باس بەتكە قايتۋ | 中文 ىلە اقپارات تورابىنا حوش كەلدىڭىزدەر!
​گۋ ايليڭ قاردا ەركىن سىرعاناۋ بويىنشا ايەلدەردىڭ U فورمالى الاڭداعى شەبەرلىك كورسەتۋ شەشۋشى جارىسىندا اعا جۇلدەگەر بولدى
2022-02-22 11:59:41     كورىلىم:رەت كەلۋ قاينارى:ىلە گازەتى  جاۋاپتى رەداكتور:گۇلدەن ماقسات قىزى

8 - التىن مەدال!

گۋ ايليڭ قاردا ەركىن سىرعاناۋ بويىنشا ايەلدەردىڭ U فورمالى الاڭداعى شەبەرلىك كورسەتۋ شەشۋشى جارىسىندا اعا جۇلدەگەر بولدى

20220218000547_a3b44b05edb66893ac007abff5779439d1ce6f52.jpg 

 2 - ايدىڭ 18 - كۇنى جۇڭگو قۇراماسىنىڭ سپورتشىسى گۋ ايليڭ جارىستا.وسى كۇنى بەيجيڭ 2022 - جىلعى قىسقى وليمپيادا سپورت جارىسى قاردا ەركىن سىرعاناۋ بويىنشا ايەلدەردىڭ U فورمالى الاڭداعى شەبەرلىك كورسەتۋ شەشۋشى جارىسى جاڭجياكوۋ يۇنديڭ قاردا سىرعاناۋ باقشاسىندا وتكىزىلدى. جۇڭگو قۇراماسىنىڭ سپورتشىسى گۋ ايليڭ وسى تۇردە اعا جۇلدەگەر بولدى.

شينحۋا اگەنتتىگىنىڭ ٴتىلشىسى چياۋ ي - جۋ فوتوسى 


شينحۋا اگەنتتىگىنىڭ 2 - ايدىڭ 18 - كۇنى حىبەيدىڭ چۇڭليىنەن بەرگەن حابارى (تىلشىلەر ياڭ فان، لۋ شيڭجي، جۋ چيڭ). 2 - ايدىڭ 18 - كۇنى بەيجيڭ قىسقى وليمپيادا سپورت جارىسىنىڭ قاردا ەركىن سىرعاناۋ بويىنشا ايەلدەردىڭ U فورمالى الاڭداعى شەبەرلىك شەشۋشى جارىسىندا جۇڭگو قۇراماسىنىڭ ساڭلاعى گۋ ايليڭ اعا جۇلدەگەر بولىپ، جۇڭگو ۋاكىلدەر ۇيىرمەسىنىڭ وسى كەزەكتى وليمپيادا سپورت جارىسىنداعى 8 - التىن مەدالىن الدى. بۇل ونىڭ وسى كەزەكتى وليمپيادا سپورت جارىسىندا قاردا ەركىن سىرعاناۋ بويىنشا ايەلدەردىڭ شاڭعىمەن ۇلكەن تۇعىردان سەكىرۋىندە التىن مەدال العاننان كەيىنگى جەكە العان 2 - التىن مەدالى.

  كانادا ساڭلاعى كاسسيە شارپە، راچاەل كاركەر جەكە - جەكە 2 -، 3 - ورىندى يەلەدى. جۇڭگو قۇراماسىنىڭ باسقا 2 ساڭلاعى لي فاڭحۇي، جاڭ كىشين جەكە - جەكە 5 - جانە 7 - ورىندى يەلەدى.

  2 - ايدىڭ 17 - كۇنگى تولىمدىلىق جارىسى اياقتاعاننان كەيىن، گۋ ايليڭ، جاڭ كىشين، لي فاڭحۇي كەلەسى جارىسقا جولداما الدى، ۋ مىڭنىڭ شەشۋشى جارىسقا كىرۋدە سالىمى بولمادى، بۇلاردىڭ اراسىندا گۋ ايليڭ 1 - ورىندا بولدى. پيونچان قىسقى وليمپيادا سپورت جارىسىندا وسى تۇردەن اعا جۇلدەگەر بولعان شارپە جانە ساپتاسى كاركەر قول ۇستاسا كەلەسى جارىسقا جولداما الدى، سوڭعى بىرنەشە جىلدا ەۆروپاداعى جارىس مايداندارىن قيداي سىپىرعان ەستونيالىق «تالانتتى بويجەتكەن» كەللي سيلدارۋ قاداپ وتىرىپ كەلەسى جارىسقا جولداما الدى.

  شەشۋشى جارىستىڭ العاشقى اينالىمىندا 18 جاستاعى لي فاڭحۇي 81.75 ٴنومىر الىپ جۇڭگو قۇراماسىنا تاماشا باستاما اشتى. الدىڭعى جارىس ماۋسىمىندا دۇنيە ٴجۇزى بويىنشا 2 - ورىندا تۇرعان انگليا ساڭلاعى زوە اتكين اعاتتىق جىبەرىپ، وڭ اياعى شاڭعىدان اجىراپ كەتتى. شارپەنىڭ كوككە كوتەرىلگەندەگى بيىكتەۋ دەڭگەيى مەن ارەكەتىنىڭ ۇشتاسۋى ادامداردى قايران قالدىرىپ، 89.00 ٴنومىر الدى، كاركەر 87.75 ٴنومىر الدى. ەڭ سوڭىندا مايدانعا شىققان گۋ ايليڭنىڭ ارەكەتى مەن كۇش - قۋاتى باسىم ٴتۇسىپ، 93.25 نومىرمەن ۋاقىتشا 1 - ورىندى يەلەدى.

  ەكىنشى اينالىمدا اتكين تاعى ٴبىر رەت اۋساي كەتتى. وسى اينالىمدا 1080 گرادۋس اينالاتىن قيىندىقتا جەڭىسكە جەتكەن لي فاڭحۇي 86.50 ٴنومىر الدى. سيلدارۋ وسى اينالىمدا ٴۇرتىس كوپ رەت شەگىنە سىرعاناۋ ارەكەتىن قۇراستىرىپ، ٴبىرشاما كوپ جىلدامدىق ورەسى مەن بيىكتىك دەڭگەيىنەن ايرىلىپ، 87 ٴنومىر الدى. شارپە گۋ ايليڭگە سايىس جاريالاپ، ىركەس - تىركەس 2 رەت 900 گرادۋس اينالىپ، وعان قوسا 1080 گرادۋس اينالاتىن قيىن ارەكەتتى بىرلەستىرىپ، 90.00 نومىرگە يە بولدى.

گۋ ايليڭ بۇكىل الاڭنىڭ كوز تىگۋىمەن مايدانعا شىعىپ، الدىمەن ىركەس - تىركەس 2 رەت 900 گرادۋس اينالاتىن قيىن ارەكەتتى جاساپ، ىلە - شالا 3 ارەكەتتى جاتىق تۇتاستىردى، سىرعاناۋ ساپاسىنا جەتەر جان بولماي، 95.25 ٴنومىر الىپ، اعا جۇلدەگەرلىكتى نەگىزىنەن ٴوز ۋىسىنا الدى.

  شەشۋشى جارىس اينالىمىندا شارپە ٴوز ونەرىن بارىنشا ايگىلەپ، 90.75 ٴنومىر الدى. جاڭ كىشين العاشقى اينالىمدا 78.75 ٴنومىر السا، ەكىنشى اينالىمدا دا اۋساي كەتتى، وسى اينالىمدا تىعىرىقتان شىعۋعا تىرمىسقانىمەن، ٴبىراق سىرعاناپ ٴبىراز جۇرگەندە جىعىلىپ قالدى، سول ارادا تەكسەرگەندە دەنەسىندە ۇلكەن ماسەلە بايقالمادى. 24 جاستاعى كاركەر سوڭىنان ساناعاندا ەكىنشى بولىپ مايدانعا شىقتى، ٴبىراق 1080 گرادۋس اينالاتىن ەڭ قيىن ارەكەتتە اعاتتىق جىبەردى.

  گۋ ايليڭ التىن مەدال الدى! ول ۇستىنە قىزىل ٴتۇستى شاڭعىشىلار كيىمىن كيىپ، بۇكىل الاڭداعىلاردىڭ القاۋلى ايعايى ىشىندە مايدانعا شىعىپ تومەنگە قاراي سىرعانادى، قيىندىعى جوعارى ارەكەت جاساعانى جوق، قايتا مايداندا ەمىن - ەركىن زىمىراي سىرعاناپ ٴتۇستى.

گۋ ايليڭ جارىستان كەيىن مىنالاردى ٴبىلدىردى: «جارىس بارىسىندا ٴىشىنارا قيىن ساتتەر بولدى، ٴبىراق سول ساتتەردە دە مەن تاعى دا ٴبىر كۇمىس مەدال تاعىپ وسى مايدانمەن قوشتاسارمىن دەگەندى ويىما دا العان جوقپىن. شاڭعى تەبۋ قىزىعى مول جانە وزگەشەلىككە يە سپورت، ٴوزىم جونىنەن العاندا، مەن وسىنداي سەزىمدى شىنىمەن دە U فورمالى الاڭنان تاپتىم».