احباراتشىلارعا ايتار ازىراق ءسوز

  • كەلۋ قاينارى: ىلە كەشى گازەتى
  • 04:34:23 06/07/2015

    بىرلەس جۇرتباي ۇلى

    قوعام اتتى كۇردەلى ءۇردىستىڭ العاباسار ۇگىتشىسى، العى شەپتەگى اتويشىل قاھارمان، جاڭالىقتى جالپىعا العاش جەتكىزۋشى، ءداۋىردىڭ ءۇنى بولعان احباراتشىلارىمىزدىڭ اسا سەزگىر، بايقاعىش، شەشەن، كەز-كەلگەن دەتالدى بەينەلەۋگە شەبەر، ءسوزى كەم، ويى كەن، تەبىنى تەنتەك، رۋحى سەرگەك بولىپ، جىلت ەتكەندى جىبەرمەيتىن قاس قىرانداي قىراعى ەرەكشەلىكتەرى مەن قالام ىزدەرى حالىقتىڭ جۇرەگىنە ۇيالاي كەتەر يلاندىرعىش قۋاتقا يە بولۋدىڭ ءسوزسىز قاجەتتىلىگىن بىلايعى جۇرت ابدەن-اق بىلەدى.

    دەسەدە اتى - زاتىنا ساي احباراتشى بولۋ كورىنگەن كوك اتتىنىڭ قولىنان كەلە بەرەتىن جەڭىل-جەلپى جۇمىس ەمەس. پالەن ايماقتىڭ، اۋداننىڭ، تەلەۆيزيانىڭ، پالەن گازەتتىڭ ءتىلشىسىمىن دەپ كەۋدەسى تاۋ سوققانداي بولىپ جۇرگەنىمەن ءباز بىرەۋلەر جيىن حابارىن نەمەسە جىل سايىن، ماۋسىم سايىن بولىپ جاتاتىن ەگىس قىزمەتى، ءتول الۋ ناۋقانى، ءتۇرلى مەرەكە -مەيرامدار، قار-سۋ اپاتىنان ساقتانۋ قىزمەتى سياقتى ۇنەمىلىك جۇمىستاردى قينالماي حابارلاۋعا عانا ابدەن «ماماندانىپ» العان ءتارىزدى. جاز جايلاۋ، قىس وتارعا تىلشىلىك بابىمەن سان مارتە ساپاردا جۇرسەدە، ءبىر سىپىرا تىلشىلەر قالامىنان بولمىستى جاندى تۇردە كوز الدىڭا كەستەلەپ اكەلگەنىمەن، «ءيا، سوسىن» دەگىزىپ، سەزىمىڭدى سەلت ەتكىزەر ادەبي ماقالا، ءتىلشى ەستەلىگى، احباراتتىق اڭگىمە، شالقىما، وچەرىك سىندى قۋاتتى تۋىندىلار تۋمايدى. ءتىپتى كەيبىرى 20 - 30 جىل بويى جيىن حابارىنان اسا الماي، اۋەلى سونىڭ ءوزىن ءتۇزۋ جەتكىزە الماي كەتىپ بارادى. ايتالىق: اناۋ ساۋىردىڭ دولى نوقايى، جەردىڭ ءبىر قىرتىسىن جۇلىپ اكەتەردەي وڭدى-سولدى ۇرعىلاپ، شاڭىن اسپانعا اتا شاق-شالەكەيىن شىعارىپ، قارىس جەردى كورسەتپەي قاھارلانىپ، مالعادا، ادامعادا حاۋىپ ءتوندىرىپ تۇرعان قاتەرلى شاقتاردان، قاتىستى ورىندارمەن باسشىلاردىڭ تاجىريبەلى ءادىس-امالدارى ارقىلى شىعىنسىز وتكەندىگىن جازباق بولسا، «پارتيا ۇكىمەت ورىندارىنىڭ سايكەسۋىندە نوقاي بورانىنان بىردە-ءبىر باس مال نەمەسە ادام شىعىنعا ۇشىراماي امان-ەسەن ءوتتى» دەي سالاتىنىن قايتەرسىڭ؟! اپ-اشىق تۇرىپ اياق استىنان زاھارىن اسپانعا اتىپ قۇتىرىنعان دولى بوراننىڭ اش ايداعارداي اشۋلى الپەتىن؛ انە سول اشۋلى ايداعاردىڭ اۋىزىنا تىرلىكتەرىنىڭ تىرەگى، الدىنداعى اسى بولعان ءتورت تۇلىكتەرىنىڭ ءتۇسىپ كەتپەۋى ءۇشىن، جان دارمەن جانتالاسقان مالشىلاردىڭ جاپالى شايقاسىن؛ تاجىريبەلى باسشىلاردىڭ جەتەكشىلىگىن؛ امان-ەسەن وتكەننەن كەيىنگى مالشىلاردىڭ پارتيا ۇكىمەتكە دەگەن ريزاشىلدىق كوڭىل-كۇيىن تيۆتەستىرىپ، جاندى اسەرلى جەتكىزىپ بەرۋ ءبىر سىپىراسىنىڭ قولىنان كەلمەيدى.

جاۋاپتى رەداكتور: بەرىك وقاباي ۇلى