگەرىسىن شينجياڭعا كومەكتەسۋ نىسان - قارجىسىنىڭ قولداۋىنان بولە قاراۋعا كەلمەيدى. بەيجيڭ قالاسىنىڭ شينجياڭعا كومەكتەسۋ قىزمەتى الدىڭعى شەپ قولباسشىلىق شتابىنىڭ قولداۋىندا، قىستاقتىڭ سۋ، ەلەكتر، جول، وتىندىق گاز سياقتى نەگىزدىك قۇرىلعىلارى جاپپاي جاقسارتىلىپ، اۋىل شارۋاشىلىعى مەن ساياحات كاسىبى توعىسا دامىپ، بارشا قىستاق تۇرعىندارى اۋىل - قىستاقتى گۇلدەندىرۋدىڭ جەمىسىنەن بىرگە يگىلىكتەندى.

بۇنداي يگى وزگەرىس داۋشياڭ قىستاعىمەن عانا شەكتەلمەدى. ونسۋ اۋدانىندا جىجياڭ ولكەسىنىڭ جينحۋا قالاسى شينجياڭعا كومەكتەسۋ قارجىسىنان 55 ميلليون يۋاننان استام قارجى سالىپ، قونىس جاڭالاپ كوشىرىلگەننەن كەيىنگى توقۇلا اۋىلى قۇرۇل قىستاعىن شارۋاشىلىعى شالقىعان، قورشاعان ورتاسى كوركەم جينحۋا جاڭا قىستاعى ەتىپ قۇرىپ شىقتى. بۇگىنگى تاڭدا، بۇل جاڭا قىستاق مەملەكەتتىك 3A دارەجەلى كورىنىس اۋماعى بولىپ باعالاندى.

شينجياڭعا باعىتتامالى كومەكتەسۋ بارىسىندا قىستاقتاردان سىرت كوپتەگەن باقشا رايوندارى دا قۇرىلدى. شاڭحاي كاسىپ سالاسى باقشاسى، تيانجين ونەركاسىپ باقشاسى، شاندۇڭ كوكونىس كاسىپ سالاسى باقشاسى... وڭتۇستىك، سولتۇستىك شينجياڭنىڭ ءار جەرىندە، شينجياڭعا باعىتتامالى كومەكتەسەتىن ولكە، قالالاردىڭ اتىمەن اتالعان كاسىپ سالاسى باقشا رايوندارىندا، ونەركاسىپ، اۋىل شارۋاشىلىعى ءوندىرىس بازالارىندا ءار ۇلت بۇقاراسىنىڭ شينجياڭعا كومەكتەسەتىن ولكە، قالالارعا دەگەن العىس سەزىمدەرى ايگىلەنىپ جاتتى.

پارتيا 18 - قۇرىلتايىنان بەرى، ورتالىق پەن مەملەكەتتىك ورگاندار، ورتالىق كاسىپورىندارى جانە شينجياڭعا كومەكتەسەتىن 19 ولكە ، قالا جاڭا كەزەكتى شينجياڭعا باعىتتامالى كومەكتەسۋ قىزمەتىندە زور كۇشپەن كومەك كورسەتىپ، شينجياڭعا باعىتتامالى كومەكتەسۋ قىزمەتىندە سۇبەلى جەتىستىككە قول جەتكىزىپ، شينجياڭنىڭ ەكونوميكالىق، قوعامدىق دامۋىنا قۋاتتى قوزعاۋشى كۇش ازىرلەدى. تيانشان الابى كۇن سايىن جاڭارىپ، اي سايىن تۇلەجىپ، شينجياڭنىڭ بايتاق دالاسىندا جالىندى ومىرشەڭدىك كۇش قاۋلاپ، ءار ۇلت بۇقاراسى تىنىش ءومىر، شات - شادىمان تىرشىلىك كەشىرىپ، ءبىر نيەتپەن جاڭا جورىققا قادام تاستادى.

　　حالىق تۇرمىسىندا شينجياڭعا كومەكتەسۋ بۇقارانىڭ ىرىس - قۇتىن مولايتتى

پارتيا 18 - قۇرىلتايىنان بەرى، ورتالىق پەن مەملەكەتتىك ورگاندار، ورتالىق كاسىپورىندارى جانە شينجياڭعا كومەكتەسەتىن 19 ولكە، قالا قاشاندا حالىق تۇرمىسىن قامتاماسىز ەتۋدى جانە جاقسارتۋدى شينجياڭعا باعىتتامالى كومەكتەسۋ قىزمەتىنىڭ شىعار ءتۇيىنى جانە تابان تىرەر تياناعى ەتتى. تەك ”13 - بەسجىلدىق“ مەزگىلدىڭ وزىندە شينجياڭعا كومەكتەسەتىن 19 ولكە، قالا شينجياڭعا كومەك قارجىسىنان جالپى 76 ميلليارد 677 ميلليون يۋاننان استام قارجى سالىپ، شينجياڭعا كومەك نىساندارىنان 8540ىن اتقاردى، شينجياڭعا كومەك قارجىلارىنىڭ ％80تەن استامى حالىق تۇرمىسى سالاسى مەن نەگىزگى ساتىعا جۇمسالىپ، ءار ۇلت بۇقاراسى ەڭ كوڭىل ءبولىپ وتىرعان، ەڭ تىكە، ەڭ رەال حالىق تۇرمىسى ماسەلەلەرىن ءونىمدى شەشتى.

− ەمدەۋ جاعىندا شينجياڭعا كومەكتەسۋ ىشكەرىلەي ورىستەتىلدى. تيانجين قالاسى ەمدەۋ دارىندىلارىنىڭ ”ۇيىرمە فورماسىندا“ شينجياڭعا كومەكتەسۋىن ورىستەتىپ، حوتان ايماقتىق حالىق شيپاحاناسىنىڭ كوز اۋرۋلارى ءبولىمىن اشۋىنا كومەكتەسىپ، سول جەردەگى شەل اۋرۋىنا شالدىققان ناۋقاستارعا جارىق سيلادى. جىجياڭ ولكەسى ”13 - بەسجىلدىق“ مەزگىلىندە 567 ميلليون يۋان قارجى سالىپ، اقسۋ ايماعىنىڭ، بيڭتۋان 1 - شىسى ارال قالاسىنىڭ ەمدەۋ - دەنساۋلىق ساقتاۋ نەگىزدىك قۇرىلعىلارىن كەمەلدەندىرۋىنە، جابدىقتاردى جاڭالاۋىنا، دارىندى تاربيەلەۋىنە كومەكتەسىپ، ”14 - بەسجىلدىقتا“ ءبىر ميلليارد 33 ميلليون يۋان قارجى سالۋدى جوسپارلاپ وتىر.

− وقۋ - اعارتۋ جاعىندا شينجياڭعا كومەكتەسۋ ساپانى جوعارىلاتتى. بەيجيڭ قالاسى 240 ميلليون يۋان قارجى سالىپ، حوتان قالاسىنىڭ دارىندى تاربيەلەۋ وقۋ - اعارتۋ باقشا رايونىن قۇرۋىنا باعىتتامالى كومەكتەسىپ، حوتان قالاسىنىڭ نەگىزدىك وقۋ - اعارتۋ بايلىعىنىڭ كولەمى شاعىن، ورنالاسىمى بىتىراڭقى بولۋ سياقتى ماسەلەلەردى شەشتى. حۋبەي ولكەسى ”قان جاساۋ“ تۇرىندە وقۋ - اعارتۋ بويىنشا شينجياڭعا كومەكتەسىپ، جىلىنا 200دەن استام تاڭداۋلى وقىتۋشىنى بۇراتالا موڭعۇل اۆتونوميالى وبلىسى مەن بيڭتۋان 5 - شىسىنداعى ورتا، باستاۋىش مەكتەپتەرگە تاڭداپ جىبەرىپ، وقۋ - اعارتۋ ساپاسىنىڭ جوعارىلاۋىنا دەم بەردى.

− جۇمىستاندىرۋ ارقىلى كىرىستى ارتتىرۋ ۇزدىكسىز ىلگەرىلەدى. گۇما اۋدانىندا انحۇي ولكەسى شينجياڭعا كومەكتەسۋ ارقىلى تۇلعالاعان سيفرلى ەكونوميكا كاسىپ سالاسى باقشاسى 2021 - جىلى جەرگىلىكتى ورىننان 2000نان استام ادامدى جۇمىستانۋعا تارتتى، بۇل كورسەتكىش بيىل مەجەمەن 5000عا جەتپەك. قاشقار ايماعىندا گۋاڭدۇڭ ولكەسى شينجياڭعا كومەكتەسۋ ارقىلى ”از ۇلتتاردان بايۋعا باستاۋشىلار تاربيەلەۋ“ ارەكەتىن ۇدايى 3 جىل اتقارىپ، شارۋاشىلىق قۇرۋشى ءبىر توپ شارۋاعا قارجىلىق جانە تەحنيكالىق كومەك ۇسىنىپ، تىكەلەي، جانامالاي 3000نان استام ادامدى جۇمىستانۋ ارقىلى كىرىس ارتتىرۋعا باستادى.

سۋمەن قامداۋ ينجەنەرياسى، كومىردى ەلەكترگە وزگەرتۋ، كورىكتى اۋىل - قىستاق قۇرىلىسى، بەيقۇت ءۇي قۇرىلىسى... حالىق تۇرمىسىنا ساياتىن شينجياڭعا كومەكتەسۋ نىساندارى قالالار مەن اۋىلداردا جاپپاي بوي كورسەتىپ، بۇقارانىڭ ءوندىرىس، تۇرمىس شارت - جاعدايىن بارىنشا جاقسارتىپ، ءار ۇلت بۇقاراسىنىڭ تابىس سەزىمى، باقىت سەزىمى، حاۋىپسىزدىك سەزىمى ۇزدىكسىز كۇشەيدى.

　كاسىپ سالاسى ارقىلى شينجياڭعا كومەكتەسۋ قان جاساۋ يقۋاتىن كۇشەيتتى

ءونىم جيناۋ مەزگىلى كەلگەندە، ءبۇحالچام تۇرسۇن ءار كۇنى تاڭ اتىسىمەن جىلىجايعا كەلىپ قاربالاس جۇمىسقا كىرىسەدى. ”تەحنيكتەردىڭ جەتەكشىلىگىندە، مەن ەككەن پروۆانسي قىزاناعىنىڭ قابىعى جۇقا، ەتى قالىڭ، ءدامى جاقسى بولعاندىقتان، قاجەتسىنۋدى قامداي الماي جاتىرمىز“، - دەدى ول.

ءبۇحالچام جاڭاءشار اۋدانى شاندۇڭ شۇيفا كوكونىس كاسىپ سالاسى باقشاسىنان جىلىجاي كوتەرمەگە الۋشى. بۇل كاسىپ سالاسى باقشاسى شاندۇڭ ولكەسىنىڭ كاسىپ سالاسى ارقىلى شينجياڭعا كومەكتەسۋدەگى ءتۇيىندى نىساندارىنىڭ ءبىرى، قازىرگە دەيىن 70 مىڭ شارشى مەترلىك زەردەلى جىلىجاي جانە 1000 جىلىجاي پارنيگى پايدالانۋعا بەرىلگەن. كاسىپ سالاسى باقشاسى تولىق سالىنىپ بىتكەن سوڭ، جىلىنا مەجەمەن ءبىر ميلليون 500 مىڭ توننا جاڭا كوكونىس ءوندىرىپ، ءبىر ميلليون توننا كوكونىس مانەرلەي الادى، ول وڭتۇستىك شينجياڭ وڭىرىندەگى كوكونىس كاسىپ سالاسىن دامىتۋعا جەتەكتەۋدەگى ۇلگى كورسەتۋشى نىسانداردىڭ ءبىرى سانالادى.

شينجياڭعا باعىتتامالى كومەكتەسۋ قىزمەتىندە شينجياڭعا كومەكتەسەتىن ءارقايسى ولكە، قالالار كاسىپ سالاسى ارقىلى شينجياڭعا كومەكتەسۋدەگى ”قان جاساۋ“ يقۋاتىن كۇشەيتىپ، كومەك قابىلداعان جەرلەردىڭ كاسىپ سالاسىن دامىتۋداعى ىشكى قوزعاۋشى كۇشىن ۇزدىكسىز كۇشەيتتى.

كاسىپ سالاسى باقشاسى قۇرىلىسىن ”تومەنگە ءتۇسىردى“. ياركەن اۋدانىنىڭ ارال اۋىلىندا شاڭحاي قالاسى بادام كاسىپ سالاسى باقشاسىن كومەكتەسىپ سالىپ بەردى، شينجياڭعا كومەكتەسەتىن كوپتەگەن كاسىپورىندار وسىندا ىرگە تەپتى. كاسىپ سالاسى باقشاسى ماڭىنداعى اۋىل - قالاشىقتارداعى جىلىجاي اۋىل شارۋاشىلىعى ەگىمشىلىك بازاسىمەن توعىسا دامىپ، كاسىپ سالاسى شوعىرى بەلدەۋىن قالىپتاستىرىپ، ياركەن اۋدانىنداعى اۋىل شارۋاشىلىعى ەرەكشە ونىمدەرىنىڭ جىنتىكتەي مانەرلەۋ كاسىبىنىڭ يتەراتيۆتەلۋىن، دارەجەسىن جوعارىلاتۋىن ىلگەرىلەتتى.

جەرگىلىكتى جاعدايعا قاراي كاسىپ سالاسى بويىنشا شينجياڭعا كومەكتەسۋدى ويداعىداي يگەردى. اقسۋ ايماعىندا جىجياڭ ولكەسىنىڭ شينجياڭعا كومەكتەسۋ قىزمەتى الدىڭعى شەپ قولباسشىلىق شتابى اقسۋدىڭ جاعراپيالىق، قاتىناس، ساۋدا جاعىنداعى باسىمدىعىمەن ۇشتاستىرا وتىرىپ، جىجياڭ جۇڭگو عىلىم - تەحنيكا ۋجينچىڭ توبى شەكتى سەرىكتەستىگىن ىرگە تەپكىزىپ، اقسۋ جەڭىل ونەركاسىپ ۋجينچىڭىن قۇردى. ”ۋجينچىڭنىڭ“ جىلدىق ساۋدا سوماسى 500 ميلليون يۋان بولىپ، 1000نان استام ادامنىڭ جۇمىستانۋ ماسەلەسى شەشىلىپ، ”بازار قۇرۋ، كاسىپ سالاسىنا جەتەكشىلىك ەتۋ، جۇمىستاندىرۋدى جەبەۋ“ سىندى دامۋ ۇلگىسى قالىپتاستى.

جاڭا كاسىپتەردىڭ ۇزدىكسىز دامۋىن، الۋەتتەنۋىن ىلگەرىلەتتى. بيىل 4 - ايدا گۋاڭدۇڭ ولكەسىنىڭ شينجياڭعا كومەكتەسۋ قىزمەتىنىڭ الدىڭعى شەپ قولباسشىلىق شتابى كاسىپ سالاسى ارقىلى شينجياڭعا كومەكتەسۋدى ۇزدىكسىز ىلگەرىلەتتى. گۋاڭجوۋ ءدارى - دارمەك توبى التاي ايماعىمەن جالپى بەتتىك ستراتەگيالىق سەلبەستىك كەلىسىمىنە قول قويىپ، قابا اۋدانىنان 10 مىڭ مۋلىق بانلانگىن ەگۋ بازاسىن قۇردى، قۇرىلعاننان كەيىن جىلىنا 2500 توننا بانلانگىن ءدارى ماتەريالدارىن وندىرۋگە بولادى.

ساندى مالىمەتتەردە كورسەتىلۋىنشە، 2014 - جىلدان 2019 - جىلعا دەيىن اۆتونوميالى رايون مەن بيڭتۋان شينجياڭعا كومەكتەسەتىن ولكە، قالالاردان كاسىپورىنداردى ەنگىزىپ ءبىر تريلليون 684 ميلليارد يۋان قارجى تياناقتاندىرعان، ورتالىققا قاراستى كاسىپورىنداردىڭ قوسقان قارجىسى 700 ميلليارد يۋاننان اسقان. ورتالىق كاسىپورىندارى مەن شينجياڭعا كومەكتەسەتىن ولكە، قالالارداعى كاسىپورىنداردىڭ قولداۋى رايونىمىزدىڭ ەكونوميكالىق، قوعامدىق دامۋىنا پارمەندى ىشكى قوزعاۋشى كۇش ۇستەدى.

　　ۇلتتار ىنتىماعى گۇلىن دەن قويا سۋاردى

1 - ايدىڭ 29 - كۇنى لوپ اۋدانىنداعى 12 اۋىل - قالاشىق باستاۋىش مەكتەبىندەگى 143 وقۋشى ”بەيجيڭدىك اكە - شەشەلەرى“ جىبەرگەن جاڭا جىلدىق تارتۋدى − ءبىر قوراپ بەيجيڭ جەڭىل تاعامى، قىسقى وليمپيادا سپورت جارىسى قولعابى، مويىنسالى، باس كيىم جانە بەيجيڭدىك كىشكەنتاي دوستاردىڭ سۋرەت تۋىندىلارىن تاپسىرىپ الدى.

بۇل بالالاردىڭ ”بەيجيڭدە ءبىر ءۇيىم بار“ اتىنداعى جۇپ قۇراپ، تۋىستاسۋ قيمىلىندا قابىلداعان تارتۋلارىنىڭ ءبىرى. بۇل قيمىلدى بەيجيڭ قالاسىنىڭ شينجياڭعا كومەكتەسۋ قىزمەتى الدىڭعى شەپ قولباسشىلىق شتابى باس بولىپ باستاعان، حوتان ايماعىنداعى 1000نان استام بالانىڭ بەيجيڭدە ”تۋىسى“ بار.

جۋىق جىلداردان بەرى شينجياڭعا كومەكتەسەتىن ولكە، قالالار اۋىس - كۇيىس قيمىلىن ورىستەتۋ ارقىلى ءار ۇلت بۇقاراسىنىڭ ءوزارا بارىس - كەلىس جاساۋ بارىسىندا ءتۇسىنىسۋدى ونان ارى تەرەڭدەتۋىنە، سۇيىسپەنشىلىكتى نىعايتۋىنا مۇمكىندىك جاسادى. تەك 2021 - جىلدىڭ وزىندە، شينجياڭعا كومەكتەسەتىن ولكە، قالالار ەكى جەردىڭ مادەنيەت اۋىس - كۇيىس قيمىلىن 4120 الاڭ - رەت ورىستەتتى؛ وسپىرىمدەر مەن بالالاردىڭ قول ۇستاسۋى جەلىلەس قيمىلىن ورىستەتىپ، 330 مىڭنان استام ادام - رەت ات سالىسۋعا باۋرادى؛ شينجياڭعا كومەكتەسۋگە كەلگەن كادرلار، دارىندىلار جۇپ قۇراپ، تۋىس بولىپ، 14 مىڭ 500 ادام - رەت تۋىستارىنا امانداسا باردى.

شينجياڭعا باعىتتامالى كومەكتەسۋ ءار ۇلت بۇقاراسىنىڭ ىشكەرىلەي ارالاسۋىن، ىشتەسۋىن، توعىسۋىن ىلگەرىلەتىپ، جۇڭحۋا ۇلتى ورتاق تۇلعا تانىمىن بىرگە بەكەمدەپ، شەشۋشى ساتتە ءار ۇلت بۇقاراسىنىڭ ءبىر نيەتپەن ىنتىماقتاساتىن، ءوزارا قارايلاساتىن وتباسى − وتان سۇيىسپەنشىلىگىن ايگىلەدى.

2021 - جىلى 7 - ايدا حىنان ولكەسىنىڭ جىڭجوۋ قالاسى قاتارلى جەرلەردە تاريحتا سيرەك كەزدەسەتىن ەرەكشە قالىڭ نوسەر جاۋىپ، اۋىر سەل - تاسقىن اپاتى تۋىلدى. تاۋ - وزەندەرى ۇندەسكەن، شينجياڭ مەن حىناننىڭ سۇيىسپەنشىلىگى ۇزاعىنان ءسۇيىندىردى. رايونىمىزداعى ءار ۇلت بۇقاراسى وزدىكتەرىنەن اتتانىسقا كەلىپ، حىنان ولكەسىندەگى اپات تۋىلعان وڭىرلەرگە قىرۋار جەمىس - جيدەك، جاشىك - جاشىك ءسۇت، مول نان جەتكىزىپ بەردى. قۇمىل قالاسىندا بۇقارا تىزگىن ۇشىمەن ميلليون نان پىسىرىپ، اپات تۋىلعان رايونعا شۇعىل جەتكىزىپ بەردى، كوپتەگەن ناۋبايحانالار ”حىنانعا كومەكتەسەمىز، نان ۋاقىتشا بولشەك ساتىلمايدى“ دەگەن ماڭدايشالىق اسىپ، سان - ساناقسىز ادامدى اسەرلەندىردى.

بيىل شاڭحاي قالاسىندا جاڭا تيپتى ايدارشا ۆيرۋس وكپە قابىنۋ ىندەتى تۋىلعان كەزدە، رايونىمىزداعى ءار ۇلت بۇقاراسى وزدىكتەرىنەن جىلۋ اتاپ، شاڭحاي حالقىنىڭ قيىن وتكەلدەن وتۋىنە كومەكتەستى. قاشقار ايماعىندا ءار ۇلت بۇقاراسى مەكەندەرىنىڭ ەڭ جاقسى ەرەكشە ونىمدەرىن الىپ شىعىپ شىنايى سۇيىسپەنشىلىكپەن قول ۇشىن بەرىپ، ءىس جۇزىندىك ارەكەتتەرى ارقىلى شينجياڭ حالقىنىڭ شاڭحاي حالقىمەن تىنىستاس، تاعدىرلاس، جۇرەكتەس ەكەندىگىن ءتۇسىندىردى.

بيىل كوكتەم مەرەكەسىندە بەيجيڭ قالاسىنىڭ شينجياڭعا باعىتتامالى كومەكتەسۋ بويىنشا شينجياڭدى مادەنيەتپەن نارلەندىرۋ ينجەنەرياسىنىڭ جەتىستىگى بولعان − ”بەس جۇلدىز شىعىستان كوتەرىلدى“ اتتى ءبي تەاترى ساحنا تورىنە شىقتى. بۇل تۋىندى حوتاننىڭ نيا ەسكى جۇرتىنان قازىپ الىنعان مەملەكەتتىك 1 - دارەجەلى مادەني ەسكەرتكىش ”بەس جۇلدىز شىعىستان كوتەرىلسە جۇڭگوعا قۇت“ − حان پاتشالىعى داۋىرىندەگى تورعىن جەڭدىكتى تۋىندى قاينارى ەتىپ، ءبىر اسەرلى حيكايانى بايانداپ، ءار ۇلت بۇقاراسىنىڭ اناردىڭ دانىندەي تىعىز ۇيىسۋ، جۇڭحۋا ۇلتى ورتاق تۇلعا تانىمىن بەرىك ورناتۋ نەگىزگى تاقىرىبىن ءتۇسىندىردى. تۋىندى جارىق كورگەننەن بەرى، قوعامنىڭ ءار سالاسىنداعى كورەرمەندەردىڭ بىردەي جاقسى باعاسىن الىپ، بەيجيڭ قالاسىنىڭ شينجياڭعا كومەكتەسۋدەگى سارا تۋىندىسىنا جانە مادەنيەت تانىسقىسىنا اينالدى.

قۇددى وسى ءبي تەاترىنىڭ نەگىزگى تاقىرىبى سياقتى، شينجياڭنىڭ ءىشى - سىرتىنداعى ءار ۇلت بۇقاراسىنىڭ كوپ ساتىلى، كوپ سالالى، كوپ فورمالى بارىس - كەلىسى، ىقپالداستىعى بارىسىندا، ۇلتتار ىنتىماعى گۇلى تيانشان الابىندا قۇلپىرا اشىلدى. شينجياڭعا باعىتتامالى كومەكتەسۋ دامۋدى ىلگەرىلەتەتىن ينجەنەرياعا، ۇلتتار ىنتىماعى ينجەنەرياسىنا، جۇرت تىلەگىن ۇيىستىراتىن ينجەنەرياعا اينالدى.