ەسىل جاندار قاجىرلى،قايىرىمدى -ەڭبەگىمەن ەلىنە بولعان ۇلگى

  • كەلۋ قاينارى: ىلە گازەتى
  • 04:01:37 29/05/2015

    

    قايىربەك قاسيران ۇلى (ءوز ءتىلشىمىز)

 

    «ەگەردە مال كەرەك بولسا، قولونەر ۇيرەنبەك كەرەك. مال جۇتايدى، ونەر جۇتامايدى. الداۋ قوسپاي ادال ەڭبەگىن ساتقان قولونەرلى –قازاقتىڭ اۋليەسى سول» دەپ اباي اتامىز تۇيىندەپ كەتكەندەي، ەڭبەگى ەگەي، ونەرى تەلەگەي جاندار قاشان دا اسپانداعى جارىق جۇلدىز ىسپەتتى اينالاسىنا نۇرىن توگىپ تۇرادى. ءيا، «ەكى قولعا ءبىر ءىس، ەرتە تۇر دا كىرىس» دەپ، اشتى تەرىمەن ءتاتتى نانىن تاۋىپ جەپ، ەگىننىڭ ەبىن، ساۋدانىڭ تەگىن ءبىلىپ، باسقالارعا ءوزىنىڭ ادال ەڭبەگىمەن ونەگە كورسەتكەن ءار سالا، ءار كاسىپتەن قارا ءۇزىپ العا شىققان ەڭبەك ەرلەرىن ماداقتاۋ –سيلاۋ جينالىسىن ىلە قازاق اۆتونوميالى وبلىسى بيىلعى حالىقارالىق ەڭبەكشىلەر مەرەكەسى قارساڭىندا تاعى ءبىر رەت دابىرالى وتكىزىپ، «1 –مامىر» ەڭبەك ەرلەرى مەن ۇزدىك قىزمەتكەرلەردى ماراپات تورىنە شىعارعان ەدى. وسى ورايدا ەڭبەك شيراتىپ، ءومىر وسىرگەن وسى جانداردىڭ اراسىنان التى ادامنىڭ ادال ەڭبەك، ءتاتتى جەمىسىن وقىرمانعا تانىستىرىپ، ونەگەسىن ۇگىتتەۋدى ءجون سانادىق.

    كاسىبىڭ نەدەن بولسا نەسىبەڭ سودان

    ماينۇر نۇرمۇقامەت قىزى بۋرىلتوعاي اۋدانى سانحى سەرىكتىگىنىڭ قاراپايىم ءبىر جۇمىسشىسى. وسى قىزمەت ورنىندا جيىرما نەشە جىلىن ءبىر كۇنگىدەي وتكىزىپ، تاباندىلىعىمەن دە، باتىلدىعىمەن دە باسقالارعا ونەگە بولا بىلگەن ول قىزمەتتە جاڭالىق اشۋدى وزىنە ماقسات ەتىپ، قىزمەت بارىسىندا باستان اياق ۇلەس قوسۋ رۋحىندا بولىپ، جۇمىس ورنىن ءوز وتباسىنداي كوردى. ۇيرەنە ءجۇرىپ ىستەپ، ىستەي ءجۇرىپ ۇيرەنىپ، ءار نارسەدەن وي ءتۇيىپ، ساباق الىپ، وسىنىڭ بارلىعىن دا ساناسىنا ۇيالاتا ءجۇردى. «ءىسىم ورگە باسسىن دەسەڭ ءوزىڭ تىندىر» دەيتىن تاعىلىمدى بويتۇمار ەتكەن ول ۇيىمنىڭ سەنىمىنە بولەنىپ، باسشىلىقتىڭ القاۋىن الدى. سان رەت «ۇزدىك قىزمەتكەر» بولىپ ماراپاتتالدى.

جاۋاپتى رەداكتور: گۇلدەن ماقسات قىزى