وبلىسقا توتە قاراستى ورىندارداعى وتباسى قيىنشىلىعى بار 244 ستۋدەنت 732 مىڭ يۋان وقۋ كومەك قاراجاتىنىڭ يگىلىگىن كوردى

سۋرەتتە: وقۋ كومەك قاراجاتىن تاراتۋ سالتى.

حۋاڭ يان فوتوسى

ٴتىلشىمىز حۋاڭ يان حابارلايدى. وتباسى قيىنشىلىعى بار وقۋشىلاردىڭ جوعارى مەكتەپ وقۋ ارمانىن جۇزەگە اسىرۋىنا كومەكتەسۋ ٴۇشىن، 8 - ايدىڭ 24 - كۇنى «التىن كۇزدە ورىندالعان ارمان، يگىلىكتى لاتاريا بەلەتىنەن وقۋعا كومەك» اتىنداعى وتباسى قيىنشىلىعى بار ستۋدەنتتەرگە وقۋ كومەك قاراجاتىن بەرۋ سالتى وبلىستىق حالىق ىستەر مەكەمەسىندە وتكىزىلدى، وتباسى قيىنشىلىعى بار ستۋدەنتتەر ۋاكىلىنەن 30 ادامنىڭ ٴارقايسىسى 3 مىڭ يۋان وقۋ كومەك قاراجاتىن الدى.

بيىلعى يگىلىكتى لاتاريا بەلەتىنەن وقۋعا كومەك بەرۋ قيمىلىندا وبلىستىق حالىق ىستەر مەكەمەسى يگىلىكتى لاتاريا بەلەتى الەۋمەتتىك قورىنىڭ «مەيىر باعىشتاپ، قامقورلىق جەتكىزۋ» قاراجاتىنان 732 مىڭ يۋان جۇمساپ، وبلىسقا توتە قاراستى قالا - اۋىلدارداعى ەڭ تومەنگى تۇرمىسى قامتاماسىزداندىرىلاتىن وتباسىلاردان بيىل شينجياڭداعى تولىق كۋرس جوعارى مەكتەپتەرىنە وقۋعا تۇسەتىن وتباسى قيىنشىلىعى بار 244 ستۋدەنتكە قارجىلاي كومەك بەردى، ولاردىڭ ٴارقايسىسى ٴبىر جولدا 3 مىڭ يۋان كومەك قاراجاتىن الدى.

«بۇگىن وقۋ كومەك قاراجاتىن الدىم، بۇدان كەيىن پارتيا مەن ۇكىمەتتىڭ قامقورلىعىن جەردە قالدىرماي، قۇلشىنا ۇيرەنىپ، مەكتەپ بىتىرگەن سوڭ تۋعان اۋىلىمنىڭ قۇرىلىس ىستەرى ٴۇشىن كۇش قوسامىن. تاعى الەۋمەتتىك يگىلىك ەرىكتىلەر قيمىلىنا بەلسەنە قاتىناسىپ، ٴتىپتى دە كوپ كومەككە مۇقتاج ادامدارعا كومەكتەسەمىن» دەدى قۇلجا قالاسى تاشكورىك اۋىلىنداعى كومەك قاراجاتقا يە بولعان وقۋشى ٴشايدا نۇرمامەت.

«يگىلىكتى لاتاريا بەلەتى <قارتتارعا قارايلاسۋ، مۇگەدەكتەرگە كومەكتەسۋ، جەتىمدەردى قۇتقارۋ، قيىنشىلىعى بارلارعا قول ۇشىن بەرۋدى> ماقسات ەتىپ، يگىلىكتى لاتاريا بەلەتى الەۋمەتتىك قورىن <حالىقتان الىپ، حالىققا پايدالانىپ> از - ازدان سۇيىسپەنشىلىك ۇيىستىرىپ، قوعامنىڭ دامۋىن جەبەدى. بالالاردىڭ قوعامنىڭ قامقورلىعىن العا ۇمتىلۋدىڭ قوزعاۋشى كۇشى ەتىپ، وڭايلىقپەن قولعا كەلمەگەن ۇيرەنۋ ورايىن قاستەرلەپ، ٴوز كۇشىنە سۇيەنىپ، ٴوزىن الۋەتتەندىرىپ، زەيىن قويا ۇيرەنىپ، وتانعا قىزمەت ەتىپ، سۇيىسپەنشىلىكتى جالعاستىرۋىن ٴۇمىت ەتەمىن» دەدى وبلىستىق يگىلىكتى لاتاريا بەلەتىن تاراتۋ ورتالىعىنىڭ مەڭگەرۋشىسى فۋ چۋان.

يگىلىكتى لاتاريا بەلەتىنەن وقۋعا كومەك بەرۋ قيمىلىنىڭ جاريا، تەڭ، ٴادىل بولۋىنا كەپىلدىك ەتۋ ٴۇشىن وبلىستىق حالىق ىستەر مەكەمەسى مالىمدەۋ بارىسىن قاتاڭداستىرىپ، العاشقى تەكسەرۋ مەن قايتا تەكسەرۋ ارقىلى وسى ٴبىر «حالىق تۇرمىسىن قامتاماسىزداندىرۋ، جۇرت جۇرەگىن جىلىتۋ» ينجەنەرياسىنىڭ شىنايى تياناقتانۋىنا كەپىلدىك ەتىپ، وتباسى قيىنشىلىعى اۋىر ستۋدەنتەرگە پارتيا مەن ۇكىمەتتىڭ مەيىر - شاپاعاتىن سەزىندىردى.

پارتيا تاريحىن ۇيرەنۋ تاربيەسى ورىستەتىلگەننەن بەرى وبلىستىق حالىق ىستەر مەكەمەسى بۇقارا ٴۇشىن ناقتى ٴىس ىستەۋگە، قيىن ماسەلەلەردى شەشۋگە تاباندى بولدى، وسى رەتكى يگىلىكتى لاتاريا بەلەتىنەن وقۋعا كومەك بەرۋ قيمىلى − وبلىستىق حالىق ىستەر مەكەمەسىنىڭ ۋنيۆەرسالدى، تۇبەگەيلى قامتاماسىز ەتۋ جۇيەسىن قۇرۋداعى ناقتى شاراسى سونداي - اق «مەن بۇقارا ٴۇشىن ناقتى ٴىس ىستەيمىن» امالياتتىق قيمىلىنىڭ ماڭىزدى ٴبىر مازمۇنى.

2007 - جىلدان بەرى وبلىستىق حالىق ىستەر مەكەمەسى، وبلىستىق يگىلىكتى لاتاريا بەلەتىن تاراتۋ ورتالىعى وقۋعا كومەك بەرۋ قيمىلىن ۇزدىكسىز ورىستەتىپ، جالپى 5 ميلليون 55 مىڭ يۋان قاراجات بوساتىپ، وتباسى قيىنشىلىعى بار ٴبىر مىڭ 695 وقۋشىعا قارجىلاي كومەك بەردى، يگىلىكتى لاتاريا بەلەتىنەن وقۋعا كومەك بەرۋ قيمىلى قوعامنىڭ ٴار سالاسىنداعىلاردىڭ نازارىن اۋداردى جانە القاۋعا يە بولدى.