گۇلدەن ماقسات قىزى، جاڭ يۇيفىڭ (ٴوز تىلشىلەرىمىز)، تاڭ چىڭجي (ەرىكتى ٴتىلشى)
− ناعيما اپەكە، ەكەۋىمىز قىستاقتاعى اتايدىڭ ۇيىنە بارىپ قايتايىق!
− ٴيا، ماقۇل، جۇرەيىك وندا!
11 - ايدىڭ 21 - كۇنى تۇستەن بۇرىن، تەكەس اۋدانى تەكەس قالاشىعى اقتاس قىستاعىنىڭ تاڭەرتەڭگى قىزمەت ورنالاستىرۋ ٴماجىلىسى اياقتاسىمەن قىستاقتىڭ ٴبىرىنشى شۋجيى شۇي جياڭ «ۇعىسۋ، تيىمدىلىك جاساۋ، توعىستىرۋ» قىزمەت اترەتىنىڭ مۇشەسى ناعيما قۋاتقان قىزىن قىستاق تۇرعىندارىنان حال سۇراي بارۋعا شاقىردى.
شۇي جياڭنىڭ «اتاي» دەپ وتىرعانى اقتاس قىستاعىنىڭ تۇرعىنى، بيىل 77 جاسقا كەلگەن مالشى كاريا نامازبەك سىدىقبەك ۇلى ەدى. كاريا 11 - ايدىڭ 20 - كۇنى تۇستەن كەيىن قارلى بۇرانعا قاراماي ارنايى قىستاق كوميتەتىنە كەلىپ، «شۇي شۋجي، بىرنەشە كۇننىڭ الدىندا قار كۇرەپ ٴجۇرىپ تايىپ جىعىلىپ جارالانىپ قالىپسىز، سورپالانىڭىز» دەپ شۇي جياڭعا قوياردا قويماي ٴبىر تاۋىق اكەلىپ بەرگەن ەدى. ۇلكەن كىسىنىڭ كوڭىلىن قالدىرعىسى كەلمەگەن شۇي جياڭ تاۋىقتى العانىمەن، ىشتەي قاتتى قىنجىلدى. «قالايدا قارىمجىسىن بەرۋ كەرەك» دەپ ويلاعان ول تاڭەرتەڭ ەرتە ٴبىر جاشىك الما ساتىپ الىپ، كاريانىڭ ۇيىنە امانداسا بارماق بولعان ەدى.
− «ناعيما اپەكە، كاريانىڭ ۇيىنە بارعاندا المانى ساتىپ العانىمدى ايتا كورمەڭىز، ۇيدەگىلەر قۇلجادان بەرىپ جىبەرىپتى دەيىك، ايتپەسە، كاريا تاعى دا الماي قويادى، الدىڭعى جولى اكەلگەن نارسە - كەرەكتەرىمدى ىزگى تىلەك بىلدىرە وتىرىپ ازەرگە العىزدىم.
− شۇي شۋجي، ٴسىز بۇل جولى دا وتىرىك ايتقالى تۇرسىز عوي!
شۇي جياڭ ىڭعايسىزدانا كۇلىپ قويدى دا، «ٴبارى دە شاراسىزدىقتان عوي، بۇقارانىڭ جاقسى كوڭىلىن مەيلى قالاي بولماسىن بىردەن تويتارىپ تاستاۋعا بولمايدى، ويتپەگەندە، بۇقارانىڭ كوڭىلى سۋيدى، ال، بۇقارالىق قىزمەت تارتىبىنە قايشىلىق جاساۋىمىزعا تىپتەن بولمايدى، <سيعا سي، سىراعا بال> دەگەن، ٴبىز دە وسى قىستاقتىڭ قاراپايىم ٴبىر مۇشەسىمىز، جول - جورالعى ادامدار اراسىن جاقىنداتىپ، سۇيىسپەنشىلىكتى ارتتىرادى عوي» دەدى.
بۇل رەتكى «سالەمدەمە بەرۋ» وتە ٴساتتى بولدى، نامازبەك سىدىقبەك ۇلى بۇل المانى شۇي جياڭنىڭ قۇلجا قالاسىندا تۇراتىن وتباسىنداعىلارى سالەمدەمە رەتىندە ارنايى وزىنە جىبەرگەنىن ەستىگەندە، قايتا - قايتا العىس ايتىپ، اۋرە بولىپسىڭدار» دەدى دە المانى بىردەن قابىل الدى. امان - سالەمنەن كەيىن كاريا شۇي جياڭنىڭ بەتىندەگى جاراقاتتى ەپپەن سيپاپ كورىپ: «ابايلاساڭ بولماي ما، اق قار، كوك مۇزدا جازدىق اياق كيىممەن قار كۇرەسەڭ جىعىلماعاندا قايتەسىڭ، ەستىسەم كوپ قان اعىپتى دەيدى؟ ٴالى اۋىرا ما؟ تىرتىق قالماسا جارار ەدى؟» دەدى الاڭداۋىن جاسىرا الماي.
− ەشتەڭە ەتپەيدى اعاي، اۋىرمايدى، تىرتىق تا قالمايدى، الاڭسىز بولىڭىز، - دەپ نامازبەك سىدىقبەك ۇلىنىڭ شىن نيەتىمەن الاڭداعانىنا، قامقورلىق تانىتقانىنا اسەرلەنگەن شۇي جياڭنىڭ كوزىنە جاس ىركىلىپ، ونى سەزدىرگىسى كەلمەگەن ول: - اعاي، ٴبىزدىڭ تاعى باسقا جۇمىستارىمىز بار ەدى، جۇرە بەرەيىك، دەنساۋلىعىڭىزعا كوڭىل ٴبولىڭىز، - دەدى.
قىستاق كوميتەتىنە قايتار جولدا شۇي جياڭنىڭ كوڭىلى تولقىپ، وي ەلەگىنەن كوپ نارسەلەردى وتكىزدى.
«الەمدە ٴبىر تارازى بار دەسەك، تارازىنىڭ كرتاسى حالىق بۇقاراسى ەمەس پە! وبلىستىق اۋىل - قىستاقتى گۇلدەندىرۋ مەكەمەسى مەن وسى مەكەمەدەن اقتاس قىستاعىنا تۇسكەن <ۇعىسۋ، تيىمدىلىك جاساۋ، توعىستىرۋ> قىزمەت اترەتى بىرنەشە جىلدان بەرى قىستاقتا قانشالاعان نىسانداردى ورىنداپ، قانشاما قىستاق تۇرعىنىنىڭ ناقتى قيىنشىلىعى مەن ماسەلەسىن شەشتى. اقتاس قىز بەيىتى 4A دارەجەلى ساياحات رايونى قۇرىلىسى، سۋ قاينارى قۇرىلىسى، قىستاقتىڭ جولدارىن اسفالتتاندىرۋ، اۋىل - قىستاق كوشەلەرىن جاڭالاۋ، توسپا رايونىنىڭ توك سىمدارىن جاڭالاپ، دارەجەسىن جوعارىلاتۋ، مال سۋاتى نىسانى، جوعارى ولشەمدى مالشىلار ساياجايى قۇرىلىسى سياقتى ٴىرى نىسانداردان تىس، بۇقاراعا كومىر، ماي جانە كوكونىس جەتكىزۋ سىندى قىستاق تۇرعىندارى ٴۇشىن ىستەگەن ناقتى، ىزگى ىستەردىڭ ٴوزى ايتىپ تاۋىسقىسىز». وسىلاردى وي ەلەگىنەن وتكىزە كەلە شۇي جياڭ مىنانى تەرەڭ ٴتۇسىندى: «جۇرتتىڭ كوڭىلىنەن شىققاندا عانا قىستاق تۇرعىندارى بىزگە ٴدان ريزا بولادى. شىنىن قۋعاندا ٴبىز پارتيانىڭ مەيىرى مەن جاقسى ساياساتىنىڭ ارقاسىندا وسىنداي قۇرمەتكە بولەنىپ وتىرمىز. ٴبىز دە ٴبىر كۇنى بۇل جەردەن كەتەمىز، الايدا، بۇقارامەن قانشالىق ەتەنە بولساق، سونشالىق مەيىر - ماحابباتقا بولەنەمىز، كەيىن مەيلى قانشا الىستا جۇرسەك تە، بۇل جەر ٴبىز ٴۇشىن ماڭگى ۇمىتىلماس ەستەمە بولماق».