ۇلت ونەرىنە ءورىس اشقان...

  • كەلۋ قاينارى: ءتاڭىرتاۋ تورابى
  • 05:27:33 07/05/2015

 سونىمەن نە كەرەك، اقىلداسىپ وتىرىپ، قوبىزدى سكريپكا تارتاتىن ونەرپازدارعا تارتقىزاتىن بولىپ كەلىستىك تە، قوبىزدىڭ جوباسىن سىزىپ، ونى شاڭحايداعى ءبىر مۋزيكا اسپاپتارىن جاسايتىن زاۆودقا جاساتتىق. ءبىراق، جاساتقان قوبىزىمىز ساقاۋ بولىپ قالدى، دىبىس شىقپايدى، وركەسترگە قوسۋدىڭ دا مۇمكىندىگى جوق. سويتسەك، ولار قوبىزدىڭ تەرىمەن بىتەۋلەيتىن استىن تاقتايلاپ تاستاپتى. كەيىن سول تاقتايدى الىپ، بوتانىڭ تەرىسىمەن قايتا قاپتاپ جاساپ ەدىك، داۋىس شىقتى، ونى تۇڭعىش رەت كادەك قىرعىزباي ۇلى تارتتى. كادەك 1982 - جىلى اۆتونوميالى رايوندا وتكىزىلگەن «ءتاڭىرتاۋ اۋەنى» اتتى ءان - كۇي بايقاۋىندا وسى قوبىزبەن كۇي ورىنداپ 2 - دارەجەلى جۇلدە الدى. سول جارىستا ءبىزدىڭ قوبىزدى ساحناعا شىعارعانىمىزعا كوپتەگەن القاۋلار ايتىلدى. سول ساقاۋ قوبىزبەن ورىندالعان كۇيلەر شينجياڭ راديوسىنىڭ قورىندا ءالى كۇنگە دەيىن بار...

    1983 - جىلى ىلە وبلىسىندا كولەمدى ءان - كۇي جارىسى ءوتتى. وسى بايقاۋدا ءبىز قولدا بار جالعىز قوبىزىمىزعا پريما، دومبىرا، گيتاردى، سونداي - اق تەلەۆيزوردان كورگەنىمىز بويىنشا اتتىڭ تۇياعى، سيىردىڭ ءمۇيىزى سياقتىلاردان پايدالانىپ ءوزىمىز جاساعان تۇياق، سىلدىرماق، اسا تاياق سياقتى مۋزيكا اسپاپتارىن قوسىپ، «سالدىر - گۇلدىردى» كوبەيتىپ، ءبىر ەكى كۇي ورىنداتىپ، «ۇلتتىق انسامبل» دەگەن اتپەن ساحناعا شىعاردىق. مۇنى دا ەل وتە جاقسى قابىلدادى. مىنە وسى قۇلشىنىسىمىز 1986 - جىلى «ۇلت اسپاپتار وركەسترىنىڭ» قۇرىلۋىنا ۇلكەن مۇرىندىق بولدى.

    ۇلت اسپاپتار وركەسترى قۇرىلعاننان كەيىن، ەڭ اۋەلى، مۋزيكا اسپاپتارىن تولىقتاۋدان باستادىق. قاتىستى ورىندارعا جوسپارىمىزدى جازىپ، 16 مىڭ يۋان اقشا الدىق. ول كەزدە بۇل قوماقتى اقشا. وسى قارجىعا شاڭحايدا مۋزيكا اسپاپتارىن جاساتتىق. اسپاپتار تولىقتانعاننان كەيىن ىشكەرى ولكەلەردە ويىن قويىپ، ونەر كورسەتكەن «ۇلت اسپاپتار وركەسترى» بەيجيڭدەگى مۋزيكا ماماندارىنىڭ جاقسى باعاسىن الدى.

جاۋاپتى رەداكتور: بەرىك وقاباي ۇلى