لي يافىڭ (ٴوز ٴتىلشىمىز)

 G577 لەنياسى تەكەس - موڭعولكۇرە بولەگىندەگى ەڭ سوڭعى 9 كيلومەترلىك جول بەتىنە سۋ سەۋىپ تاپتاپ تەگىستەۋ جۇمىسى قاۋىرت جۇرگىزىلۋدە. 

 لي يافىڭ فوتوسى.

4 - ايداعى ىلە اڭعارىندا تاۋلار جاسىلدانىپ، اعاشتار بۇرلەپ، اۋا رايى جىلىنا باستادى. بىرنەشە كۇننەن بەرى ٴتىلشى وبلىسقا توتە قاراستى ورىنداردىڭ ٴبىر ٴبولىم قاتىناس - تاس جول قۇرىلىس نىساندارىنىڭ جۇمىس باسىنا باردى، بارعان جەرلەرىندە ماشينالار گۇرىلدەپ، قۇرىلىس اۆتوكولىكتەرى ارلى - بەرلى قايشالىسىپ، قۇرىلىس جۇمىستارىنىڭ دابىرالى جۇرگىزىلىپ جاتقانىن كوردى.

ماڭىزدى قاتىناس تورابى ينجەنەريا قۇرىلىستارى تەبىندى جۇرگىزىلۋدە

4 - ايدىڭ 8 - كۇنى تۇستە موڭعۇلكۇرە اۋدانىنىڭ ۇزىنبۇلاق اۋىلىندا G577 لەنياسىنىڭ تەكەس - موڭعۇلكۇرە 1 - دارەجەلى تاس جول نىسانىندا (قىسقاشا G577 تەكەس - موڭعۇلكۇرە لەنياسى نىسانى دەلىنەدى) ينجەنەريا قۇرىلىسى دابىرالى جۇرگىزىلىپ جاتتى. قارا ماي توسەۋ ماشيناسى، تاسىمال اۆتوموبيلى جانە جول تاپتاعىش تىعىز سەلبەسىپ، جۇمىسشىلار قاربالاس جۇمىس جۇرگىزۋدە.

G577 تەكەس - موڭعۇلكۇرە لەنياسى نىسانى بۇرىنعى S220 لەنياسى نەگىزىندە وزگەرتىپ سالىنعان، جالپى ۇزىندىعى 62.8 كيلومەتر، قوس باعىتتا 4 اۆتوكولىك قاتىنايدى،جالپى ٴبىر ميلليارد 959 ميلليون يۋان قارجى قوسىلعان. 2020 - جىلى قۇرىلىس جۇرگىزگەننەن قازىرگە دەيىن جالپى قۇرىلىس مولشەرىنىڭ %85 ى ورىندالىپ، جيىنى ٴبىر ميلليارد 550 ميلليون يۋان قارجى قوسىلىپ بولعان.

«بۇل جول بولەگى − تۇتاس لەنيا نىساننىڭ ەڭ سوڭعى 9 كيلومەترى، قازىر ٴبىز ۇستەمە جۇمىس ىستەپ جول بەتىن شىڭداۋ، اسفالت توسەۋ جۇمىسىن ىستەپ جاتىرمىز، 6 - ايدىڭ 30 - كۇنى جۇمىستى وتكىزىپ بەرۋ شارت - جاعدايىن ازىرلەۋگە، 9 - ايدىڭ 30 - كۇنى اۆتوموبيل قاتىناۋىنا كەپىلدىك ەتەمىز». G577 تەكەس - موڭعۇلكۇرە لەنياسى نىسانىنىڭ موڭعۇلكۇرە بولىگىنىڭ K56 كيلومەترلىك جەرىندە جۇمىس باسىنداعى نىسان جاۋاپتىسى دىڭ گوجۇن بىلاي دەدى: «وسى نىسان ورىندالعاننان كەيىن وڭىرلىك جول تورابى قۇرىلىمىن ساپالىلاندىرىپ، ەكى جەردىڭ اراسىنداعى اۆتوكولىك قاتىناۋ ۋاقىتىن 45 مينۋتقا قىسقارتۋمەن بىرگە، موڭعۇلكۇرە اۋدانىندا جوعارى قارقىندىق (1 - دارەجەلى) تاس جول  بولماۋ تاريحىن دا اياقتاتادى». 

G577 تەكەس - موڭعۇلكۇرە لەنياسى 1 - دارەجەلى تاس جول نىسان قۇرىلىسى قولباسشىلىق شتابىنىڭ قولباسشىسى شۇي دۇڭشۇي بىلاي دەپ تانىستىردى: G577 تەكەس - موڭعۇلكۇرە لەنياسى نىسانىنىڭ سولتۇستىك بولەگى تەكەس اۋدانىندا G578 لەنياسىمەن تۇتاسىپ توعىزتاراۋعا بارادى، قازىر سالىنىپ جاتقان S242 لەنياسى (توعىزتاراۋ - نىلقى 1 - دارەجەلى تاس جول نىسانى) ارقىلى G577 لەنياسىنىڭ جىڭ - قۇلجا اۋدانى 1 - دارەجەلى تاس جولىمەن (قىسقاشا G577 جىڭ - قۇلجا لەنياسى دەلىنەدى) تۇتاسىپ، ەڭ سوڭىندا ليانيۇنگاڭ - قورعاس جوعارى قارقىندىق تاس جولىمەن (G30) تۇتاسادى. وڭتۇستىك بولەگى موڭعۇلكۇرە اۋدانىندا «14 - بەسجىلدىق» جوبا مەزگىلىندە قۇرىلىس باستاعان ونسۋ - موڭعۇلكۇرە تاس جولىمەن تۇتاسادى.

«G577 تەكەس - موڭعۇلكۇرە لەنياسى − وڭتۇستىك شينجياڭ مەن سولتۇستىك شينجياڭنىڭ 3 - ۇلكەن ارناسىنداعى ماڭىزدى قاتىناس تورابى. نىسان ورىندالعاننان كەيىن وڭتۇستىك، سولتۇستىك شينجياڭ اراسىندا بارىپ - كەلۋ ٴتىپتى دە قولايلى بولىپ، بۇكىل شينجياڭنىڭ وڭىرلىك ەكونوميكاسىنىڭ توعىسپالى دامۋىنا دەم بەرەدى» دەدى شۇي دۇڭشۇي.

ىلە اڭعارىنا كىرىپ - شىعاتىن ەكىنشى تاس جول قۇرىلىسى  قاۋىرت ىلگەرىلەتىلۋدە

ىلە اڭعارىنا كىرىپ - شىعاتىن ەكىنشى نەگىزگى تاس جول رەتىندە  جالپى 11 ميلليارد 127 ميلليون يۋان قارجى قوسىلعان G577 لەنياسىنىڭ جىڭ - قۇلجا 1 - دارەجەلى تاس جول نىسان قۇرىلىسى قاۋىرت ىلگەرىلەتىلۋدە. 

G577 لەنياسى جىڭ - قۇلجا 1 - دارەجەلى تاس جول نىسانىنداعى جالپى ۇزىندىعى 3 مىڭ 94 مەتر كەلەتىن سۇپتاي 3 - ٴنومىرلى  تۋنەلىنىڭ شىعار اۋزىنداعى قۇرىلىس ورنىندا قاز - قاتار تىزىلگەن  قازۋ ماشينالارى جۇمىسشىلاردىڭ  قول شىراقپەن نۇسقاۋشىلىق ەتۋىندە قازۋ جۇمىستارىن دالمە - ٴدال جۇرگىزۋدە. قازىر بۇل جەردەگى 82 جۇمىسشى مەن 10 نەشە ٴتۇرلى ماشينا، جابدىق تاۋلىك بويى توقتاۋسىز جۇمىس جۇرگىزىپ، قۇرىلىس اياق الىسىنا كەپىلدىك ەتۋدە.

G577 لەنياسى جىڭ - قۇلجا 1 - دارەجەلى تاس جول نىسانى جىڭ اۋدانىنداعى شاشانزىنىڭ باتىس وڭتۇستىگىنەن باستالىپ، ليانيۇنگاڭ - قورعاس جوعارى قارقىندى تاس جولىمەن (G30) تۇتاستىرىلىپ، سوڭعى ٴتۇيىنى نىلقى اۋدانى سۇپتاي اۋىلىنىڭ وڭتۇستىگىندەگى 1 - دارەجەلى تاس جول G578 لەنياسىنا جالعاسىپ، ٴوزارا تۇتاسىپ، ٴبىر - بىرىنە جالعاسقان، قوس باعىتتا ٴتورت اۆتوكولىك قاتار جۇرەتىن، ساعاتتىق قارقىنى 100 كيلومەتر ەتىپ جوبالانعان. جالپى ۇزىندىعى 92.545 كيلومەتر، جالپى 88 كوپىر، 5 تۋنەل جوبالانعان، كوپىر جانە  تۋنەلدىڭ ۇزىندىعى 43 كيلومەترگە جەتىپ، 2025 - جىلدىڭ سوڭىندا اۆتوكولىك قاتىناتۋ جوسپارلانعان. 

بۇل نىسان  سالىنىپ بىتكەن سوڭ تەكەس اۋدانى مەن موڭعولكۇرە اۋدانى جوعارى قارقىندىق تاس جول لەنياسى «+» فورماسىندا تۇتاسىپ، ىلە اڭعارىنداعى ٴارقايسى اۋداندارداعى جوعارى قارقىندىق تاس جولدى ٴوزارا تۇتاستىرۋ جۇزەگە اسىرىلادى. سونىمەن بىرگە، قۇلجا قالاسىنان ۇرىمجىگە كولىك قاتىناۋ ارالىعى 85 كيلومەتر قىسقارىپ، ىلە اڭعارىنان ۇرىمجىگە بارۋداعى ەڭ قولايلى ارناعا اينالادى. 

G577 لەنياسى جىڭ - قۇلجا لەنياسىنىڭ SG5 مەردىگەرلىك بولەگى نىسانىنىڭ باس ينجەنەرى لي يۇنپىڭ بىلاي دەدى: سۇپتاي 3 - ٴنومىرلى  تۋنەلىنىڭ شىعار اۋزى ينجەنەرياسىنىڭ تۋنەل قازۋ جۇمىسى تامامدالدى؛ سۇپتاي 4 - ٴنومىرلى  تۋنەلىندە تۋنەل قازۋ جۇمىسى باستالىپ، مەجەمەن 4 - ايدىڭ سوڭىندا نەگىزگى تۇلعالىق قۇرىلىس كەزەڭىنە وتەدى. قازىر سالىنىپ جاتقان G577 لەنياسى جىڭ - قۇلجا جوعارى قارقىندىق تاس جولى تەمىرجولمەن قاتارلاسىپ توتە شىعىسقا قاراي  جۇرەدى، ەندىگارى كەڭسايدى اينالىپ ٴجۇرۋدىڭ قاجەتى جوق. جاسالىپ بىتكەن سوڭ بۇل تاس جولدا تاۋلىك بويى اۆتوكولىك قاتىناۋ جۇزەگە اسىرىلىپ، ىلە اڭعارىنا كىرىپ - شىعاتىن ەكىنشى تاس جولعا، سونداي - اق، بۇراتالا موڭعۇل اۆتونوميالى وبلىسىنان وڭتۇستىك شينجياڭعا تۇتاساتىن ماڭىزدى ارناعا اينالادى. 

G577 لەنياسى جىڭ - قۇلجا 1 - دارەجەلى تاس جول نىسان قۇرىلىسىنىڭ جاۋاپتىسى حۋ شياۋدىڭ تانىستىرۋىنشا، تۇتاس لەنيانىڭ ٴتۇيىندى، قيىن ينجەنەرياسى نەگىزىنەن 11.89 كيلومەتر ۇزىندىقتاعى سولتۇستىك تيانشان ەرەكشە ۇزىن  تۋنەلىنە شوعىرلانىپ، كوپ رەت وپىرىلمالى قىرتىستى ۇگىلمەلى الاپتى جانە سۋلى بولەكتى تەسىپ وتەتىندىكتەن، سۋ باسۋ، لاي - باتپاق شىعۋ كومەسكى قاتەرى بار، بۇل تۇتاس نىسانداعى تىزگىندەۋ سيپاتىندىق قۇرىلىس سانالادى ەكەن. مۇنىڭ ىشىندە بوربوسىن ەرەكشە ۇلكەن كوپىرىندەگى ەڭ بيىك  دىڭگەك 144 مەترگە، ەكى دىڭگەكتىڭ ارالىعى 160 مەترگە جەتەدى. قازىر تۇتاس لەنيانىڭ ٴارقايسى جول بولەگىندە جاپپاي قۇرىلىس جۇرگىزىلىپ، كوپىر، تۋنەل، جول تاعانى سياقتى كوپ جۇمىس مايدانىندا قۇرىلىس تەڭ ىلگەرىلەتىلۋدە.

جول تورابىنىڭ نەگىزى بەكەمدەلىپ، ماڭىزدى قاتىناس نىسان قۇرىلىستارى قاۋىرت ىلگەرىلەتىلۋدە. G577  لەنياسىنىڭ تەكەس - موڭعولكۇرە بولەگى مەن جىڭ - قۇلجا بولەگى نىسانى تەك وبلىسقا توتە قاراستى ورىنداردىڭ ماڭىزدى قاتىناس نىسان قۇرىلىسىن قاۋىرت ىلگەرىلەتكەندىگىنىڭ ىقشام كورىنىسى سانالادى.