شي جينپيڭ 3 - رەتكى ”ءبىر بەلدەۋ، ءبىر جول“ قۇرىلىسى اڭگىمە ماجىلىسىندە بىلاي دەپ باسا دارىپتەدى

　　جوعارى ولشەمدى، باياندى، حالىق تۇرمىسىنا ءتيىمدى بولۋدى نىسانا ەتىپ، ”ءبىر بەلدەۋ، ءبىر جولدى“ بىرگە قۇرۋدىڭ جوعارى ساپالى دامۋىن ۇزدىكسىز ىلگەرىلەتۋ كەرەك

　　حان جىڭ باسقاردى

11 - ايدىڭ 19 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ بەيجيڭدە 3 - رەتكى ”ءبىر بەلدەۋ، ءبىر جول“ قۇرىلىسى اڭگىمە ماجىلىسىنە قاتىناستى ءارى ماڭىزدى ءسوز سويلەدى. □ سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

شينحۋا اگەنتتىگىنىڭ 11 - ايدىڭ 19 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 11 - ايدىڭ 19 - كۇنى بەيجيڭدە 3 - رەتكى ”ءبىر بەلدەۋ، ءبىر جول“ قۇرىلىسى اڭگىمە ماجىلىسىنە قاتىناستى ءارى ماڭىزدى ءسوز سويلەپ، بىلاي دەپ باسا دارىپتەدى: جاڭا دامۋ ۇستانىمىن تولىق، دالمە - ءدال، جان - جاقتى دايەكتىلەندىرىپ، جوعارى ولشەمدى، باياندى، حالىق تۇرمىسىنا ءتيىمدى بولۋدى نىسانا ەتىپ، ۇلاستىرۋ - تۇتاستىرۋ سەلبەستىگىنىڭ نەگىزىن نىعايتىپ، حالىقارالىق سەلبەستىكتىڭ جاڭا ءورىسىن كەڭەيتىپ، حاۋىپ - قاتەردەن ساقتانۋ جانە ونى تىزگىندەۋ تورىن بەرىك توقىپ، اناعۇرلىم جوعارى سەلبەستىك دەڭگەيىن، اناعۇرلىم جوعارى ۇسىنىلىم ونىمدىلىگىن، اناعۇرلىم جوعارى قامداۋ ساپاسىن، اناعۇرلىم جوعارى دامۋ سەرپىمدىلىگىن جۇزەگە اسىرۋعا قۇلشىنىپ، ”ءبىر بەلدەۋ، ءبىر جولدى“ بىرگە قۇرۋدىڭ جوعارى ساپالى دامۋىن ىلگەرىلەتۋدە ۇزدىكسىز تىڭ تابىستارعا قول جەتكىزۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى، ”ءبىر بەلدەۋ، ءبىر جول“ قۇرىلىسىن ىلگەرىلەتۋ قىزمەتى باسشىلىق گرۋپپاسىنىڭ باستىعى حان جىڭ اڭگىمە ءماجىلىستى باسقاردى.

اڭگىمە ماجىلىستە مەملەكەتتىك دامۋ جانە رەفورما كوميتەتىنىڭ مەڭگەرۋشىسى حى ليفىڭ، سىرتقى ىستەر مينيسترلىگىنىڭ مينيسترى ۋاڭ ي، شينجياڭ ۇيعۇر اۆتونوميالى رايوندىق پارتكومنىڭ شۋجيى چىن چۋانگو، جياڭسۋ ولكەلىك پارتكومنىڭ شۋجيى ۋ جىڭلۇڭ، جۇڭگو شالعاي مۇحيت تەڭىز تاسىمالى توبى شەكتى سەرىكتەستىگىنىڭ القا باستىعى ۋان مين، جىڭتاي توبى شەكتى جارنا سەرىكتەستىگىنىڭ القا باستىعى نان سۇنحۇي، جۇڭگو حالىقارالىق ەكونوميكالىق اۋىس - كۇيىس ورتالىعىنىڭ باس ەكونوميسى چىن ۋىنليڭ ىركەس - تىركەس سوزگە شىعىپ، ءىس جۇزىندىك جاعدايمەن بىرلەستىرە وتىرىپ قىزمەت جاعدايىن تانىستىرىپ، پىكىر جانە ۇسىنىس العا قويدى.

كوپشىلىكتىڭ ءسوزىن تىڭداعاننان كەيىن، شي جينپيڭ ماڭىزدى ءسوز سويلەدى. ول بىلاي دەپ باسا دارىپتەدى: 8 جىلدان بەرى پارتيا ورتالىق كوميتەتىنىڭ پارمەندى باسشىلىعىندا، ءبىز جوعارى ساپالى دامۋدى ىلگەرىلەتۋدى، جاڭا دامۋ ارناسىن قالىپتاستىرۋدى جانە ”ءبىر بەلدەۋ، ءبىر جولدى“ بىرگە قۇرۋدى ءبىر تۇتاس جوسپارلاپ، بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىنە تاباندى بولىپ، نەگىزدىك قۇرىلعىلاردىڭ ۇلاسۋىن ماڭىزدى بەتالىس، ەرەجە - ولشەمدەردىڭ ۇلاسۋىن ماڭىزدى تىرەك، بىرگە قۇرۋشى مەملەكەتتەر حالقىمەن ”تىلەك توعىستىرۋدى“ ماڭىزدى نەگىز ەتىپ، ”ءبىر بەلدەۋ، ءبىر جولدى“ بىرگە قۇرۋدىڭ جوعارى ساپالى دامۋىن ىلگەرىلەتىپ، ناقتى، ماۋەلى جەتىستىكتەرگە قول جەتكىزدىك. ”ءبىر بەلدەۋ، ءبىر جولدى“ بىرگە قۇرۋ ارقىلى ەل ىشىندەگى ءارقايسى وڭىرلەردىڭ ەسىك اشۋ دەڭگەيىن جوعارىلاتىپ، سىرتقا ەسىك اشۋ سالالارىن كەڭەيتىپ، تۇزىمدىك ەسىك اشۋدى ىلگەرىلەتىپ، كەڭ كولەمدى دوستار شەڭبەرىن قالىپتاستىرىپ، بىرگە دامۋدى جەبەۋدىڭ جاڭا جولدارىن قاراستىرىپ، بىرگە قۇرۋشى مەملەكەتتەرمەن ءوزارا پايدا جەتكىزۋدى، تەڭ يگىلىككە كەنەلۋدى جۇزەگە اسىردىق.

شي جينپيڭ بىلاي دەپ اتاپ كورسەتتى: ”ءبىر بەلدەۋ، ءبىر جولدى“ بىرگە قۇرۋدا ءدوپ كەلگەن جاڭا جاعدايدى دۇرىس تانۋ جانە يگەرۋ كەرەك. جالپى تۇلعالىق جاقتان العاندا، بەيبىتشىلىك پەن دامۋ سىندى ءداۋىر تاقىرىبى وزگەرگەن جوق، ەكونوميكانىڭ جاھاندانۋ ۇلكەن بەتالىسى وزگەرگەن جوق، حالىقارالىق ارنانىڭ دامۋ ستراتەگيالىق جاعدايى بىزگە ءتيىمدى، ”ءبىر بەلدەۋ، ءبىر جولدى“ بىرگە قۇرۋ ءالى دە ماڭىزدى ورايعا ءدوپ كەلىپ وتىر. سونىمەن بىرگە دۇنيە جۇزىندە 100 جىلدا بولماعان زور وزگەرىس جەدەل قۇبىلۋدا، جاڭا كەزەكتى عىلىم - تەحنيكا توڭكەرىسى مەن كاسىپ سالاسى وزگەرىسى اكەلگەن قيان - كەسكى باسەكە بۇرىن بولماعان دەڭگەيگە جەتتى، كليمات وزگەرىسى، ىندەتتەن ساقتانۋ - تىزگىندەۋ سياقتى الەمدىك ماسەلەلەردىڭ ادامزات قوعامىنا اكەلگەن ىقپالى بۇرىن بولماعان دەڭگەيگە جەتتى، ”ءبىر بەلدەۋ، ءبىر جولدى“ بىرگە قۇرۋدىڭ حالىقارالىق ورتاسى كۇن سايىن كۇردەلىلەسىپ كەلەدى. ءبىز ستراتەگيالىق تاباندىلىقتى ساقتاپ، ستراتەگيالىق ورايدى مىقتى يگەرىپ، دامۋ مەن حاۋىپسىزدىكتى ءبىر تۇتاس جوسپارلاپ، ەل ءىشى مەن حالىقارانى ءبىر تۇتاس جوسپارلاپ، سەلبەستىك پەن كۇرەستى ءبىر تۇتاس جوسپارلاپ، ساقتالعان شاما مەن ارتقان شامانى ءبىر تۇتاس جوسپارلاپ، تۇتاس تۇلعا مەن ماڭىزدى ءتۇيىندى ءبىر تۇتاس جوسپارلاپ، سىن - سايىستارعا بەلسەنە توتەپ بەرىپ، پايدالىسىنا ۇمتىلىپ، زالالدىسىنان ساقتانىپ، ەرلىكپەن العا باسۋىمىز كەرەك.

شي جينپيڭ بىلاي دەپ باسا دارىپتەدى: دامۋدىڭ نەگىزىن بەكەمدەۋ كەرەك. ساياسيداعى ءوزارا سەنىمدىلىكتى تەرەڭدەتىپ، ساياساتتىق پىكىرلەسۋدىڭ جەتەكشىلىك جانە جەبەۋ رولىن ساۋلەلەندىرىپ، اناعۇرلىم كوپ سەلبەسۋ، ۇشتاسۋ مەحانيزمدەرىن ورناتۋدى قاراستىرىپ، ساياسي ورتاق تانىمدى ناقتى ارەكەتكە اينالدىرۋدى، ۇستانىمدى شىنايى مويىنداۋدى ناقتى جەتىستىككە اينالدىرۋدى ىلگەرىلەتۋ كەرەك. ۇلاستىرۋ - تۇتاستىرۋدى تەرەڭدەتىپ، قۇرلىق، تەڭىز، اسپان، ينتەرنەت ”ءتورت ءبىر تۇلعالانعان“ ۇلاستىرۋ - تۇتاستىرۋ ورنالاسىمىن كەمەلدەندىرىپ، ءداستۇرلى نەگىزدىك قۇرىلعى نىساندارى سەلبەستىگىن تەرەڭدەتىپ، جاڭاشا نەگىزدىك قۇرىلعى نىساندارى سەلبەستىگىن ىلگەرىلەتىپ، ەرەجە - ولشەم سياقتىلاردىڭ ۇلاسۋ دەڭگەيىن جوعارىلاتىپ، الەمنىڭ ۇلاسۋىنىڭ، تۇتاسۋىنىڭ ارتۋىن جەبەۋ كەرەك. ساۋدانى ىركىلىسسىزدەندىرۋدى تەرەڭدەتىپ، توڭىرەكتەگى ەلدەرمەن ساۋدا كولەمىن كەڭەيتىپ، اناعۇرلىم كوپ ساپالى تاۋارلاردى يمپورت ەتۋگە ىنتالاندىرىپ، ساۋدا مەن قارجى قوسۋدىڭ ەركىن، قولايلى بولۋ دەڭگەيىن جوعارىلاتىپ، ساۋدانىڭ ءبىر كەلكى، تەڭ يگىلىكتەنەتىن دامۋىن جەبەۋ كەرەك. ءۇش جاقتىڭ نەمەسە كوپ جاقتىڭ بازار سەلبەستىگىن ۇزدىكسىز كەڭەيتىپ، حالىقارالىق وندىرىستىك قۋات سەلبەستىگىن ورىستەتۋ كەرەك. قارجىنى اينالىمعا سالۋدى تەرەڭدەتىپ، كوپ جاقتى دامىتۋ قۇرىلىمدارىن، دامىعان ەلدەردىڭ فينانس قۇرىلىمدارىن ات سالىسۋعا باۋراپ، كوپ نەگىزدى قارجى قوسۋ، قارجى قۇراۋ جۇيەسىن اقاۋسىزداندىرۋ كەرەك. گۋمانيتارلىق اۋىس - كۇيىستى تەرەڭدەتىپ، گۋمانيتارلىق اۋىس - كۇيىستىڭ كوپ نەگىزدى ىقپالداستىق ۇلكەن ارناسىن قالىپتاستىرۋ كەرەك.

شي جينپيڭ بىلاي دەپ اتاپ كورسەتتى: سەلبەستىكتىڭ جاڭا سالالارىن ورنىقتى قاداممەن كەڭەيتۋ كەرەك. سالاماتتىق، جاسىل، سيفرلىق، جاڭالىق اشۋ سياقتى جاڭا سالالارداعى سەلبەستىكتەردى ورنىقتى ورىستەتىپ، سەلبەستىكتىڭ جاڭا ارتۋ تۇيىندەرىن جەتىلدىرۋ كەرەك. ىندەتكە قارسى اتتانۋدىڭ حالىقارالىق سەلبەستىگىن كۇشەيتىپ، بىرگە قۇرۋشى مەملەكەتتەرگە قولدان كەلگەنشە ۇزدىكسىز كومەك كورسەتۋ كەرەك. وركەندەپ كەلە جاتقان ەلدەردىڭ ەنەرگياداعى جاسىل، تومەن كومىر قىشقىل گازدى دامۋىن قولداپ، جاسىل، تومەن كومىر قىشقىل گازدى دامۋ بويىنشا ينفورماتسيادان بىرگە يگىلىكتەنۋ جانە قابىلەت قۇرىلىسىن ىلگەرىلەتىپ، ەكولوگيالىق ورتا مەن كليماتتى جونگە سالۋ سەلبەستىگىن تەرەڭدەتۋ كەرەك. سيفرلى سالاداعى سەلبەستىكتەردى تەرەڭدەتىپ، ”جىبەك جولى ەلەكتروندىق ساۋداسىن“ دامىتىپ، سيفرلى سەلبەستىك ارناسىن قالىپتاستىرۋ كەرەك. عىلىم - تەحنيكادا جاڭالىق اشۋ ارەكەت جوسپارىن ويداعىداي اتقارىپ، ءبىلىم مەنشىك ۇقىعىن قورعاۋدىڭ حالىقارالىق سەلبەستىگىن كۇشەيتىپ، عىلىم - تەحنيكانى دامىتۋدىڭ اشىق، ءادىل، تۋراشىل، كەمسىتپەيتىن ورتاسىن قالىپتاستىرۋ كەرەك.

شي جينپيڭ بىلاي دەپ باسا دارىپتەدى: جاڭا دامۋ ارناسىن قالىپتاستىرۋعا اناعۇرلىم ويداعىداي قىزمەت ەتۋ كەرەك. جاڭا دامۋ ارناسىن قالىپتاستىرۋ مەن ”ءبىر بەلدەۋ، ءبىر جولدى“ بىرگە قۇرۋدى ءبىر تۇتاس ويلاستىرىپ جانە جوسپارلاپ، نازاردى جاڭا كۇش سالۋ تۇيىندەرىنە شوعىرلاندىرىپ، جاڭا ۇشتاسۋ تۇيىندەرىن قالىپتاستىرۋ كەرەك. ءارقايسىسىنىڭ وزىندىك ەرەكشەلىگى بار، ءبىرىن - ءبىرى تولىقتايتىن، ىركىلىسسىز، حاۋىپسىز قۇرلىق ارناسىن جەدەل كەمەلدەندىرىپ، تەڭىزدەگى ورنالاسىمدى ساپالىلاندىرىپ، ەل ءىشى مەن حالىقارا سىندى قوس اينالىمدى ىركىلىسسىزدەندىرۋگە پارمەندى تىرەك ازىرلەۋ كەرەك. كاسىپ سالاسى تىزبەگىنىڭ، قامداۋ تىزبەگىنىڭ ىركىلىسسىز ۇشتاسۋىن كۇشەيتىپ، كەلۋ قاينارىنىڭ كوپ نەگىزدەنۋىن ىلگەرىلەتۋ كەرەك. نىشاندىق ينجەنەريالاردى ساپالى تۇلعالاۋ كەرەك. حالىق تۇرمىسى ينجەنەرياسى − بىرگە قۇرۋشى مەملەكەتتەردەگى حالىق بۇقاراسىنىڭ تابىس سەزىمىن جەدەل جوعارىلاتۋدىڭ ماڭىزدى جولى، ءبىر تۇتاس جوسپارلاۋدى كۇشەيتىپ، ومىرگە جاناسىمدى، جۇرت تىلەگىن توعىستىراتىن اناعۇرلىم كوپ سەلبەستىك جەتىستىكتەرىن قالىپتاستىرۋ كەرەك.

شي جينپيڭ بىلاي دەپ باسا دارىپتەدى: حاۋىپ - قاتەردەن ساقتانۋدى جانە ونى تىزگىندەۋدى جاپپاي كۇشەيتۋ كەرەك. حاۋىپ - قاتەردەن ساقتانۋ جانە ونى تىزگىندەۋ ءتۇزىمىن تياناقتاندىرىپ، كاسىپورىنداردىڭ تۇلعالىق جاۋاپكەرشىلىگى مەن باسقارۋشى تاراۋلاردىڭ باسقارۋ جاۋاپكەرشىلىگىن قاتايتۋ، ناقتىلاندىرۋ كەرەك. شەكارا سىرتىنداعى نىسانداردىڭ حاۋىپ - قاتەرىنەن بارلىق جاعدايدا الدىن الا ساقتاندىرۋ، باعالاۋ كەشەندى قىزمەت وتەۋ تۇعىرىن قۇرۋدى قاراستىرىپ، دەر كەزىندە الدىن الا ساقتاندىرۋ، مەرزىم بويىنشا باعالاۋ جۇرگىزۋ كەرەك. شەتەلدەگى مۇددەنى قورعاۋ، حالىقارالىق لاڭكەستىككە قارسى تۇرۋ، حاۋىپسىزدىكتى قامتاماسىز ەتۋ سياقتى مەحانيزمدەردىڭ سايكەسۋىن، سەلبەسۋىن كۇشەيتۋ كەرەك. ىندەتتەن ساقتانۋ - تىزگىندەۋ مەن ”ءبىر بەلدەۋ، ءبىر جولدى“ بىرگە قۇرۋ سەلبەستىگىن ءبىر تۇتاس جوسپارلاپ ىلگەرىلەتىپ، شەكارا سىرتىنداعى ادامدارىمىزدىڭ ءومىرىنىڭ حاۋىپسىزدىگى مەن دەنساۋلىعىن، پسيحيكالىق اقاۋسىزدىعىن بار كۇشپەن قامتاماسىز ەتىپ، ساقتانۋ - تىزگىندەۋ شارالارىنىڭ دالدىگىن كورنەكتىلەندىرىپ، جۇمىسشى ىستەتۋ سۇرانىسى، ادامدارىمىزدىڭ كەزەكپەن ەلگە ورالۋى، زاتتىق ماتەريالدارمەن قامداۋ، قارجىلىق قولداۋ سياقتىلاردى كۇش سالا قامتاماسىز ەتۋ كەرەك. ەلىمىزدىڭ شەتەلدەگى كاسىپورىندارى مەن ازاماتتارىن ءوز تۇرعان جەرلەرىنىڭ زاڭىنا سانالى بويسۇنۋعا، جەرگىلىكتى عۇرىپ - ادەتتەرگە قۇرمەت ەتۋگە تاربيەلەۋ، جەتەكتەۋ كەرەك. شىرىكتەسۋگە قارسى تۇرۋدىڭ شەتەلگە ساياتىن جۇيەلى، كەمەلدى زاڭ، زاڭ ەرەجە جۇيەسىن جەدەل قالىپتاستىرىپ، شەكارا اتتاعان شىرىكتەسۋدى جونگە سالۋ سەرپىنىن ارتتىرۋ كەرەك. ءتۇرلى كاسىپورىندار تيجاراتتىق ءىس - ارەكەتتەرىن ارناعا ءتۇسىرۋ، مەملەكەتتىڭ اتاق - ابىرويىنا داق تۇسىرۋگە استە جول بەرمەۋ كەرەك. تارتىپكە، زاڭعا قايشى ماسەلەلەر بايقالعان زامان قاتاڭ ءبىر جاقتى ەتۋ كەرەك.

شي جينپيڭ بىلاي دەپ باسا دارىپتەدى: ءبىر تۇتاس جوسپارلاۋدى، سايكەستىرۋدى كۇشەيتۋ كەرەك. پارتيانىڭ ورتالىقتانعان ءبىر تۇتاس باسشىلىعىنا تاباندى بولۋ كەرەك، باسشىلىق گرۋپپا كەلەلى جوبا، كەلەلى ساياسات، ەلەۋلى نىسان، ەلەۋلى ماسەلە جانە جىلدىق ءتۇيىندى قىزمەت سياقتىلار جونىندەگى سايكەستىرۋدى، وتكەلدى يگەرۋدى مىقتى ۇستاۋ كەرەك. قاتىستى تاراۋلار ”ءبىر بەلدەۋ، ءبىر جولدى“ بىرگە قۇرۋ قىزمەتىن ماڭىزدى كەڭەستىك كۇن تارتىپكە ەنگىزىپ، شەكارا سىرتىنداعى نىساندار قۇرىلىسى مەن حاۋىپ - قاتەردىڭ الدىن الۋ جانە ونى تىزگىندەۋ جاۋاپكەرشىلىگىن ءبىر تۇتاس جوسپارلاپ، ويداعىداي تياناقتاندىرۋ كەرەك. جەرگىلىكتى ورىندار ”ءبىر بەلدەۋ، ءبىر جولدى“ بىرگە قۇرۋعا ات سالىسۋداعى ءوز ورىندارىن ءدال تابۋ كەرەك. تاماشا قوعامدىق پىكىر ورتاسىن قالىپتاستىرىپ، ”ءبىر بەلدەۋ، ءبىر جولدى“ بىرگە قۇرۋدىڭ ۇستانىمى، پرينسيبى، ءتاسىلى سياقتىلاردى ىشكەرىلەي ءتۇسىندىرىپ، ”ءبىر بەلدەۋ، ءبىر جولدى“ بىرگە قۇرۋ حيكايالارىن بىرگە ويداعىداي بايانداۋ كەرەك.

حان جىڭ ءماجىلىستى باسقارعاندا مىنالاردى ءبىلدىردى: باس شۋجي شي جينپيڭنىڭ ماڭىزدى ءسوزى جاڭا داۋىردە ”ءبىر بەلدەۋ، ءبىر جولدى“ بىرگە قۇرۋ قىزمەتىن ىلگەرىلەتۋگە ءتۇبىرلى بويسۇنۋ ولشەمىن ازىرلەدى، ءبىز ىشكەرىلەي ۇيرەنۋىمىز، ۇعىنۋىمىز، مۇقيات دايەكتىلەندىرۋىمىز، تياناقتاندىرۋىمىز كەرەك. ”ءبىر بەلدەۋ، ءبىر جول“ قۇرىلىسىن ىلگەرىلەتۋ قىزمەتى باسشىلىق گرۋپپاسى شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا باستاماشى بولۋ، جالپى جاقتان يگەرۋ رولىن تولىق ساۋلەلەندىرۋ كەرەك. باسشىلىق گرۋپپاسى كەڭسەسى ءبىر تۇتاس جوسپارلاپ سايكەستىرۋ، قۋزاۋ، تياناقتاندىرۋ قىزمەت جاۋاپكەرشىلىگىن ويداعىداي اتقارىپ، ەلەۋلى ىستەردى باسقارۋدى كۇشەيتىپ، ەلەۋلى ماسەلەلەردى زەرتتەۋدى تەرەڭدەتىپ، شىنايى تۇردە حاۋىپ - قاتەردىڭ الدىن الىپ، ءتۇيىندى مىندەتتەردى ىلگەرىلەتۋدى ويداعىداي يگەرۋ كەرەك. جەر - جەر، تاراۋلار، ورىندار ءوز ورىندارىن ءدال تاۋىپ، بەلسەندىلىكتى، جاسامپازدىقتى تولىق قاۋلاتىپ، سان سالالى سايكەسۋدى، جوعارى مەن تومەن بىرلەسىپ قيمىلداۋدى كۇشەيتىپ، ءتۇرلى شارالاردى ەگجەي - تەگجەيلى تياناقتاندىرىپ، ءتۇرلى مىندەتتەردى قاز - قالپىندا ورىنداۋ كەرەك. شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، ”ءبىر بەلدەۋ، ءبىر جولدى“ بىرگە قۇرۋدىڭ جوعارى ساپالى دامۋىن مىزعىماس تاباندىلىقپەن ىلگەرىلەتىپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋعا، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە تىڭ دا اناعۇرلىم زور ۇلەس قوسۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ ءبىر ءبولىم مۇشەلەرى، مەملەكەتتىك كەڭەستىڭ ءبىر ءبولىم مۇشەلەرى اڭگىمە ماجىلىسكە قاتىناستى.

”ءبىر بەلدەۋ، ءبىر جول“ قۇرىلىسى قىزمەتىن ىلگەرىلەتۋ باسشىلىق گرۋپپاسىنا مۇشە ورىندارداعى، ورتالىق پەن مەملەكەت ورگاندارىنىڭ قاتىستى تاراۋلارىنداعى، ءارقايسى ولكە، اۆتونوميالى رايون، قالالارداعى جانە شينجياڭ ءوندىرىس - قۇرىلىس بيڭتۋانىنداعى نەگىزگى جاۋاپتى جولداستار، قاتىستى كاسىپورىنداردىڭ جاۋاپتىلارى جانە سالالىق ساۋدا قوعامدارىنىڭ، مامان - وقىمىستىلاردىڭ ۋاكىلدەرى، ت. ب اڭگىمە ماجىلىسكە قاتىناستى. ءماجىلىس تەلەۆيزور - تەلەفون ءماجىلىسى فورماسىندا اشىلدى، ولكەلەردە، اۆتونوميالى رايونداردا، قالالاردا جانە شينجياڭ ءوندىرىس - قۇرىلىس بيڭتۋانىندا بولىمشە ءماجىلىس ورنى ورنالاستىرىلدى.