ۇلت ونەرىنە ءورىس اشقان...

  • كەلۋ قاينارى: ءتاڭىرتاۋ تورابى
  • 05:27:33 07/05/2015

    1988 - جىلى اۆتونوميالى رايون جاعىنان «ۇلتتىق مۋزيكا اسپاپتارىنا رەفورما جاساۋداعى جەتىستىكتەرىن باعالاۋ» جونىندە جيىن اشىلدى. سول جيىندا ءبىزدىڭ ۇلتتىق وركەستر قوبىز، سىبىزعى سياقتى ۇلتتىق اسپاپتاردى ۇلىقتاۋداي ارتىقشىلىعىمەن، «ءتورت تۇرمانىنىڭ تۇگەلدىگىمەن» توپ جارىپ، باس بايگەنى بايلانىپ قايتتى. ول كەزدە ۇيعۇردىڭ وزىندە مۇنداي كەمەلدى ۇلتتىق وركەستر قۇرىلىپ ۇلگىرمەگەن شاق ەدى. 1995 - جىلى قازاقستان رەسپۋبليكاسىنىڭ مادەنيەت مينيسترلىگىمەن جانە قۇرمانعازى اتىنداعى ۇلت اسپاپتار وركەسترىمەن بايلانىس جاساپ، سول جاقتان 10 شاقتى قوبىز اكەلدىك. سونىمەن بىرگە، تۇياق ءشامىلوۆ، قۋانىش اجىمۇراتوۆ، قۇندىز قالامبايەۆالار كەلىپ دومبىرا، قوبىزدان 5 اي كۋرس اشتى. بۇل سول كەزدەگى ەڭ ۇلكەن تابىسىمىزدىڭ ءبىرى دەسەك، ەندىگى ءبىر تابىسىمىز «ءساليحا - سامەن» مەن «التاي اياسىنداعى ءبىر ءۇيلى جان» وپەراسىنىڭ ساحنالاستىرىلىپ، وينالۋى. بۇل شىعارمالار ەۆروپانىڭ وپەرا ولشەمىنە تولىق جەتپەگەنىمەن، ءبىز جونىنەن العاندا، سول كەزدە دەڭگەيى ءبىرشاما جوعارى ساحنالىق شىعارمالار ەدى. «ءساليحا - سامەن» 1982 - جىلى اۆتونوميالى رايونىمىزدا وتكەن ساحنالىق شىعارمالار بايقاۋىندا باس بايگەنى العان. ال «التاي اياسىنداعى ءبىر ءۇيلى جان» 1999 - جىلى مەملەكەت قۇرىلعاندىعىنىڭ 50 جىلدىعىندا وتكىزىلگەن ساحنالىق تاڭداۋلى تۋىندىلار بايقاۋىندا كوللەكيتۆ ءبىرىنشى دارەجەلى جۇلدە، جەكە ءتۇر بويىنشا 11 سيلىق العان.

    09 - جىلداردىڭ باسىندا ىلە وبلىستىق ۇيىرمەنىڭ ارتيستەرىنىڭ قاتىسۋىمەن «ىلە سالتاناتى» كەسكىنگە الىنىپ، تەلە ارنادان تاراتىلدى. 2004 - جىلى وبلىس قۇرىلعاندىعىنىڭ 50 جىلدىعى بايلانىسىمەن ۇلت اسپاپتار وركەسترى «كۇي كەرۋەنى » تاقىرىبىندا ارناۋلى كونسەرت كەشىن وتكىزىپ، جۇڭگو قازاقتارىنىڭ كۇي مادەنيەتىن تاعى ءبىر قىرىنان ايگىلەسە، 2009 - جىلى وتكىزىلگەن «كوكتەم سازى» دا كۇي مادەنيەتىمىزدى ۇلىقتاۋ تۇرعىسىنان وتكىزىلگەن ماڭىزدى كونسەرت بولدى. 2003 - جىلى تاڭجارىق جولدى ۇلىنىڭ شىعارمالارىن ارقاۋ ەتىپ جاسالعان «تاۋ ۇلانى» تاقىرىبىنداعى ءان - ءبي، كۇي كەشى دە وزىندىك ەرەكشەلىگىمەن كورەرمەندەردىڭ كوڭىلىندە قالدى. «ءتورت ماۋسىم جىرى» تاقىرىبىنداعى ءبي كەشى دە (2004 - جىل) ءبي مادەنيەتىمىزدىڭ ءبىر بيىگىنىڭ كۋاسى. 2013 - جىلى جاسالعان «كورىكتى ىلە مەكەنىم » تاقىرىبىنداعى ساحنالىق قويىلىم جۇڭگو شينجياڭ حالىقارالىق ۇلتتىق ءبي فەسيتۆالىندا تاماشا باعا العانى ءمالىم. ايتا بەرسەڭ وتە كوپ، مەن بۇل ارادا باستىلارىن عانا اتاپ وتىرمىن. مىنە وسىنىڭ ءبارى سوڭعى 30 قانشا جىلداعى زور دامۋدىڭ ناتيجەسى.

جاۋاپتى رەداكتور: بەرىك وقاباي ۇلى