ۇلت ونەرىنە ءورىس اشقان...

  • كەلۋ قاينارى: ءتاڭىرتاۋ تورابى
  • 05:27:33 07/05/2015

    ءتىلشى: وبلىستىڭ «كوشى - قونى» كەزىندە كۇيتۇنگە «قونىس اۋدارعان» ۇيىرمە كەيىن قۇلجا قالاسىنا قايتا كوشىپ كەلگەنى بەلگىلى. بۇل ءدال ەلىمىزدە رەفورما جاساپ، ەسىك اشقان، تۇتاس جۇڭگودا ۇلكەن سەرپىلىس بولعان مەزگىلگە تۋرا كەلەدى. وسى سەرپىلىستىڭ وبلىستىق ۇيىرمەگە قانداي ىقپالى بولدى؟

    كارىم: دۇرىس ايتاسىڭ، رەفورما جاساپ، ەسىك اشقاننان كەيىن، بارلىق سالادا تىڭ وزگەرىس، زور دامۋ جارىققا شىقتى. اسىرەسە، بۇرىن «فەوداليزمنىڭ قالدىعى»، «كوپ كونەنىڭ ءبىرى» سياقتى قيسىنسىز جەلەۋلەرمەن تۇسالىپ كەلگەن مادەنيەت - كوركەمونەر ىستەرىندە دە ۇلكەن دامۋشىلىق بولدى. 1979 - جىلى وبلىستىق ءان - ءبي ۇيىرمەسى قۇلجا قالاسىنا كوشىپ كەلدى. ىشكى قۇرىلىمىنا رەتتەۋ جۇرگىزىپ، زامان اۋقىمىنا ساي جاڭاشا دامۋ جولىنا ءتۇستى. 1981 - جىلى ۇيىرمەمىز جارتى جىل ىشكى ولكەنى ارالاپ، ويىن قويىپ قايتتى. 1986 - جىلى ۇيىرمەنىڭ اتى «ىلە قازاق اۆتونوميالى وبلىستىق ءان - ءبي ۇيىرمەسى» بولىپ وزگەردى. سونىمەن بىرگە، قازاق ۇلتىنىڭ مادەنيەت - كوركەمونەرىن دامىتۋ ماقساتىندا ىلە قازاق اۆتونوميالى وبلىستىق ۇلت اسپاپتار وركەسترى مەن وبلىستىق مادەنيەت - كوركەمونەر ىستەرىن زەرتتەۋ ورنى قۇرىلدى. ءوز باسىم، ۇلت اسپاپتار وركەسترىنىڭ قۇرىلۋىن «جۇڭگو قازاقتارىنىڭ كوركەمونەر سالاسىنداعى ۇلكەن بەلەسى» دەپ تانيمىن. ويتكەنى قازاقتا ۇلت اسپاپتارى مول بولعانىمەن، وركەستر قۇرىلعان كەزدە دومبىرادان باسقا مۋزيكا اسپابى جۇرتتىڭ قولىندا جوق ەدى. دەمەك، وبلىستىق ءان - ءبي ۇيىرمەسىنىڭ نەگىزگى جۇمىسىنىڭ ءبىرى، ەلىمىز قازاقتارىندا جوعالىپ بارا جاتقان مۋزيكا اسپاپتارىن قۇتقارۋدان باستالعان. جالعىز دومبىراعا سۇيەنىپ وركەستردىڭ جۇمىسىن جۇرگىزۋ مۇمكىن ەمەس، كەرەك دەسەڭىز، دومبىرانىڭ تۇرلەرى دە تولىق ەمەس ەدى. مىنە وسىنداي جاعداي استىندا قۇرىلعان ۇلت اسپاپتار وركەسترى ۇلتتىق مۋزيكا اسپاپتارىن «ءتىرىلتۋ» جاعىندا دا ءبىر قىدىرۋ جۇمىستار ىستەدى. ءتىرىلتۋ دەمەكشى، وبلىستىق ءان - ءبي ۇيىرمەسى ۇلت اسپاپتارىن «ءتىرىلتۋدى» قوبىزدان باستاپ قولعا العان. ءاسىلى قوبىزدى ساحناعا شىعارۋدى ءجانابىل، ەرعالي سياقتى باسشىلار وبلىستىق ءان - ءبي ۇيىرمەسىنىڭ جاۋاپتىلارىنا ەرتەرەك قۇلاق قاعىس قىلعان. ءبىراق، ءبىز قوبىزدىڭ سىرتقى نوبايىن بىلەتىنىمىز بولماسا، ونى قالاي تارتاتىنىنان مۇلدەم حابارسىز ەدىك. ۇلگىسىن الىپ جاسايىق دەسەك، دايىن قوبىز جوق، قاتتى قينالدىق.

جاۋاپتى رەداكتور: بەرىك وقاباي ۇلى