اعارتۋعا ءوزىن ارناعان اق ەدىل ۇستاز

  • كەلۋ قاينارى: ىلە گازەتى
  • 08:28:45 21/05/2015

ءار كۇنى دەرلىك ءبىر–ەكى وقۋشى ونىمەن بىرگە تۇسكى نەمەسە كەشكى اسقا باراتىن. كلاستاعى 50 نەشە بالادان جەكەڭنىڭ ۇيىنە بارىپ تاماق جەمەگەن بىردە–بىرەۋى جوق دەرلىك. ول بەينە ءبىر دارقان كوڭىلدى مەيىربان اكە سياقتى ءار وقۋشىسىنا قورمالدىق تانىتىپ، جان شۋاعىن سيلاپ كەلەدى، بۇعان جەكەڭنىڭ زايىبى دا ەشقاشان ءىش جيعان ەمەس... مىنە، جەكەڭنىڭ وقۋشىلار ءۇشىن وزىندە بارىن ارنايتىن مۇنداي ىستەرى ايتىپ تاۋىسقىسىز.

    جەڭىسبەك باستان اياق ءوزى ونەگە بولۋ–سوزبەن تاربيەلەۋدەن ماڭىزدى دەگەن قاعيدانى ۇستانىپ، ەڭبەك بولسا وقۋشىلاردى باستاپ بىرگە ىستەدى، تاڭەرتەڭگى وقۋعا وقۋشىلاردان ەرتە كەلدى، ءوزىنىڭ ۇقىپتى پوزيتسياسى ارقىلى وقۋشىلارعا يگى ىقپال جاساپ، ولاردى اسەرلەندىرىپ، باۋلىپ وتىردى.

 وسى كوللەكتيۆتە وقىتۋشى–وقۋشى قاتىناسى جاراسىمدى، وقۋشىلار ءبىر شاڭىراقتىڭ ادامىنداي بەرەكەلى، جاس وسپىرىمدەردە ۇنەمى كەزىگەتىن توبەلەسۋ، ەرەگەسۋ سياقتى ۇنامسىز قۇبىلىستار بۇل كلاستا ەشقاشان بولعان ەمەس، وقۋشىلار تەك ۇيرەنۋدە، بەلسەندىلىكپەن ەڭبەك ىستەۋدە، جاقسى ءىس ىستەۋدە عانا باسەكەلەسەدى. وقىتۋشىسىنىڭ مەيىرباندىعىنان قاتتى اسەرلەنگەن كلاستاعى وقۋشىلا دا تەك تاماشا ناتيجەلەرى ارقىلى ۇستازدارىنىڭ ءۇمىتىن اقتاۋعا تالپىنادى. ءار رەتكى ايلىق ەمتيحاندا، بايقاۋ ەمتيحانىندا جەكەڭنىڭ كلاسىنداعى وقۋشىلار الدىڭعى 5 ورىندى بەرمەيدى، ونىڭ كلاسى ۇنەمى ۇيرەنۋدە ۇزدىك كلاس بولىپ، ءوزى دە «ۇزدىك كلاس جەتەكشىسى» بولىپ ماراپاتتالىپ كەلەدى.

    ۇلى ابايدىڭ «ۇستازدىق ەتكەن جالىقپاس، ۇيرەتۋدەن بالاعا، اقىرىن ءجۇرىپ انىق باس، ەڭبەگىڭ كەتپەس دالاعا» دەگەنىندەي، جەكەڭ اعارتۋ قىزمەتىندەگى ىزدەنۋ رۋحى ارقىلى شاكىرت ساناسىنا ءبىلىم شىراعىن جاعۋمەن بىرگە، ەڭ باستىسى، دالاداي دارقان پەيىلى، اق ەدىل اسىل قاسيەتىمەن ۇرپاق جۇرەگىنە سۇيىسپەنشىلىك ۇرىعىن سەپتى. ونىڭ ۇرپاق ءۇشىن توككەن اششى تەرى كاسىپتەگى تابىسىنا اينالىپ، وقۋشىلارعا ارناعان قالتقىسىز قامقورلىعى وقۋشىلاردىڭ سۇيىسپەنشىلىگى بولىپ ورالدى، ءوزىن كوپتىڭ كوكەيىندە قۇرمەتتى ورىنعا، پارتيا، ۇكىمەت سيلاعان داڭق تورىنە شىعاردى. وقۋشىلارعا وقىتۋدى باعالاتقاندا ونىڭ وقىتۋى جىل سايىن ۇزدىك بولىپ باعالانىپ وتىردى.

جاۋاپتى رەداكتور: گۇلدەن ماقسات قىزى