اعارتۋعا ءوزىن ارناعان اق ەدىل ۇستاز

  • كەلۋ قاينارى: ىلە گازەتى
  • 08:28:45 21/05/2015

   

    -التاي ايماعىنىڭ ەڭبەك ەرى، مەملەكەتتىك ۇزدىك كلاس جەتەكشىسى جەڭىسبەك ءبىرعازى ۇلى جونىندە

    نۇرجان جانەتقان ۇلى

    

     جەڭىسبەك ءبىرعازى ۇلى–شىڭگىل اۋداندىق ورتا مەكتەپتىڭ جوعارى دارەجەلى وقىتۋشىسى. 1990– جىلى شىلدەدە شينجياڭ ۋنيۆەرسيتەتىنىڭ تاريح فاكۋلتەتىنەن وقۋ تاۋىسقان سوڭ شىڭگىل اۋدانىندا وقىتۋشىلىق قىزمەتىمەن شۇعىلدانعان 20 نەشە جىلدان بەرى ول كاسىبىن ءسۇيىپ، شوگەلدىكپەن قىزمەت ىستەپ، كورنەكتى ناتيجە جاراتۋمەن بىرگە، ون نەشە جىل كلاس جەتەكشىسى بولدى. اسىل ءمورالى، اسقاق ۇستازدىق ستيلى ارقىلى وقىتۋشى–وقۋشىلاردىڭ جانە اتا–انالاردىڭ تەرەڭ سۇيىسپەنشىلىگىنە بولەندى.

    قاجىرلى قۇلشىنىستىڭ قارىمجىسى

    اعارتۋ قىزمەتى قاراپايىم قىزمەت بولعانىمەن سول كاسىپتى سۇيگەن ادام ءۇشىن كوڭىل توعايتاتىن قىزىقتى قىزمەت. اعارتۋمەن اينالىسقان وسىناۋ جىلداردا جەكەڭ تىنباي قۇلشىنىپ، تاباندىلىقپەن ىزدەنىپ، وزىندىك دارا وقىتۋ سلوبىن قالىپتاستىردى. ول وقىتۋدا بالالاردىڭ جاقسى ۇستازى، جاناشىر دوسى بولىپ، وقۋشىلاردىڭ قىزۋ ىقىلاسىنا بولەنسە، تۇرمىستا وقۋشىلاردىڭ اتا–انالارىنىڭ سىرلاس دوسىنا اينالىپ، ولاردىڭ سەنىمە يە بولدى.

    ۇستازدىق جولىن العاش باستاعاندا ول تاريح ساباعىن بار وقۋشىنىڭ جاقسى كورە بەرمەيتىنىن بايقادى، بۇل ونىڭ جۇرەگىن سىزداتتى. سونىمەن ول ىشتەي ءوز ساباعىنىڭ تارتىمدىلىعىن ارتتىرۋعا بەكىپ، وقىتۋ قىزمەتىنە بار ىنتا– پەيىلىمەن كىرىستى.

    سودان باستاپ ءار ساباقتى ويداعىداي ءوتۋ ءۇشىن جەكەڭ قولى جەتكەن ماتەريالداردى تۇگەل دەرلىك وقىپ، ساباقحاناداعى ءار سويلەم ءسوزدى اسا تالعامپازدىقپەن تاۋىپ ايتۋعا كۇش سالدى. «ەڭبەگى باردىڭ ونبەگى بار» دەمەكشى، ونىڭ قۇلشىنىسى اقىرى جەمىس بەردى، ساباقحاناسىندا ومىرشەڭدىك وركەن جايىپ، وقۋشىلاردىڭ ىنتاسى ارتا ءتۇستى. ول جاسامپازدىقپەن وقىتۋعا دەن قويىپ، جالپى وقۋشىنى كوزدە ۇستاۋمەن بىرگە، ءىشىنارا وقۋشىلاردىڭ ارتىقشىلىعىن دا شەبەرلىكپەن ساۋلەلەندىرە ءبىلدى.

جاۋاپتى رەداكتور: گۇلدەن ماقسات قىزى