بەلگرادتا جىر الىبى جامبىلدىڭ ەسكەرتكىشى ورناتىلادى

  • كەلۋ قاينارى: ءتاڭىرتاۋ تورابى
  • 03:14:18 04/03/2016

    ۇلى اقىن جامبىل جابايەۆتىڭ 170 جىلدىق مەرەيتويىنا وراي اقىننىڭ الماتى وبلىسىنداعى ادەبي مۇراجايىنا 175 ميلليون تەڭگەگە، جامبىل اۋىلىنىڭ ورتالىق كوشەلەرىنە 111 ميلليون تەڭگەگە كۇردەلى جوندەۋ مەن 175 ميلليون تەڭگەگە جارىقتاندىرۋ جۇمىستارى جاسالدى، دەپ حابارلايدى وبلىستىق اكىمدىكتىڭ باسپا ءسوز قىزمەتى.

    جامبىل ورتا مەكتەبىنە كۇردەلى جوندەۋ جۇرگىزىلىپ، بازاسى نىعايتىلدى. الداعى ۋاقىتتا جامبىل اۋىلىندا «ونەر» مەكتەبى جانە 140 ورىندىق بالاباقشا اشىلماق. سونىمەن قاتار اقىن مەرەيتويىنا وراي مامىر ايىندا سەربيانىڭ استاناسى بەلگراد قالاسىندا جامبىل جابايەۆتىڭ ەسكەرتكىشى ورناتىلماق. بۇل تۋرالى الماتى وبلىسى جامبىل اۋىلىندا وتكەن 170 جىلدىق مەرەيتوي اياسىندا سويلەگەن سوزىندە الماتى وبلىسىنىڭ اكىمى اماندىق باتالوۆ ايتتى.

    جالپى، جامبىل اۋىلىندا وتكەن بۇل شارا - 170 جىلدىق مەرەيلى تويدىڭ نەگىزگى شاراسى. وسى كۇنى «قازاقستان» ۇلتتىق ارناسى تۇسىرگەن «جامبىل» فيلمىنىڭ كورسەتىلىمى كورەرمەندەرگە ۇسىنىلدى.

    ەسكە سالساق، بۇعان دەيىن مەرەيتوي شىمىلدىعى جازۋشىلار وداعىندا اشىلىپ، «الەمدى جىرى شارلاعان» اتتى ادەبي-سازدى كەشكە ۇلاسقان ەدى. سونداي-اق، وقۋشىلار مەن ستۋدەنتتەردىڭ رەسپۋبليكالىق جاس اقىندار ايتىسى، «ۇلى دالا جىرشىسى» اتتى حالىقارالىق عىلىمي سيمپوزيۋم وتكەن بولاتىن.

جاۋاپتى رەداكتور: بەرىك وقاباي ۇلى