اكەمدى ەسكە العاندا

  • كەلۋ قاينارى: ىلە گازەتى
  • 08:21:57 20/04/2015

    پارتيا 11-كەزەكتى ورتالىق كوميتەتىنىڭ 3–جالپى ماجىلىسىندەگى «بىلىقپالىقتى وڭاپ، شارۋاشىلىقتى شالقىتۋ» دەگەن ۇندەۋىن ءوزىنىڭ قىزمەتتەگى دەمەۋشىسى ەتىپ، قازاق حالقىنىڭ ەجەلدەن ۇزىلمەي كەلگەن ايتىس، ات بايگەسى، كوكپار، قىز قۋار سياقتى ءداستۇرلى مادەنيەتىن قالپىنا كەلتىرىپ، مالشى قاۋىمنىڭ اڭسارى اۋىپ، كەنەزەسى كەۋىپ جۇرگەن دالا مادەنيەتىن جاڭعىرتىپ، زامانعا ساي تۇلەتۋگە ەرەن ەڭبەك سىڭىرگەن ەدى. قازاقتىڭ اتاقتى اقىنى قۇرمانبەك زەيتىنعازى ۇلى:

    كۇرەسسىز كەلگەن باقىت تەگىن قايدا؟

    ونەرگە ەر سۇيەمەي تەبىن قايدا.

    ايتىستى العاش رەت جولعا قويعان،

    قۇرمەت ەت تۋعان التاي تەمىربايعا–دەپ ماقتاسا، ال وسىنداي دالا مادەنيەتىنىڭ سيلى قوناعى، التايدىڭ ءبىر تۋار ۇلى ماقاتان ءشارىپقان ۇلى حالىقتىڭ كوڭىلدى بەينەسىن، قۋانىشتى كۇنىن كورىپ، دالا مادەنيەتىن ماقتاپ:

    حالقىمىزدىڭ ءان مەن كۇيگە تەگى باي،

    جۇيرىگىنىڭ تامشىلاعان تەرىن–اي.

    ەلىڭمەنەن دۋمانداتىپ وتىرسىڭ،

    اسىل اعام، اياۋلى اعام تەمىرباي.–دەپ تولعاعانى بار.

    قازاق حالقىندا ەجەلدەن قالىپتاسقان تۇسىنىكتىڭ ءبىرى _ «اكە اسقار تاۋ»، اكەسى بار ءۇيدىڭ شاڭىراعى ەش ۋاقىتتا شايقالمايدى. اكە تاربيەسىن تىڭداپ وسكەن بالا ومىردەگى جولىن تابادى. جاقسى ازامات بولىپ ەلىنە ادال قىزمەت ەتەدى. «اكەنىڭ بەرگەن تاربيەسىنەن جولىمدى تاۋىپ كەلەمىن» دەپ انشىلەردىڭ ءان شىرقاعانىنداي، اكەمىزدىڭ بارلىق بالا–شاعالارى، نەمەرە–شوبەرەلەرى سول كىسىنىڭ بەرگەن تاربيەسى مەن اقىلى ارقىلى جولدارىن تاۋىپ كەلەدى.

    مارقۇم اكەمىز قاراپايىم عۇمىر كەشىپ، ءبىزدى تىم ەرتە كەزدەن–اق بىلىمگە باۋلىدى دەسەم تىم ارتىق ايتقان بولماسپىن. ول كىسىنىڭ بۇكىل عۇمىرى قازاقى تىرلىكپەن ورنەكتەلدى. قايران اكەم–اي. «جاقسىنىڭ جۇرگەن جەرى رۋلى ەلدەي» دەپ بۇرىنعىلاردىڭ ايتقانىنداي، ءسىزدىڭ قادىرىڭىزدى ەندى مىنە كەلمەستىڭ كەمەسىنە ءمىنىپ ارامىزدان اتتانعاننان كەيىن بىلدىك قوي.

    امال قانشا، راقىمسىز اجالعا كىم توسقاۋىل قويار دەيسىز؟ بۇگىن تاعدىر جايدارمان، جايساڭ اكەمىزدى ورتامىزدان ايىرىپ اكەتسە دە «قارا ورمانداي حالقىم» دەپ وتكەن ونىڭ ەسىمى تاريح بەتىنەن جارقىراپ ورىن الاتىندىعى ءشۇباسىز.

جاۋاپتى رەداكتور: جازيرا بولاتباي قىزى