ۇلت ونەرىنە ءورىس اشقان...

  • كەلۋ قاينارى: ءتاڭىرتاۋ تورابى
  • 05:27:33 07/05/2015

    ءتىلشى: ونەر يەسى رەتىندە ويىن - ساۋىق ۇيىرمەسى العاش قۇرىلعان كەزدەگى قازاق ونەرىنە اكەلگەن جاڭالىعى رەتىندە نەلەردى اتار ەدىڭىز؟

    كارىم: رايونىمىز العاش قۇرىلعان مەزگىلدە، تەك قازاقتا عانا ەمەس، باسقا ۇلتتاردا دا كاسىپتىك ۇيىرمە جوق ەدى، ويىن - ساۋىق ۇيىرمەلەرىنىڭ كوبى بۇقارالىق سيپاتتى ۇجىمدار بولاتىن. ال وبلىستىق ويىن - ساۋىق ۇيىرمەسىن كاسىپتىك ۇيىرمە دەپ اتاۋىمىزعا بولادى. مۇنىڭ ءوزى سول ءداۋىر جونىنەن الىپ ايتقاندا، ۇلكەن قوعامدىق وزگەرىس. سونىمەن قاتار، ول كەزدە سوۆەت وداعىنىڭ ورتا ازياداعى رەسپۋبليكالارىمەن بارىس - كەلىس جاسالدى. وسى بارىس - كەلىس اياسىندا دا ءبىزدىڭ كوركەمونەر ىستەرىمىزدە كوپتەگەن جاڭالىقتار بولدى. ايتالىق، مۋزيكانىڭ ىشكى قۇرىلىمى تۇرعىسىنان الىپ ايتساق، رايونىمىزدا بۇرىن ماجور قالىبى باستى ورىندا بولاتىن، ال مينور قالىبى قازاقستان وڭىرىندە ءبىرشاما كەڭ تارالعان، ەلدەر ارا مادەنيەت اۋىس - كۇيىسىنەن كەيىن مينور قالىبى ءبىزدىڭ ەلگە دە كەڭ تارالدى؛ بۇرىن جۇڭگو قازاقتارى شەرتپە كۇيدى كوبىرەك شەرتەتىن، كەيىن قازاقستاننىڭ توكپە كۇيلەرىمەن توعىستى. مۋزيكا قۇرىلىمدارىندا دا ۇلكەن وزگەرىستەر بولدى، مۇنىڭ مىسالى رەتىندە سول كەزدە جازىلعان تايىردىڭ «جاڭا شابىت»، الىپبەكتىڭ «كوكتەم شۋاعى» كۇيلەرىن اتاساق تا جەتكىلىكتى. سونىمەن بىرگە، كولەمدى ساحنالىق شىعارمالار كوپتەپ وينالدى، توپتىق بيلەر جاسالدى. ورتالىق حالىق راديو ستانسياسىنىڭ حالىق ىشىندەگى ءان - كۇيلەردى جيناۋ جۇمىسىنا دا قولعابىستار جاساپ، قازاقتىڭ تالاي ءان - كۇيىن راديونىڭ التىن قورىنا كىرگىزدى. بۇل قازىرگى ءداۋىردىڭ كوزىمەن قاراعاندا، تاتىمسىز دۇنيە كورىنۋى مۇمكىن، ءبىراق، سول ءداۋىر جونىنەن العاندا، كوركەمونەر سالاسىنداعى ۇلكەن جاڭالىق ەدى، مۋزيكا سالاسىنداعى وسىنداي جاڭالىقتاردىڭ جالپىلاسۋىنا ىلە ويىن - ساۋىق ۇيىرمەسىنىڭ مۇرىندىق بولعانىن ەشكىم جوققا شىعارا المايدى.

جاۋاپتى رەداكتور: بەرىك وقاباي ۇلى