اشۋ - دۇسپان، اقىل - دوس

  • كەلۋ قاينارى: ىلە گازەتى
  • 04:06:12 06/03/2017

    بۇرىن اشۋى جامان ءبىر ۇل بالا بولىپتى، اكەسى وعان ءبىر دوربا شەگە بەرىپ: «ءار رەت اشۋلانعانىڭدا نەمەسە باسقالارمەن ۇرىسىپ قالعانىڭدا اۋلاداعى اعاش شارباققا شەگەدەن ءبىر تالىن قاعىپ تۇر»، - دەپتى. ءبىرىنشى كۇنى بۇل بالا 37 تال شەگە قاعىپ بولىپتى. ول بىرنەشە كۇننەن كەيىن اشۋىن تەجەۋدى ۇيرەنگەندىكتەن ءار كۇنى قاعاتىن شەگەنىڭ سانى بارعان سايىن ازايىپتى، اشۋدى تەجەۋ شەگە قاعۋدان وڭاي بولاتىندىعىن بايقايدى، اقىرى بۇل بالا الباتى اشۋ شاقىرمايتىن بولىپتى، بۇل قۋانىشتى ءىستى اكەسىنە ايتادى.

    اكەسى وعان: «بۇگىننەن باستاپ ءبىر رەت اشۋىڭدى تەجەگەنىڭدە ءبىر تال شەگەنى سۋىرىپ تاستاعايسىڭ»، - دەيدى. كۇندەر ءوتىپ جاتتى، ءبىر كۇنى بالا اكەسىنە قاققان شەگەلەردى اقىرى سۋىرىپ بولعانىن ايتادى، اكەسى ونى اعاش شارباقتىڭ قاسىنا ەرتىپ كەلىپ وعان بىلاي دەپتى: «بالام، سەن جاقسى ىستەپسىڭ، ءبىراق اعاش شارباقتاعى شەگەنىڭ ورنىنا قاراشى بۇل شارباق ماڭگى بۇرىنعى قالپىنا كەلمەيدى. سەن باسقالارمەن ۇرىسىپ قالعاندا قۇلاققا تۇرپىدەي تيەتىن ءسوز ايتساڭ ونىڭ جۇرەگىن جارالايسىڭ، بەينە شەگەنىڭ ورنى سياقتى ءىز قالادى، سەن باسقالاردىڭ جان دۇنيەسىن جارالاساڭ جارا وڭاي – وسپاق قالپىنا كەلمەيدى. مەيلى سەن قالاي كەشىرىم سۇراساڭ دا ونىڭ كوڭىلىندە كىربەڭدىك قالادى. سوندا بارىپ ءتان مەن جۇرەككە تۇسكەن سىزاتتىڭ ءبارى وڭاي – وسپاق قالپىنا كەلە بەرمەيتىندىگىن بىلەسىڭ.

    دوسىڭ سەنىڭ اسىل بايلىعىڭ، ولارمەن اعىنان اقتارىلا اڭگىمەلەسسەڭ ەڭسەڭ كوتەرىلىپ قالادى، ولار قاي – قاشان دا سەنىڭ قايعى – قاسىرەتىڭە ورتاق بولادى. سەن ولارعا ءزارۋ بولعاندا ولار سەنىڭ كوڭىلىڭە بۇككەن تۇيىنشەگىڭدى شەشۋگە قولداۋ كورسەتەدى.

    استە، باسقالاردىڭ بوس قيالىن سايقى مازاق ەتپە، وڭاي – وسپاق باسقالارعا باعا بەرمە، ءسوزىڭ سالماقتى، ويىڭ ورامدى بولسىن. تەلەفوندا سويلەسكەنىڭدە سەنىڭ كۇلىمسىرەگەنىڭدى قارسى جاعىڭ سەزە الاتىن بولسىن.

    دوسىڭ جاڭبىردا ساعان قول شاتىرىن ۇستاپ بىرگە سەرۋەندەۋى، سەنىمەن بىرگە تەڭىز جاعاسىنا بارىپ قايراننان بالا جاساۋى، سەنىمەن بىرگە قيالعا شومۋى كەرەك، قىسقاسى، دوسىڭ سەن قايعى – قاسىرەتكە جولىقساڭ سەنىمەن بىرگە كوز جاسىن كولدەتە ءبىلۋى، قۋانىشتى ىستە سەنىمەن بىرگە قۋانا ءبىلۋى كەرەك...

    دوسىڭ سەنى ۇنەمى ىزدەپ تۇرۋى ەكىتالاي، ءبىراق سەنى ۇمىتىپ كەتپەيدى، دوسىڭنىڭ سونشالىقتى مەيىرىمدى، شىنايى، سىپايى ەكەنىن اندا – ساندا ەسىڭە الىپ ساعىناسىڭ. دوسىڭ سەنىڭ كوڭىلىڭدە، كوز الدىڭدا ءجۇرۋى، دوسىڭ سەنىمەن قول ۇستاسا سەرىك بولىپ، قيىنشىلىقتاردى بىرگە باستان كەشىرۋى كەرەك. ءتىپتى، ساعان قۋانىش، سۇيىسپەنشىلىك سيلاي ءبىلۋى كەرەك.

    دوسىڭ كۇن نۇرى سياقتى، ول باردا گۇلدەي قۇلپىراسىڭ، دوسىڭ باردا بارلىعىنا قول جەتكىزە الاسىڭ، ءبىز كوپ نارسەدەن كوز جازىپ قالامىز، ءبىراق دوستان ايىرىلماۋىمىز ءتيىس. مۇمكىن، دوسىڭمەن ماڭگىلىك بىرگە بولا المايتىن شىعارسىڭ، دوسىڭ سەنىڭ عۇمىرىڭنىڭ ءمالىم ءبىر مەزگىلىندەگى جولاۋشى سياقتى بولار، الايدا ول بار بولسا ءومىرىڭ نۇرلانىپ كەتەدى، دوسىڭنىڭ سۇيىسپەنشىلىگى جان دۇنيەڭدى تەربەيدى. بۇرىن ءبىز سىزبەن دوس بولعانبىز، كوردىڭىز بە؟ مەن ىشتەي ساعان باقىت تىلەيمىن، سەن مەنىڭ ەڭ جاقسى دوسىمسىڭ!

 ماقالانى حانزۋشادان اۋدارعان : بەيسەنالى جانداۋلەت ۇلى

جاۋاپتى رەداكتور: جازيرا بولاتباي قىزى