اكەمدى ەسكە العاندا

  • كەلۋ قاينارى: ىلە گازەتى
  • 08:21:57 20/04/2015

    بارلىق ۇل–قىزدارىڭىز ءوزىڭىزدى جوقتاعان كورىس جولدارىن ايتقان سايىن، اكە، ءسىزدىڭ زاڭعار تۇلعاڭىز كوز الدىمىزدا ەلەستەيدى دە تۇرادى. ءسىزدى ويلاعان سايىن ءسىزدىڭ دايىم بىزگە «بىرىگۋ–بىرلىك». «باس قوسۋ–تىرلىك»، «حالىق ءۇشىن قىزمەت ەتۋ–ۇلكەن كۇرەس» جانە «بەدەلدى سۇراپ الاتىن نارسە ەمەس، ءوزىڭ تىكتەيسىڭ» دەيتىن تاربيەلىك اقىلىڭىز، مەيىرىمدىلىگىڭىز، ادالدىعىڭىز، اۋىز اشسا جۇرەگىڭىز كورىنەتىن اق كوڭىلدىلىگىڭىز ءبىزدىڭ ەسىمىزدەن ماڭگى شىقپاق ەمەس.

    دۇنيەدەگى ءارقانداي تاربيە _ اكەمە مەن انانىڭ تاربيەسىنەن ارتىق بولمايدى. ال دۇنيەدەگى تاعىلىمدى تاربيە تەك اكە مەن انادان داريدى. اكەمىز ءوزىنىڭ سەگىز بالاسىنىڭ بولاشاعىنا باعىت–باعدار كورسەتىپ دۇنيەدەن ءوتتى. اكەمىزدىڭ تاربيەسى اباي اتامىز ايتقانداي بار تامىردى قۋالايدى. جۇرەكتەن شىعىپ جۇرەككە جەتەدى. اكەنىڭ بالاعا ايتقان تاربيەسى، بالاسىمەن بىرگە سەرۋەندەپ ءومىر وتكىزگەنى، ادامدارمەن تانىستىرعانى، ەل ارالاپ قىدىرتقانى، «بالام» دەپ ماقتاعانى، اتا–باباسىنىڭ، رۋىنىڭ، ەلى مەن جەرىنىڭ كىم ەكەنىن ۇقتىرعانى ... ءبار–ءبارىنىڭ دە تاربيەلىك ءمانى وتە تەرەڭ دۇنيەلەر. سوندىقتان، اكە وتكەن مەن بۇگىندى، بۇگىن مەن بولاشاقتى بايلانىستىرىپ تۇراتىن التىن كوپىر. وسى كوپىر ارقىلى ءاربىر ۇرپاق ءوزىنىڭ بولاشاعىمەن قاۋىشادى.

    اكەمىز باقي دۇنيەگە اتتانعاندا وبلىستىق حالىق قۇرىلتايى تۇراقتى كوميتەتى، التاي ايماقتىق پارتكوم مەن حالىق ۇكىمەتى، حالىق قۇرىلتايى التاي ايماقتىق قىزمەت كوميتەتى، ساياسي كەڭەس التاي ايماقتىق قىزمەت كوميتەتى سياقتى ورىنداردىڭ باسشىلارى جانە اۆتونوميالى رايون، وبلىس، ايماق، اۋدانداردان كەلگەن باسشىلار اكەمىزدىڭ سۇيەگىمەن قوشتاسقان ازا ءبىلدىرۋ سالتىندا پارتيا مەن حالىق ءۇشىن ايانباي قىزمەت ىستەگەن يگى ىستەرىن تىلدەرىنە تيەك ەتىپ، قاتىستى ورىندار مەن باسشىلاردان، دوس–جاراندارىنان كەلگەن قارالى تەلەفون، تەلەگراممانى قايعىمىزعا ورتاق بولعان بۇقارا مەن بالا–شاعالارىنا، تۋىس–تۋعاندارىنا جەتكىزىپ، قۇداي قوسقان قوساعىنىڭ سوڭعى تۇرمىس جاعدايىن ورنالاستىرىپ، ءوز ەلىنىڭ تورىندە، ءوز مەكەنىندە، ءوزى سالدىرعان قارا شاڭىراعىندا ءوز تالابى، ءوز وسيەتى بويىنشا باقيعا اتتاندىرىپ، بۇرىنعى ءوزىنىڭ قىزمەتتەستەرى، ساپتاستارى جاتقان قاھارماندار زيراتىنا قويدى. ءبىزدىڭ، ياعني ول كىسىنىڭ بارلىق بالا–شاعالارى مەن نەمەرە–شوبەرەلەرىنىڭ جانە تۋعان–تۋىستارىنىڭ قارا ورمانداي حالقىمىزعا العىستان باسقا ايتارىمىز جوق.

جاۋاپتى رەداكتور: جازيرا بولاتباي قىزى