ەلى سۇيگەن اعانى ەسكە العاندا ...

  • كەلۋ قاينارى: ىلە گازەتى
  • 04:51:21 01/02/2016

    (ەسسە)

    ءمۇسىلىم ادىربەك ۇلى

 

    1962- جىلى ماۋسىمنىڭ باس شەنى. تەكەس اۋداندىق حالىق كوميتەتىنىڭ كەڭسە مەڭگەرۋشىسى ءادىش مەنى كەڭسەسىنە شاقىرىپ:

    -ىلە وبلىستىق حالىق كوميتەتى كەڭسەسىندەگى ابىلەز شارىپتەن الگىندە عانا تەلەفون الدىم. اۆتونوميالى رايوندىق تىڭ يگەرۋ مەڭگەرمەسىنىڭ باستىعى شارشەبەك سىدىق دەگەن ازامات اۋدانىمىزعا كەلىپ، اۋداننىڭ بيىلعى قىزمەتتەرىنە جەتەكشىلىك ەتەتىن بولىپتى. ول كىسىنىڭ جاتىن ورىن، تاماقتانۋى ءبىزدىڭ مىندەتىمىزگە جۇكتەلدى. سەن اناۋ بوس تۇرعان ەكى اۋىز بولمەنى تازالات، تۇرمىستىق بۇيىمداردىڭ ءبارىن تولىقتات، ەكى ۇلكەن قىزمەت ۇستەلى مەن ورىندىق قويعىز، پوچتا مەكەمەسىنە سويلەسىپ ىشكى بولمەگە تەلەفون تارتقىز،–دەدى.

    -قاشانعا دەيىن بىتىرەمىن، اعاي ؟

    -بۇگىن، ەرتەڭ پىتىرەسىڭ، ەرتەڭ تۇستەن كەيىن ءوزىم بارىپ تەكسەرىپ وتكىزىپ الامىن، بار، جۇگىر!–دەدى كەڭسە مەڭگەرۋشىسى كەلتە قايتارىپ.

    -ماقۇل اعاي، تىرىسىپ كورەيىك،–دەدىم دە شىعىپ كەتتىم.

    ول كەزدە اۋداندا مەيمانحانا بولمايتىن، جوعارىدان قىزمەت بابىمەن كەلگەن ادامدار، مەيلى ول باسشى كادر بولسىن ءوزى تەكسەرمەك بولعان سالانىڭ ءبىر بولمەسىندە جاتاتىن، ال ءبىزدىڭ مىنا دايىندىعىمىز سول كەزدىڭ جاعدايىندا ەڭ جوعارى دايىندىق ەسەپتەلەتىن.

    ايتۋلى كۇنى وبلىستىق حالىق كوميتەتى كەڭسەسىندە ىستەيتىن ابىلەز ءشارىپ اعامىز قاسىندا ياسىن دەيتىن كاتىبى بار شارشەبەك اقساقالدى ەرتىپ كەلىپ، اۋدان اكىمى اكىمجانعا تانىستىردى.

    شارشەبەك اقساقال ول كەزدە قىرىققا ءالى ىلىنە قويماعان، سۇڭعاق بويلى، كەڭ يىقتى، كەسەك تۇلعالى جىگىت ەكەن. تولقىندى قارا شاشىن ارتىنا تىڭ قايىرعان، شوقتاي جايناعان كوزى مەيىرىمدى بەت پىشىنىنە ايبىن بەرىپ، ەرەكشە ءسان قوسقانداي. ماعان تانىسۋ كەزەگى كەلگەندە:

    -اسسالاۋماعالايكۇم، اعاي، سالەمەتسىز بە؟– دەپ قوس قولىمدى ۇسىنا امانداستىم. ويتكەنى، مەن سول قورالانا تۇرىپ تانىسىپ جاتقانداردىڭ ىشىندەگى ەڭ جاسى كىشىسى ەكەنمىن، سول جىلى 23 كە شىققان ەدىم.

جاۋاپتى رەداكتور: گۇلدەن ماقسات قىزى